3 Nephi 20–26

Kinatibuk-ang Pagpasabot

Atol sa pagpangalagad sa Manluluwas taliwala sa mga Nephite, Siya mipahayag nga ang Langitnong Amahan mohinumdom sa Iyang pakigsaad sa pagpundok sa nagkatibulaag nga Israel, ug Siya mipadayag og mga timailhan aron sa pagtabang kanato nga makaila sa higayon nga nagsugod na ang pagpundok sa ulahing mga adlaw. Iyang gihatagan og gibug-aton ang kaimportante sa pagtipig ug pagtuon sa mga kasulatan ug sa mga pulong sa mga propeta. Migamit Siya sa mga pulong ni Malaquias sa pagtudlo sa mga Nephite mahitungod sa balaod sa ikapulo ug sa mga panalangin sa pagpuyo niini nga sugo. Mikutlo usab siya og mensahe nga Iyang orihinal nga gipakigbahin kang Malaquias nga naglakip sa pagbalik ni Elias ug sa iyang importante nga tahas sa buhat sa templo ug kasaysayan sa pamilya.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

3 Nephi 20–22

Katuyoan sa leksiyon: Kini nga leksiyon makatabang sa mga estudyante nga moapil sa pagpundok sa Israel.

• Pagpangandam sa estudyante: Dapita ang mga estudyante sa paghunahuna atol sa ilang adlaw-adlaw nga pagbasa sa kasulatan kon sa unsang paagi ang Basahon ni Mormon nakatabang kanila nga mas maduol kang Jesukristo.

• Mga butang: Usa ka pundok sa mga tirungan o mga toothpick; usa ka labi ka baga nga piraso sa kahoy ug usa ka lansang o lain pang piraso sa metal

• Sugyot sa pagtudlo pinaagi sa videoconference: Ikonsiderar ang pagpakita sa pagpares nga kalihokan ug hatagi og panahon ang mga estudyante sa pagbasa sa mga bersikulo. Dayon dapita ang mga estudyante nga magpuli-puli gamit ang drawing nga feature aron ipares ang matag hugpong sa mga bersikulo ngadto sa deskripsyon niini. O dapita ang mga estudyante sa pagsulat sa husto nga mga tubag gamit ang chat feature.

3 Nephi 23

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagtuon sa mga pulong sa Ginoo nga mas makugihon.

• Pagpangandam sa estudyante: Dapita ang mga estudyante nga mogahin og panahon sa pagtuon sa mga kasulatan sa wala pa kini nga leksiyon, maghatag og partikular nga pagtagad sa unsay ilang gibuhat nga naghimo sa ilang pagtuon nga mas makahuloganon. Dasiga sila sa pagtimbang-timbang sa bili ug kalidad sa ilang pagtuon ug sa epekto nga gihatag o nga wala nahatag sa ilang mga kinabuhi.

• Mga butang: Lain-laing mga butang nga itago sa tibuok lawak

• Hulagway: Usa ka hulagway sa Manluluwas nga nangayo kang Nephi sa mga rekord

• Sugyot sa pagtudlo pinaagi sa videoconference: Sa pagsugod sa leksiyon, ikonsiderar ang pagpakita sa usa ka mubo nga listahan sa mga butang nga kinahanglan pangitaon sa mga estudyante sa ilang lawak o sa ilang balay. Kini mahimong maglakip sa usa ka telepono, libro, litrato, tasa, unlan, sapatos, o uban pang mga sinulagma nga mga butang nga mahimo nilang makita. Hatagi ang mga estudyante og usa ka gitakda nga gidugayon sa panahon (pananglitan, usa ka minuto), ug hangyoa sila sa pagpangita og daghang mga butang kutob sa ilang mahimo. Dayon ipangutana ang mga pangutana nga gilista sa sinugdanan sa leksiyon, sugod sa “Unsay buot ipasabot sa pagpangita?”

3 Nephi 24

Katuyoan sa leksiyon: Kini nga leksiyon gituyo aron matabangan ang mga estudyante nga mobati og tinguha sa pagbayad sa ikapulo.

• Pagpangandam sa estudyante: Dapita ang mga estudyante sa pagbasa sa 3 Nephi 24:8–10 ug sa paghunahuna sa mga kasinatian nga sila o ang uban aduna bahin sa balaod sa Ginoo sa ikapulo.

• Materyal alang sa mga estudyante: Mga kopya sa seksion nga “Leksiyon Numero 1—Importante apan Dili Dayon Makita nga mga Panalangin” sa David A. Bednar, “Ang mga Tamboanan sa Langit,” Liahona, Nob. 2013, 17–19

• Sugyot sa pagtudlo pinaagi sa videoconference: Ikonsiderar ang pagpakita sa mga senaryo nga nalista sa sinugdanan sa leksiyon samtang mangutana ka kon hain ang gibati sa mga estudyante nga labing angay kanila ug ngano. Dayon dapita ang mga estudyante sa paggamit sa chat sa pagpakigbahin sa mga pangutana o mga kabalaka nga aduna sila mahitungod sa ikapulo.

3 Nephi 25

Katuyoan sa leksiyon: Kini nga leksiyon gituyo aron sa pagtabang sa mga estudyante sa pag-apil sa kasaysayan sa pamilya ug sa buhat sa templo.

• Pagpangandam sa estudyante: Dapita ang mga estudyante sa pagpangandam sa pagpakigbahin sa usa ka indibidwal nga ilang nahibaloan diha sa kasaysayan sa ilang pamilya, buhi man o patay. Mahimong mapuslanon alang sa mga estudyante nga makig-istorya sa usa ka ginikanan o apohan o gamiton ang FamilySearch nga app.

• Handout: Usa ka upat nga henerasyon nga tsart sa pedigree

• Bidyo: “The Promised Blessings of Family History 2” (4:04)

• Sugyot sa pagtudlo pinaagi sa videoconference: Imbes nga ipanghatag ang upat ka henerasyon nga tsart sa pedigree isip usa ka handout, ikonsiderar ang pagpakita niini sa mga estudyante aron kopyahon. Human ang mga estudyante adunay oportunidad sa pagpakigbahin mahitungod sa usa ka tawo sa kasaysayan sa ilang pamilya, ikonsiderar ang pagdapit og usa ka estudyante sa pag-log in sa FamilySearch.org, pagpakigbahin sa iyang screen, ug pagpakita sa upat ka henerasyon.

Rebyo 21 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante sa pagpalawom sa ilang pagsabot ug makapasabot sa mga kamatuoran gikan sa usa o sa daghan pa sa mga tudling sa doktrinal nga kahanas gikan sa Basahon ni Mormon.

• Pagpangandam sa estudyante: Dapita ang mga estudyante sa pagtambong nga andam nga mopakigbahin og listahan sa ilang gipangbuhat aron mas masabtan ang mga kasulatan sa ilang pagtuon.

• Sugyot sa pagtudlo pinaagi sa videoconference: Ikonsiderar ang pagkontak sa pipila ka mga estudyante sa wala pa ang klase ug hangyoa sila sa pag-andam sa pagpakigbahin sa usa ka talento o sa paghisgot mahitungod sa usa ka dapit diin sila adunay dakong pagsabot. Hangyoa sila sa pagpasabot kon giunsa nila pag-angkon ang ilang pagsabot ug mga abilidad. Pangutana kon unsay ilang mahimo aron sa pagpadayon sa pag-uswag sa niining mga dapita. Sugdi ang klase pinaagi sa pagdapit kanila sa pagpakigbahin.