Rebyo 21 sa Doktrinal nga Kahanas

Sabta ug Ipasabot

Ang usa ka katuyoan sa doktrinal nga kahanas mao ang pagtabang kanimo nga masabtan ang mga kamatuoran sa ebanghelyo sa Manluluwas ug mapasabot kini sa imong kaugalingong mga pulong. Kini nga leksiyon maghatag kanimo og kahigayonan sa pagpalawom sa imong panabot ug sa pagpasabot sa mga kamatuoran gikan sa usa o sa daghan pa sa mga tudling sa doktrinal nga kahanas gikan sa Basahon ni Mormon.

Pagpangandam sa estudyante: Dapita ang mga estudyante sa pagtambong nga andam nga mopakigbahin og listahan sa ilang gipangbuhat aron mas masabtan ang mga kasulatan sa ilang pagtuon.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Pagsabot sa mga kasulatan

Isippuli sa kalihokan sa ubos, ikonsiderar ang pag-ila sa mga dapit diin adunay dakong pagsabot o talento ang imong mga estudyante. Hangyoa sila sa pagpasabot kon unsay ilang gihimo aron sa pagpalambo niini nga mga abilidad. Pangutan-a kon unsa ang ilang mahimo aron padayong mouswag niadtong mga dapita.

Tan-awa ang mosunod nga mga hulagway:

• Unsa ang gikinahanglan alang sa usa ka batang magdudula sa soccer aron mahimong usa ka propesyonal?

• Sa unsang paagi kini nga proseso may kalabotan sa atong abilidad sa pagsabot sa mga kasulatan?

Si Elder D. Todd Christofferson sa Korum sa Napulog Duha ka Apostoles mitudlo:

Aron ang ebanghelyo mahisulat sa inyong kasingkasing, kinahanglan mong masayod unsa kini ug motubo sa pagsabot niini sa mas hingpit nga paagi. Nagpasabot kana nga kinahanglan kini ninyong tun-an. Sa pagsulti ko nga “tun-an,” nagpasabot ko nga labaw pa kay sa pagbasa lang. (D. Todd Christofferson, “Kon Makabig Na Kamo,” Liahona, Mayo 2004, 11)

• Sa unsang paagi ang imong pagsabot sa ebanghelyo mitubo sa tibuok mong kinabuhi? Sa unsang paagi nakatabang ang pagtuon sa mga kasulatan?

  Tabangi ang mga estudyante nga makasabot nga normal lang nga dili masabtan ang tanan diha sa mga kasulatan sa sinugdanan. Mahimo nimong idirekta sila sa tudling sa doktrinal nga kahanas sa 2 Nephi 28:30 isip kabahin niini nga panaghisgotan. Kini mahimong usa ka maayong dapit sa pag-follow up sa kalihokan sa pagpangandam.

• Unsa ang pipila ka pamaagi sa pagtuon nga imong gigamit sa pagpalawom sa imong pagsabot sa usa ka tudling sa kasulatan o hilisgotan sa ebanghelyo?

Aron makakita og mga ehemplo sa pamaagi sa pagtuon, ikonsiderar ang pagtan-aw sa “Advice for Studying the Scriptures” (2:06) gikan ni Elder David A. Bednar sa Korum sa Napulog Duha ka Apostoles.

Bisan og pamilyar ka sa pipila sa mga tudling sa doktrinal nga kahanas ug sa doktrina nga gitudlo niini, ang Manluluwas nagtinguha nga ang imong pagsabot magpadayon sa pagtubo. Nagkinahanglan kini og paningkamot sa imong bahin. Niini nga leksiyon, makabaton ka og kahigayonan nga ipraktis ang mga kahanas sa pagtuon sa kasulatan nga makatabang nga madugangan ang imong pagsabot sa mga tudling sa doktrinal nga kahanas.

Mga kahanas sa pagtuon sa kasulatan

Daklit nga irebyo ang mosunod nga mga tudling sa doktrinal nga kahanas ug ang mahinungdanong nga hugpong sa mga pulong sa kasulatan.

Ikonsiderar ang pagpakunhod sa mosunod nga tsart ngadto sa pipila ka mga tudling nga paminaw nimo labing gikinahanglan sa mga estudyante nga tun-an. Mahimong irebyo sa mga estudyante ang mga tudling nga nag-inusara, may pares, o isip usa ka klase.

Doktrinal nga Kahanas sa Basahon ni Mormon: Alma–Moroni

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan Alma 7:11–13	Mahinungdanon nga Hugpong sa mga Pulong sa Kasulatan “Ug siya magpadayon, mag-antos sa mga sakit ug mga kasakit ug mga pagtintal sa matag matang.”
Pakisayran sa Kasulatan Alma 34:9–10	Mahinungdanon nga Hugpong sa mga Pulong sa Kasulatan “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”
Pakisayran sa Kasulatan Alma 39:9	Mahinungdanon nga Hugpong sa mga Pulong sa Kasulatan “Ayaw na pagsunod sa mga tinguha nga daotan sa imong mga mata.”
Pakisayran sa Kasulatan Alma 41:10	Mahinungdanon nga Hugpong sa mga Pulong sa Kasulatan “Ang pagkadaotan dili mahitabo nga kalipay.”
Pakisayran sa Kasulatan Helaman 5:12	Mahinungdanon nga Hugpong sa mga Pulong sa Kasulatan “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukoranan.”
Pakisayran sa Kasulatan 3 Nephi 11:10–11	Mahinungdanon nga Hugpong sa mga Pulong sa Kasulatan “Ako mituman sa kabubut-on sa Amahan sa tanan nga mga butang gikan sa sinugdanan.”
Pakisayran sa Kasulatan 3 Nephi 12:48	Mahinungdanon nga Hugpong sa mga Pulong sa Kasulatan “[Pagmahingpit] sama nga Ako ingon, o ang inyong Amahan kinsa anaa sa langit hingpit.”
Pakisayran sa Kasulatan 3 Nephi 27:20	Mahinungdanon nga Hugpong sa mga Pulong sa Kasulatan “Duol ngari kanako ug magpabunyag … aron kamo mahimo nga pagasantoson pinaagi sa pagdawat sa Espiritu Santo.”
Pakisayran sa Kasulatan Ether 12:6	Mahinungdanon nga Hugpong sa mga Pulong sa Kasulatan “Kamo dili makadawat og saksi hangtod human sa pagsulay sa inyong hugot nga pagtuo.”
Pakisayran sa Kasulatan Ether 12:27	Mahinungdanon nga Hugpong sa mga Pulong sa Kasulatan “Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila.”
Pakisayran sa Kasulatan Moroni 7:45–48	Mahinungdanon nga Hugpong sa mga Pulong sa Kasulatan “Ang gugma nga putli mao ang tiunay nga gugma ni Kristo.”
Pakisayran sa Kasulatan Moroni 10:4–5	Mahinungdanon nga Hugpong sa mga Pulong sa Kasulatan “Mangutana sa kinasingkasing, uban sa tinuod nga katuyoan nga may hugot nga pagtuo kang Kristo … [ug] pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

© 2024 by Intellectual Reserve, Inc. All rights reserved.

Ikonsiderar ang pagbahin sa klase ngadto sa ginagmay nga mga grupo aron kompletohon ang mosunod nga kalihokan. Kon ang mga estudyante makabenepisyo gikan sa usa ka pananglitan, ikonsiderar ang pagpakita og pananglitan sa usa o sa sobra pa sa usa sa mosunod nga kahanas sa pagtuon gamit ang tudling sa doktrinal nga kahanas. Mahimo usab nimo pulihan ang usa sa mga kahanas nga nalista sa ubos sa lain nga imong pilion.

Pagpili og usa sa mga tudling sa kasulatan sa doktrinal nga kahanas niini nga tsart nga gusto nimong mas masabtan. Dayon paggamit og usa o sobra pa sa usa sa mosunod nga mga kahanas sa pagtuon sa kasulatan aron matabangan ang imong pagsabot nianang maong tudling nga molambo. Mahimong andam sa pagpasabot ngadto sa uban sa kasulatan nga imong napili.

Kalihokan A: Pag-cross-reference

Gamita ang mga footnote sa kasulatan, ang Giya ngadto sa mga Kasulatan o uban pang mga kapanguhaan aron makakaplag og dugang nga mga kasulatan nga makadugang sa imong pagsabot sa usa ka tudling. Ikonsiderar ang pagsulat sa cross-reference diha sa imong mga kasulatan duol sa tudling sa doktrinal nga kahanas o pag-link niini sa imong Gospel Library nga app. Isulat diha sa imong journal sa pagtuon o sa Gospel Library nga app ang mga cross-reference nga imong napili ug ang pagsabot nga imong naangkon bahin sa tudling sa doktrinal nga kahanas gikan sa pagtuon niini nga paagi.

Kalihokan B. Ihatag ang kahulogan sa mga pulong ug sa hugpong sa mga pulong

Pangita og mga pulong sa tudling sa doktrinal nga kahanas nga gusto nimong mas masabtan og maayo. Pangitaa ang mga kahulogan niadtong mga pulong o mga hugpong sa mga pulong sa anaa nga mga kapanguhaan, sama sa Giya ngadto sa mga Kasulatan o kinatibuk-ang diksyonaryo. Irekord diha sa imong journal sa pagtuon, sa mga margin sa kasulatan, o sa Librarya sa Ebanghelyo nga app ang mga kahulogan nga imong nakaplagan, kauban sa bisan unsang bag-ong panabot mahitungod sa tudling sa doktrinal nga kahanas.

Kalihokan C: Pagsabot sa konteksto ug sulod

Aron masabtan ang konteksto ug sulod sa usa ka tudling, basaha ang ulohan sa kapitulo ug ang naglibot nga mga bersikulo sa tudling nga imong gitun-an. Paninguhaa nga masabtan kon kinsa ang nagsulti ug kon ngano. Pangita og mga timailhan aron masabtan ang sitwasyon o background sa mga bersikulo ug ang unod nga mensahe nga gipaningkamotan nga ipahayag sa tagsulat. Irekord kon unsa ang imong mas nasabtan mahitungod sa tudling tungod sa unsay imong gipamalandong.

Kon itugot sa panahon, sulayi paggamit ang lain nga kahanas sa usa sa ubang mga tudling.

Human sa igong panahon, dapita ang mga estudyante sa pagpasabot ngadto sa mga estudyante sa laing grupo sa ilang kahanas sa pagtuon sa kasulatan ug kon unsa ang ilang mas nasabtan mahitungod sa ilang tudling sa doktrinal nga kahanas tungod niini. Ikonsiderar ang pagdapit og pipila ka mga estudyante sa pagpasabot sa ilang tudling ngadto sa tibuok klase.

Pahinumdomi ang mga estudyante nga ang Ginoo motabang kanila nga masabtan ang mga kasulatan pinaagi sa Espiritu Santo. Ikonsiderar ang pagpamatuod sa kaimportante sa pagtinguha sa panabang sa Ginoo samtang sila nagtuon.