3 Nephi 27–4 Nephi 1

Kinatibuk-ang Pagpasabot

Si Jesukristo mitudlo sa Iyang mga tinun-an nga Nephite nga ang Iyang Simbahan kinahanglang pagatawgon sunod sa Iyang ngalan ug itukod diha sa Iyang ebanghelyo. Siya mipasabot sa mahinungdanong mga panalangin nga anaa niadtong mosunod sa Iyang ebanghelyo, lakip ang pagbalaan pinaagi sa Espiritu Santo. Tulo sa mga tinun-an sa mga Nephite ang nagtinguha nga magpabilin sa yuta ug modala og mga kalag ngadto kang Jesukristo hangtod sa Iyang Ikaduhang Pag-anhi, ug kini nga tinguha gihatag. Ang katawhan naimpluwensiyahan pag-ayo sa pagpangalagad sa Manluluwas diha kanila, ug sila nagpuyo sa pagkamatarong sulod sa dul-an sa 200 ka tuig.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

3 Nephi 27, Bahin 1

Katuyoan sa leksiyon: Kini nga leksiyon makatabang sa mga estudyante nga makasabot kon unsa ang ebanghelyo sa Manluluwas ug ang kamahinungdanon sa ngalan sa Simbahan.

• Pagpangandam sa estudyante: Mahimo nimong dapiton ang mga estudyante sa pagbasa sa 3 Nephi 27:1–10 ug sa pagdiskobre kon unsa ang gitudlo sa Manluluwas sa Iyang mga tinun-an nga mga Nephite mahitungod sa Iyang Simbahan.

• Bidyo: “Ang Sakto nga Ngalan sa Simbahan” (15:43; tan-awa gikan sa time code 3:26 hangtod sa 4:45)

• Litrato: Usa ka linya nga drowing sa simbahan

• Sugyot sa pagtudlo pinaagi sa videoconference: Sa padulong na sa kataposan sa leksiyon, gidapit ang mga estudyante sa pagdrowing og hulagway sa usa ka simbahan ug sa paglista og mga kamatuoran mahitungod sa ebanghelyo sa Manluluwas ubos niini. Mahimo nimong ipakita ang simbahan diha sa imong screen ug gamiton ang annotate feature aron tugotan ang mga estudyante sa pagdugang sa ilang mga panabot niini.

3 Nephi 27, Bahin 2

Katuyoan sa leksiyon: Kini nga leksiyon makatabang sa mga estudyante nga makadawat sa makabalaan nga gahom sa Manluluwas samtang sila naningkamot sa pagsunod sa Iyang ebanghelyo.

• Pagpangandam sa estudyante: Dapita ang mga estudyante sa paghisgot ngadto sa uban kon sa unsang paagi ang Espiritu Santo nakatabang kanila nga mahimong balaan, o mas mahisama sa Manluluwas.

• Bidyo: “Paghinumdom kang Kinsa Kita Mosalig” (10:25; tan-awa gikan sa time code 0:00 hangtod sa 2:09)

• Sulod nga ipakita: Mga paagi nga mahimong magamit sa mga estudyante ang mga kamatuoran nga ilang gitun-an diha sa ilang mga kinabuhi (gilista sa kataposan sa leksiyon)

• Sugyot sa pagtudlo pinaagi sa videoconference: Ikonsiderar ang pagdapit sa mga estudyante nga gamiton ang chat nga feature aron motubag sa pangutana nga “Unsa ang pipila ka mga paagi nga mahimo natong dapiton ang padayon nga pakig-uban sa Espiritu Santo aron kita kanunay nga mapanalanginan sa Iyang makabalaan nga impluwensiya?” Kini makatabang kanimo sa dali nga pagmugna og usa ka listahan sa mga ideya nga makatabang sa mga estudyante.

Doktrinal nga Kahanas: 3 Nephi 27:20

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa 3 Nephi 27:20, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Ikonsiderar ang pagdapit sa mga estudyante sa pagsugod sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan alang sa 3 Nephi 27:20: “Duol ngari kanako ug magpabunyag …, aron kamo pagasantoson pinaagi sa pagdawat sa Espiritu Santo.”

• Sugyot sa pagtudlo pinaagi sa videoconference: Ikonsiderar ang pagpakita sa Doktrinal nga Kahanas nga app aron sa pagtabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong.

3 Nephi 28

Katuyoan sa leksiyon: Kini nga leksiyon gituyo aron matabangan ang mga estudyante nga mobati og dugang nga tinguha sa pagdala sa uban ngadto kang Jesukristo.

• Pagpangandam sa estudyante: Dapita ang mga estudyante sa paghunahuna sa mga kasinatian nga ilang nasinati sa pagpakigbahin sa ebanghelyo ug sa unsay nakatabang kanila sa pagtinguha sa pagbuhat sa ilang gibuhat.

• Sulod nga ipakita: Mga pangutana sa pagsukod sa kaugalingon duol sa sinugdanan sa leksiyon; mga pakisayran sa kasulatan alang sa kalihokan sa pagtuon duol sa kataposan sa leksiyon

• Mga Bidyo: “Your Day for a Mission” (3:31); “By Small and Simple Things: Sharing the Gospel” (3:19)

4 Nephi

Katuyoan sa leksiyon: Kini nga leksiyon makatabang sa mga estudyante nga mobati og mas dakong gugma alang sa Langitnong Amahan ug kang Jesukristo aron sila mahimong mas lawom nga makabig ngadto Kanila.

• Pagpangandam sa estudyante: Ikonsiderar ang pagdapit sa mga estudyante sa pagtuon sa kahulogan sa pulong nga pagkakabig sa magamit nga mga kapanguhaan sa Simbahan. Sa laing paagi, mahimo nimong dapiton ang mga estudyante sa pagpangutana sa usa ka tawo nga ilang kaila kon unsay kahulogan sa pagkakabig ngadto kang Kristo alang kanila.

• Bidyo: “Ang Labing Dako nga Katigayonan” (12:44; tan-awa gikan sa time code 7:02 hangtod sa 8:19)

• Sugyot sa pagtudlo pinaagi sa videoconference: Kon mopili ka sa pagbasa sa 4 Nephi 1:2–18 isip usa ka klase, mahimo nimong ibutang ang imong screen sa gallery view aron makita nimo ang tibuok nga klase. Human mabasa sa usa ka estudyante ang usa ka bersikulo, dapita siya sa pagtudlo sa usa ka partikular nga direksiyon. Dayon hangyoa ang estudyante nga makita sa kana nga direksiyon sa imong screen nga mobasa sa sunod nga bersikulo. Ang mga estudyante nga dili komportable sa pagbasa kinahanglang tugotan nga mobalibad.