Doktrinal nga Kahanas: 3 Nephi 27:20

“Duol ngari Kanako ug Magpabunyag … aron Kamo Mahimo nga Pagasantoson pinaagi sa Pagdawat sa Espiritu Santo.”

Sa imong pagtuon sa 3 Nephi 27, imong nakat-onan ang mahitungod sa pagbalaan nga imong masinati gikan sa Espiritu Santo samtang imong gipuy-an ang ebanghelyo sa Manluluwas. Kini nga leksiyon makatabang kanimo sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa 3 Nephi 27:20, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Pagtabang sa mga estudyante sa pagpalambo sa abilidad sa paghisgot sa mga pagtuo sa ebanghelyo ngadto sa uban. Ang pagsabot sa mga estudyante madugangan kon sila mopasabot sa ebanghelyo sa usag usa. Pagmugna og palibot diin ang mga estudyante komportable nga mopakigbahin sa ilang panabot sa mga kamatuoran sa ebanghelyo.

Pagpangandam sa estudyante: Ikonsiderar ang pagdapit sa mga estudyante sa pagsugod sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan alang sa 3 Nephi 27:20: “Duol ngari kanako ug magpabunyag …, aron kamo pagasantoson pinaagi sa pagdawat sa Espiritu Santo.”

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “3 Nephi 27, Bahin 2,” nga mao ang leksiyon sa konteksto alang sa tudling sa doktrinal nga kahanas 3 Nephi 27:20. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Gikan sa imong pagtuon sa 3 Nephi 27:20, imong nakat-onan ang mosunod nga kamatuoran: Kon kita maghinulsol, moduol kang Jesukristo, ug magpabunyag, niana kita mabalaan pinaagi sa pagdawat sa Espiritu Santo ug mobarog nga walay lama atubangan sa Manluluwas sa kataposan nga adlaw.

Handurawa nga aduna kay kahigayonan sa pagtudlo niini nga kamatuoran ngadto sa usa ka bata.

Sa dili pa dapiton ang mga estudyante sa pagtubag sa mosunod nga pangutana sa makusog nga tingog, ikonsiderar ang pagdapit kanila sa pagsulat sa ilang pagpasabot diha sa ilang journal sa pagtuon. Mahimo dayon nimong dapiton ang mga estudyante sa pagpakigbahin kon unsa ang ilang gisulat ngadto sa ka pares o sa gamay nga grupo.

• Unsaon man nimo sa pagpasabot niini nga kamatuoran ngadto sa usa ka bata sa paagi nga siya makasabot?

Pagpraktis sa pagsag-ulo sa mahinungdanon nga hugpong sa mga pulong sa kasulatan alang sa 3 Nephi 27:20: “Duol ngari kanako ug magpabunyag … , aron kamo pagasantoson pinaagi sa pagdawat sa Espiritu Santo.”

Bahina ang pakisayran sa kasulatan ug ang mahinungdanon nga hugpong sa mga pulong ngadto sa mosunod nga mga hugna. Bansaya ang pagsulti sa matag hugna gikan sa panumdoman sa makadaghang higayon. Pagkahuman tipona ang mga hugna ug isulti gikan sa panumdoman ang tibuok nga pakisayran ug ang mahinungdanon nga hugpong sa mga pulong.

Aron makadugang og kalainan, mahimo nimong hangyoon ang lain-laing mga estudyante o grupo sa mga estudyante sa pagsag-ulo sa usa sa mosunod nga mga hugna. Itudlo ang usa ka estudyante o grupo ug ipasulti ang ilang na-assign nga hugna. Ipadayon kini hangtod nga masulti og balik ang tibuok nga pakisayran sa kasulatan ug ang mahinungdanon nga hugpong sa mga pulong. Mahimo dayon kang mag-assign og lahi nga hugna ngadto sa matag estudyante o grupo ug sublion kini nga kalihokan.

• 3 Nephi 27:20

• Duol ngari kanako

• ug magpabunyag

• aron kamo mahimo nga pagasantoson

• pinaagi sa pagdawat sa Espiritu Santo

Pagbansay sa paggamit

Aron sa pagtabang kanimo sa pagrebyo, ilista sulod sa 30 ka segundo ang tanan nga imong mahinumdoman mahitungod sa usa sa mga baroganan sa pag-angkon og espirituhanong kahibalo. Dayon buhata ang sama gihapon sa laing duha ka baroganan. Kon ikaw nagkinahanglan og tabang sa paghinumdom sa mga baroganan, mahimo nimong tan-awon ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

Ang laing kapilian sa pagrebyo sa mga baroganan sa pag-angkon og espirituhanong kahibalo mao ang pagbahin sa klase ngadto sa tulo ka grupo ug paghatag sa matag grupo og usa ka baroganan nga rebyohon. Ang usa ka estudyante gikan sa matag grupo mahimong mosulat diha sa pisara kon unsa ang nahinumdoman sa iyang grupo mahitungod sa ilang na-assign nga baroganan.

Kon mahuman na ang mga estudyante sa pagrebyo sa na-assign kanila nga baroganan, ipakigbahin ang mosunod nga sitwasyon ngadto sa klase. Mahimo nimong ipakita ang senaryo aron ang mga estudyante makakita niini sa tibuok leksiyon.

Ikaw ug ang imong higala nga si Meagan naghisgot bahin sa ebanghelyo pagpadulong na pauli gikan sa eskwelahan. Si Meagan nangutana, “Nakulbaan ka ba bahin sa pagpakigkita pag-usab sa Dios? Naningkamot ko sa pagpakabuhi nga matarong ug sa paghinulsol kon ako masayop, apan ang hunahuna sa pagbarog sa atubangan sa Dios aron pagahukman nakapahadlok kanako.”

Dapita ang mga estudyante sa paghisgot kon sa unsang paagi nila magamit ang mga baroganan sa pag-angkon og espirituhanong kahibalo ug ang doktrina nga gitudlo sa 3 Nephi 27:20 aron matabangan si Meagan sa iyang kabalaka.

Mahimo nimong ikonsiderar ang pagsugod sa diskusyon pinaagi sa paghangyo sa mga estudyante sa pagpakigbahin kon hain kaha sa mga baroganan ang ilang sugdan ug kon sa unsang paagi kana nga baroganan mahimong makatabang. Dayon padayon sa paghisgot sa ubang mga baroganan sa pag-angkon og espirituhanong kahibalo hangtod nga inyong mahisgotan kon sa unsang paagi kining tulo ka mga baroganan makatabang sa mga kabalaka sama sa kang Meagan.

Kon gikinahanglan, gamita ang mosunod nga mga pangutana isip kabahin sa inyong diskusyon. Dili nimo kinahanglan nga gamiton kining tanan nga mga pangutana, ug mahimo nimo kini ipangutana sa han-ay nga labing makatabang.

Susiha ang mga Konsepto ug mga Pangutana inubanan sa Mahangtorong Panglantaw

• Unsa kaha ang pipila ka sayop nga mga pangagpas ni Meagan mahitungod sa Langitnong Amahan o sa Iyang plano?

• Unsa ang pipila ka mga kamatuoran nga gusto nimong masabtan ni Meagan mahitungod sa Langitnong Amahan ug sa Iyang plano?

Tinguhaa ang Dugang nga Panabot pinaagi sa Balaanong Gitudlo nga mga Tinubdan

• Unsa ang pipila ka mga pagtulun-an gikan sa 3 Nephi 27:20 nga makatabang niini nga sitwasyon?

• Unsa ang ubang mga kasulatan o mga pamahayag gikan sa mga lider sa Simbahan nga mahimong makatabang?

Lihokon inubanan sa Hugot nga Pagtuo

• Unsa nga mga lihok ang mahimong buhaton ni Meagan aron makatabang kaniya nga mobati nga mas malinawon sa iyang kabalaka? Ngano sa imong hunahuna nga kini nga mga lihok mahimong makatabang?

Rebyo sa doktrinal nga kahanas

Ang mosunod nga kalihokan mahimong gamiton sa umaabot nga leksiyon aron sa pagtabang sa mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan alang sa 3 Nephi 27:20. Kini nga kalihokan mahimong buhaton isip usa ka klase, sa ginagmay nga mga grupo, o sa mga paresan.

Dapita ang mga estudyante sa pagsulat diha sa usa ka piraso sa papel ang pakisayran sa kasulatan ug ang mahinungdanon nga hugpong sa mga pulong sa 3 Nephi 27:20 ug isulti sa makusog gikan sa panumdoman ang pakisayran ug ang mahinungdanon nga hugpong sa mga pulong sa makatulo ka higayon. Hangyoa sila sa paggunting sa mga pulong aron magkabulag ug isagol kini. Dayon ipahan-ay sa mga estudyante ang mga pulong sa tukma nga pagkasunod-sunod.