3 Nephi 27, Bahin 1

“Natukod diha sa Akong Ebanghelyo”

Unsa ang pipila sa labing importante nga mga kinaiya sa Simbahan sa Manluluwas? Si Jesukristo mitudlo sa Iyang mga tinun-an nga Nephite nga ang Iyang Simbahan kinahanglang pagatawgon sunod sa Iyang ngalan ug itukod diha sa Iyang ebanghelyo. Kini nga leksiyon makatabang kanimo nga makasabot kon unsa ang ebanghelyo sa Manluluwas ug ang kamahinungdanon sa ngalan sa Simbahan.

Andama ang imong kaugalingon nga mahimong instrumento sa Espiritu Santo.Ang Ginoo mitudlo, “ug kon kamo dili makadawat sa Espiritu kamo dili angayang motudlo” (Doktrina ug mga Pakigsaad 42:14). Samtang maningkamot ka sa pagsunod sa ehemplo sa Manluluwas sa pagkamasulundon ug sa pagsunod sa ebanghelyo sa tibuok nimong kasingkasing, ang Espiritu motabang kanimo sa pagtudlo sa ebanghelyo ni Jesukristo.

Pagpangandam sa estudyante: Ang mga estudyante mahimong dapiton sa pagbasa sa 3 Nephi 27:1–10 ug sa pagdiskobre kon unsa ang gitudlo sa Manluluwas sa Iyang mga tinun-an nga mga Nephite mahitungod sa Iyang Simbahan.

Mga Posibleng Kalihokan sa Pagkat-on

Unsaon nimo sa pagtubag?

Ipakigbahin ang mosunod nga senaryo ngadto sa mga estudyante. Mahimo ka usab magdapit og duha ka andam nga mga estudyante sa pagdrama-drama niini.

Usa ka adlaw samtang mipakigbahin sa ilang gibuhat sa kataposan sa semana, si Naomi naghisgot sa iyang higala nga si Marco nga siya nagtambongan sa pagsimba sa adlawng Dominggo.

Nangutana si Marco, “Mormon ka, dili ba?”

Si Naomi miingon, “Usahay ang mga tawo motawag kanamo niana, apan mas gusto namong tawgon nga mga miyembro sa Ang Simbahan ni Jesukristo sa mga Santos sa Ulahing mga Adlaw.”

Si Marco mitubag, “Murag taas ra kaayo kana. Nganong dili naman lang ka moingon nga nahisakop ka sa simbahan sa Mormon? Wala ka ba nagbasa gikan sa Basahon ni Mormon?”

Ang mga estudyante mahimong dapiton sa paghisgot sa mosunod nga pangutana uban sa usa ka pares o sa gamay nga grupo.

• Unsa ang pipila ka mga paagi nga si Naomi mahimong motubag sa pangutana ni Marco?

Karon, ikaw magtuon sa pipila sa mga pagtulun-an sa Manluluwas ngadto sa Iyang mga tinun-an nga mga Nephite nga natala sa 3 Nephi 27. Samtang magtuon ka, pangita og mga kamatuoran nga gitudlo ni Jesus mahitungod sa Iyang Simbahan nga makatabang kanimo kon mag-atubang ka og mga sitwasyon sama sa imong nabasa.

Ang ngalan sa Simbahan

Sa wala madugay human sa pagbisita ni Kristo sa mga Nephite, ang Iyang napulog duha ka mga tinun-an nga mga Nephite nagkahiusa diha sa pagpuasa ug pag-ampo. Sila gusto nga masayod kon unsay angay nga pangalan sa Simbahan. Samtang sila nag-ampo, ang Manluluwas mipakita ug misugod sa pagtudlo kanila (tan-awa sa 3 Nephi 27:1–3).

Basaha ang 3 Nephi 27:4–7, mangita kon unsa ang gitudlo sa Manluluwas sa Iyang mga tinun-an mahitungod sa ngalan sa Iyang Simbahan.

• Unsa ang gisulti sa Manluluwas nga angayng itawag sa Iyang Simbahan?

Ikonsiderar ang pagsulat sa mosunod nga kamatuoran diha sa pisara ug pagbilin og luna diha sa pisara sa kataposan, aron makadugang ka sa kamatuoran unya diha sa leksiyon.

Usa ka kamatuoran nga atong makat-onan gikan niini nga mga bersikulo mao nga ang tinuod nga Simbahan ni Jesukristo kinahanglan pagatawgon pinaagi sa Iyang ngalan.

• Unsa ang mga rason nga gihatag sa Manluluwas sa pagngalan sa Simbahan sunod sa Iyang Kaugalingon?

Si Presidente Russell M. Nelson mipakigbahin og mga rason kon nganong importante nga gamiton nato ang husto nga ngalan sa Simbahan:

Ang ngalan sa Simbahan dili mausab. Sa dihang ang Manluluwas klaro nga namahayag unsay ngalan sa Iyang Simbahan ug gani giunhan sa Iyang pamahayag sa, “Kay sa ingon ang akong simbahan pagatawgon,” Siya seryoso. Ug kon kita motugot nga gamiton ang mga angga o modawat o kita mismo mopasiugda niadto nga mga angga, Siya masilo.

Unsay naa sa ngalan o niining kahimtanga, ang usa ka angga? Kon bahin na sa mga angga sa Simbahan, sama sa “LDS Church,” ang “Mormon Church,” o ang “Simbahan sa mga Santos sa Ulahing mga Adlaw,” ang labing importanteng butang sa maong mga ngalan mao ang pagkawala sa ngalan sa Manluluwas. Ang pagkuha sa ngalan sa Ginoo gikan sa Simbahan sa Ginoo usa ka dakong kadaogan ni Satanas. Kon atong kuhaon ang ngalan sa Manluluwas, gituyo nato sa pagbaliwala ang tanan nga gibuhat ni Jesukristo alang kanato—gani ang Iyang Pag-ula. (Russell M. Nelson, “Ang Sakto nga Ngalan sa Simbahan,” , Nob. 2018, 87–88)

• Unsa ang labing mahinungdanon kanimo gikan sa pamahayag ni Presidente Nelson?

• Sa imong hunahuna, sa unsang paagi ang atong paningkamot sa paggamit sa sakto nga ngalan sa Simbahan makaapektar niadtong dili mga miyembro sa Simbahan?

Isip kabahin sa panaghisgot sa miaging pangutana, ikosiderar ang pagtan-aw sa usa o labaw pa sa usa sa mga bidyo gikan sa seksiyon sa “Komentaryo ug Background nga Impormasyon” ubos sa ulohan nga “Unsay mahitabo kon gamiton nato ang husto nga ngalan sa Simbahan?”

“Natukod diha sa Akong ebanghelyo”

Agig dugang sa pagpasiugda nga ang Iyang Simbahan kinahanglang pagatawgon pinaagi sa Iyang ngalan, ang Manluluwas mitudlo sa Iyang mga tinun-an nga mga Nephite og laing mahinungdanong kinaiya sa Iyang Simbahan.

Basaha ang 3 Nephi 27:8–10, mangita niini nga kinaiya.

• Unsa ang imong ikadugang gikan niini nga mga bersikulo ngadto sa gipabaga nga pagkasulat nga kamatuoran nga imong naila bag-o lang mahitungod sa Simbahan sa Manluluwas?

Ikonsiderar ang pag-update sa kamatuoran nga imong gisulat kaganina diha sa pisara ngadto sa susama sa mosunod.

Usa ka paagi nga atong mapamubo ang mga pagtulun-an sa Manluluwas nga imong natun-an sa pagka karon mao ang tinuod nga Simbahan ni Jesukristo kinahanglan pagatawgon pinaagi sa Iyang ngalan ug pagatukoron diha sa Iyang ebanghelyo.

• Unsa sa imong hunahuna ang gipasabot sa pagtukod sa Simbahan sa Manluluwas diha sa Iyang ebanghelyo?

Mahimong makatabang sa pagsabot nga ang pulong ebanghelyo nagpasabot og “maayong balita” (tan-awa sa Bible Dictionary, “Gospels”).

Aron matabangan ka nga masabtan ang importante nga mga aspeto sa ebanghelyo sa Manluluwas, pagdrowing og yano nga hulagway sa usa ka bilding sa simbahan diha sa imong journal sa pagtuon, sama sa mosunod. Siguroha nga magbilin og luna aron masulatan og mga pulong ug mga hugpong sa mga pulong ubos sa simbahan.

Paghimo og usa ka hulagway sa usa ka simbahan diha sa pisara aron kini magamit isip kabahin sa imong diskusyon.

Basaha ang 3 Nephi 27:13–22, mangita sa unsay gisulti ni Jesukristo sa Iyang ebanghelyo. Isulat ang mga pulong o mga hugpong sa mga pulong nga imong napalgan diha sa luna ubos sa imong drowing.

Dapita ang nagkalainlaing mga estudyante sa paglista sa mga pulong o mga hugpong sa mga pulong nga ilang nasayran ubos sa hulagway sa simbahan diha sa pisara. Dayon hisgoti kon unsay nakat-onan sa mga estudyante gikan sa ilang pagtuon niining mga bersikulo pinaagi sa pagpangutana sama sa mosunod.

• Base sa mga bersikulo nga imong gitun-an, unsaon nimo sa paghulagway kon unsa ang ebanghelyo sa Manluluwas?

Hisgoti ang piho nga mga aspeto sa ebanghelyo sa Manluluwas nga gilista diha sa pisara. Tabangi ang mga estudyante nga makasabot sa kamahinungdanon niini nga mga aspeto pinaagi sa pagpangutana og sama niini: Ngano sa imong hunahuna nga kini nga aspeto sa ebanghelyo sa Manluluwas mahimong ikonsiderar nga maayong balita? Ngano sa imong hunahuna nga importante alang sa Simbahan sa Manluluwas nga “matukod” (o magpunting) niini nga pagtulun-an o baroganan? Sa unsang paagi nga kini nga aspeto sa ebanghelyo sa Manluluwas makaapekto sa imong kinabuhi?

Kon nahuman na nimo ang diskusyon, mahimo nimong hisgotan pagbalik ang senaryo gikan sa sinugdanan sa leksiyon ug tugoti ang mga estudyante nga magbansay sa pagtubag gamit ang ilang nakat-onan.

Komentaryo ug Background nga Impormasyon

Unsay mahitabo kon gamiton nato ang husto nga ngalan sa Simbahan?

Si Presidente Russell M. Nelson misaad:

Minahal kong mga kaigsoonan, mosaad ko kaninyo nga kon buhaton nato ang atong pinakamaayo sa pagpahiuli sa hustong ngalan sa Simbahan sa Ginoo, Siya kansang Simbahan mao kini ang mobu-bu sa Iyang gahom ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad. Makabaton kita sa kahibalo ug gahom sa Dios aron matabangan kita sa pagdala sa mga panalangin sa gipahiuli nga ebanghelyo ni Jesukristo ngadto sa matag nasod, kaliwatan, pinulongan, ug katawhan ug sa pag-andam sa kalibotan alang sa Ikaduhang Pag-anhi sa Ginoo. (Russell M. Nelson, “Ang Sakto nga Ngalan sa Simbahan,” Liahona, Nob. 2018, 89)

Aron makita ang mga ehemplo sa kaayohan nga miabot sa mga indibidwal nga naggamit sa husto nga ngalan sa Simbahan, tan-awa ang pipila o ang tanan sa mosunod nga mga bidyo:

“Ang Sakto nga Ngalan sa Simbahan” (mga time code 11:34 hangtod 13:07).

“Ang Ngalan sa Simbahan Dili Mausab” (mga time code 4:36 hangtod sa 6:41).

“Ang Ngalan sa Simbahan Dili Mausab” (mga time code 10:45 hangtod sa 12:16).

Sa unsang paagi nga ang pagpuyo sa ebanghelyo sa Manluluwas makatabang kanato nga mahimong sama Kaniya?

Si Elder Thierry K. Mutombo sa Seventy mipasabot kon sa unsang paagi ang pagkat-on, pagdawat, ug pagsunod sa ebanghelyo sa Manluluwas nakaapekto kaniya ug sa iyang pamilya.

Dihang nagsugod kami sa pakigkita niining talagsaon nga mga misyonaryo, kinsa sama sa mga anghel nga gikan sa Dios, akong namatikdan nga adunay butang nga nagsugod og kausab sa among pamilya. Human sa among bunyag, kami tinud-anay gayod nga nagsugod sa paglambo og bag-ong estilo sa kinabuhi tungod sa gipahiuli nga ebanghelyo. Ang mga pulong ni Kristo misugod sa pagpadako sa among mga kalag. Kini misugod sa pagdan-ag sa among salabotan ug nahimong maanindot ngari kanamo, tungod kay ang mga kamatuoran nga among nadawat nasabtan ug among nakita ang kahayag, ug kini nga kahayag nag-anam og labaw kahayag ug labaw pa kahayag matag adlaw.

Kini nga pagsabot sa ngano sa ebanghelyo nakatabang kanamo nga mahimong mas mahisama sa Manluluwas. (Thierry K. Mutombo,“Kamo Mahimo nga Gawasnon,” Liahona, Mayo 2021, 51)

Pagpasalida sa bidyo

Aron makakita og paghulagway sa Manluluwas nga nagtudlo sa Iyang Apostoles mahitungod sa Iyang Simbahan ug sa Iyang ebanghelyo, tan-awa “Si Jesukristo Mipahibalo sa Ngalan sa Iyang Simbahan ug sa Iyang Doktrina” gikan sa time code 0:00 hangtod sa 5:26.

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang pagdapit sa mga estudyante sa paghunahuna nga sila ug ang pipila ka mga higala maghimo og usa ka team alang sa usa ka butang nga sila malingaw (usa ka paugnat sa kusog, usa ka grupo sa musika, ug uban pa). Dapita sila sa paghunahuna og ngalan nga ilang gamiton alang sa ilang grupo. Mahimo nimo nga pangutan-on sila kon ngano nga gipili nila kana nga ngalan ug kon unsa ang mapaabot niana nga ngalan ngadto sa uban mahitungod sa ilang grupo. Dayon dapita sila sa pagbasa sa 3 Nephi 27:4–7, mangita sa ngalan nga gihatag sa Manluluwas alang sa Iyang Simbahan ug kon nganong Iyang gihatag kana nga ngalan.

3 Nephi 27:11. Kalipay sa mubo nga higayon

Ang uban tingali nabalaka bahin sa uban sa gawas sa Simbahan nga murag nakasinati og kalipay ug kagawasan. Ikonsiderar ang pagpakigbahin sa sugilanon gikan ni Elder Robert C. Gay mahitungod sa usa ka batan-ong babaye nga nangutana niini nga pangutana: “‘Akong uyab ug ako bag-ohay lang nagkabulag, ug mipili siya nga mobiya sa Simbahan. Nagsulti siya nako nga wala pa siya sukad nakabati og kalipay. Sa unsa man nga paagi?’” (“Pagdala ngari Kanato sa Ngalan ni Jesukristo,” Liahona,Nob. 2018, 99). Dapita ang mga estudyante sa paghunahuna kon unsaon nila sa pagtubag. Mahimong tun-an sa mga estudyante ang 3 Nephi 27:10–17, mangita sa unsay gitudlo sa Manluluwas nga makatabang kanila sa pagtubag.

3 Nephi 27:13–15. Si Kristo gituboy sa krus

Gigamit sa Manluluwas ang gamhanang paghulagway sa krus sa pagpahinumdom sa mga tawo sa unsay Iyang nabuhat alang kanila. Tungod kay Siya gituboy, kita usab ituboy, o pabangonon gikan sa lubnganan (nabanhaw), aron kita unya pagahukman. Mahimo nimong ikonsiderar ang pagdapit sa mga estudyante sa pagbasa sa Juan 3:14–17 ug sa pag-cross-reference niini ngadto sa 3 Nephi 27:14 diha sa ilang mga kasulatan.