3 Nephi 27, Bahin 2

Mahimong Balaan pinaagi ni Jesukristo

Aduna bay mga higayon nga gusto nimo nga mahimong mas limpyo sa espirituhanong paagi? Sa dihang si Jesukristo nagtudlo sa Iyang mga tinun-an sa karaang Amerika, Siya mipasabot sa mahinungdanong mga panalangin nga anaa niadtong mosunod sa Iyang ebanghelyo, lakip ang pagbalaan pinaagi sa Espiritu Santo. Kini nga leksiyon makatabang kanimo nga makasabot kon unsaon pagdawat sa makabalaan nga gahom sa Manluluwas samtang mohimo ka og mga paningkamot sa pagsunod sa Iyang ebanghelyo.

Pagtabang sa mga estudyante nga mobati nga nahisakop. Ang seminary kinahanglan nga usa ka kahimtangdiin ang mga estudyante luwas ug gisuportahan ug ang ilang tampo gihatagan og bili. Ipakita ang imong gugma ug pagpakabana sa mga estudyante samtang nakig-uban ka kanila. Awhaga ang mga sakop sa klase sa pagpaminaw sa usag usa ug paghatag og bili sa mga panglantaw sa ilang mga kaedad.

Pagpangandam sa estudyante: Dapita ang mga estudyante sa pagbasa sa unang tulo ka mga parapo sa “Espiritu Santo” diha sa Giya ngadto sa mga Kasulatan (scriptures.ChurchofJesusChrist.org). Dapita sila sa pagtambong nga andam sa pagpakigbahin kon sa unsang paagi sila naghunahuna nga ang Espiritu Santo makatabang kanila nga mahimong balaan, o mas mahisama sa Manluluwas.

Mga Posibleng Kalihokan sa Pagkat-on

Hugaw

Aron matabangan ang mga estudyante nga maandam sa pagtuon mahitungod sa ilang panginahanglan nga malimpyohan gikan sa ilang mga sala, ikonsiderar ang pagpakigbahin sa mosunod nga asoy.

Si Elder Allen D. Haynie sa Seventy mipakigbahin sa mosunod nga istorya gikan sa iyang pagkabata.

Sa dihang nuybe anyos pa ko, ang puti og buhok, upat ka pye ug onse ka pulgada (1.5 m) nako nga lola miabot aron mogahin og pipila ka semana uban namo diha sa among balay. Usa ka hapon samtang diha pa siya, ang akong duha ka magulang nga igsoong lalaki ug ako nakahukom nga maglungag atbang sa among balay. Wala ko kahibalo nganong amo kadtong gibuhat; usahay ang mga batang lalaki ganahang maglungag. Nagkahugaw mi apan dili kanang makapaproblema kaayo namo. Ang ubang batang mga lalaki sa kasilinganan nakakita kon unsa kalingaw ang paglungag ug misugod sa pagtabang. Dayon misamot na mi og kahugaw tanan. Ang yuta gahi, mao nga nagdala mi og hose sa garden ug mibutang og gamayng tubig sa lungag aron mohumok ang yuta. Nagkalapok mi samtang nagkalot mi, apan ang lungag nagkalawom na.

Dunay usa sa among grupo nga nakahukom nga among himoon og swimming pool ang among lungag, mao nga amo kining gibutangan og tubig. Kay mao ang pinakabata ug gustong maapil, naagni ko nga molukso ug mosulay niini. Karon pwerte na nakong hugawa. Wala ko magplano nga maputos sa lapok, apan mao kana ang akong gidangatan.

Sa dihang nagkatugnaw na, mitabok ko sa dalan, mipauli sa among balay. Ang akong lola misugat nako sa atubangang pultahan ug mibalibad sa pagpasulod nako. Iya kong giingnan nga kon iya kong pasudlon, magdala ko og lapok sulod sa balay nga bag-o pa lang niyang gilimpyohan. Mao nga akong gibuhat ang unsay buhaton ni bisan kinsang nuybe anyos nianang sitwasyona ug midagan ngadto sa likod nga pultahan, apan mas abtik siya kay sa akong pagtuo. Naglagot ko, gibusdak ang akong tiil, ug namugos pagsulod sa balay, apan ang pultahan nagpabiling sirado.

Basa ko, nagkalapok, gitugnaw, ug, sa bata nakong imahinasyon, naghunahuna nga basin mamatay ko sa akong kaugalingong tugkaran. Sa kataposan, nangutana ko niya kon unsay angayan nakong buhaton aron makasulod sa balay. Wala lang nako damha, nagbarog na ko sa tugkaran samtang ang akong lola mipasirit nako sa hose. Human sa morag kahangtoran, ang akong lola mipahibalo nako nga limpyo na ko ug mipasulod nako sa balay. Init sulod sa balay, ug nakasul-ob ko og uga, limpyo nga sinina. (Allen D. Haynie, “Paghinumdom kang Kinsa Kita Mosalig,” Liahona, Nov. 2015, 121)

• Unsa nga espirituhanong mga pagkompara ang imong mabuhat tali sa istorya ni Elder Haynie ug sa atong mga kinabuhi?

Sa 3 Nephi 27, isip kabahin sa pakigpulong sa Manluluwas ngadto sa Iyang mga tinun-an nga mga Nephite mahitungod sa Iyang ebanghelyo, Siya mitudlo mahitungod sa mga sangpotanan sa sala ug sa unsa nga paagi kita makabuntog niini ug mahimong hinlo sa espirituhanon nga paagi.

Basaha ang 3 Nephi 27:19, mangita sa mga pagtulon-an sa Manluluwas.

• Unsa ang gitudlo niini nga bersikulo kanimo mahitungod sa imong panginahanglan alang ni Jesukristo ug sa Iyang Pag-ula?

Ang pagpakigbahin sa mosunod nga parapo makatabang sa mga estudyante sa pag-ila sa ilang personal nga panginahanglan sa makahinlo nga gahom sa Manluluwas.

Si Jesukristo makalimpyo kanimo gikan sa lama sa sala ug motabang kanimo nga mahimong balaan. Hunahunaa ang imong panginahanglan nga malimpyohan gikan sa sala ug kon unsa kaha ang bation o gibati nga mahinlo sa espirituhanon nga paagi. Sa imong pagtuon karon, pangitaa ang mga pagtulon-an nga makatabang nimo nga mas makasabot kon unsaon nimo paggamit ang makabalaan nga gahom sa Manluluwas sa imong kinabuhi.

Si Jesukristo naghulagway kon sa unsang paagi kita mabalaan pinaagi sa Espiritu Santo

Sa 3 Nephi 27:20–22, ang Manluluwas mitudlo kon unsay atong mabuhat aron makadawat sa Iyang makabalaan nga gahom ug mahimong takos sa kinabuhing dayon. Aron matabangan ka sa pagtuon niini nga mga bersikulo, kopyaha ang mosunod nga tsart nganha sa imong journal sa pagtuon.

Mahimo usab nimong kopyahon kini nga tsart diha sa pisara aron masuwatan kini sa mga estudyante isip usa ka klase inig ka human og tuon.

Mga Sugo	Mga Panalangin

Basaha ang 3 Nephi 27:20–22 ug kompletoha ang tsart base sa unsay imong nakaplagan.

Ang 3 Nephi 27:20 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsaon nimo sa pagpamubo ang mga pagtulun-an sa Manluluwas diha sa bersikulo 20 isip usa ka pamahayag sa kamatuoran?

Ang usa ka kamatuoran nga atong makat-onan mao nga kon kita maghinulsol ug moduol kang Jesukristo pinaagi sa pagpabunyag, niana kita mabalaan pinaagi sa pagdawat sa Espiritu Santo ug mobarog nga walay lama atubangan Kaniya sa kataposan nga adlaw.

Aron mabalaan nagpasabot nga “mahimo nga gawasnon gikan sa sala, [putli, limpyo, ug balaan] pinaagi sa pag-ula ni Jesukristo” (Giya ngadto sa mga Kasulatan, “Pagbalaan,” scriptures.ChurchofJesusChrist.org).

• Sa unsang paagi ang paghinulsol ug bunyag makatabang kanato nga makasinati og pagkabalaan pinaagi ni Jesukristo?

• Unsaon nimo pagtubag sa usa ka tawo kinsa naghunahuna kon unsaon kini nga mga sugo magamit ngadto kaniya human siya makadawat sa ordinansa sa bunyag?

Kon gikinahanglan, tabangi ang mga estudyante nga makasabot nga tungod kay kita dili hingpit, kita adunay mga oportunidad nga maghinulsol matag adlaw. Kinahanglan usab kita kanunay nga maningkamot sa pagtuman sa atong mga pakigsaad sa bunyag human mabunyagi. Ang takos nga pag-ambit sa sakramento naghatag kanato og kahigayonan matag semana sa pagbag-o niana nga mga pakigsaad. Kining tanan nga mga binuhatan makatabang kanato nga mahimong mas putli sa espirituhanon nga paagi.

Ang mga pamahayag nila ni Presidente Russell M. Nelson ug Boyd K. Packer diha sa “Komentaryo ug Background nga Impormasyon” nga seksiyon mahimong gamiton sa pagtabang sa pagtudlo niini nga mga konsepto.

Mahimong Balaan pinaagi sa Espiritu Santo

Ang mga pulong ni Jesukristo sa bersikulo 20 nagtudlo kanato nga ang paagi nga Siya motabang kanato nga mabalaan mao ang pinaagi sa pagdawat sa Espiritu Santo.

Si Presidente Henry B. Eyring sa Unang Kapangulohan mitudlo mahitungod sa koneksiyon tali sa Pag-ula sa Manluluwas ug sa makabalaan nga impluwensiya sa Espiritu Santo.

Kon inyong nabati ang impluwensiya sa Espiritu Santo karon, mahimo ninyong isipon kini nga ebidensiya nga ang Pag-ula naglihok sa inyong kinabuhi. Tungod niana nga rason ug sa daghan pa, makabuhat ka og maayo sa pagbutang sa inyong kaugalingon sa mga dapit ug sa mga buluhaton nga magdapit sa mga pag-aghat sa Espiritu Santo. Ang pagbati sa impluwensiya sa Espiritu Santo nagalihok sa duha ka paagi: ang Espiritu Santo mopuyo lamang sa limpyo nga templo, ug ang pagdawat sa Espiritu Santo molimpyo nato pinaagi sa Pag-ula ni Jesukristo. (Henry B. Eyring, “Gifts of the Spirit for Hard Times,” Ensign,Hunyo 2007, 23)

• Sa unsang paagi nimo namatikdan ang makalunsay nga impluwensiya sa Espiritu sa imong kinabuhi?

  Isip kabahin sa paghisgot sa miaging pangutana, ikonsiderar ang pagpakigbahin og mga ehemplo kon sa unsang paagi ang Espiritu Santo nakatabang nimo nga madugangan ang imong espirituhanong kaputli. Kini mahimong maglakip sa mga paagi nga nadugangan sa Espiritu Santo ang imong mga tinguha sa pagsunod kang Jesukristo o mga pag-aghat nga gihatag sa Espiritu Santo kanimo aron malikayan ang mga pamatasan nga nagdala kanimo pahilayo gikan sa Manluluwas.

• Unsa ang pipila ka mga paagi nga mahimo natong dapiton ang padayon nga pakig-uban sa Espiritu Santo aron kita kanunay nga mapanalanginan sa iyang makabalaan nga impluwensiya?

Paggamit sa mga pagtulon-an sa Manluluwas sa imong kinabuhi

Ang mga kamatuoran nga imong natun-an karon yano apan importante nga sundon sa kanunay aron takos ka nga makabalik ngadto sa presensiya sa Dios. Hunahunaa kon sa unsang paagi nimo magamit sa imong kinabuhi ang unsay imong nakat-onan ug gibati. Mahimo kang mopili og usa o labaw pa sa usa sa mosunod nga mga kapilian o mopili og laing paagi sa paggamit niini nga mga pagtulun-an.

Ipakita ang mosunod nga mga kapilian ug hatagi ang mga estudyante og igong panahon sa pagpamalandong ug posibleng pagsulat og plano sa pagbuhat diha sa ilang mga journal sa pagtuon. Inig mahuman na sila, pagpamatuod sa mga kamatuoran nga imong nahisgotan niini nga leksiyon.

1. Mahimong tuyoon og hisgot ang mahitungod sa paghinulsol matag adlaw ug determinado nga mas hingpit nga mosunod sa Manluluwas.

2. Himoa ang imong pag-apil diha sa ordinansa sa sakramento nga mas makahuloganon nga bahin sa imong pagsimba sa Domingo.

3. Ilha ang sala o makabalda nga naglimita sa imong pakig-uban sa Espiritu Santo. Himoa ang gikinahanglan nga mga aksyon aron makuha ang maong sala o pagkabalda gikan sa imong kinabuhi.

4. Sugdi ang pagbuhat og butang nga makahatag kanimo og mas dako nga access ngadto sa pakig-uban sa Espiritu Santo.

Komentaryo ug Background nga Impormasyon

Sa unsang paagi ang adlaw-adlaw nga paghinulsol makatabang nako nga masinati ang makabalaan nga gahom sa Manluluwas?

Si Presidente Russell M. Nelson mitudlo:

Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, adlaw-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo. …

… Ang Ginoo wala magdahom og kahingpitan gikan kanato niining puntoha sa atong mahangtorong pag-uswag. Apan Siya nagdahom gayod nga kita mag-anam-anam og kaputli. Ang matag adalw nga paghinulsol mao ang agianan ngadto sa kaputli, ug ang kaputli magdala og gahom. (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67)

Sa unsa nga paagi nga ako malimpyohan gikan sa akong mga sala human ako mabunyagi?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Kasagaran atong nasabtan nga, ang kondisyon sa paghinulsol, ang ordinansa sa bunyag naghugas sa atong mga sala. Ang uban naghunahuna kon sila nabunyagan ba sa sayo ra kaayo. Kon mahimo lang unta silang magpabunyag karon ug makabaton og limpyo nga sinugdanan. Apan kana dili kinahanglan! Pinaagi sa ordinansa sa sakramento, gibag-o ninyo ang mga pakigsaad nga gihimo atol sa bunyag. Kon kamo makakab-ot sa tanan nga mga kondisyon sa paghinulsol, bisan unsa kalisod, kamo mahimo nga mapasaylo ug ang inyong mga kalapasan dili na makasamok sa inyong hunahuna. (Boyd K. Packer, “Washed Clean,” Ensign, Mayo 1997, 10)

Sa unsang paagi makatabang ang Espiritu Santo kanato nga masinati ang makabalaan nga gahom sa Manluluwas?

Si Elder Kevin R. Duncan sa Seventy mipasabot:

Ang Espiritu Santo adunay mahinungdanong papel sa pagtabang kanato sa pagbuntog sa sala ug pulihan kini og gugma sa pagkamatarong ug abilidad sa pagsunod sa mga sugo sa Dios.

Nasaksihan nako ang makapabalaan nga gahom sa Espiritu diha sa mga kinabuhi sa daghang mga tawo. Ako nakakita sa daotan nga mga tawo nga nahimong maayo, ug ang maayo nga mga tawo nahimo mas maayo, ingon nga sila mitugyan sa ilang mga kasingkasing ngadto sa lunsay nga impluwensiya sa Espiritu. Ang Espiritu Santo usa ka tigbalaan. (Kevin R. Duncan, “The Sacred Roles of the Holy Ghost,” Ensign, Okt. 2014, 65)

Aron mas masabtan kon sa unsang paagi ang Manluluwas naghinlo kanato pinaagi sa Espiritu Santo, ikonsiderar ang pagtan-aw sa “Face to Face uban nila ni Presidente Eyring ug Elder Holland,” anaa sa ChurchofJesusChrist.org, gikan sa mga time code 1:03:17 hangtod sa 1:09:16.

Pagpasalida sa bidyo

Aron motan-aw og paghulagway sa pipila sa mga panudlo sa Manluluwas diha sa 3 Nephi 27, tan-awa ang “Si Jesukristo Mipahibalo sa Ngalan sa Iyang Simbahan ug sa Iyang Doktrina” gikan sa time code 3:26 hangtod sa 8:03.

Dugang nga mga Kalihokan sa Pagkat-on

Alternatibo nga pagsugod sa leksiyon

Sa dili pa mobasa sa 3 Nephi 27:19, mahimo nimong dapiton ang mga estudyante sa paghanduraw nga sila adunay usa ka importante nga hitabo nga tambongan, sama sa usa ka interbyo o usa ka miting, nga magkinahanglan kanila nga magsinina og tarong. Dayon ipahunahuna kanila kon unsay ilang bation kon, sa wala pa magsugod ang hitabo, ilang nayab-an ang ilang mga bisti ug namatsahan kini. Dayon mahimo nimong hangyoon ang mga estudyante sa paghunahuna mahitungod sa mga butang nga makapahimo sa atong mga espiritu nga magmahugaw ug kon unsa kahay atong bation nga mobarog sa atubangan sa Dios diha sa usa ka espirituhanon nga mahugaw nga kahimtang.

3 Nephi 27:27. “Unsa nga matang sa tawo kamo angay nga mahisama?”

Sa 3 Nephi 27:23–33, ang Manluluwas mihatag og mga instruksiyon ngadto sa Iyang napulog duha ka tinun-an ug mitudlo kanila mahitungod sa ilang mga responsibilidad, lakip sa ilang mga tahas isip mga maghuhukom sa katawhan. Dapita ang mga estudyante sa pagbasa sa 3 Nephi 27:27, mangita og kamatuoran nga atong makat-onan gikan sa sugo nga gihatag sa Manluluwas ngadto sa Iyang mga tinun-an nga mahimong magamit sa ilang kaugalingon nga mga kinabuhi. Usa ka kamatuoran nga tingali mailhan sa mga estudyante mao ang Ginoo nagsugo sa Iyang mga tinun-an nga mahimong mahisama Kaniya.

Mahimong tun-an sa mga estudyante ang mga panghitabo gikan sa kinabuhi sa Manluluwas nga nagpakita sa Iyang hingpit nga ehemplo ug mangita og mga hiyas sa Manluluwas nga gusto nilang sundon. Mahimo silang magplano aron mas hingpit nga mapalambo ang usa sa Iyang mga hiyas aron sila mahimong mas mahisama Kaniya.