4 Nephi

“Nakabig ngadto sa Ginoo”

Sulod sa milenyo, ang mga indibidwal, pamilya, ug katilingban nangita og mga mithi sama sa panag-uyon, kalinaw, ug panaghiusa. Kini ingon og dili makab-ot, apan kini anaa. Ang asoy sa 4 Nephi usa ka ehemplo niana. Usa ka paagi aron masinati kini nga mga panalangin mao ang pagpalawom sa atong pagkakabig ngadto sa Ginoo ug pagbaton sa gugma sa Dios sa atong mga kasingkasing. Kini nga leksiyon makatabang kanimo nga mobati og mas dakong gugma alang sa Langitnong Amahan ug kang Jesukristo aron ikaw mahimong mas lawom nga makabig ngadto Kanila.

Pangandam pinaagi sa pagtuon sa pulong sa Dios. Kita gisugo sa pagtudlo sa mga kamatuoran nga makita diha sa mga kasulatan ug sa mga pagtulon-an sa mga propeta ug apostoles sa ulahing mga adlaw. Pinaagi sa mainampoong pagtuon sa pulong sa Dios, kita mahiangay sa Espiritu Santo ug makadawat og mga panglantaw ug direksiyon.

Pagpangandam sa estudyante: Ikonsiderar ang pagdapit sa mga estudyante sa pagtuon sa kahulogan sa pulong nga pagkakabig sa magamit nga mga kapanguhaan sa Simbahan. Sa laing paagi, mahimo nimong dapiton ang mga estudyante sa pagpangutana sa usa ka tawo nga ilang kaila kon unsay kahulogan sa pagkakabig ngadto kang Kristo alang kanila.

Mga Posibleng Kalihokan sa Pagkat-on

Usa ka langitnon nga posibilidad

Handurawa kon unsa kaha kini kon ikaw ug ang mga tawo sa imong palibot nahigugma ug naningkamot sa pagsunod ni Jesukristo.

Ikonsiderar ang pagbutang sa mga estudyante sa gagmay nga mga grupo ug ipahisgot kanila sa daklit ang mosunod nga mga pangutana.

• Sa unsang paagi kaha malahi ang imong komunidad?

• Sa unsang paagi kaha nga malahi ang imong eskwelahan o simbahan?

• Sa unsang paagi kaha nga malahi ang imong panimalay?

Ang basahon sa 4 Nephi naglangkob sa asoy sa mga katawhan kinsa nabuhi human sa pagbisita sa Manluluwas ngadto sa Amerika. Samtang imong tun-an ang ilang mga kasinatian, tan-awa ang epekto ni Jesukristo ug sa Iyang ebanghelyo ngadto niini nga mga tawo. Hunahunaa kon sa unsang paagi kini nga mga pagtulon-an makaapekto sa paagi sa imong pagpili sa pagpakabuhi.

Ang epekto sa ebanghelyo sa Manluluwas

Basaha ang 4 Nephi 1:1–2, mangita sa epekto sa Manluluwas ug sa Iyang mga pagtulon-an diha sa mga katawhan.

• Unsa ang imong namatikdan?

Mahimo nimong markahan ang hugpong sa mga pulong nga “ang tanan nga mga katawhan nakabig ngadto sa Ginoo” diha sa bersikulo 2.

Ikonsiderar ang pagdapit sa mga estudyante kinsa nakakompleto sa kalihokan sa pagpangandam sa pagpakigbahin kon unsay ilang nakat-onan mahitungod sa kon unsay buot ipasabot sa makabig ngadto sa Ginoo. Mahimo usab nimong ipakigbahin ang mosunod nga kahulugan.

Ang makabig ngadto sa Ginoo nagpasabot og “pag-usab sa usa ka tawo sa tinuohan, kasingkasing, ug kinabuhi aron pagdawat ug pag-uyon ngadto sa kabubut-on sa Dios … [ug] mahimo nga usa ka tinun-an ni Kristo” (Giya ngadto sa mga Kasulatan, “Kinabig, Pagkakabig,” scriptures.ChurchofJesusChrist.org).

Ang mga panalangin sa pagkakabig

Ang mga Nephite ug mga Lamanite nakasinati og talagsaong mga panalangin tungod sa ilang pagkakabig ngadto kang Jesukristo. Sa imong journal sa pagtuon, isulat ang “Mga Panalangin gikan sa Pagkakabig” diha sa tunga-tunga sa usa ka pahina.

Agig dugang sa mga estudyante nga nagsulat sa ulohan diha sa ilang journal sa pagtuon, mahimo nimo kini isulat diha sa pisara. Mahimong isulat sa mga estudyante ang ilang mga tubag diha sa pisara human sa pagtuon sa mosunod nga mga bersikulo.

Basaha ang 4 Nephi 1:2–18 ug markahi ang mga pulong o mga hugpong sa mga pulong nga naghulagway sa mga panalangin nga ilang nadawat. Sa imong papel, isulat kini nga mga pulong o hugpong sa mga pulong libot sa ulohan nga “Mga Panalangin gikan sa Pagkakabig.” (Mahimong makatabang ang pagkahibalo sa kahulogan sa pipila sa mga pulong sa bersikulo 16. Ang mga kagubot nagpasabot sa mga kaguliyang sa publiko o mga kasamok, ang mga malaw-ay nga mga buhat nagpasabot sa sekswal nga mga sala, ug ang pagkamaulagon nagpasabot sa pagkahigal ug pagkadili-putli.)

Hunahunaa kon hain niini nga mga panalangin ang gusto nimong masinati sa imong kaugalingong kinabuhi. Ikonsiderar ang paglingin niini diha sa pahina sa imong journal sa pagtuon.

Dapita ang mga estudyante sa pagpakigbahin kon unsay ilang nakat-onan o gibati gikan sa ilang pagtuon sa mga bersikulo 2–18. Mahimo kang modapit og nagkalainlaing mga estudyante sa pagpakigbahin sa usa ka hugpong sa mga pulong nga labi ka mahinungdanon ngadto kanila ug sa pagpasabot sa kamahinungdanon niini.

• Unsay mipatigbabaw diha kanimo gikan niining mga bersikulo? Ngano man?

• Base sa unsay imong nakat-onan gikan niini nga mga bersikulo, unsaon nimo sa pagtapos ang mosunod nga kapahayag: “Kon kita nakabig ngadto sa Ginoo …”?

Usa ka kamatuoran nga atong maila gikan niini nga mga bersikulo mao nga kon kita nakabig ngadto sa Ginoo, kita mapanalanginan og kalipay ug panaghiusa isip mga anak ni Kristo.

• Ngano sa imong hunahuna nga ang pagkakabig ngadto ni Jesukristo ug pagpuyo sa Iyang ebanghelyo makahatag og ingon niana nga mga panalangin?

• Sa unsang paagi nga ang pagkasabot niini nga kamatuoran makaapekto sa atong inadlaw-adlaw nga mga lihok?

Ang gugma sa Dios

Si Elder Jeffrey R. Holland sa Korum sa Napulog Duha ka Apostoles mipakigbahin sa mosunod nga obserbasyon kon nganong kini nga mga tawo nakapuyo sa ingon nga kahimtang sa kalipay ug panaghiusa.

Unsa ang mahinungdanon niining kalit nga pag-uswag sa kontento, malipayong pagpuyo? Anaa na kini diha sa teksto sa usa ka kapahayag: “Ang gugma sa Dios … anaa sa mga kasingkasing sa mga katawhan” [4 Nephi 1:15]. Kon ang gugma sa Dios mao ang padulngan sa atong kaugalingong kinabuhi, alang sa atong relasyon sa usag usa ug sa kataposan ang atong pagbati alang sa tanang katawhan, nan ang daan nga mga pagpihig, mga utlanan sa atong pagsabot, ug artipisyal nga pagbahin magsugod sa pagkawala, ug kalinaw ang mopatigbabaw. Mao gayod kana ang nahitabo sa atong ehemplo sa Basahon ni Mormon. Wala nay mga Lamanite, o mga Jacobite, o mga Josephite, o mga Zoramite. Wala nay mga “-ite”. Ang mga katawhan naggamit og usa lang ka talagsaon nga ilhanan. Silang tanan, kini nag-ingon, mahibaloan isip “ang mga anak ni Kristo” [4 Nephi 1:17]. (Jeffrey R. Holland, “Ang Labing Dako nga Katigayonan,” LiahonaNob. 2021, 9)

Ikonsiderar ang pagmarka sa pamahayag diha sa bersikulo 15 bahin sa gugma sa Dios nga anaa sa mga kasingkasing sa mga katawhan. Ang pagbaton sa gugma sa Dios sa atong mga kasingkasing mahimong magpasabot sa pagbati sa gugma sa Dios alang kanato ug alang sa uban. Kini usab nagpasabot sa pagbati og gugma ngadto sa Langitnong Amahan ug ni Jesukristo.

• Unsa ang pipila ka buhat nga atong mahimo nga makatabang kanato nga mobati og mas dakong gugma alang sa Langitnong Amahan ug ni Jesukristo?

Pagtinguha og daghang mga tubag sa nauna nga pangutana. Isip kabahin niini nga diskusyon, mahimong mapuslanon ang paghangyo sa mga estudyante sa pagpasabot kon unsay nakatabang kanila nga mobati ug mas dakong gugma alang sa Dios. Mahimo ka usab mopakigbahin og mga ehemplo gikan sa imong kaugalingong kinabuhi.

Usa ka paagi nga atong mabati ang mas dakong gugma alang sa Langitnong Amahan ug kang Jesukristo mao ang pagkat-on ug pag-ila Kanila diha sa mga kasulatan.

Mahimong kompletohon sa mga estudyante ang mosunod nga kalihokan nga magtinagsa o diha sa gamay nga grupo.

Paggahin og panahon sa pagtuon sa mga tudling sa kasulatan mahitungod sa Langitnong Amahan ug ni Jesukristo nga makatabang kanimo nga mobati og mas dakong gugma alang Kanila. Hatagi og pagtagad ang unsay imong nakat-onan mahitungod sa Ilang mga hiyas, mga tinguha, ug mga tahas. Mahimo kang mangita og mga termino sama sa “Amahan sa Langit” o “Jesukristo” gamit ang mga himan sa pagtuon sama sa Giya ngadto sa mga Kasulatan, o sa search function sa Librarya sa Ebanghelyo [Gospel Library].

Dapita ang mga estudyante sa pagpakigbahin og mga bersikulo nga ilang nakaplagan nga makahuloganon kaayo kanila. Hangyoa sila sa pagpasabot kon sa unsang paagi ang mga kamatuoran nga gitudlo makatabang kanato nga mobati og mas dakong gugma alang sa Langitnong Amahan o kang Jesukristo.

• Kon ang mga estudyante nahuman na sa pagpakigbahin, ikonsiderar ang pagdapit kanila sa pagtubag sa mosunod nga pangutana diha sa ilang mga journal sa pagtuon. Dayon pagpamatuod sa mga kamatuoran nga imong nahisgotan karon.

• Unsa ang usa ka butang nga imong paningkamotan nga buhaton sa umaabot nga mga adlaw nga makatabang kanimo nga mahimong mas makabig ngadto ni Jesukristo?

Komentaryo ug Background nga Impormasyon

Unsa ang makatabang nako nga mapalawman pa ang akong pagkakabig ngadto sa Ginoo?

Si Sister Bonnie L. Oscarson, kanhi Kinatibuk-ang Presidente sa Young Women, mitudlo:

Ang pagkakabig mahitabo kon kita magkugi sa pag-ampo, pagtuon sa atong mga kasulatan, pagsimba, ug pagpakatakos sa pag-apil sa mga ordinansa sa templo. Ang pagkakabig mahitabo samtang kita nagsunod sa matarong nga mga baroganan nga atong nakat-onan sa atong panimalay ug sa klase. Ang pagkakabig mahitabo samtang kita nagpuyo og putli ug mahiyasong mga kinabuhi ug nagtagamtam sa pakig-uban sa Espiritu Santo. Ang pagkakabig mahitabo samtang kita nakasabot sa Pag-ula ni Jesukristo, miila Kaniya isip atong Manluluwas ug Manunubos, ug nagtugot sa Pag-ula nga motandog sa atong mga kinabuhi. (Bonnie L. Oscarson, “Magpakabig Kamo,” Liahona, Nob. 2013, 78)

Unsa kaha kon gibati nako nga ang pagkakabig wala nahitabo kanako?

Si Elder David A. Bednar sa Korum sa Napulog Duha ka Apostoles mitudlo:

Kasagaran ang pagkakabig padayon nga proseso ug dili usa lang ka hitabo nga moresulta gikan sa gamhanan o dramatikong kasinatian. Pagtulun-an human sa usa ka pagtulun-an ug lagda human sa usa ka lagda, hinay-hinay ug hapit dili gani mabantayan, ang atong mga motibo, mga hunahuna, mga pulong, ug mga binuhatan mahiangay sa kabubut-on sa Dios. Ang pagkakabig ngadto sa Ginoo nagkinahanglan og kamakanunayon ug pailob. (David A. Bednar, “Nakabig ngadto sa Ginoo,” Liahona, Nob. 2012, 108)

Sa unsang paagi ang pagbaton sa gugma sa Dios sa akong kasingkasing makatabang nako nga mas makasinati og mas dakong panaghiusa sa uban?

Si Elder Dale G. Renlund sa Korum sa Napulog Duha ka Apostoles mitudlo:

Ang panaghiusa nagkinahanglan og paningkamot. Molambo kini kon kita mougmad sa gugma sa Dios diha sa atong mga kasingkasing ug kita motutok sa atong mahangtorong padulngan. Kita nahiusa pinaagi sa atong komon, nag-una nga kailhanan isip mga anak sa Dios ug sa atong pasalig ngadto sa mga kamatuoran sa gipahiuli nga ebanghelyo. Isip resulta, ang atong gugma sa Dios ug ang atong pagkadisipulo ni Jesukristo nagmugna og tinud-anay nga pagpakabana alang sa uban. (Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 84)

Dugang nga mga Kalihokan sa Pagkat-on

Usa ka ehemplo sa usa ka panaw sa pagkakabig

Ikonsiderar ang pagpakita sa bidyo nga “A Mighty Change: Conversion,” (2:47) mangita sa unsay gibuhat ni Alejandra aron makabig ngadto sa Ginoo ug ang mga panalangin nga iyang nasinati.

4 Nephi 1:1–18. Pagtukod sa Zion

Pahinumdomi ang mga estudyante bahin sa siyudad sa Enoch ug kon nganong gitawag sila sa Ginoo og “Zion” (tan-awa sa Moises 7:18). Pangutan-a sila kon giunsa nila nga namatikdan ang mga kinaiya nga gihulagway diha sa Moises 7:18 taliwala sa katawhan sa 4 Nephi. Mahimo usab nimong dapiton ang mga estudyante sa pagbasa sa 3 Nephi 26:19 aron makakita og laing paghulagway niini nga mga katawhan nga ikatandi sa mga katawhan ni Enoch.

4 Nephi 1:19–49. Ang makadaot nga kinaiya sa sala

Sa 4 Nephi 1:19–49, atong mabasa ang bahin sa espirituhanon nga pagkunhod sa mga katawhan. Sa paghulagway niini, ikonsiderar ang pagpakita sa mosunod nga pamahayag ni Elder Jeffrey R. Holland sa Korum sa Napulog Duha ka Apostoles: “Usa ka karaang panultihon nag-ingon nga ang usa ka panaw sa liboan ka milya nagsugod sa usa ka lakang, mao nga bantayi ang inyong lakang” (Jeffrey R. Holland, “Walay Luna alang sa Kaaway sa Akong Kalag,” Liahona, Mayo 2010, 45).

Ipapangita sa mga estudyante ang 4 Nephi 1:20–35, 38–45, mangita sa lain-laing mga lakang o mga buhat nga gibuhat sa mga katawhan nga midala kanila palayo kang Jesukristo ug mipadulong ngadto sa pagkadaotan ug kasubo.