3 Nephi 25

Buhat sa Templo ug sa Kasaysayan sa Pamilya

Nakapasabot ka na ba sukad ngadto sa usa ka tawo kon ngano nga aduna kitay mga templo o kon nganong nagbuhat kita sa kasaysayan sa pamilya? Unsa ka importante ang buhat sa kasaysayan sa pamilya ug sa templo alang kanimo? Samtang nagtudlo sa mga Nephite, si Jesus mikutlo og mensahe nga Iyang orihinal nga gipakigbahin kang Malaquias nga naglakip sa pagbalik ni Elijah ug sa iyang importante nga tahas sa buhat sa templo ug sa kasaysayan sa pamilya. Kini nga leksiyon gituyo aron sa pagtabang kanimo sa pag-apil sa buhat sa kasaysayan sa pamilya ug sa templo.

Pagtabang sa mga estudyante sa paghimo og epektibo, matarong nga aksiyon. Ang pagpalambo og hugot nga pagtuo ug pagkahimong Kristohanon dili mahitabo sa usa ka mubo nga klase. Samtang imong dapiton ang imong mga gitudloan sa paglihok pinasikad sa tinuod nga doktrina, imo silang gitabangan nga mapadayon ang kasinatian sa pagkat-on ngadto sa ilang mga panimalay ug inadlaw nga kinabuhi (tan-awa sa Doktrina ug mga Pakigsaad 43:8–10).

Pagpangandam sa estudyante: Dapita ang mga estudyante sa pagpangandam sa pagpakigbahin sa usa ka buhi o patay na nga indibidwal nga ilang nahibaloan diha sa kasaysayan sa ilang pamilya. Mahimong mapuslanon alang sa mga estudyante nga makig-istorya sa usa ka ginikanan o apohan o gamiton ang FamilySearch nga app.

Mga Posibleng Kalihokan sa Pagkat-on

Imong mga katigulangan

Ikonsiderar ang pag-apud-apod og mga kopya sa mosunod nga tsart ngadto sa matag estudyante ug dapita sila sa pagsulat og daghang impormasyon kutob sa ilang mahimo.

Pamalandongi kon unsa ang imong nahibaloan ug gibati mahitungod sa kinabuhi sa imong mga minahal, unsa ang gusto nimong mahibaloan, ug unsa ang epekto niini sa imong kinabuhi.

• Nganong importante man nga kita magtinguha sa pagkat-on og dugang mahitungod sa atong mga katigulangan?

  Tinoa kon labing maayo ba alang sa mga estudyante nga ipakigbahin ang ilang mga tubag sa mosunod, pagbuhat og usa ka dili magpaila nga poll [anonymous poll], o hilom lang nga timbang-timbangon ang ilang mga kaugalingon.

• Sa sukdanan nga 1–10 (1 = dili interesado, 10 = interesado kaayo), unsa ka ka interesado nga makaila sa imong mga katigulangan? Sa pag-apil sa buhat sa templo ug sa kasaysayan sa pamilya? Ngano man?

Samtang magtuon ka, pangita og mga panglantaw nga makatabang sa pagdasig kanimo nga mas moapil niini nga buluhaton.

“Sa dili pa moabot ang mahinungdanon ug makalilisang nga adlaw sa Ginoo”

Gamit ang abundang paghulagway ug simbolikanhong mga pulong nga gitala sa propeta sa Daang Tugon nga si Malaquias, si Jesus mitudlo sa mga katawhan sa Amerika mahitungod sa Iyang Ikaduhang Pag-anhi sa yuta ug nanagna mahitungod sa templo ug sa buhat sa kasaysayan sa pamilya.

Basaha ang 3 Nephi 25:1–2, mangita sa unsay gitudlo sa Manluluwas nga mahitabo sa Iyang pagbalik sa yuta. Ang mosunod nga mga kahulogan ug mga interpretasyon sa mga simbolo mahimong mapuslanon.

Ikonsiderar ang pagpakita sa mosunod:

• Dagami: Mga tuod sa tanom nga nahibilin sa umahan human sa pag-ani nga sunogon sa usa ka mag-uuma

• Mga gamot: Katigulangan

• Mga sanga: Kaliwatan

• Pagpang-ayo diha sa Iyang mga pako: Pagpang-ayo ug pagpanalipod nga gahom sa Ginoo ug sa Iyang Pag-ula

• Mga nati nga baka sa toril: Pagatimanon pag-ayo ang Israel ug pagasangkapan sama sa mga hayop diha sa usa ka toril

• Unsaon nimo sa pagpasabot unsay mahitabo sa Iyang Ikaduhang Pag-anhi sumala niini nga mga bersikulo? Unsa ang mahitabo sa mga daotan?

  Kon gikinahanglan, ipasabot nga sa Ikaduhang Pag-anhi ni Jesukristo, ang mga daotan makasinati og kalaglagan ug pagaputlon gikan sa kagikanan ug kaliwatan (tan-awa sa 3 Nephi 25:1).

• Unsa ang imong nakat-onan gikan niini nga mga simbolo mahitungod sa Manluluwas ug sa Iyang mga panalangin niadtong kinsa mosunod Kaniya?

Basaha ang 3 Nephi 25:5–6 ug ikonsiderar ang pagmarka kon unsay buhaton sa Manluluwas sa pagtabang sa mga pamilya sa kalibotan sa wala pa ang Iyang Ikaduhang Pag-anhi. Usa sa mga kahulogan sa pulong nga “mopabalik” mao ang pagabugkoson, o i-seal (tan-awa sa Mga Pagtulon-an sa mga Presidente sa Simbahan: Joseph Smith [2007], 572). Ang mga footnote sa imong mga kasulatan makatabang usab kanimo nga mas makasabot niini nga mga bersikulo.

Mahimo nimong ipasabot nga kini nga panagna gisubli sa matag usa sa mga sumbanan nga mga basahon. Mahimo nimong dapiton ang mga estudyante sa pagtan-aw kon makit-an ba nila ang matag usa niining upat ka okasyon o ipakigbahin kanila ang mosunod nga mga bersikulo: Malaquias 4:5–6; Lucas 1:17; Doktrina ug mga Pakigsaad 110:15–16; Joseph Smith—Kasaysayan 1:38–39.

Ikonsiderar ang pagpangutana sa mga estudyante kon unsay ilang nahibaloan mahitungod kang Elijah ug sa mga yawe nga iyang gihuptan. Base sa mga tubag sa estudyante, ipakigbahin ang mosunod nga mga parapo (o ang mga bahin nga gikinahanglan).

Si Elijah, usa ka karaang propeta, naghupot sa yawe sa gahom sa pagbugkos. Ang gahom sa pagsilyo/pagbugkos naghimo nga balido ngadto sa langit ang mga ordinansa nga gipahigayon pinaagi sa awtoridad sa pagkapari sa yuta (Giya ngadto sa mga Kasulatan, “Bugkos, Pagbugkos,” scriptures.ChurchofJesusChrist.org).

Basaha ang Doktrina ug mga Pakigsaad 110:13–16 aron makahibalo kon unsay nahitabo didto sa Templo sa Kirtland niadtong 1836 nga naglambigit nila ni Elijah, Joseph Smith, ug Oliver Cowdery.

Tungod sa gipahiuli nga gahom sa pagbugkos, kita makahimo og buhat sa templo alang sa atong kaugalingon ug sa atong mga katigulangan nga patay na.

• Unsa ang imong nakat-onan gikan sa 3 Nephi 25 ug sa Doktrina ug mga Pakigsaad 110?

  Ang pipila ka mga kamatuoran nga mahimong mailhan sa mga estudyante naglakip sa mosunod: Pinaagi ni propeta Elijah, gipahiuli ni Jesukristo ang mga yawe sa pagbugkos alang sa buhat sa templo ug sa kasaysayan sa pamilya. Samtang moapil kita sa buhat sa templo ug sa kasaysayan sa pamilya, atong giandam ang atong kaugalingon ug ang atong pamilya alang sa Ikaduhang Pag-anhi sa Manluluwas.

• Unsa ang pipila ka piho nga mga paagi nga ang mga batan-on makaapil sa buhat sa templo ug sa kasaysayan sa pamilya?

• Sa unsang paagi nga ang pag-apil sa buhat sa templo ug sa kasaysayan sa pamilya makatabang sa usa ka tawo nga maandam sa Ikaduhang Pag-anhi sa Manluluwas?

Kini importante nga masabtan nga wala lamang gipahiuli sa Manluluwas ang mga yawe sa pagbugkos, apan pinaagi lamang sa Iyang Pag-ula nga kita ug kadtong anaa sa atong mga pamilya mahimong matubos, maputli, ug makadawat og mahangtorong mga ordinansa ug mga panalangin lakip ang ordinansa sa pagbugkos.

Pamalandongi kon nganong ang buhat sa templo ug kasaysayan sa pamilya importante sa imong kinabuhi. Samtang namalandong ka, mahimo nimong tan-awon ang bidyo nga “The Promised Blessings of Family History 2” (4:04), nga anaa sa ChurchofJesusChrist.org.

Ikonsiderar ang pagdapit sa mga estudyante sa paghisgot sa mosunod nga magpares o sa gagmay nga mga grupo sa dili pa ipakigbahin ang mga tubag isip usa ka klase.

• Unsa nga mga kasinatian ang imong nasinati sa mga templo ug sa kasaysayan sa pamilya?

• Unsa nga mga panalangin ang imong namatikdan sa imong kinabuhi isip resulta?

Pag-apil sa buhat sa templo ug sa kasaysayan sa pamilya

Aron matabangan ka nga makaapil sa buhat sa templo ug sa kasaysayan sa pamilya, buhata ang usa o duha sa mosunod. Mahimo usab nimong ikonsiderar ang pagbuhat og laing butang nga may kalabotan sa buhat sa templo ug sa kasaysayan sa pamilya nga gibati nimo nga gigiyahan ka sa Espiritu sa pagbuhat.

Ang mosunod gituyo aron makamugna og oportunidad alang sa mga estudyante nga moapil sa buhat sa templo ug sa kasaysayan sa pamilya diha sa klase. Mahimo kamong magpunting sa usa ka kalihokan isip usa ka klase o motugot sa mga estudyante sa pagpili og kalihokan ug sa magtrabaho nga magtinagsa. Kon mapuslanon, ug adunay pag-uyon sa inyong lider sa pagkapari, ikonsiderar ang pagdapit sa inyong ward o stake family history consultant diha sa inyong klase aron sa pagtabang.

• Gamit ang imong ChurchofJesusChrist.org nga account, pag-log in sa FamilySearch.org. Susiha ang mga kapanguhaan aron mahibalo bahin sa usa sa imong mga katigulangan. Ikonsiderar ang pagsugod sa “Unsa ang imong gusto aron makasugod na?”

• Pag-text, tawag, o pagtakda og panahon sa pagpakigsulti sa mga ginikanan, mga apohan, o uban pang mga paryente aron makakat-on og dugang mahitungod sa ilang mga kinabuhi, mga kasaysayan, o mga pagkakabig sa ebanghelyo. Ikonsiderar ang paghimo og rekord sa unsay imong nahibaloan.

• Pag-apil sa indexing. Alang sa tabang sa pagsabot kon unsa kini ug unsaon pagsugod, ikonsiderar una ang pagtan-aw sa bidyo nga “FamilySearch Indexing—How it Works” (1:48), anaa sa FamilySearch.org.

• Pangita og mga ngalan sa namatay na nga mga katigulangan nga nanginahanglan sa ordinansa nga ipahigayon sa templo diha sa FamilySearch nga app o sa FamilySearch.org. Ikonsiderar ang pagsugod sa “Unsa ang imong gusto aron makasugod na?”

Human ang mga estudyante nakabaton og pipila ka mga kasinatian sa klase sa buhat sa templo ug sa kasaysayan sa pamilya, ikonsiderar ang pagdapit kanila sa pagpakigbahin sa ilang mga kasinatian. Ang mosunod nga mga pangutana makatabang kanimo sa pagtapos sa leksiyon.

• Unsa ang imong gibati nga gusto sa Ginoo nga imong buhaton aron makapadayon sa pag-apil sa buhat sa templo ug sa kasaysayan sa pamilya? Unsa nga kalainan ang mahimo niini sa imong kinabuhi?

Samtang nagtinguha ka sa pagpadayon sa pag-apil sa kasaysayan sa pamilya ug sa buhat sa templo, hinumdomi kini nga pamahayag gikan ni Presidente Russell M. Nelson:

Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org)

Ipamatuod o dapita ang mga estudyante sa pagpamatuod sa kaimportante sa buhat sa templo ug sa kasaysayan sa pamilya.

Komentaryo ug Background nga Impormasyon

Unsa ang pipila sa mga panalangin sa pag-apil sa buhat sa templo ug sa kasaysayan sa pamilya?

Si Sister Wendy W. Nelson mitudlo:

Busa, kon gusto kamo og dugang nga kalipay sa inyong kinabuhi, dugang nga kahulogan, dugang nga mga koneksiyon sa kasingkasing ngadto sa kasingkasing, dugang nga pagputing, kusog, kadasig, dugang sa daghan kaayong nindot nga mga butang, paggahin og panahon sa pagtabang niadtong anaa sa pikas bahin sa paghimo og mga pakigsaad ngadto sa Dios. Ang gahom sa Dios modagayday ngadto sa inyong kinabuhi samtang buhaton ninyo kini. (Wendy W. Nelson, “… My Soul Delighteth in the Covenants of the Lord” [pakigpulong nga gihatag sa Brigham Young University Women ’s Conference, Abr. 30, 2015])

Si Elder Dale G. Renlund sa Korum sa Napulog Duha ka Apostoles mipakigbahin:

Makaplagan ninyo dili lamang ang panalipod gikan sa tintasyon ug mga kasakit niining kalibotana, apan makaplagan sab ninyo ang personal nga gahom, gahom sa pag-usab, gahom sa paghinulsol, gahom sa pagkat-on, gahom sa pagkahimong balaan, ug gahom nga mobati ang inyong mga kasingkasing sa mga sakop sa inyong pamilya sa pagtudlo sa usag usa ug pag-ayo sa nagkinahanglan og pagkaayo. (Dale G. Renlund, “Family History ug mga Panalangin sa Templo,” Liahona, Pebrero 2017, 39)

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang pagpakita og hulagway sa sanga ug kahoy o pagdala og gamay nga sanga ug idirekta ang pagtagad sa mga estudyante ngadto sa kahoy sa gawas. Dapita ang mga estudyante sa paghunahuna sa daghang mga pagkapareho ug mga kalainan kutob sa mahimo tali sa sanga ug sa kahoy. Dapita sila sa paghunahuna kon sa unsang paagi kini nga mga butang ikatandi kanato ug sa atong mga pamilya. Ipasabot nga diha sa mga kasulatan, ang Ginoo kanunay nga mogamit sa sumbingay sa usa ka kahoy nga adunay mga gamot ug mga sanga aron sa pagtudlo mahitungod sa pamilya. Ang mga gamot sama sa atong pamilya nga nahiuna kanato, ug ang mga sanga sama kanato, ug sa atong kaliwatan nga nagagikan kanato. Dapita ang mga estudyante sa pagkonsiderar kon unsay ilang mahimo aron ang Manluluwas makapalig-on ug makapreserbar sa mga gamot, punoan, ug mga sanga sa inyong kahoy sa pamilya [family tree] samtang sila nagtuon sa 3 Nephi 25.

3 Nephi 26. Samtang kita motuo ug molihok sa unsay gipadayag sa Dios, atong giandam ang atong kaugalingon sa pagdawat og mas daghang pagpadayag.

Sa 3 Nephi 26, si Jesukristo mipatin-aw sa mga kasulatan, ug si Mormon mitudlo sa unsay angay nga buhaton aron makadawat og mas dugang pa nga mga butang nga gipadayag sa Manluluwas. Mahimong basahon sa mga estudyante ang 3 Nephi 26:6–8 mangita kon pila sa mga pagtulun-an ni Jesus ang natala diha sa Basahon ni Mormon ug ang 3 Nephi 26:9–11 mangita kon nganong dili tanan sa Iyang mga pagtulun-an gilakip. Isaad sa mga estudyante nga kon sila matinud-anong magtuon ug maggamit sa mga baroganan diha sa Basahon ni Mormon, makadawat sila og dugang nga panabot sa ebanghelyo. Ikonsiderar ang mga pangutana sama sa mosunod: “Unsay imong gibuhat sa imong kinabuhi nga nagpakita sa imong pagtuo sa Basahon ni Mormon?” “Sa unsang paagi nga ang pagbasa sa Basahon ni Mormon nga adunay tinuod nga katuyoan magdala kanimo sa pagdawat og personal nga pagpadayag?”