3 Nifae 27–4 Nifae 1

Vaaiga Aoao

Na aoao atu e Iesu Keriso Ona soo sa Nifaē e tatau ona faaigoa Lana Ekalesia i Lona suafa ma atiae i luga o Lana talalelei. Sa Ia faamalamalama mai faamanuiaga taua o loo avanoa mo i latou o e mulimuli i Lana talalelei, e aofia ai le faapaiaina e ala i le Agaga Paia. E toatolu soo sa Nifaē sa mananao e nonofo ai pea i le lalolagi ma aumai agaga ia Iesu Keriso seia oo i Lona Afio Mai Faalua, ma sa tuuina atu i ai lenei manao. Sa loloto le aafia o tagata i le auaunaga a le Faaola ia i latou, ma sa latou ola i le amiotonu mo le toeitiiti 200 tausaga.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

3 Nifae 27, Vaega 1

Faamoemoega o le lesona: O lenei lesona e mafai ona fesoasoani i tagata aoga ia malamalama po o le a le talalelei a le Faaola ma le taua o le igoa o le Ekalesia.

• Sauniuniga a le tagata aoga: E mafai ona e valaaulia tagata aoga e faitau le 3 Nifae 27:1–10 ma saili mea na aoao atu e le Faaola i Ona soo sa Nifaē e uiga i Lana Ekalesia.

• Vitio: “O le Igoa Sa’o o le Ekalesia” (15:43; matamata mai le faailo taimi 3:26 i le 4:45)

• Ata: O se atatusi o se ekalesia

• Fautuaga faafaiaoga faavitio: I le agai atu i le faaiuga o le lesona, e valaaulia ai tagata aoga e tusi se ata o se ekalesia ma lisi i lalo ifo ia upumoni e uiga i le talalelei a le Faaola. E mafai ona e faaali atu le ekalesia i luga o le lau o lau komepiuta ma faaaoga le vaega o faamatalaga ina ia mafai ai e tagata aoga ona faaopoopo o latou malamalamaaga i ai.

3 Nifae 27, Vaega 2

Faamoemoega o le lesona: O lenei lesona e mafai ona fesoasoani i tagata aoga ia maua le mana faapaiaina o le Faaola a o latou faia taumafaiga e ola ai i Lana talalelei.

• Sauniuniga a le tagata aoga: Valaaulia tagata aoga e talanoaina ma isi pe na faapefea ona fesoasoani le Agaga Paia ia i latou ia faapaiaina, pe sili atu foi ona pei o le Faaola.

• Vitio: “Manatua Le Ua Tatou Faalagolago i Ai” (10:25; matamata mai le faailo taimi 0:00 i le 2:09)

• Anotusi e faaali atu: O auala e mafai ai e tagata aoga ona faaaoga upumoni sa latou suesueina i o latou olaga (o loo lisi atu i le faaiuga o le lesona)

• Fautuaga faafaiaoga faavitio: Mafaufau e valaaulia tagata aoga e faaaoga le vaega o talanoaga e tali atu ai i le fesili “O a nisi o auala e mafai ona tatou valaaulia ai le mafutaga faifai pea a le Agaga Paia ina ia mafai ona faamanuiaina i tatou e le aunoa i Lana faatosinaga faapaiaina?” E mafai ona fesoasoani lenei mea ia te oe e vave maua ai se lisi o manatu e mafai ona fesoasoani i tagata aoga.

Atamai i Aoaoga Faavae: 3 Nifae 27:20

Faamoemoega o le lesona: O lenei lesona e mafai ona fesoasoani i tagata aoga e tauloto ai le mau faasino ma le fasifuaitau autu o le mau mo le 3 Nifae 27:20, faamatala le aoaoga faavae ua aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga masani o le olaga.

• Sauniuniga a le tagata aoga: Mafaufau e valaaulia tagata aoga e amata ona tauloto le mau ma le fuaitau autu o le mau mo le 3 Nifae 27:20: “O mai ia te au ma ia papatiso …, ina ia faapaiaina outou i le taliaina o le Agaga Paia.”

• Fautuaga faafaiaoga faavitio: Mafaufau e faaali atu le polokalama o le Atamai i Aoaoga Faavae e fesoasoani ai i tagata aoga e tauloto le mau faasino o le atamai i aoaoga faavae ma le fasifuaitau autu.

3 Nifae 28

Faamoemoega o le lesona: O lenei lesona ua faamoemoe e fesoasoani i tagata aoga ia lagona se faateleina o le manao e aumaia isi ia Iesu Keriso.

• Sauniuniga a le tagata aoga: Valaaulia tagata aoga e mafaufau e uiga i aafiaga na latou maua i le faasoaina atu o le talalelei ma mea na fesoasoani ia i latou e mananao ai e fai mea sa latou faia.

• Anotusi e faaali atu: Fesili o le iloiloga o le tagata lava ia e lata i le amataga o le lesona; mau faasino mo le gaoioiga suesue e lata i le faaiuga o le lesona

• Vitio: “O Lou Aso mo se Misiona” (3:31); “E Ala i Mea Laiti ma Faatauvaa: Faasoaina Atu o le Talalelei” (3:19)

4 Nifae

Faamoemoega o le lesona: O lenei lesona e mafai ona fesoasoani i tagata aoga ia lagonaina le alofa sili atu mo le Tama Faalelagi ma Iesu Keriso ina ia mafai ai ona latou liua loloto atili ia i Laua.

• Sauniuniga a le tagata aoga: Mafaufau e valaaulia tagata aoga e suesue le uiga o le upu liua i punaoa o loo maua a le Ekalesia. O le isi mea, e mafai ona e valaaulia tagata aoga e fesili i se tasi latou te iloa po o le a le uiga ia i latou o le liua ia Keriso.

• Vitio: “O le Oa Silisili” (12:44; matamata mai le faailo taimi 7:02 i le 8:19)

• Fautuaga faafaiaoga faavitio: Afai e te filifili e faitau le 4 Nifae 1:2–18 faatasi o se vasega, e mafai ona e setiina le lau o lau komepiuta i le vaaiga o le potu-ata ina ia mafai ona e vaai i le vasega atoa. A uma ona faitau e se tagata se fuaiupu, valaaulia o ia e faasino atu i se itu patino. Ona fai atu lea i le tagata aoga o loo faaali mai i le itu lena i luga o le lau o lau komepiuta e faitau le fuaiupu e sosoo ai. O tagata aoga e le lagonaina le toafimalie e faitau e tatau ona faatagaina e teena.