4 Nifae

“Faaliliuina i le Alii”

Mo le afe tausaga, sa sailia e tagata taitoatasi, aiga, ma nuu ni tulaga lelei e pei o le fealofani, filemu, ma le lotogatasi. Atonu e foliga mai e le mafai ona ausia nei mea, ae o loo i ai. O le tala i le 4 Nifae o se faataitaiga o lena mea. O se tasi o ki i le mauaina o nei faamanuiaga o le faalolotoina lea o lo tatou liua i le Alii ma maua le alofa o le Atua i o tatou loto. O lenei lesona e mafai ona fesoasoani ia te oe e lagona ai le alofa sili atu mo le Tama Faalelagi ma Iesu Keriso ina ia mafai ai ona e matua liua loloto ia i Laua.

Saunia e ala i le suesue i le afioga a le Atua. Ua tuuina mai ia i tatou le aoaoina atu o upumoni o loo maua i tusitusiga paia ma aoaoga a perofeta ma aposetolo o aso e gata ai. O le suesue ma le agaga tatalo i le afioga a le Atua, e mafai ai ona tatou ogatusa ma le Agaga Paia ma maua malamalamaaga ma taitaiga.

Sauniuniga a le tagata aoga: Mafaufau e valaaulia tagata aoga e suesue le uiga o le upu liua i punaoa o loo maua a le Ekalesia. Pe i se isi itu, e mafai ona e valaaulia tagata aoga e fesili i se tasi latou te iloa po o le a le uiga ia i latou o le liua ia Keriso.

Gaoioiga e Mafai Ona Aoao Ai

O se avanoa faalelagi

Vaai faalemafaufau pe faape’i le tulaga o le a i ai pe afai o oe ma tagata o siomia oe e alofagia ma taumafai e mulimuli ia Iesu Keriso.

Mafaufau e tuu tagata aoga i ni vaega toalaiti ma tuu atu ia i latou e talanoaina puupuu fesili nei.

• O le a faapefea ona ese ai lou nuu?

• O le a faapefea ona ese ai lau aoga po o le ekalesia?

• O le a faapefea ona ese ai lou aiga?

O le tusi o le 4 Nifae o loo i ai le tala i tagata na ola ina ua mavae le asiasiga a le Faaola i le atu Amerika. A o e suesue i o latou aafiaga, vaavaai mo le aafiaga na i ai o Iesu Keriso ma Lana talalelei i luga o nei tagata. Mafaufau pe mafai faapefea e nei aoaoga ona aafia ai le ala e te filifili e ola ai i lou olaga.

O le aafiaga o le talalelei a le Faaola

Faitau le 4 Nifae 1:1–2, ma vaavaai mo le aafiaga na faia e le Faaola ma Ana aoaoga i tagata.

• O a ni mea sa e maitauina?

Atonu e te manao e faailoga le fasifuaitau “sa liliu tagata uma i le Alii” i le fuaiupu 2.

Mafaufau e valaaulia tagata aoga o e na faamaeaina le gaoioiga sauniuni e faasoa mai mea sa latou aoaoina e uiga i le ia liua i le Alii. E mafai foi ona e faasoa atu le faauigaga lenei.

Ina ia liua i le Alii o lona uiga o le “suia o talitonuga o se tasi, lona loto, ma lona olaga ina ia talia ma ia ogatasi ma le finagalo o le Atua … [ma] avea ai o se soo o Keriso” (Taiala i Tusitusiga Paia, “Liliuga, Liliu Mai,” scriptures.ChurchofJesusChrist.org).

O faamanuiaga o le liua

Na oo sa Nifaē ma sa Lamana i faamanuiaga ofoofogia ona o lo latou liua ia Iesu Keriso. I lau api faamaumau mo suesuega, tusi ai “Faamanuiaga mai le Liuaina” i le ogatotonu o se itulau.

E faaopoopo atu i tagata aoga o loo tusia le ulutala i a latou api faamaumau mo suesuega, e mafai ona e tusia i luga o le laupapa. E mafai e tagata aoga ona tusi a latou tali i luga o le laupapa pe a uma ona suesue i fuaiupu nei.

Faitau le 4 Nifae 1:2–18 ma faailoga upu po o fasifuaitau e faapupula ai faamanuiaga na latou mauaina. I lau pepa, tusi ai upu po o fasifuaitau nei faataamilo i le ulutala “Faamanuiaga mai le Liuaina”. (Atonu e fesoasoani le iloa o le uiga o nisi o upu i le fuaiupu 16. Faanunununu e faasino i vavao i nofoaga faitele po o vevesi, faitaaga e faasino i agasala faalefeusuaiga, ma le faamataaitu e faasino i le tuinanau ma le le mama.)

Mafaufau po o le fea o nei faamanuiaga e te manao e maua atili i lou lava olaga. Mafaufau e li’o na faamanuiaga i luga o le itulau i lau api faamaumau mo suesuega.

Valaaulia tagata aoga e faasoa mai mea na latou aoaoina pe lagonaina mai a latou suesuega o fuaiupu 2–18. E mafai ona e valaaulia ni tagata aoga eseese e faasoa mai se fasifuaitau e faapitoa le taua ia i latou ma faamatala lona taua.

• O le a se mea sa tulagaese ia te oe mai nei fuaiupu? Aisea?

• E faavae i mea ua e aoaoina mai nei fuaiupu, e mafai faapefea ona e faaumaina le fuaiupu lenei: “Pe a tatou liua i le Alii …”?

O se upumoni e tasi e mafai ona tatou faailoa mai nei fuaiupu o le pe a tatou liua i le Alii, e faamanuiaina i tatou i le fiafia ma le lotogatasi o ni fanau a Keriso.

• Aisea e te manatu ai o le liua ia Iesu Keriso ma le ola ai i Lana talalelei e mafai ona maua ai na faamanuiaga?

• E mafai faapefea e le malamalama i lenei upumoni ona aafia ai au gaoioiga i aso uma?

O le alofa o le Atua

Sa faasoa mai e Elder Jeffrey R. Holland o le Korama a Aposetolo e Toasefululua le matauga lenei e uiga i le mafuaaga na mafai ai e nei tagata ona ola i se tulaga o le fiafia ma le lotogatasi.

O le a le ki i lenei faateteleina faafuasei o le ola fiafia ma le faamalieina? O loo maua’a i le anotusi i se fuaiupu e tasi: “O le alofa o le Atua … sa mau i loto o tagata” [4 Nifae 1:15]. A oo ina seti e le alofa o le Atua le maualuga auaumama mo o tatou olaga, mo a tatou fegalegalea’iga o le tasi ma le isi ma taualuga i o tatou lagona mo tagata uma, ona mou atu ai lea o le faanofo ituaiga tuai, tuuitiitia ai le faipona, ma fevaevaea’iga faaletagata, ae faateleina le toafilemu. O le mea tonu lena na tupu i la tatou faataitaiga i le Tusi a Mamona. Sa le’i toe i ai ni sa Lamanā, po o ni sa Iakopō, po o ni sa Iosefā, po o ni sa Soramā. Sa le toe i ai lava ni “sa ituaigā”. Sa faaaoga e tagata na o le faasinomaga maualuga fou e tasi. Fai mai, na lauiloa i latou uma “o le fanau a Keriso” [4 Nifae 1:17]. (Jeffrey R. Holland, “O Le Oa Silisili,” Liahona, Nov. 2021, 9)

Mafaufau e faailoga le fasifuaitau i le fuaiupu 15 e uiga i le alofa o le Atua o loo nofo i loto o tagata. Ina ia i ai le alofa o le Atua i o tatou loto e mafai ona faauigaina o le lagonaina o le alofa o le Atua mo i tatou ma mo isi. E mafai foi ona faauigaina o le lagona o le alofa i le Tama Faalelagi ma Iesu Keriso.

• O a nisi o faatinoga e mafai ona tatou faia o le a fesoasoani tatou te lagona ai le alofa sili atu mo le Tama Faalelagi ma Iesu Keriso?

Saili ni tali se tele i le fesili talu ai. I le avea ai ma se vaega o lenei talanoaga, atonu e aoga le fai atu i tagata aoga e faamatala mai mea na fesoasoani ia i latou e lagona ai le alofa sili atu mo le Atua. Atonu foi e te manao e faasoa atu faataitaiga mai lou lava olaga.

O se tasi o auala e mafai ai ona tatou lagonaina le alofa sili atu mo le Tama Faalelagi ma Iesu Keriso e ala i le aoao e uiga i ai ma le iloaina o i Laua i tusitusiga paia.

E mafai e tagata aoga ona faauma taitoatasi le gaoioiga lenei pe fai faatasi foi i ni vaega toalaiti.

Faaalu se taimi e suesue ai fuaitau o mau e uiga i le Tama Faalelagi ma Iesu Keriso lea e mafai ona fesoasoani ia te oe e lagona ai le alofa sili atu mo i Laua. Gauai atu i mea ua e aoaoina e uiga i o Laua uiga, manaoga, ma matafaioi. E mafai ona e sailiili i faaupuga e pei o le “Tama oi le Lagi” po o le “Iesu Keriso” e faaaoga ai meafaigaluega e suesue ai e pei o le Taiala i Tusitusiga Paia, le Taiala mo Autu, po o le faatinoga o le sailiga o le Potutusi o le Talalelei.

Valaaulia tagata aoga e faasoa mai fuaiupu na latou maua e faapitoa le taua ia i latou. Fai atu ia i latou e faamatala mai pe mafai faapefea e upumoni na aoaoina ona fesoasoani ia i tatou e lagona ai le alofa sili atu mo le Tama Faalelagi po o Iesu Keriso.

• A uma ona faasoa mai tagata aoga, mafaufau e valaaulia i latou e tali le fesili lenei i a latou api faamaumau mo suesuega. Ona molimau atu lea i upumoni na outou talanoaina i le asō.

• O le a se mea o le a e taumafai e fai i aso a sau e mafai ona fesoasoani e te liua atili ai ia Iesu Keriso?

Manatu ma Talaaga o Faamatalaga

O le a se mea e mafai ona fesoasoani ia te au e faalolotoina ai lo’u liua i le Alii?

Na aoao mai e Sister Bonnie L. Oscarson, o lē sa avea ma Peresitene Aoao o Tamaitai Talavou:

E tupu le liua pe a tatou filigā i le faia o a tatou tatalo, suesueina o a tatou tusitusiga paia, auai i le lotu, ma ia agavaa e auai i sauniga o le malumalu. E oo mai le liua a o tatou faatinoa ia mataupu faavae amiotonu na tatou aoaoina i totonu o tatou aiga ma le potuaoga. E oo mai le liua a o tatou ola i ni olaga mama ma paia ma fiafia i le mafutaga a le Agaga Paia. E oo mai le liua ao tatou malamalama i le Togiola a Iesu Keriso, faailoa o Ia o lo tatou Faaola ma le Togiola, ma faaaogaina le Togiola i o tatou olaga. (Bonnie L. Oscarson, “Ia Outou Liua,” Liahona, Nov. 2013, 77–78)

Ae faapefea pe afai ou te lagona e le o tupu le liua mo au?

Na aoao mai Elder David A. Bednar o le Korama o Aposetolo e Toasefululua:

Mo le toatele o i tatou, o le liuaina o se faagasologa e faifai pea, ae le o se mea e tupu i se taimi e tasi e mafua mai i se aafiaga mamana pe maoae foi. O lea fuaitau ma lea fuaitau ma lea fuaiupu i lea fuaiupu, e faasolosolo malie toetoe lava ina le maitauina, o o tatou faamoemoega, o o tatou manatu, o a tatou upu, ma a tatou mea e fai e ogatusa ma le finagalo o le Atua. O le liua i le Alii e manaomia ai le tumau ma le onosai. (David A. Bednar, “Faaliliuina i le Alii,” Liahona, Nov. 2012, 107–108)

E mafai faapefea e le i ai o le alofa o le Atua i lo’u loto ona fesoasoani ia te a’u ia maua le lotogatasi sili atu ma isi?

Na aoao mai Elder Dale G. Renlund o le Korama a Aposetolo e Toasefululua:

O le lotogatasi e manaomia ai taumafaiga. E atia’eina pe a tatou faafaileleina le alofa o le Atua i o tatou loto ma tatou taulai atu i lo tatou taunuuga e faavavau. Tatou te lotogatasi e ala i lo tatou faasinomaga autu lautele o ni fanau a le Atua ma lo tatou tuuto atu i upumoni o le talalelei toefuataiina. Ona o lena mea, o lo tatou alolofa i le Atua ma le avea o i tatou ma soo o Iesu Keriso, e faaosofia ai le popole moni mo isi. (Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 84)

Gaoioiga Faaopoopo e Aoao Ai

O se faataitaiga o se faigamalaga i le liuaina

Mafaufau e faaali le vitio “O Se Suiga Tele: Liuaina,” (2:47) ma vaavaai mo mea na faia e Alejandra ina ia liua ai i le Alii ma faamanuiaga sa ia maua.

4 Nifae 1:1–18. Faatuina o Siona

Faamanatu i tagata aoga le aai o Enoka ma pe aisea na faaigoa ai i latou e le Alii o “Siona” (tagai i le Mose 7:18). Fesili atu ia i latou pe na faapefea ona latou matauina uiga o loo faamatalaina i le Mose 7:18 i tagata o loo i le 4 Nifae. E mafai foi ona e valaaulia tagata aoga e faitau le 3 Nifae 26:19 e vaai ai i se isi faamatalaga o nei tagata e mafai ona faatusatusa i le nuu o Enoka.

4 Nifae 1:19–49. O le natura faataumaoi o le agasala

I le 4 Nifae 1:19–49, tatou te faitau ai e uiga i le faaitiitia o le faaleagaga o tagata. Ina ia faapupula atu lenei mea, mafaufau e faaali atu le saunoaga lenei a Elder Jeffrey R. Holland o le Korama a Aposetolo e Toasefululua: “O se faataoto ua leva e faapea, o se malaga e afe maila e amata i le laa e tasi, o lea la ia leoleo la outou laa” (Jeffrey R. Holland, “Ia Lē Toe Ulu Mai I Lo’u Agaga Lē Ita Mai ia te A’u,” Liahona, Me 2010, 45).

Tuu atu i tagata aoga e suesue le 4 Nifae 1:20–35, 38–45, ma vaavaai mo laasaga po o faatinoga eseese na faia e tagata na taitaieseina ai i latou mai ia Iesu Keriso ma agai atu ai i le amioleaga ma le faanoanoa.