3 Nifae 27, Vaega 2

O Le Faapaiaina e ala ia Iesu Keriso

Pe o i ai ni taimi na e manao ai ia mama atili faaleagaga? Ina ua aoao atu e Iesu Keriso Ona soo i le atu Amerika anamua, sa Ia faamalamalama atu faamanuiaga taua o loo avanoa mo i latou o e mulimuli i Lana talalelei, e aofia ai le faapaiaina e ala i le Agaga Paia. O lenei lesona e mafai ona fesoasoani ia te oe e malamalama ai i le ala e maua ai le mana faapaiaina o le Faaola a o e faia ni taumafaiga e ola ai i Lana talalelei.

Fesoasoani i tagata aoga ia lagonaina se lagona o le auai ai. O le seminare e tatau ona avea o se siosiomaga e saogalemu ma lagolagoina ai tagata aoga ma e faatauaina ai a latou faasoa. Faaali atu lou alofa ma le popole mo tagata aoga a o e fegalegaleai ma i latou. Faamalosi’au i tagata o le vasega e faalogo i le tasi ma le isi ma faataua manatu a o latou uo.

Sauniuniga a le tagata aoga: Valaaulia tagata aoga e faitau parakalafa muamua e tolu o le “Agaga Paia” i le Taiala i Tusitusiga Paia (scriptures.ChurchofJesusChrist.org). Valaaulia i latou e o mai saunia e faasoa mai pe latou te manatu e mafai faapefea e le Agaga Paia ona fesoasoani ia i latou ia faapaiaina, pe avea atili e pei o le Faaola.

Gaoioiga e Mafai Ona Aoao Ai

Le Mamā

Ina ia fesoasoani i tagata aoga e sauniuni e suesue e uiga i lo latou manaomia ona faamamaina mai a latou agasala, mafaufau e faasoa atu le tala lenei.

Na faasoa mai e Elder Allen D. Haynie o le Fitugafulu le tala lenei mai le taimi o lona tamaitiiti.

Ina ua iva o’u tausaga, sa sau le tina o lo’u tina, lauulu sina, e fa-futu-sefulutasi-inisi lona umi (150 cm) ma matou nonofo mo ni nai vaiaso i lo matou aiga. I se tasi aoauli a o i ai o ia iina, sa tonu ia i matou ma o’u uso matutua e toalua o le a eli se lua agai i le isi itu o le auala mai lo matou fale. Ou te le iloa pe aisea na matou faia ai; o nisi taimi e eli ai e tama matutua ni pu. Sa fai si o matou taugapalapala, ae le o se mea matou te ono oo ai i se faafitauli tele Sa iloa mai e isi tama o lo matou pitonuu le manaia o le eli o se pu ma sa amata ona fesoasoani mai. Ona atili ai lava lea ona matou taufai taugaeleelea faatasi ai. Sa malō le palapala, o lea na matou toso mai ai se faagaau o le togalaau ma ki atu ai sina vai laitiiti i le ta’ele o le pu e faavaivai ai le palapala. Sa pipii ni palapala i o matou tino a o matou eliina, ae sa oo ina loloto atili le pu.

Sa filifili se tasi o le matou vaega e tatau ona fai le pu ma se vai taele, o lea na matou faatumuina ai i vai. Ona o a’u sa pito laitiiti ma manao ia talia au e le isi vaega, o lea sa faatauanauina ai au e puna i totonu e faataitai. O lea la ua ou matua palapala lava. Ou te lei muai fuafua faapea e lilofia uma i le palapala, ae o le mea lena na ou iu i ai.

Ina ua amata ona malulu, sa ou kolosia le auala, ma le faamoemoe ou te savali atu i totonu o le matou fale. Sa faafeiloai au e lo’u tinamatua i le faitotoa ma sa musu e avatu au i totonu. Sa ia fai mai afai na te faatagaina au i totonu, o le a ou soli atua le palapala i totonu o le fale sa faatoa uma ona ia faamamaina. O lea sa ou faia ai le mea e faia e soo se iva tausaga i ia tulaga ma tamoe i le faitotoa i tua, ae sa sili atu ona vave o ia nai lo le mea sa ou mafaufauina. Sa ou ita ma tatū o’u vae, ma avaavau atu ou te alu atu i totonu o le fale, ae sa tapuni pea lava le faitotoa.

Sa ou susu, palapala, ma maalili, ma i o’u mafaufauga faatagata, ai a ou oti i lo’u lava tuafale. Na iu ina ou fesili atu ia te ia po o le a le mea e tatau ona ou faia ina ia ou alu atu ai i totonu o le fale. A o lei oo i ai so’u mafaufau, sa ou tūtū i tuafale a o faapasī mai e lo’u tinamatua le faagaau. I le mae’a ai o lenei faatinoga lea sa foliga mai e faavavau lava o faia, sa tonu i lo’u tinamatua ua lava lo’u mama ma faataga ai au i totonu o le fale. Sa mafanafana totonu o le fale, ma sa mafai ona fai ou ofu mago ma mama. (Allen D. Haynie, “Manatua Le Ua Tatou Faalagolago I Ai,” Liahona, Nov. 2015, 121)

• O a faatusatusaga faaleagaga e mafai ona e faia i le tala a Elder Haynie ma o tatou olaga?

I le 3 Nifae 27, o se vaega o le lauga a le Faaola i Ona soo sa Nifaē e uiga i Lana talalelei, sa Ia aoao atu ai e uiga i taunuuga o le agasala ma le auala e mafai ai ona tatou faatoilaloina i latou ma mama ai faaleagaga.

Faitau le 3 Nifae 27:19, ma vaavaai mo aoaoga a le Faaola.

• O le a se mea o aoao mai e lenei fuaiupu ia te oe e uiga i lou manaomia o Iesu Keriso ma Lana Togiola?

O le faasoaina atu o le parakalafa lenei e mafai ona fesoasoani i tagata aoga e iloa ai o latou manaoga patino mo le mana faamama o le Faaola.

E mafai e Iesu Keriso ona faamama oe mai le pisia o le agasala ma fesoasoani ia te oe ia paia. Mafaufau i lou manaomia ona faamamaina mai le agasala ma pe ono faape’i pe faape’i le lagonaina o le mama faaleagaga. A o e suesue i le asō, vaavaai mo aoaoga e mafai ona fesoasoani ia te oe e malamalama atili ai pe mafai faapefea ona e maua le mana faapaiaina o le Faaola i lou olaga.

Ua faamatala mai e Iesu Keriso le ala e mafai ai ona faapaiaina i tatou e ala i le Agaga Paia

I le 3 Nifae 27:20–22, na aoao mai ai e le Faaola mea e mafai ona tatou faia e maua ai Lona mana faapaiaina ma agavaa ai mo le ola e faavavau. Ina ia fesoasoani i au suesuega o nei fuaiupu, kopi le siata lenei i lau api faamaumau mo suesuega.

Atonu foi e te manao e kopi le siata lenei i luga o le laupapa ina ia mafai ai e tagata aoga ona faatumu o se vasega pe a uma ona suesue.

Poloaiga	Faamanuiaga

Faitau le 3 Nifae 27:20–22 ma faatumu le siata e fua i mea e te maua.

O le3 Nifae 27:20 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• E faapefea ona e aoteleina aoaoga a le Faaola i le fuaiupu 20 o se faamatalaga o le upumoni?

O se upumoni e tasi e mafai ona tatou aoaoina o le afai tatou te salamo ma o mai ia Iesu Keriso e ala i le papatisoina, ona mafai lea ona faapaiaina i tatou e ala i le mauaina o le Agaga Paia ma tutu ma le le ponā i Ona luma i le aso gataaga.

O le faapaiaina o lona uiga o le “tuusaolotoina mai le agasala, atoatoa, mama, ma paia e ala i le Togiola a Iesu Keriso” (Taiala i Tusitusiga Paia, “Faapaiaina,” scriptures.ChurchofJesusChrist.org).

• E faapefea ona fesoasoani le salamo ma le papatisoga tatou te oo ai i le faapaiaina e ala ia Iesu Keriso?

• E mafai faapefea ona e tali atu i se tasi o loo taumanatunatu pe faapefea ona faatatau nei poloaiga ia i latou pe a uma ona latou mauaina le sauniga o le papatisoga?

Afai e manaomia, fesoasoani i tagata aoga ia malamalama talu ai tatou te le atoatoa, ua tatou maua avanoa e salamo ai i aso taitasi. E tatau foi ona faaauau pea ona tatou taumafai e tausia a tatou feagaiga o le papatisoga pe a uma ona papatisoina. O le aai ma feinu ma le agavaa i le faamanatuga tatou te maua ai se avanoa i vaiaso taitasi e faafou ai na feagaiga. O nei faatinoga uma e fesoasoani ia i tatou ia mama atili ai faaleagaga.

O saunoaga a Peresitene Russell M. Nelson ma Boyd K. Packer i le vaega o “Faamatalaga ma Faamatalaga o Talaaga” e mafai ona faaaoga e fesoasoani e aoao atu ai nei manatu faavae.

Faapaiaina e ala i le Agaga Paia.

O afioga a Iesu Keriso i le fuaiupu 20 ua aoao mai ai i tatou o le ala e fesoasoani ai o Ia ia i tatou ia faapaiaina o le taliaina lea o le Agaga Paia.

Na aoao mai Peresitene Henry B. Eyring o le Au Peresitene Sili e uiga i le sootaga i le va o le Togiola a le Faaola ma le faatosinaga faapaiaina a le Agaga Paia.

Afai ua e lagonaina le aafiaga a le Agaga Paia i le aso nei, atonu e avea lena mea o se faamaoniga faapea ua galue le Togiola i lou olaga. Mo lena mafuaaga ma le tele o isi, o le a lelei pe a e tuuina oe lava i nofoaga ma galuega ia e valaaauliaina ai uunaiga a le Agaga Paia. O le lagonaina o le aafiaga a le Agaga Paia e galue i itu uma e lua: o le Agaga Paia e na o malumalu mama lava e nofo ai, ma le mauaina o le Agaga Paia e faamamaina ai tatou e ala i le Togiola a Iesu Keriso. (Henry B. Eyring, “Gifts of the Spirit for Hard Times,” Ensign, Iuni 2007, 23)

• Na faapefea ona e iloaina aafiaga faamamaina a le Agaga Paia i lou olaga?

  I le avea ai o se vaega o le talanoaina o le fesili na muamua atu, mafaufau e faasoa atu faataitaiga o auala na fesoasoani ai le Agaga Paia ia te oe e faateleina lou mama faaleagaga. E mafai ona aofia ai auala ua faateleina ai e le Agaga Paia lou manao e mulimuli ia Iesu Keriso po o uunaiga ua tuuina atu e le Agaga Paia ia te oe e aloese ai mai amioga sa taitai ese ai oe mai le Faaola.

• O a nisi o auala e mafai ona tatou valaaulia ai le mafutaga faifai pea a le Agaga Paia ina ia mafai ai ona faamanuiaina i tatou e le aunoa i ana faatosinaga faapaiaina?

Faaaogaina o aoaoga a le Faaola i lou olaga

O upumoni ua e suesueina i le asō e faigofie ae taua le mulimuli ai pea lava pea ina ia mafai ai ona e toe foi atu ma le agavaa i le afioaga o le Atua. Mafaufau pe o le a faapefea ona e faaaogaina i lou olaga mea sa e aoaoina ma lagonaina. E mafai ona e filifili se tasi pe sili atu o filifiliga nei pe filifili se auala ese e faaaoga ai nei aoaoga.

Faaali atu filifiliga nei ma tuu atu i tagata aoga ia lava se taimi e mafaufau loloto ai ma atonu e tusi ai se fuafuaga e faatino i a latou api faamaumau mo suesuega. Pe a uma, molimau atu e uiga i upumoni na o tou talanoaina i lenei lesona.

1. Ia sili atu ona fuafua lelei e salamo i aso taitasi ma filifili e mulimuli atoatoa atili i le Faaola.

2. Ia avea lou auai i le sauniga o le faamanatuga o se vaega sili ona anoa o lau tapuaiga i le Aso Sa.

3. Faailoa se agasala po o se mea faalavefau o loo faatapulaaina ai lau mafutaga ma le Agaga Paia. Fai faatinoga talafeagai e aveese ai lena agasala po o le faalavefau mai lou olaga.

4. Amata ona fai se mea o le a e maua atili ai le mafutaga a le Agaga Paia.

Manatu ma Talaaga o Faamatalaga

E mafai faapefea e le salamo i aso taitasi ona fesoasoani ia ou maua le mana faapaiaina o le Faaola?

Na aoao mai Peresitene Russell M. Nelson:

E leai se mea e sili atu ona saoloto, sili atu ona malualii, pe sili atu ona tāua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e lē o se mea e faatasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso. …

… E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau. Ae ua Ia faamoemoeina i tatou ia faateleina lo tatou mamā. O le salamo i aso taitasi o le ala lea i le mamā, ma o le mamā na te aumaia le mana. (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019,67, 68)

E mafai faapefea ona faamamaina a’u mai a’u agasala pe a uma ona ou papatiso?

Sa aoao mai Peresitene Boyd K. Packer (1924–2015) o le Korama a Aposetolo e Toasefululua:

E masani lava ona tatou malamalama, e faalagolago i le salamo, o le sauniga o le papatisoga e tafieseina ai a tatou agasala. O nisi e taumanatunatu pe na vave tele ona papatisoina i latou. Maimau pe ana mafai ona papatisoina i latou i le taimi nei ma maua se amataga mama. Ae e lē manaomia lena mea! E ala i le sauniga o le faamanatuga, ua e faafouina ai feagaiga na osia i le papatisoga. Pe a e ausia tuutuuga uma o le salamo, po o le a lava le faigata, e mafai ona faamagaloina oe ma o le a le toe faalavelaveina lou mafaufau i au solitulafono. (Boyd K. Packer, “Washed Clean,” Ensign, Me 1997, 10)

E faapefea ona fesoasoani le Agaga Paia ia i tatou ia maua ni aafiaga o le mana faamama a le Faaola?

Na faamalamalama mai e Elder Kevin R. Duncan o le Fitugafulu:

E faia e le Agaga Paia se matafaioi autu i le fesoasoani ia i tatou e faatoilalo le agasala ma suia i se alofa o le amiotonu ma se gafatia e tausi ai poloaiga a le Atua.

Ua ou molimauina le mana faapaiaina o le Agaga i olaga o le toatele o tagata. Ua ou vaai i alii leaga ua avea ma ni alii lelei, ma ua avea alii lelei ma alii maoae, a o gauai atu o latou loto i faatosinaga faamamaina a le Agaga. O le Agaga Paia o se faapaia. (Kevin R. Duncan, “O Matafaioi Paia a le Agaga Paia,” Liahona, Oke. 2014, 65)

Ina ia malamalama atili i le auala e faamamaina ai i tatou e le Faaola e ala i le Agaga Paia, mafaufau e matamata le “Talanoaga Faafesagai ma Peresitene Eyring ma Elder Holland,” o loo maua i le ChurchofJesusChrist.org, mai le faailo taimi 1:03:17 i le 1:09:16.

Ata vitio

Ina ia matamata i se ata [faaaliaga] o nisi o aoaoga a le Faaola i le 3 Nifae 27, matamata i le “Jesus Christ Declares the Name of His Church and His Doctrine” mai le faailo taimi 3:26 i le 8:03.

Gaoioiga Faaopoopo e Aoao Ai

O se isi filifiliga mo le amataga o le lesona

A o lei faitauina le 3 Nifae 27:19, e mafai ona e valaaulia tagata aoga e vaai faalemafaufau faapea e i ai se mea taua latou te auai atu i ai, e pei o se faatalanoaga po o se fonotaga, o le a manaomia ai ona fai lelei o latou laei. Ona tuu atu lea ia i latou e mafaufau pe o a ni o latou lagona pe afai, a o lei amataina le gaoioiga, sa masaa se mea i o latou lavalava ma pisipisia ai. Ona e fai atu lea i tagata aoga e mafaufau e uiga i mea e mafai ona mafua ai ona le mama o tatou agaga ma pe o a ni o tatou lagona i le tutu ai i luma o le Atua i se tulaga le mama faaleagaga.

3 Nifae 27:27. “O a ituaiga o tagata e tatau ona outou i ai?”

I le 3 Nifae 27:23–33, na tuuina mai ai e le Faaola faatonuga i Ona soo e toasefululua ma aoao i latou e uiga i o latou tiutetauave, e aofia ai a latou matafaioi o ni faamasino o tagata. Valaaulia tagata aoga e faitau le 3 Nifae 27:27, ma vaavaai mo se upumoni e mafai ona tatou aoaoina mai le poloaiga na tuu atu e le Faaola i Ona soo e mafai ona faaaoga i o latou lava olaga. O se tasi o upumoni e ono faailoa mai e tagata aoga o le ua poloaiina e le Alii Ona soo ia avea e pei o Ia.

E mafai e tagata aoga ona suesue i mea na tutupu mai le soifuaga o le Faaola lea e faaalia ai Lana faataitaiga atoatoa ma vaavaai mo uiga auaumama o le Faaola latou te mananao e faataitai i ai. E mafai ona latou faia se fuafuaga e atiina ae atoatoa ai se tasi o Ona uiga auaumama ina ia mafai ai ona latou avea atili e faapei o Ia.