Atamai i Aoaoga Faavae: 3 Nifae 27:20

“O Mai ia te A’u ma Ia Papatiso … , Ina ia Faapaiaina Outou i le Taliaina o le Agaga Paia,”

I lau suesuega o le 3 Nifae 27, ua e aoao ai e uiga i le faapaiaga e mafai ona e maua mai le Agaga Paia a o e ola i le talalelei a le Faaola. O lenei lesona e mafai ona fesoasoani ia te oe e tauloto le mau faasino ma le fasifuaitau autu o le mau mo le 3 Nifae 27:20, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga.

Fesoasoani i tagata aoao e atiina ae le tomai o le talanoaina o talitonuga o le talalelei faatasi ma isi. E faateleina le malamalama o tagata aooga pe a latou faamatalaina le talalelei i le tasi ma le isi. Fatu se siosiomaga e lagona ai e tagata aoga le toafimalie e faasoa atu o latou malamalama i upumoni o le talalelei.

Sauniuniga a le tagata aoga: Mafaufau e valaaulia tagata aoga e amata ona tauloto le mau ma le fuaitau autu o le mau mo le 3 Nifae 27:20: “O mai ia te a’u ma ia papatiso … , ina ia faapaiaina outou i le taliaina o le Agaga Paia.”

Gaoioiga e Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina e aoao atu pe a maea le lesona o le “3 Nifae 27, Vaega 2,” o le lesona faatatau mo le fuaitau o le atamai i aoaoga faavae o le 3 Nifae 27:20. Afai e manaomia le faamei o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Mai lau suesuega o le 3 Nifae 27:20, ua e aoaoina ai le upumoni lenei: Afai tatou te salamo, o mai ia Iesu Keriso, ma papatisoina, ona mafai lea ona faapaiaina i tatou e ala i le mauaina o le Agaga Paia ma tutu ma le le pona i luma o le Faaola i le aso gataaga.

Vaai faalemafaufau e faapea, sa e maua se avanoa e aoao atu ai lenei upumoni i se tamaitiiti laitiiti.

A o lei valaauliaina tagata aoga e tali leotele le fesili lenei, mafaufau e valaaulia i latou e tusi a latou faamalamalamaga i a latou api faamaumau mo suesuega. Ona mafai lea ona e valaaulia tagata aoga e faasoa mai mea na latou tusia faatasi ma se paga po o se vaega toalaiti.

• E faapefea ona e faamatalaina lenei upumoni i se tamaitiiti laitiiti i se auala e mafai ona ia malamalama ai?

Faataitai ona tauloto le fuaitau autu o le mau mo le 3 Nifae 27:20: “O mai ia te a’u ma ia papatiso … , ina ia faapaiaina outou i le taliaina o le Agaga Paia.”

Vaevae le mau faasino ma le fasifuaitau autu i vaega nei. Faataitai le taulotoina o vaega taitasi mo ni nai taimi. Ona tuufaatasi lea o vaega ma tauloto atoa le mau ma le fasifuaitau autu.

Ina ia faaopoopo ni faiga eseese, e mafai ona e fai atu i tagata aoga po o vaega eseese o tagata aoga e tauloto se tasi o vaega nei. Faasino atu i se tagata aoga po o se vaega ma fai atu ia i latou e tauloto mai le latou vaega atofaina. Faaauau lenei faiga seia oo ina toe fai le mau atoa ma le fasifuaitau autu. Ona e atofa atu lea o se vaega ese i tagata aoga taitasi po o vaega ma toe fai le gaoioiga lenei.

• 3 Nifae 27:20

• O mai ia te a’u

• ma ia papatiso

• ina ia faapaiaina outou

• i le taliaina o le Agaga Paia

Faataitai le faaaogaina

Ina ia fesoasoani ia te oe e toe faamanatu, lisi i totonu o le 30 sekone mea uma e mafai ona e manatua e uiga i se tasi o mataupu faavae o le mauaina o le malamalama faaleagaga. Ona fai lea o lena mea e tasi i isi mataupu faavae e lua. A e manaomia se fesoasoani e manatua ia mataupu faavae, e mafai ona e vaai i le parakalafa 5–12 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023).

O le isi auala e toe faamanatu ai mataupu faavae o le mauaina o le malamalama faaleagaga o le vaevae lea o le vasega i ni vaega se tolu ma atofa atu i vaega taitasi se mataupu faavae se tasi e toe faamanatu. E mafai e se tagata aoga se toatasi mai vaega taitasi ona tusi i luga o le laupapa mea e manatua e lana vaega e uiga i la latou mataupu faavae atofaina.

A uma ona toe faamanatu e tagata aoga a latou mataupu faavae atofaina, faasoa atu le ata faataitai lenei i le vasega. Atonu e te manao e faaali atu le ata faataitai ina ia mafai ona vaai i ai tagata aoga i le gasologa o le lesona.

O oe ma lau uo o Meagan o loo faia se talanoaga o le talalelei ao o atu i le fale mai le aoga. Na fesili Meagan, “Pe e te popole ea e uiga i le toe feiloai ma le Atua? Ou te taumafai e ola sa’o ma salamo pe a ou faia ni mea sese, ae o le mafaufau i le tu i luma o le Atua ina ia faamasinoina ua ou fefe ai.

Valaaulia tagata aoga e talanoaina pe mafai faapefea ona latou faaaogaina mataupu faavae o le mauaina o le malamalama faaleagaga ma le aoaoga faavae o loo aoaoina i le 3 Nifae 27:20 e fesoasoani ai ia Meagan ma lona popolega.

E mafai ona e mafaufau e amata le talanoaga i le fai atu i tagata aoga e faasoa mai po o le fea o mataupu faavae atonu latou te amata ai ma pe mafai faapefea ona fesoasoani lena mataupu faavae. Ona faaauau lea ona talanoaina isi mataupu faavae o le mauaina o le malamalama faaleagaga seia oo ina outou talanoaina pe mafai faapefea e nei mataupu faavae uma e tolu ona fesoasoani i atugaluga e pei o atugaluga o Meagan.

Pe a manaomia, faaaoga fesili nei o se vaega o lau talanoaga. E le manaomia ona e faaaogaina uma nei fesili, ma e mafai ona e fesili atu ia i latou i le faasologa e sili ona aoga.

Iloilo Manatu ma Fesili ma se Vaaiga e Faavavau

• Mata o a ni manatu sese o loo i ai ia Meagan e uiga i le Tama Faalelagi po o Lana fuafuaga?

• O a nisi o upumoni e te manao ia malamalama i ai Meagan e uiga i le Tama Faalelagi ma Lana fuafuaga?

Saili le Malamalama Atili e ala i Punavai Paia ua Atofaina

• O a nisi o aoaoga mai le 3 Nifae 27:20 e mafai ona fesoasoani i lenei tulaga?

• O a ni isi o mau po o saunoaga mai taitai o le Ekalesia atonu e fesoasoani?

Faatino i le Faatuatua

• O a faatinoga e mafai ona faia e Meagan e mafai ona fesoasoani ia te ia e lagona atili ai le filemu i lona popolega? Aisea e te manatu e mafai ona fesoasoani ai nei faatinoga?

Iloiloga o le atamai i aoaoga faavae

O le gaoioiga lenei e mafai ona faaaoga i se lesona i le lumanai e fesoasoani ai i tagata aoga e tauloto le mau faasino ma le fuaitau autu o le mau mo le 3 Nifae 27:20. O lenei gaoioiga e mafai ona faia o se vasega, i vaega toalaiti, po o paga.

Valaaulia tagata aoga e tusi i luga o se fasipepa le mau faasino ma le fasifuaitau autu mo le 3 Nifae 27:20 ma tauloto leotele faatolu le mau ma le fasifuaitau autu. Fai atu ia i latou e oti’oti upu ma faafefiloi. Ona tuu atu lea i tagata aoga e faatulaga sa’o ia upu.