3 Nifae 28

Mananao e Aumai Isi ia Iesu Keriso

O se tasi o manaoga silisili e mafai ona tatou maua i o tatou olaga o le fesoasoani lea i isi tagata ia maua faamanuiaga ua ofoina mai e Iesu Keriso ma Lana Togiola (tagai i le Mataupu Faavae ma Feagaiga 15:6). Na faaalia e soo e toatolu o sa Nifaē lenei mea i se auala tulaga ese ina ua latou mananao e nonofo ai pea i le lalolagi ma aumai agaga ia Iesu Keriso seia oo i Lona Afio Mai Faalua. O lenei lesona ua faamoemoe e fesoasoani ia te oe ia lagonaina se faateleina o le mana’o e aumaia isi ia Iesu Keriso.

Fesoasoani i tagata aoga e aoao e faalagolago ia Iesu Keriso. A o taumafai tagata aoga e mulimuli ia Iesu Keriso, atonu latou te lagona le le mautonu e uiga i o latou tomai e faataunuu ai o latou tiute po o tofiga. Faamanatu i tagata aoga a o latou faatinoina le faatuatua, o le a faamalosia i latou e le Alii. Fautuaina i latou e saili le taitaiga ma le lototele e ala i le liliu atu i le Tama Faalelagi i le tatalo.

Sauniuniga a le tagata aoga: Valaaulia tagata aoga e mafaufau e uiga i aafiaga na latou maua i le faasoaina atu o le talalelei ma mea na fesoasoani ia i latou e mananao ai e fai mea sa latou faia.

Gaoioiga e Mafai Ona Aoao Ai

O a mea e te mana’o ai?

Mafaufau e valaaulia tagata aoga e mafaufau loloto i fesili nei.

• E faapefea ona e tali atu pe ana fai e afio mai Iesu Keriso ia te oe ma fesili atu, “O le a se mea e te manao i ai mai ia te au?”

• Aisea na e filifilia ai lena mea?

Mafaufau e valaaulia ni nai tagata aoga o e le afaina ia i latou le faasoa mai o mea sa latou tali.

I le taimi o le auaunaga a le Faaola i sa Nifaē, sa Ia tuuina atu lenei fesili i Ona soo (tagai i le 3 Nifae 28:1).

Faitau le 3 Nifae 28:2–6, ma vaavaai pe na faapefea ona tali atu soo sa Nifaē i le fesili a le Faaola.

• O le a se mea sa e mauaina?

I le fuaiupu 6, na ta’ua ai e le Faaola e faapea, e toatolu soo sa Nifaē na mananao i le mea lava lea e tasi na manao i ai Ioane le Soo Pele. Faitau le Mataupu Faavae ma Feagaiga 7:1–3, ma vaavaai mo le manaoga o Ioane.

• Aisea e te manatu na mananao ai nei soo e toatolu e nonofo ai pea i le lalolagi?

Mafaufau i lou lava manao e aumai tagata ia Iesu Keriso. O le iloiloga faaletagata lenei e mafai ona fesoasoani ia te oe e faia ai lenei mea.

Mafaufau e faaali atu le gaoioiga lenei ma valaaulia tagata aoga e iloilo filemu i latou lava. Aua le fai atu i tagata aoga e faasoa mai a latou tali i le vasega.

Tali i faamatalaga taitasi nei i se tasi o nei tali: “e le aunoa,” “o nisi taimi,” po o le “seāseā.”

1. Ou te vaavaai mo avanoa e talanoa ai i tagata e uiga ia Keriso.

2. Ou te tatalo mo avanoa e maua ai tagata e talanoa i ai e uiga ia Keriso.

3. Ou te lagona se manao e fesoasoani i isi ia mulimuli ia Iesu Keriso.

Faateleina lou manao e fesoasoani i isi ia o mai ia Keriso

E faaopoopo atu i tagata aoga e tusia le ata lenei i a latou api faamaumau mo suesuega, e mafai ona e tusia i luga o le laupapa.

I le ogatotonu o se itulau i lau api faamaumau mo suesuega, tusi ai se ata fasilaau e faatusa i se talavou e le o i ai se manao e faasoa atu le talalelei i isi. I le avanoa faataamilo i le ata fasilaau, tusi ai nisi o mafuaaga atonu e le manao ai lenei talavou e faasoa atu le talalelei. Sefe se avanoa e tusi ai upumoni e te aoaoina a o e suesue i le asō.

A o faaauau pea ona e suesue, vaavaai mo aoaoga e mafai ona fesoasoani i se tasi ia lagonaina se manao sili atu e faasoa atu le talalelei.

Faitau le 3 Nifae 28:7–10, ma vaavaai mo mea na folafola atu e le Alii i soo sa Nifaē o e na mananao e nonofo pea i le lalolagi e aumai agaga ia te Ia.

• O le a le faamanuiaga na tuu atu e Iesu ia i latou i fuaiupu 7–8 ina ia mafai ai ona latou faataunuuina o latou manaoga?

• O le a le mea na folafola atu e le Faaola i Ona soo o le a latou maua i fuaiupu 9–10 ona o a latou manaoga amiotonu?

I lo tatou augatupulaga, ua folafola mai ai e le Alii faamanuiaga ia i latou o e saili e aumai agaga ia te Ia. Faitau le Mataupu Faavae ma Feagaiga 18:15–16, ma vaavaai mo faamanuiaga e mafai ona tatou maua mo le aumaia o agaga ia Iesu Keriso.

• O le a se upumoni e mafai ona tatou aoao mai nei fuaiupu e uiga i le ala e mafai ai ona faamanuiaina i tatou a o tatou saili e aumai agaga ia Iesu Keriso?

O se upumoni e tasi e mafai ona tatou aoao mai nei fuaiupu o le a o tatou faia ni taumafaiga e aumai agaga ia Iesu Keriso, e mafai ona tatou lagonaina le olioli. Mafaufau e tusi le upumoni lenei i luga o le ata na e tusiina.

• Aisea e te manatu ai o le aumaia o agaga ia Iesu Keriso o se puna o le olioli?

• E mafai faapefea e lenei upumoni ona fesoasoani i se tasi ia lagona se manao sili atu ia faasoa atu le talalelei?

Saili mo isi mau po o saunoaga a taitai o le Ekalesia e mafai ona fesoasoani e faateleina ai lo tatou manao e faasoa atu le talalelei. E mafai ona e faaaogaina meafaigaluega suesue e pei o le Autu o le Talalelei po o le Taiala i Tusitusiga Paia e saili ai autu e pei o le “Galuega Faafaifeautalai,” pe mafai foi ona e suesueina se vaega po o fuaiupu uma nei. Faaopoopo upumoni e te maua i le ata na tusi i lau api faamaumau mo suesuega.

Faaali atu fuaiupu nei. Tuu atu i tagata aoga se taimi e suesue ai nei fuaiupu po o isi fuaiupu po o faamatalaga a taitai o le Ekalesia latou te mauaina e i latou lava.

• 2 Nifae 2:8

• Mataupu Faavae ma Feagaiga 33:8–10

• Mataupu Faavae ma Feagaiga 84:88

• Mataupu Faavae ma Feagaiga 123:12–14

Valaaulia tagata aoga e faasoa mai mea na latou aoaoina mai i a latou suesuega. E faaopoopo atu i le fai atu o le fesili lenei, e mafai ona e valaaulia i latou e tusi upumoni sa latou mauaina faataamilo i le ata o loo i luga o le laupapa.

• O a nisi o aoaoga na e maua e mafai ona fesoasoani i se tasi ia lagonaina se manao sili atu e faasoa atu le talalelei? Aisea e te manatu o le a fesoasoani ai na aoaoga?

• O a ni aafiaga na fesoasoani ia te oe e iloa ai faamanuiaga e mafai ona maua pe a tatou faasoa atu le talalelei?

Ina ia vaai i faataitaiga o le ala na faamanuiaina ai tagata taitoatasi e ala i taumafaiga faafaifeautalai, mafaufau e matamata i le “O Lou Aso mo se Misiona” (3:31) po o le “E Ala i Mea Laiti ma Faatauvaa: Faasoaina atu o le Talalelei” (3:19). E mafai ona maua uma vitio nei i luga o le ChurchofJesusChrist.org.

Mafaufau i mea ua e aoaoina pe lagonaina i le asō atonu na uunaia ai lou lava manao e fesoasoani i isi ia o mai ia Keriso. Tusi i lau api faamaumau mo suesuega soo se manatu po o ni uunaiga faaleagaga na e maua ma faia se fuafuaga e faatino ai ou lagona uunai.

Mafaufau e molimau atu i le malosi e mafai ona tatou maua ma le alofa o le Atua e mafai ona tatou lagonaina a o tatou faatinoina le manao e fesoasoani i isi ia o mai ia Iesu Keriso.

Manatu ma Talaaga o Faamatalaga

Aisea e taua tele ai lo tatou manao e fesoasoani e aumai isi ia Keriso i aso nei?

Na aoao mai Peresitene Russell M. Nelson:

E leai se isi taimi ua matua sili ona manaomia ai le talalelei a Iesu Keriso i lo le taimi nei. O fefinauaiga ua solia ai mea uma na tu atu ai le Faaola ma aoao atu. Ou te alofa i le Alii o Iesu Keriso ma molimau atu o Lana talalelei e na o le pau lea o le vaifofo tumau mo le filemu.

O Lana talalelei e na o le pau lea o le tali i taimi ua toatele tagata i le lalolagi ua faateia i le fefe. … Ua ia i tatou le tiute tauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga. …

… O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e “silisili lava i mea uma e manatu i ai” [Filipi 4:7]. (Russell M. Nelson, “Tala’i Atu le Talalelei o le Filemu,” Liahona, Me 2022, 6, 7)

Pe mafai e isi ona lagona le olioli pe a ou faasoa atu le talalelei?

Na aoao mai Elder Marcus B. Nash o le Au Fitugafulu:

Pe a oo ina iloa e se tagata le faamoemoega mamalu o le olaga, e oo ina malamalama e faamagalo ma fesoasoani Keriso ia i latou o ē mulimuli ia te Ia, ona filifili lea e mulimuli ia Keriso i le vai papatiso, e suia le olaga mo se mea sili atu—e tusa lava pe le suia tulaga o le olaga.

Sa tau mai e se tuafafine fiafia tele sa ou feiloai ai i Onitsha, Nigeria, e faapea, mai lava i le taimi na ia aoaoina ai le talalelei ma papatisoina ai (ma o lea ua ou faaaogaina ana upu), “ua lelei mea uma mo au. Ua ou fiafia. Ua ou i ai i le lagi.” O le faasoa atu o le talalelei e faamumū ai le olioli ma le faamoemoe i agaga o lē na te foai atu ma lē na te taliaina. E moni, “e matua tele lou olioli” [Mataupu Faavae ma Feagaiga 18:15] a o e faasoa atu le talalelei! O le faasoaina atu o le talalelei o le olioli lea i luga o lea olioli, faamoemoe i luga o lea faamoemoe. (Marcus B. Nash, “Ia Tuu i Luga Lo Outou Malamalama,” Liahona, Nov. 2021, 71)

O le a le eseesega o le faaliliuga, liua ma le toetu?”

O soo sa Nifaē e toatolu na muai liua ina ia “vaai i mea a le Atua” (3 Nifae 28:13–15) ona faaliliuina lea ina ia mafai ona latou tumau ai i le lalolagi seia oo i le Afio Mai Faalua (3 Nifae 28:37–40).

O faauigaga nei e mafai ona fesoasoani e faamanino ai eseesega i le va o le faaliliuga, liua, ma le toetu.

• Tagata ua faaliliuina. “O tagata ua suia ina ia le oo ia te i latou le tiga po o le oti seia oo i lo latou toetutu mai i le tino ola pea” (Taiala i Tusitusiga Paia, “Tagata Ua Faaliliuina,” scriptures.ChurchofJesusChrist.org).

• Liua. “O se tulaga lea e oo i tagata o e ua suia i se taimi le tumau i foliga ma le natura—ina ia mafai ai ona latou lavatia le faatasi ai ma le mamalu o tagata faalelagi” (Taiala i Tusitusiga Paia, “Liua,” scriptures.ChurchofJesusChrist.org).

• Toetu. “O le toefaatasia lea o le tino agaga ma le tino faaletino o aano ma ivi pe a mavae le oti. Pe a mavae le toetu, o le a le toe tuueseeseina le agaga ma le tino, ma o le a avea ai le tagata ma tagata tino ola pea” (Taiala i Tusitusiga Paia, “Toetu,” scriptures.ChurchofJesusChrist.org).

Gaoioiga Faaopoopo e Aoao Ai

Popolega e ono i ai e uiga i le auauna atu i se misiona

O se isi gaoioiga e mafai ona suitulaga i le ata fasilaau, e mafai ona e valaaulia tagata aoga e matamata pe faitau le saunoaga a Peresitene Russell M. Nelson. Valaaulia tagata aoga e mafaufau faapea o se uo na faalogo i lenei faamatalaga e i ai ona popolega e uiga i le auauna atu i se misiona. E mafai ona mafaufau tagata aoga po o a na popolega. Ona latou sueina lea o mau po o saunoaga a taitai o le Ekalesia e mafai ona fesoasoani i lenei tagata e faatoilalo ai o latou atugaluga ma lagona ai se manao sili atu e auauna atu i se misiona.

O isi faamatalaga e uiga i soo sa Nifaē e toatolu

E mafai ona e valaaulia tagata aoga e faitau le 3 Nifae 28:18–23 ma vaavaai pe na faapefea ona faamanuiaina e le Alii ia soo sa Nifaē e toatolu ina ia mafai ona latou faataunuuina o latou manaoga amiotonu. E mafai foi ona faitau tagata aoga i le 3 Nifae 28:25–32, ma saili mo tagata o i latou ua faamanuiaina, ma o le a faapea ona faamanuiaina mai le auaunaga a nei soo. Mafaufau e valaaulia tagata aoga e talanoaina ma se paga se mea na latou aoaoina e uiga i le auaunaga a nei soo sa Nifaē.

3 Nifae 29. Valoaga e uiga i aso mulimuli

Afai e te manao e faaalu se taimi e suesue ai le 3 Nifae 29 i le vasega, e mafai ona e faaaogaina le siata lenei. E mafai e tagata aoga ona faafetaui upu o i le itu tauagavale i a latou faauigaga i le itu taumatau. Ona mafai lea ona latou faitauina le 3 Nifae 29, ma vaavaai mo le mea na valoia e Mamona o le a tupu i aso e gata ai. Valaaulia tagata aoga e talanoaina pe na faapefea ona latou vaaia le tutupu o na mea i aso nei.

1. Nuuese	a. Lua uiga: (1) o fanau a le perofeta o le Feagaiga Tuai o Iakopo (Isaraelu), lea na osi feagaiga ma le Alii, ma le (2) o tagata talitonu moni ia Iesu Keriso, o e na osi feagaiga ma le Atua
2. Aiga o Isaraelu	e. O se folafolaga i tagata faatuatua lea e aofia ai faamanuiaga o le talalelei, pule o le perisitua, aiga e faavavau, ma se laueleele o le tofi
3. Teena	i. Faanoanoa loloto
4. Le Taliaina	o. Ina ia le amanaiaina pe teena ma le inoino
5. O le Feagaiga a le Alii ma Isaraelu	u. Ia faailoa atu le le faaaloalo po o le le taliaina
6. Oi Talofa	f. Lua uiga: (1) o tagata e lē ni Isaraelu, pe e lē tau i le gafa o Iutaia, ma le (2) o tagata e le’i mauaina le talalelei

(Tali: 1–f, 2–a, 3–o, 4–u, 5–e, 6–i)