Mormon 7

“Usa ka Kahimtang sa Kalipay nga Walay Kataposan”

Mormon

Handurawa kon unsa kaha ang gibati ni Mormon samtang iyang nasaksihan ang kasubo ug kalaglagan nga gipahinabo sa kataposang mga gubat tali sa mga Nephite ug sa mga Lamanite. Sa wala pa kini nga mga gubat mihunos sa iyang kaugalingon nga kinabuhi, gitapos ni Mormon ang iyang mga sinulat pinaagi sa pagtudlo mahitungod kang Jesukristo ug sa mahangtorong kalipay nga naghulat niadtong kinsa nagsunod Kaniya. Kini nga leksiyon makatabang kanimo sa pagsunod ni Jesukristo ug sa pagpangandam sa pagpuyo uban sa Dios diha sa kalipay nga walay kataposan.

Pagdasig og usa ka kinaiya sa inadlaw-adlaw nga pagtuon sa kasulatan.Ang pagpalambo og usa ka batasan sa inadlaw nga pagtuon sa kasulatan adunay potensiyal nga mopanalangin sa mga estudyante sa tibuok nilang kinabuhi. Pangita og mga pamaagi sa pagtudlo sa mga estudyante mahitungod sa mga panalangin sa pagtuon sa mga kasulatan kada adlaw.

Pagpangandam sa estudyante: Mahimo nimong dapiton ang mga estudyante sa pagtambong sa klase nga andam sa pagpakigbahin sa unsay makapalipay kanila. Mahimo usab nga makig-istorya ang mga estudyante sa usa ka sakop sa pamilya mahitungod sa unsay makapalipay niana nga sakop sa pamilya.

Mga Posibleng Kalihokan sa Pagkat-on

Aron matabangan ang mga estudyante sa pagpamalandong sa unsay ilang nahibaloan mahitungod ni Mormon, mahimo nimong gamiton ang mosunod nga pasulit. Ang mga estudyante mahimong motubag sa elektronik nga paagi o mopataas sa ilang kamot kon ang husto nga tubag mabasa. Imbis nga mohatag og usa ka pasulit, mahimo nimong ipakita ang usa ka hulagway ni Mormon ug hangyoa ang mga estudyante sa pagpakigbahin unsay ilang nahibaloan mahitungod kaniya. Tungod kay ang mga sinulat ni Mormon (iyang kaugalingong mga pulong ug usa ka minubo sa kasaysayan sa Nephite) naglakip sa tanan gikan sa Ang Mga Pulong ni Mormon hangtod sa Mormon 7, mahimo nimong dapiton ang mga estudyante nga adunay mga papel nga kasulatan sa pag-abli niini nga mga kapitulo aron mahanduraw kon pila ka mga pahina sulod sa Basahon ni Mormon ang iyang gimubo ug gisulat.

Mga tubag sa pasulit: 1) c; 2) a; 3) b (Ang Mga Pulong ni Mormon–Mormon 7 ug Moroni 7–9)

Ang kinabuhi ni Mormon

Kuhaa ang mosunod nga pasulit aron makita kon unsa ang imong mahinumdoman mahitungod ni propeta Mormon.

1. Giunsa paghulagway si Mormon sa iyang pagkabatan-on? (Tan-awa sa Mormon 1:2.)

   1. Siya usa ka tigdala sa armas sa kasundalohan sa Nephite

   2. Nahadlok siya

   3. Siya dali sa pagpaniid

2. Unsa ang nasinati ni Mormon sa edad nga 15? (Tan-awa sa Mormon 1:15.)

   1. Siya giduaw sa Ginoo

   2. Ang iyang pagsangyaw nakakabig og gatosan

   3. Siya nasamdan sa gubat

3. Sa banabana mga pila ka bahin sa Basahon ni Mormon ang gisulat o gipamubo ni Mormon?

   1. 1/2

   2. 2/3

   3. 3/4

Si Mormon adunay responsibilidad sa pagpamubo, pagsulat, ug pagpreserbar sa sagradong kasulatan nga atong nailhan karon isip Basahon ni Mormon. Padulong sa kataposan sa iyang kinabuhi, si Mormon nakasaksi ug miapil sa usa ka dako nga gubat tali sa mga Nephite ug sa mga Lamanite. Kini nga gubat sa kadugayan nakapatay kang Mormon (tan-awa sa Mormon 8:3). Sa wala pa ipasa ang sagradong mga rekord ngadto sa iyang anak nga si Moroni, si Mormon misulat sa iyang kataposang mensahe ngadto sa umaabot nga mga magbabasa sa Basahon ni Mormon.

Dapita ang mga estudyante sa pagpamalandong ug sa paghisgot sa mosunod nga pangutana diha sa gagmay nga mga grupo. Kini magtugot og daghan pang mga estudyante nga mopakigbahin sa ilang mga hunahuna.

• Samtang namalandong ka sa kinabuhi, kasinatian, ug pagpamatuod ni Mormon, unsa sa imong hunahuna ang tingale iyang isulat sa iyang kataposang mensahe ngadto sa umaabot nga mga magbabasa sa Basahon ni Mormon? Ngano man?

Samtang magtuon ka sa Mormon 7, tan-awa kon sa unsang paagi ang mensahe ni Mormon mahimong makahuloganon dili lamang sa mga tawo taliwala sa gubat apan sa mga tawo sa bisan unsang kahimtang sa kinabuhi.

Unsa ang gusto ni Mormon nga atong mahibaloan

Samtang magtuon ang mga estudyante sa Mormon 7, mahimo nilang itandi ang mga pagtulun-an ni Mormon sa mga kamatuoran nga ilang gipaabot nga iyang itudlo.

Basaha ang Mormon 7:2–7. Markahi diha sa imong mga kasulatan o ilista diha sa imong journal ang mga butang nga gusto ni Mormon nga mahibaloan sa mga magbabasa. Hatagi og espesyal nga pagtagad ang unsay gitudlo ni Mormon mahitungod ni Jesukristo sa mga bersikulo 5–7.

• Ngano kaha sa imong hunahuna nga si Mormon mibati nga kini importante nga mga kamatuoran nga atong mahibaloan?

• Hain niini nga mga kamatuoran ang labing makahuluganon kanimo sa personal? Ngano man?

• Ngano nga importante nga masayod “nga kamo sakop sa balay ni Israel” (Mormon 7:2)?

Kon imong gibati nga makabenepisyo ang mga estudyante gikan sa mas lawom nga pagtuon sa mga bersikulo 2–7, ikonsiderar ang pagdapit kanila sa paggamit sa mga kapanguhaan sa pagtuon sama sa Gospel Library, mga footnote, o mga pakigpulong sa kinatibuk-ang komperensiya. Ang maong mga kapanguhaan makatabang kanila nga mas makasabot sa kamahinungdanon sa unsay gidapit ni Mormon nga atong mahibaloan. Sama pananglit, ang uban mahimong magtuon sa kamahinungdanon sa pagkahibalo nga “kamo sakop sa balay ni Israel” (bersikulo 2). Ang uban mahimong magtinguha sa pagsabot sa kamahinungdanon sa “[pagbutang] sa inyong mga hinagiban sa gubat” (bersikulo 4).

Tingali namatikdan nimo nga samtang si Mormon gilibotan sa pagkadaotan ug sa gubat, siya milaom sa Pagkabanhaw ug sa pagtubos ni Jesukristo. Iyang gitudlo nga tungod ni Jesukristo, kita mahimong mapasaylo sa atong mga sala ug sa ingon andam sa pagpuyo uban sa Dios diha sa kahimtang sa kalipay (tan-awa sa Mormon 7:7).

• Unsa ang pipila ka mga hagit o negatibo nga mga impluwensiya nga naglibot kanimo?

• Sa unsang paagi nga ang kahibalo bahin sa Pag-ula ni Jesukristo ug sa potensiyal sa kalipay nga walay kataposan magsilbing tinubdan sa paglaom ug kalig-on sa imong kinabuhi karon?

Paghimo sa kahibalo ngadto sa aksyon

Ang pagkahibalo nga kita makapuyo uban sa Dios diha sa mahangtorong kalipay makahatag kanato og dakong paglaom. Aron matabangan kita nga makab-ot kini nga kalipay, si Mormon midasig kanato sa paghimo sa kahibalo ngadto sa aksiyon. Kini gipakita sa iyang paggamit sa pulong nga “busa” sa bersikulo 8.

Ikonsiderar ang pagsulat sa mosunod nga dili kompleto nga baroganan ngadto sa pisara. Mahimong magsulat ang mga estudyante og lain-laing mga paagi nga ilang magamit ang mga pulong ni Mormon sa mga bersikulo 8–10 sa pagtapos sa pamahayag.

Diha sa imong journal sa pagtuon, isulat ang mosunod nga dili kompleto nga pamahayag: “Ako makapuyo uban sa Dios diha sa usa ka kahimtang sa kalipay kon ako …”

Basaha ang Mormon 7:8–10 ug kompletoha ang pamahayag pinaagi sa pagsulat og labing menos tulo ka mga buhat nga gidapit ni Mormon nga atong buhaton. Timan-i nga sa bersikulo 9, ang “kini” nagpasabot sa Basahon ni Mormon ug ang “niana” nagpasabot sa Balaang Biblia.

Kon gikinahanglan, tabangi ang mga estudyante sa pag-ila og mga buhat sama sa mosunod:

• “… paghinulsol, ug [ako] magpabunyag sa ngalan ni Jesus” (Mormon 7:8).

• “… paghupot sa ebanghelyo ni Kristo [diha sa mga kasulatan]” (Mormon 7:8).

• “… [pagsunod] sa panig-ingnan sa atong Manluluwas” (Mormon 7:10).

Ang mga estudyante mahimong bahinon ngadto sa gagmay nga mga grupo ug i-assign ang usa sa tulo ka mga buhat. Mag-uban, mahimo nilang hisgotan ang mosunod nga mga pangutana.

• Unsa ang pipila ka mga paagi nga kita makagamit niini nga mga buhat?

• Sa unsang paagi kini nga mga buhat makaandam kanato sa pagdawat sa gisaad nga kalipay nga anaa pinaagi ni Jesukristo?

Kon mahimo, hatagi ang mga estudyante sa mosunod nga sukdanan. O basaha og kusog ang mga kapilian aron ang mga estudyante makapamalandong sa ilang mga tubag.

Pamalandongi kon unsa ka maayo ang imong pagbuhat sa tambag ni Mormon. Tan-awa ang mosunud nga sukdanan ug gradohi ang imong kaugalingon sa matag kategorya (1 = dili gyod; 5 = hapit kanunay).

sukdanan 1 hangtod 5 alang sa matag pamahayag

Mahimo kang mopakigbahin og personal nga istorya o pagpamatuod aron sa paghulagway sa kalinaw nga mahimong moabot gikan sa paghinulsol, pagtuon sa mga kasulatan, pagsunod sa panag-ingnan ni Jesukristo, ug pagpaabot sa mahangtorong kalipay uban sa Dios. Mahimong kompletohon sa mga estudyante ang mosunod diha sa ilang journal sa pagtuon.

Pagpili og usa sa mga pagdapit ni Mormon nga imong gibati nga makatabang kanimo sa pagtinguha sa kalipay nga anaa pinaagi ni Jesukristo. Pagdesisyon kon unsa ang imong mahimo aron sa pagbuhat niana nga pagdapit ug kon sa unsang paagi kini makatabang kanimo sa pagpunting ngadto sa Manluluwas.

Komentaryo ug Background nga Impormasyon

Mormon 7:2. Sa unsang paagi nga ang pagkahibalo nga ako sakop sa balay ni Israel makahimog kalainan sa akong kinabuhi?

Si Presidente Russell M. Nelson mitudlo:

Presidente Russell M. Nelson

Usa ka kahulogan sa Hebreo sa pulong nga Israel mao ang “ipatigbabaw ang Dios labaw sa tanan.” Mao nga ang ngalan mismo nga Israel nagpasabot og tawo kinsa andam nga ipatigbabaw ang Dios labaw sa tanan diha sa iyang kinabuhi. Kana nga konsepto hilabihang nakadasig kanako! …

Kon ang inyong labing dakong tinguha mao ang pagpatigbabaw sa Dios labaw sa tanan, nga mahimong kabahin sa Israel, daghan kaayo nga mga desisyon ang mahimong mas sayon. Daghan kaayong mga isyu ang mahimong walay hinungdan! Masayod kamo unsay labing maayong paagi sa pagpresentar sa inyong kaugalingon. Masayod kamo unsay tan-awon ug basahon, asa igahin ang inyong panahon, ug kinsay ikauban. Masayod kamo unsay inyong gustong makab-ot. Masayod kamo unsa nga matang sa tawo gusto gayod ninyo nga mamahimo. (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92, 94)

Mormon 7:2. Unsay buot ipasabot nga mahimong sakop sa balay ni Israel?

Ingon nga kabahin sa balay ni Israel nangahulogan nga ikaw adunay pakigsaad nga relasyon uban sa Langitnong Amahan ug ni Jesukristo. Kini nangahulogan nga ikaw, sama ni Abraham gitakda nga “mahimong usa ka panalangin” ngadto sa mga anak sa Dios (Genesis 12:2; Abraham 2:9–11). Kini nangahulogan, sa mga pulong ni Pedro, nga “kamo maoy usa ka kaliwatan nga pinili, ang kahugpongan sa harianong pagkapari [sacerdote], ang nasod nga balaan, ang katawhan nga iyang kaugalingon sa Dios, aron kamo magamantala sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag” (1 Pedro 2:9). Kini nangahulogan nga ikaw usa kinsa “nakigbugno uban sa Dios” samtang ikaw nagtahod sa imong mga pakigsaad uban Kaniya. (Dali, Sunod Kanako—Alang sa mga Indibidwal ug mga Pamilya: Daang Tugon 2022, 41)

Mormon 7:9. Sa unsang paagi nga ang Basahon ni Mormon mopalambo sa akong hugot nga pagtuo sa Balaang Biblia?

Si Presidente Russell M. Nelson mitudlo:

Presidente Russell M. Nelson

Ang gugma alang sa Basahon ni Mormon mopadako sa gugma sa usa ka tawo alang sa Biblia ug vice versa. Ang mga kasulatan sa Pagpahiuli wala makigkompetensiya sa Biblia, kini nagkomplemento sa Biblia. Nakautang kita sa mga martir nga mihatag sa ilang mga kinabuhi aron nga kita makaangkon sa Biblia. Nakaestablisar kini sa walay kataposan nga matang sa ebanghelyo ug sa plano sa kalipay. Ang Basahon ni Mormon mipahiuli ug mipasabot sa mga doktrina sa Biblia sama sa ikapulo, sa templo, sa Igpapahulay nga adlaw, ug sa priesthood. (Russell M. Nelson, “Mga Saksi sa Kasulatan,” Liahona, Nob. 2007, 43)

Dugang nga mga Kalihokan sa Pagkat-on

Tudloi ko sa tanan nga angay nakong buhaton

Makabenepisyo ang mga estudyante gikan sa pag-ila sa sumbanan ni Mormon sa pagtudlo og mga butang nga kinahanglan natong mahibaloan (Mormon 7:2–7), gisundan sa pagtudlo kanato og mga butang nga kinahanglan natong buhaton (Mormon 7:8–10).

Human sa pagtuon sa unsay gidapit ni Mormon nga atong mahibaloan sa mga bersikulo 2–7, ikonsiderar ang pagpakighbahin sa mosunod nga mga detalye mahitungod sa himnonga “Ako Anak sa Dios.”

Sa dihang ang “Ako Anak sa Dios” unang gisulat sa Iningles, usa sa mga linya mabasa, “Tudloi ko, unsay mahibaloan nga makabalik ko sa Amahang Langitnon.” Sa dihang nadungog ni Presidente Spencer W. Kimball ang himno, nangutana siya kon kana nga linya mahimo bang mausab ngadto sa, “Tudloi ko unsay buhaton nga makabalik ko sa Amahang Langitnon” (tan-awa sa Mga Pagtulun-an sa mga Presidente sa Simbahan: Spencer W. Kimball [2006], 1).

Hisgoti kon unsay atong makat-onan gikan sa kausaban sa pulong nga “mahibaloan” ngadto sa “buhaton.”

Idirekta dayon ang mga estudyante sa pagpangita kon unsay gidapit ni Mormon nga atong buhaton diha sa Mormon 7:8–10. Hisgoti kon sa unsang paagi ang pagbuhat niini nga mga butang makatabang kanato nga makabalik sa pagpuyo uban sa atong Langitnong Amahan.

Mormon 7:9. “Kini gisulat sa tuyo nga kamo mahimo nga motuo niana”

Aron matabangan ang mga estudyante nga makasabot kon giunsa sa Biblia ug sa Basahon ni Mormon pagtinabangay, ipakita ang usa ka kopya sa Basahon ni Mormon nga gimarkahan og “kini.” Dayon ipakita ang kopya sa Biblia nga may marka nga “niana.” Dapita ang mga estudyante sa pagbasa og hilom sa Mormon 7:8–9 , mangita kon unsay gisulti ni Mormon mahitungod sa relasyon tali sa “kini” (ang Basahon ni Mormon) ug “niana” (ang Biblia). Dapita ang mga estudyante sa pag-cross-reference sa Mormon 7:9 ngadto sa 2 Nephi 3:12 ug sa Doktrina ug mga Pakigsaad 10:52. Ipangutana ang sama sa mosunod:

• Sa unsang paagi nga ang imong pagtuon sa Basahon ni Mormon nakapalig-on sa imong pagpamatuod sa mga kamatuoran sa Biblia?

• Sa unsang paagi nga ang imong pagtuon sa Biblia nakapalig-on sa imong pagpamatuod sa Basahon ni Mormon?

• Unsa kaha ang kinahanglan nga buhaton sa usa ka tawo nga adunay hugot nga pagtuo sa Biblia aron tugotan ang Espiritu nga makapamatuod kaniya sa katinuod sa Basahon ni Mormon?