Mormon 8:1–26

Talaan nga adunay Dako nga Bili

Unsa ang imong buhaton kon ikaw gisaligan og butang nga sama ka bililhon sa bulawan nga mga palid? Sa dihang nadawat ni Moroni ang mga palid, iyang gibuhat ang tanan niyang mahimo aron sa pagpanalipod niini. Siya sa kataposan milubong niini sa yuta, nagsalig nga kini “gitipigan ngadto sa Ginoo” (ulohan nga pahina sa Basahon ni Mormon), nga pagadad-on sa usa ka adlaw “pinaagi sa kamot sa Ginoo” (Mormon 8:26). Kini nga leksiyon makatabang kanimo nga mabati ang kamahinungdanon sa Basahon ni Mormon sa imong kinabuhi.

Paghimo og usa ka aktibo nga palibot sa pagkat-on. Ikonsiderar ang paggamit sa mga estasyon sa pagkat-on isip epektibo nga paagi aron mabahin ang daghang mga sulod ug matugotan ang mga estudyante nga mahimong responsable sa ilang kaugalingong pagkat-on. Samtang sila mopili ug molibot tali sa mga estasyon, tan-awa ang mga estudyante nga tingali nagkinahanglan og indibidwal nga tabang.

Pagpangandam sa estudyante: Dapita ang mga estudyante sa pagpamalandong kon sa unsang paagi ang ilang bag-ohay lang nga mga paningkamot sa pagtuon sa Basahon ni Mormon nagpakita kon giunsa nila paghatag og bili ang Basahon ni Mormon.

Mga Posibleng Kalihokan sa Pagkat-on

Usa ka bililhong gasa

Handurawa nga ang usa ka tawo naghatag kanimo og usa ka bag nga puno sa mga diyamante ug mga rubi isip usa ka regalo.

• Unsaon nimo sa pagtubag? Sa unsang paagi kini nga gasa makapanalangin sa imong kinabuhi?

Si Presidente Russell M. Nelson mihatag og kopya sa Basahon ni Mormon ngadto sa usa ka hari sa tribo sa Africa ug mipasabot kon sa unsang paagi kini usa ka laing tugon ni Jesukristo. Mitubag ang hari:

“Mahimo ko nimong mahatagan og mga diamante o mga ruby, apan walay labaw ka bililhon kay sa niining dugang nga kahibalo bahin ni Ginoong Jesukristo” (Russell M. Nelson, “Ang Basahon ni Mormon: Unsa Kaha ang Imong Kinabuhi Kon Wala Kini?,” Liahona, Nob. 2017, 61)

• Unsa kaha ang pipila ka mga rason nga ang hari mibati niini nga paagi?

Hatagi og panahon ang mga estudyante sa pagtimbangtimbang sa ilang mga pagbati mahitungod sa Basahon ni Mormon. Mahimo nimong ipakita ang mosunod nga pamahayag gikan ni Presidente Nelson aron matabangan sila sa pagpamalandong.

Hunahunaa kon unsaon nimo sa pagtubag ang mosunod nga mga pangutana nga gihimo ni Presidente Nelson:

Akong kaigsoonan, unsa man kabililhon ang Basahon ni Mormon diha kaninyo? Kon tanyagan kamo og mga diamante o mga ruby o Basahon ni Mormon, hain man ang inyong pilion? Sa tinuod lang, hain man ang mas dako og bili nganha kaninyo? (Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 61)

Samtang magtuon ka sa Mormon 8, pamalandongi ang imong personal nga pagpamatuod sa Basahon ni Mormon. Pangitaa ang mga rason kon nganong ang pagsaksi ni Jesukristo diha sa Basahon ni Mormon bililhon kaayo ug sa unsang paagi kini makapanalangin sa imong kinabuhi.

Pagdiskobre sa kamahinungdanon sa Basahon ni Mormon

Ang mosunod nga kalihokan naglangkob og upat ka bahin aron matabangan ang mga estudyante nga madiskobrehan o mapamatud-an pag-usab ang bili sa Basahon ni Mormon. Mahimo kang magbutang og usa ka estasyon alang sa matag bahin, ug mahimong molibot ang mga estudyante sa mga estasyon nga magtinagsa o diha sa gagmay nga mga grupo.

Sa imong journal sa pagtuon, paghimo og outline sa usa ka mapa sa bahandi. Ang matag tulbok sa mapa usa ka dapit sa pagrekord sa unsay imong nakat-onan atol sa imong pagtuon sa Mormon 8. Ilakip ang mga nadiskobrehan mahitungod sa kabililhon sa Basahon ni Mormon gikan sa matag usa sa mosunod nga mga seksiyon. Ang matag butang nga imong nahibaloan magdala kanimo nga mas mapaduol sa X sa mapa sa bahandi. Ang X mao ang dapit diin makahimo ka sa pag rekord kon unsay kahulogan sa Basahon ni Mormon nganha kanimo.

Bahin 1. Usa ka tinago nga bahandi

Human mamatay si Mormon sa gubat (tan-awa sa Mormon 8:3), si Moroni mitipig ug misulat pa sa rekord nga gihimo sa iyang amahan sa mga palid nga bulawan.

Basaha ang Mormon 8:1–5 ug ang ulohan nga pahina sa Basahon ni Mormon, mangita kon nganong ang Basahon ni Mormon gisulat ug gipreserbar.

• Unsa ang atong makat-onan mahitungod sa katuyoan sa Basahon ni Mormon?

Isulat ang imong tubag tapad sa usa sa mga tulbok sa mapa.

Usa ka kamatuoran nga atong makat-onan mao nga ang Basahon ni Mormon gipreserbar alang sa atong panahon aron sa pagkombinsir kanato nga si Jesus mao ang Kristo.

• Sa unsang paagi ang Basahon ni Mormon naka-impluwensiya sa imong tinguha sa pagsunod kang Jesukristo?

Bahin 2. Ang bili sa talaan

Aron matabangan ang mga estudyante sa paghanduraw ug paghunahuna mahitungod sa mga bulawan nga palid, ikonsiderar ang paggamit sa impormasyon gikan sa Mga Hisgotanan sa Kasaysayan sa Simbahan, “Bulawan nga mga Palid,” history.ChurchofJesusChrist.org.

Hunahunaa kon unsa ang imong nahibaloan mahitungod sa mga palid nga bulawan ug unsa kaha sa imong hunahuna ang bili niini. Basaha kon unsay nasinati ni Joseph Smith sa dihang una niyang nadawat ang mga bulawan nga palid gikan ni Moroni.

Human nadala ni Joseph sa balay ang mga bulawan nga palid, ang mga tigpangita og bahandi naningkamot sa pagkawat niini sulod sa pipila ka semana. Aron magpabiling luwas ang rekord, kinahanglan niya kining ibalhin-balhin og butang, gitagoan ang mga palid ilawom sa halinganan, ilawom sa salog sa talyer sa iyang amahan, ug ilawom sa nagtipun-og nga lugas. Kinahanglang magbantay gayod siya kanunay. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 47)

• Unsa ang labing mahinungdanon kanimo gikan niini nga asoy?

Basaha ang Mormon 8:14, mangita sa unsay gisulti ni Moroni mahitungod sa mga palid.

• Unsa kaha ang gipasabot ni Moroni sa dihang miingon siya nga ang mga palid “walay bili” apan “ang natala niini mao ang adunay dako nga bili”? Unsay atong makat-onan gikan niini?

Isulat ang imong tubag tapad sa usa sa mga tulbok sa mapa.

Usa ka kamatuoran nga atong makat-onan mao nga ang talaan sa Basahon ni Mormon dako kaayo og bili.

Paglista og pipila ka mga bersikulo, mga pagtulun-an, o mga istorya gikan sa Basahon ni Mormon nga imong gibati nga bililhon kaayo. Ipasabot kon nganong kini bililhon kanimo o sa uban.

Bahin 3. Usa ka gasa gikan sa Dios

Pamalandongi ang unsay imong nahibaloan mahitungod ni Joseph Smith isip usa ka batan-ong lalaki. Makahunahuna ka ba og mga rason kon nganong gipili sa Dios si Joseph Smith sa paghubad sa Basahon ni Mormon?

Basaha ang Mormon 8:15–16, 26, mangita sa unsay gitudlo ni Moroni mahitungod ni Joseph Smith ug sa Basahon ni Mormon.

• Unsa nga mga kamatuoran ang atong makat-onan mahitungod kon sa unsang paagi ang Basahon ni Mormon mitungha?

Isulat ang imong tubag tapad sa usa sa mga tulbok sa mapa.

Usa ka kamatuoran nga atong makat-onan mao nga ang Dios mihatag kang Joseph Smith og gahom sa pagpatungha sa Basahon ni Mormon.

Isulat ang usa o duha ka mga butang nga imong nahibaloan mahitungod ni Joseph Smith nga naghubad sa Basahon ni Mormon. (Tan-awa sa Mga Hisgotanan sa Kasaysayan sa Simbahan, “Hubad sa Basahon ni Mormon,” history.ChurchofJesusChrist.org o Gospel Topics, “Book of Mormon Translation,” history.ChurchofJesusChrist.org.)

Bahin 4. Unsa ang akong gipakabilihan mahitungod sa Basahon ni Mormon

Base sa imong pagtuon sa Basahon ni Mormon sa balay, sa simbahan, ug sa seminary, isulat kon unsay imong labing gipakabilihan mahitungod sa Basahon ni Mormon. Ang mosunod nga mga pangutana tingali makatabang.

Isulat ang tubag sa bisan usa lang sa mosunod nga mga pangutana tapad sa X diha sa imong mapa:

• Ngano nga mapasalamaton ka nga ang Basahon ni Mormon gipreserbar?

• Unsay imong nakat-onan mahitungod sa mga propeta nga gitawag sa Ginoo sa pagdala kanato sa Basahon ni Mormon?

• Unsa ang imong buhaton aron ipakita sa Ginoo kon unsa ka dako ang imong paghatag og bili sa Basahon ni Mormon?

Human masulat sa mga estudyante ang ilang mga tubag, ikonsiderar ang pagdapit kanila sa paghunahuna og usa ka tawo nga tingali ilang mahatagan og kopya sa Basahon ni Mormon o link sa pag-download niini. Mahimo nimong dasigon sila sa paglakip sa ilang pagpamatuod sa higayon nga ilang ipakigbahin ang basahon. Ikonsiderar ang paghatag sa imong pagpamatuod sa Basahon ni Mormon.

Komentaryo ug Background nga Impormasyon

Unsay bililhon sa Basahon ni Mormon?

Si Elder Russell M. Nelson mihatag og pipila ka mga ehemplo. Alang sa mas detalyadong tubag, tan-awa ang iyang kompletong pakigpulong.

Ang Basahon ni Mormon naghatag sa kahingpitan sa labing masaligon nga pagsabot sa Pag-ula ni Jesukristo nga makaplagan bisan asa. Nagtudlo kini unsa gayod ang gipasabot sa pagpakatawo og usab. Gikan sa Basahon ni Mormon makat-on kita bahin sa panagpundok sa nagkatibulaag nga Israel. Makahibalo kita nganong anaa kita dinhi sa yuta. Kini ug ang ubang kamatuoran mas impluwensiyal ug maagnihong gitudlo diha sa Basahon ni Mormon kay sa bisan unsang libro. Ang hingpit nga gahom sa ebanghelyo ni Jesukristo anaa sa Basahon ni Mormon. Wala nay lain.

Ang Basahon ni Mormon mihatag og katin-awan sa pagtulun-an sa Agalon ug mipakita sa mga taktika sa kaaway. Ang Basahon ni Mormon nagtudlo og tinuod nga doktrina sa pag-iway sa sayop nga relihiyosong mga tradisyon sama sa hiwi nga binuhatan sa pagbunyag sa mga bata. Ang Basahon ni Mormon naghatag og katuyoan sa kinabuhi pinaagi sa pag-aghat kanato sa pagpamalandong sa posible nga kinabuhing dayon ug “walay kataposan nga kalipay.” [Mosiah 2:41; tan-awa usab sa Alma 28:12]. Ang Basahon ni Mormon mipusgay sa sayop nga mga pagtuo nga ang kalipay makaplagan pinaagi sa kadaotan ug kanang indibidwal nga kamaayo mao lang ang gikinahanglan sa pagbalik sa presensiya sa Dios [espesyal nga sagrado nga mga ordinansa ug mga pakigsaad usab gikinahanglan]. Gipapha niini sa hangtod ang sayop nga konsepto nga ang pagpadayag natapos diha sa Biblia ug nga ang kalangitan sarado na karon. (Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 62)

Dugang nga mga Kalihokan sa Pagkat-on

Mormon 8:1–5. Unsa kaha kon si Moroni wala magmalamposon?

Aron matabangan ang mga estudyante nga makasabot sa kamahinungdanon ni Moroni nga nagtabang sa pagpreserbar sa bulawan nga mga palid, ikonsiderar ang pagpasalida sa bidyo nga “Scriptures Legacy” gikan sa time code 0:00 hangtod sa 2:27 ug 19:40 hangtod sa 20:46. Hisgoti kon unsa untay mahitabo kon si Moroni napakyas pa ug sa unsang paagi kita napanalanginan tungod kay siya milampos.

Mormon 8:14–15. Ang tinuod nga bili sa bulawan nga mga palid

Aron matabangan ang mga estudyante nga makasabot kon sa unsang paagi si Joseph Smith nagkinahanglan sa pag-andam sa iyang kaugalingon aron siya makapatungha sa Basahon ni Mormon “uban sa bug-os nga tinguha ngadto sa himaya [sa Dios]” (Mormon 8:15), ipakigbahin ang mga kinutlo gikan sa mga pahina 28–29 sa Mga Santos, vol. 1, Ang Sumbanan sa Kamatuoran.

Mormon 8:22–26. Ebidensiya nga ang Dios nagtuman sa mga pakigsaad

Dapita ang mga estudyante sa paglista sa mga tawo kinsa nakatampo sa paghatag kanato sa Basahon ni Mormon. Mahimong basahon sa mga estudyante ang unsay gisulti ni Moroni diha sa Mormon 8:22–26 mahitungod niadtong nag-una kaniya ug adunay dakong tinguha sa pagpanalangin sa umaabot nga mga kaliwatan (tan-awa usab sa Enos 1:15–18). Tabangi ang mga estudyante nga makasabot nga ang Basahon ni Mormon usa ka ebidensiya nga ang Ginoo naghimo ug nagtuman sa mga pakigsaad.

Mahimong makabenepisyo ang mga estudyante gikan sa paghimo og lista sa dugang nga mga pakigsaad nga gihimo sa Ginoo nga kita nasayod nga Siya motuman.