Mormon 9:7–27

“Dios sa mga Milagro”

Usahay kon magbasa kita mahitungod sa mga milagro diha sa mga kasulatan, tingali maghunahuna kita kon nganong wala kitay susama nga mga milagro sa atong panahon. Nahibalo si Moroni nga ang pipila ka mga tawo makabaton niini nga pangutana sa kataposang mga adlaw. Kini nga leksiyon makatabang kanimo nga makasabot kon sa unsang paagi ang pagbaton og hugot nga pagtuo sa Dios makatugot Kaniya sa paghimo og mga milagro diha sa imong kinabuhi.

Pagtukod og hugot nga pagtuo diha ni Jesukristo. Ang pagtuon sa mga kasulatan makatabang sa mga estudyante nga makaila kang Jesukristo. Dasiga sila sa pagduol ngadto sa Manluluwas pinaagi sa pagtutok sa makakabig nga mga baroganan ug pinaagi sa pagpakita og hugot nga pagtuo diha Kaniya samtang sila nagtuon.

Pagpangandam sa estudyante: Dapita ang mga estudyante sa pagbasa o sa pagpaminaw sa pakigpulong ni Elder Ronald A. Rasband nga “Tan-awa! Ako Mao ang usa ka Dios sa mga Milagro” ug sa paghunahuna mahitungod sa unsay ilang nakat-onan o unsa nga mga pangutana ang aduna sila mahitungod sa mga milagro. Kini nga pakigpulong anaa sa ChurchofJesusChrist.org.

Mga Posibleng Kalihokan sa Pagkat-on

Dios sa mga Milagro

Aron matabangan ang mga estudyante nga mahisgotan kon sa unsang paagi ang Dios nagpadayon sa pagbuhat og mga milagro taliwala sa Iyang mga anak karon, ikonsiderar ang pagpakigbahin og usa ka kasinatian o senaryo. Mahimo nimong hangyoon ang mga estudyante sa pagkonsiderar kon nganong ang pipila ka mga tawo nagtan-aw lamang sa mga milagro isip mga sulagma.

Mahimo natong ikonsiderar ang daghang mga panghitabo sa atong kinabuhi nga milagroso. Bisan pa, ang uban tingali nag-isip kanila nga mga sulagma lamang. Paghunahuna og pipila ka mga pananglitan sa mga milagro nga ang uban mahimong masipyat sa paghunahuna isip mga sulagma.

• Unsa kaha sa imong hunahuna ang hinungdan nga ang mga tawo masayop sa paghunahuna sa mga milagro nga mga sulagma lamang?

• Nganong importante man alang sa usa ka tawo nga magbaton og hugot nga pagtuo nga ang Dios nagbuhat og mga milagro diha sa atong mga kinabuhi karon?

Pamalandongi ang imong pagtuo nga ang Dios makahimo og mga milagro. Unsa ka makusganon ang imong pagtuo sa mga milagro diha sa mga kasulatan, diha sa mga kinabuhi sa uban, ug diha sa imong kaugalingong kinabuhi?

Si Moroni nagpamatuod sa mga milagro sa Dios

Si Moroni, kinsa nakakita sa atong panahon, misulat og usa ka mensahe niadtong kinsa milimod nga ang mga milagro mahimo gihapon nga mahitabo.

Basaha ang Mormon 9:7–11, mangita sa unsay gitudlo ni Moroni mahitungod sa Dios.

• Unsay mipatigbabaw kanimo gikan niini nga mga bersikulo?

• Unsa nga mga kamatuoran ang imong maila?

Ikonsiderar ang pagsulat diha sa pisara niining mga kamatuoran.

Duha ka mga kamatuoran nga gitudlo ni Moroni mao nga ang Dios sama kagahapon, karon, ug sa kahangtoran ug nga ang Dios usa ka Dios sa mga milagro.

• Sa unsang paagi nga ang pagsabot niini nga mga kamatuoran makaimpluwensiya sa atong hugot nga pagtuo sa Dios?

Paghimo og paagi nga makatabang ka sa mga estudyante sa paghunahuna og mas lawom mahitungod sa mga pagtulun-an ni Moroni niini nga kapitulo. Usa ka paagi tingali mao angpagpahimo og pamphlet sa mga estudyante nga nagpamubo ug naghatag og mga ehemplo sa mga pagtulun-an ni Moroni. Ang mga estudyante mahimong magtrabaho nga magtinagsa o diha sa gagmay nga mga grupo. Paghatag og papel, mga galamiton sa pagsulat, ug ang gikinahanglan nga mga instruksiyon. Tingali aduna kay mga hulagway sa Manluluwas nga naghimo og mga milagro nga ilang magunting ug ipapilit nga gamiton isip hapin alang sa pamphlet. Ang mga estudyante mahimo usab nga mohimo og digital nga presentasyon o laing matang nga ilang gipili.

Handurawa nga makatabang ka ni Moroni sa pagpakigbahin sa iyang mensahe pinaagi sa pag-andam og presentasyon nga nagpasabot niini nga mga kamatuoran.

Paghimo og pamphlet pinaagi sa pagpilo sa usa ka pirasong papel ngadto sa katunga, nga magbilin kanimo og usa ka hapin sa atubangan, duha ka sulod nga seksiyon, ug usa ka likod. Aron matabangan ang pag-organisar sa imong pamphlet, ikonsiderar ang pag-label sa matag seksiyon ug pagbutang og usa ka hulagway o ilustrasyon sa hapin.

• Unang seksiyon (hapin): “Ang Dios usa ka Dios sa mga milagro.”

• Ikaduhang seksiyon: “Mga pananglitan sa mga milagro.”

• Ikatulong seksiyon: “Mga milagro nga nahitabo karon.”

• Ikaupat nga seksiyon: “Unsaon sa pagdapit sa Dios sa pagbuhat og mga milagro.”

Sa tibuok leksiyon, idugang ang mga hunahuna, mga pagbati, mga impresyon, ug mga panabot nga anaa kanimo samtang ikaw magtuon.

Mga ehemplo sa mga milagro

Basaha ang Mormon 9:11–18, mangita og mga milagro nga gusto ni Moroni nga atong mailhan. Ilista sa ikaduha nga pahina sa imong pamphlet ang imong nadiskobrehan.

Human ka makaila og pipila ka mga milagro nga gihisgotan ni Moroni, ilista ang ubang mga milagro gikan sa mga kasulatan nga imong mahunahunaan.

• Unsa ang natabang niini nga mga milagro aron makasabot ka mahitungod sa Langitnong Amahan ug ni Jesukristo?

Mga milagro nga nanghitabo karon

Basaha ang Mormon 9:19, mangita sa unsay gitudlo ni Moroni mahitungod sa mga milagro karon.

Si Elder Ronald A. Rasband sa Korum sa Napulog Duha ka Apostoles nagtudlo kon sa unsang paagi kita makaila og mga milagro sa atong panahon.

Ang mga milagro, mga timailhan, ug mga katingalahan makita nga daghan kaayo taliwala sa mga sumusunod ni Jesukristo karon, diha sa inyong mga kinabuhi ug sa akoa. Ang mga milagro mao ang balaanong mga buhat, mga pagpakita, ug mga pagpahayag sa walay kinutobang gahom sa Dios ug ang pagpamatuod nga Siya “sama sa kagahapon, karon, ug sa kahangt[o]ran.” …

Daghan kaninyo ang nakasaksi og mga milagro, sobra pa sa inyong mahunahunaan. Kini tingali mora og gamay ra kon itandi sa pagbanhaw ni Jesus sa mga minatay. Apan ang gidak-on niini dili mao ang nakapahimo niini nga milagro, ang nakapahimo niini nga milagroso tungod kay naggikan kini sa Dios. (Ronald A. Rasband, “Tan-awa! Ako usa ka Dios sa mga Milagro,” Liahona, Mayo 2021, 110)

• Unsa ang matabang niini nga pamahayag sa atong pagsabot mahitungod sa mga milagro?

• Unsa ang dagko ug gagmay nga mga milagro nga nagagikan sa Dios karon?

Sa ikatulong pahina sa imong pamphlet nga gimarkahan og “Mga milagro nga nahitabo karon,” isulat ang mga milagro nga imong nasaksihan o niadtong imong nailhan.

Ikonsiderar ang pagdapit sa mga estudyante sa pagpakigbahin og mga milagro nga ilang nasinati. Kinahanglang dili nimo sila hangyoon nga mopakigbahin og bisan unsa nga paminaw nila hilabihan ka personal o sagrado. Kini tingali ang usa ka angay nga panahon sa pagpakigbahin sa mga milagro nga imong nasinati, lakip ang gagmay nga mga butang nga mahimong isipon nga mga sulagma.

Alang sa usa ka ehemplo sa bidyo, mahimo nimong ipakita ang bidyo nga “Sanctify Yourselves” o usa ka kasinatian nga gipakigbahin ni Elder Ronald A. Rasband sa “Pinaagi sa Balaan nga Plano” gikan sa time code 7:16 hangtod sa 8:19.

Unsaon sa pagdapit sa Dios sa pagbuhat og mga milagro

Paghunahuna og pipila ka mga milagro nga imong gibati nga labing gikinahanglan o gilaoman karon.

Basaha ang Mormon 9:20–28, mangita sa unsay gisugo sa Dios nga atong buhaton aron Siya makapanalangin kanato og mga milagro.

• Unsaon man nato sa pagdapit sa Dios sa pagbuhat og mga milagro sa atong mga kinabuhi?

Basaha ang mosunod nga pamahayag ni Presidente Russell M. Nelson o tan-awa ang bidyo nga “Ang Gahom sa Kadasig sa Espirituhanong Paglambo,” gikan sa time code 13:30 hangtod sa 14:05, anaa sa ChurchofJesusChrist.org.

Ang Ginoo mopanalangin kaninyo og mga milagro kon kamo motuo Kaniya, “sa walay pagduhaduha.” Buhata ang esprituhanong buhat sa pagtinguha og mga milagro. Sa mainampoong paagi pangayo og tabang sa Dios sa pagtabang ninyo nga makagamit niana nga matang sa hugot nga pagtuo. Ako mosaad nga kamo makasinati sa inyong kaugalingon nga si Jesukristo “[mo]hatag og gahom niadtong maluya; ug kaniya nga walay kabaskog magadugang siya og kusog.” (Russell M. Nelson, “Ang Gahom sa Kadasig sa Espirituhanong Paglambo,” Liahona, Mayo 2022, 99)

• Unsa ang mipatigbabaw diha nimo gikan sa mga pulong ni Presidente Nelson?

• Unsa nga espirituhanong buhat ang kinahanglan natong buhaton aron sa pagtinguha og mga milagro?

Ikonsiderar ang pagdapit sa mga estudyante sa pagpakigbahin sa ilang mga pamplet ngadto sa uban diha sa klase. Mahimo nilang idugang niini ang bisan unsa nga ilang nakat-onan gikan sa ilang mga kaedad. Dayon mahimo usab nimong hisgotan ang mosunod nga mga pangutana.

• Unsa ang imong nakat-onan ug nabati mahitungod sa Dios sa imong pagtuon sa Mormon 9?

• Unsa ang imong buhaton aron sa pagdapit sa Iyang mga milagro diha sa imong kinabuhi?

Komentaryo ug Background nga Impormasyon

Unsa kaha kon ako mag-ampo alang sa usa ka milagro ug mobati nga ingon og dili kini moabot?

Si Elder Ronald A. Rasband sa Korum sa Napulog Duha ka Apostoles miingon:

Adunay mga higayon nga kita naglaom alang sa usa ka milagro nga mamaayo ang usa ka minahal sa kinabuhi, nga balihon ang usa ka dili makiangayon nga binuhatan, o humokon ang kasingkasing sa usa ka masuk-anon o nahisalaag nga kalag. Kon ikonsiderar ang mga butang sa mortal nga panglantaw, gusto kita nga ang Ginoo manginlabot, nga moayo sa unsay naguba. Pinaagi sa hugot nga pagtuo, ang milagro moabot, bisan dili gayod sa atong gusto nga higayon o sa pamaagi nga maoy atong gitinguha. Nagpasabot ba kana nga dili igo ang atong pagtuo o dili kita angayan sa Iyang pagpanginlabot? Dili. Kita gipangga sa Ginoo. (Ronald A. Rasband, “Tan-awa! Ako usa ka Dios sa mga Milagro,” Liahona, Mayo 2021, 111)

Unsa nga mga milagro ang gihimo sa Manluluwas karon nga tingali wala nako ikonsiderar?

Si Presidente Dallin H. Oaks sa Unang Kapangulohan mitudlo:

Ang pag-usab sa mga lawas o pagpanalipod sa mga templo mga milagro, apan ang usa ka mas dako nga milagro mao ang usa ka dako nga kausaban sa kasingkasing sa usa ka anak nga lalaki o anak nga babaye sa Dios (tan-awa sa Mosiah 5:2). Ang kausaban sa kasingkasing, lakip ang bag-ong mga kinaiya, mga prayoridad, ug mga tinguha, mas dako ug mas importante kay sa bisan unsang milagro nga naglambigit sa lawas. (Dallin H. Oaks, “Miracles,” Ensign, Hunyo 2001, 17)

Si Elder Donald L. Hallstrom sa Seventy mipamatuod:

Karong adlawa mopamatuod ko og mga milagro. Ang atong pagkaanak sa Dios usa ka milagro. Ang pagdawat og lawas sa Iyang hitsura ug panagway usa ka milagro. Ang gasa sa usa ka Manluluwas usa ka milagro. Ang Pag-ula ni Jesukristo usa ka milagro. Ang potensiyal alang sa mahangtorong kinabuhi usa ka milagro. …

Bisan unsa ang atong kaliwat, atong nasyonalidad, atong nabuhat kon maghinulsol kita, ang nabuhat diri kanato—kitang tanan pareha nga makadawat niini nga mga milagro. (Donald L. Hallstrom, “Nahunong ba ang Adlaw sa mga Milagro?” Liahona, Nob. 2017, 90)

Dugang nga mga Kalihokan sa Pagkat-on

Ang mga milagro sa Manluluwas

Kon maghisgot sa mga milagro gikan sa nangagi, ikonsiderar ang pagtan-aw og bidyo nga nagpakita og mga milagro gikan sa kinabuhi sa Manluluwas. Usa ka kapilian mao ang paggamit sa mga bahin sa “Finding Faith in Christ” gikan sa time code 7:40 hangtod sa 10:47.

Pagsulat sa mga milagro

Tingali mahimo nimong dapiton ang mga estudyante sa pagsugod og “Journal sa Milagro [Miracle Journal].” Dasiga sila sa pagpamalandong sa gibuhat sa Dios alang kanila sa matag adlaw ug irekord kini sa ilang mga journal. Isip pananglitan, tan-awa ang bidyo nga, “O Hinumdumi, Hinumdumi” (1:27) o tan-awa ang mga bahin sa pakigpulong ni Presidente Henry B. Eyring, “O Hinumdumi, Hinumdumi” ( Liahona, Nob. 2007, 66–69).