Rebyo 23 sa Doktrinal nga Kahanas

Isag-ulo

batan-ong babaye nga nagtuon sa mga kasulatan

Ang paghinumdom sa mga tudling sa kasulatan ug sa unsay gitudlo niini makatabang nimo sa daghang mga paagi. Kini nga leksiyon gituyo aron sa pagtabang sa mga estudyante sa pagsag-ulo og daghan nga mga pakisayran sa kasulatan ug sa mahinungdanon nga mga hugpong sa mga pulong sa kasulatan, o sa tibuok tudling sa doktrinal nga kahanas, gikan sa ikaduhang bahin sa Basahon ni Mormon.

Pagdasig sa pagsag-ulo. Pagmatngon nga dili makapawala sa kadasig sa mga estudyante kinsa tingali maglisod sa pagsag-ulo. Tabangi ang mga estudyante nga adunay mga kakulangan sa pagkat-on nga mangita og mga paagi sa pagsag-ulo nga mas mohaom sa ilang mga panginahanglan.

Pagpangandam sa estudyante: Dapita ang mga estudyante sa pagpili og mahinungdanon nga hugpong sa mga pulong sa kasulatan sa doktrinal nga kahanas ug pakisayran nga sag-ulohon ug sa pagtambong sa klase nga andam sa pagpakigbahin.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Ang kamahinungdanon sa pagbalikbalik

Tabangi ang mga estudyante nga makasabot sa kabililhon sa pagbalikbnalik, apan ayaw paggahin og daghang panahon dinhi. Ipaneguro sa mga estudyante nga aduna silay igong panahon sa pagsag-ulo sa mga hugpong sa mga pulong o mga tudling sa doktrinal nga kahanas sa ulahing bahin sa leksiyon.

Adunay daghang mga kaayohan sa pagbalikbalik sa usa ka butang nga gusto natong makat-onan o mahinumdoman. Paglista og pipila ka mga kalihokan nga sa kasagaran nagkinahanglan sa kanunay nga pagbalikbalik.

• Unsa ang pipila ka mga paagi nga nakabenepisyo ka sa pagbalikbalik sa usa ka butang sa makadaghan?

Kon makatabang, ikonsiderar ang paghisgot sa makadiyot sa kamatuoran nga ang mga tawo kasagaran makalimot sa bag-ong nakat-onan nga materyal inig molabay ang mga semana, apan sila makapalambo sa paghinumdom pinaagi sa pagtan-aw og balik sa materyal. Usab, imbes nga isag-ulo ang tanan sa usa ka higayon, mahimong mas epektibo kini ang pag tunga-tunga sa materyal ngadto sa gagmay nga mga bahin.

Moroni nagpakita ngadto kang Joseph Smith

Ipakita ang imahe ni Joseph Smith nga giduaw ni Moroni.

Sa dihang ang propeta sa Basahon ni Mormon nga si Moroni, karon usa ka langitnong mensahero, mibisita ni Joseph Smith, migamit siya og pagbalikbalik aron sa pagtabang sa 17 anyos nga si Joseph sa paghinumdom og importante nga mensahe.

• Unsa ang imong nahinumdoman mahitungod niini nga mga pagbisita? (Tan-awa ang Joseph Smith-Kasaysayan 1:33–49.)

• Unsa ang gisulti niini mahitungod sa Dios nga Siya mohimo sa pagpadala ni Moroni sa makaupat ka higayon sa paghatag sa sama nga mensahe?

Si Elder David A. Bednar sa Korum sa Napulog Duha ka Apostoles naghisgot sa balik-balik nga mga pagbisita nga gihimo ni Moroni ngadto ni Joseph Smith ug dayon mitudlo:

Elder David A. Bednar

Ang pagbalikbalik usa ka sakyanan diin ang Espiritu Santo makapahayag sa atong mga hunahuna, makaimpluwensiya sa atong mga kasingkasing, ug makapadako sa atong panabot. (David A. Bednar, “Repeat Over Again … the Same Things as Before” [Brigham Young University–Idaho devotional, Ene. 26, 2016], byui.edu)

• Unsa ang natabang niini nga imong masabtan ang mahitungod sa mga benepisyo sa balik-balik nga pagtuon sa mga tudling sa doktrinal nga kahanas ug sa mahinungdanon nga mga hugpong sa mga pulong sa kasulatan?

• Unsa kaha ang gisulti niini mahitungod sa piho nga mga kasulatan nga gipili alang kanimo aron balikon ug pagatutokan?

Ipakita o hatagi ang mga estudyante og kopya sa mosunod nga tsart o dapita sila sa pagpangita sa lista sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas (2022).

Dapita sila sa pagrebyo sa mga pakisayran ug sa mahinungdanon nga mga hugpong sa mga pulong sa kasulatan nga ilang gisag-ulo sa miagi ug dayon sa paghukom kon hain nga mga tudling ang gusto nilang tutokan sa pagsag-ulo karon.

Doktrinal nga Kahanas sa Basahon ni Mormon: Alma–Moroni

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan Alma 7:11–13	Mahinungdanon nga Hugpong sa mga Pulong sa Kasulatan “Ug siya magpadayon, mag-antos sa mga sakit ug mga kasakit ug mga pagtintal sa matag matang.”
Pakisayran sa Kasulatan Alma 34:9–10	Mahinungdanon nga Hugpong sa mga Pulong sa Kasulatan “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”
Pakisayran sa Kasulatan Alma 39:9	Mahinungdanon nga Hugpong sa mga Pulong sa Kasulatan “Ayaw na pagsunod sa mga tinguha nga daotan sa imong mga mata.”
Pakisayran sa Kasulatan Alma 41:10	Mahinungdanon nga Hugpong sa mga Pulong sa Kasulatan “Ang pagkadaotan dili mahitabo nga kalipay.”
Pakisayran sa Kasulatan Helaman 5:12	Mahinungdanon nga Hugpong sa mga Pulong sa Kasulatan “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukuranan.”
Pakisayran sa Kasulatan 3 Nephi 11:10–11	Mahinungdanon nga Hugpong sa mga Pulong sa Kasulatan “Ako mituman sa kabubut-on sa Amahan sa tanan nga mga butang gikan sa sinugdanan.”
Pakisayran sa Kasulatan 3 Nephi 12:48	Mahinungdanon nga Hugpong sa mga Pulong sa Kasulatan “[Pagmahingpit] sama nga Ako ingon, o ang inyong Amahan kinsa anaa sa langit hingpit.”
Pakisayran sa Kasulatan 3 Nephi 27:20	Mahinungdanon nga Hugpong sa mga Pulong sa Kasulatan “Duol ngari kanako ug magpabunyag … aron kamo mahimo nga pagasantoson pinaagi sa pagdawat sa Espiritu Santo.”
Pakisayran sa Kasulatan Ether 12:6	Mahinungdanon nga Hugpong sa mga Pulong sa Kasulatan “Kamo dili makadawat og saksi hangtod human sa pagsulay sa inyong hugot nga pagtuo.”
Pakisayran sa Kasulatan Ether 12:27	Mahinungdanon nga Hugpong sa mga Pulong sa Kasulatan “Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila.”
Pakisayran sa Kasulatan Moroni 7:45–48	Mahinungdanon nga Hugpong sa mga Pulong sa Kasulatan “Ang gugma nga putli mao ang tiunay nga gugma ni Kristo.”
Pakisayran sa Kasulatan Moroni 10:4–5	Mahinungdanon nga Hugpong sa mga Pulong sa Kasulatan “Mangutana sa kinasingkasing, uban sa tinuod nga katuyoan nga may hugot nga pagtuo kang Kristo … [ug] pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

Ang mga estudyante mahimong mogamit sa mosunod o sa ubang mga pagbansay aron sa pagsag-ulo sa pakisayran ug sa mahinungdanon nga hugpong sa mga pulong sa kasulatan o sa tibuok tudling. Sa pagkompleto, mahimong ipakita sa mga estudyante ang mga biswal nga ilang gihimo sa opsiyon 2 ug ipasabot kon sa unsang paagi nga ang ilang gibuhat makatabang kanila sa pagpabilin sa panumdoman kon unsay ilang nasag-ulo. Kon itugot sa panahon, mahimong balikon sa mga estudyante kini nga mga pagbansay alang sa ubang mga kasulatan sa doktrinal nga kahanas.

Sugdi sa pagsag-ulo

Paghunahuna og usa o duha ka paagi nga mahimo nimong dapiton ang Espiritu Santo sa paglamdag sa imong hunahuna samtang imong gamiton ang pagbalikbalik aron sa pagtabang kanimo sa pagsag-ulo. Ang mosunod nga mga pananglitan tingali makatabang kanimo:

1. Tunga-tungaa kon unsa ang gusto nimong isag-ulo ngadto sa gagmay nga mga bahin ug ibalikbalik kini nga magkalahi.

2. Paghimo og biswal sa tanan o sa pipila sa mga pulong nga gusto nimong isag-ulo.

3. Basaha ang bahin sa tudling nga gusto nimong isag-ulo hangtod nga imong masulti kini nga dili motan-aw. Ang paggamit sa unang mga letra sa mga pulong makatabang usab.

Plano nga balikon

Dapita ang mga estudyante sa pagpalambo sa ilang paghinumdom pinaagi sa pagpadayon sa pagsag-ulo bisag sa dili ting-klase. Tabangi ang estudyante nga magmalamposon pinaagi sa pagpahimo kanila og detalyado nga plano ug sa pag-follow up sa ilang pag-uswag sa mosunod nga mga adlaw ug mga semana.

Paghunahuna og mga paagi nga mahimo nimong ipadayon ang pagsag-ulo sulod sa pipila ka adlaw o mga semana. Ang mosunod nga mga ideya tingali makatabang kanimo sa pagdesisyon:

1. Pag-ampo ngadto sa Langitnong Amahan alang sa tabang sa paghinumdom kon unsay imong gisag-ulo.

2. Pagpili og usa ka piho nga panahon sa adlaw aron sa pagsulti kutob sa imong mahimo gikan sa panumdoman. Mahimo kang magtakda og usa ka alarma aron sa pagpahinumdom kanimo sa samang oras kada adlaw.

3. Pagdapit og usa ka tawo sa pagsusi sa imong pag-uswag ug paghinumdom pinaagi sa pagdapit kaniya sa pagtan-aw sa mga pulong samtang imong isulti ngadto kaniya.