Ether 1–5

Kinatibuk-ang Pagpasabot

Dihang ang daotang mga tawo misulay sa pagtukod og tore aron makaabot sa langit, ang Ginoo milibog sa ilang pinulongan (tan-awa sa Genesis 11:1–9). Ang igsoon nga lalaki ni Jared nangamuyo ngadto sa Ginoo, nangamuyo nga Siya moluwas sa iyang pamilya ug mga higala niini nga kalibog (tan-awa sa Ether 1:34–37), ug ang Ginoo mitubag uban sa kaluoy. Samtang ang igsoon nga lalaki ni Jared ug ang iyang mga tawo nagtukod og mga barko aron makatabok sa dagat, nakasugat sila og pipila ka dagko nga mga problema. Ang igsoon nga lalaki ni Jared miduol sa Ginoo nga adunay plano sa pagsulbad sa iyang mga problema ug mapainubsanong nag-ampo nga adunay “hilabihan nga ka hugot nga pagtuo” (Ether 3:9) nga siya nakakita ug nakigsulti uban sa Ginoo. Ang Ginoo misugo ni Moroni sa pagselyo sa natala nga panan-awon sa igsoon nga lalaki ni Jared ug mipasabot nga kini nga mga sinulat ipadayag kon ang mga tawo makabaton og hugot nga pagtuo sama sa gibuhat sa igsoon nga lalaki ni Jared.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Ether 1

Katuyoan sa leksiyon: Kini nga leksiyon gituyo aron sa pagdasig sa mga estudyante sa pag-ampo nga mas sinsero ug makanunayon.

• Pagpangandam sa estudyante: Dapita ang mga estudyante sa pagbasa sa Ether 1:34–37 ug sa pagmarka sa hugpong sa mga pulong nga “pangamuyo ngadto sa Ginoo.” Awhaga sila sa pagtambong nga andam mopakigbahin unsa ang kahulogan niini nga hugpong sa mga pulong ngadto kanila ug sa unsang paagi kini mahimong lahi sa mga paagi nga kita usahay mag-ampo.

• Mga Bidyo: “The Tower of Babel” (0:58); “Mga Tubag sa Pag-ampo” (12:39; tan-awa gikan sa time code 2:16 hangtod sa 4:31)

• Sugyot sa pagtudlo pinaagi sa videoconference: Kon ang mga estudyante magpakaaron-ingnon nga sila gihangyo nga mahimong kabahin sa usa ka panel sa pagpalambo sa ilang mga pag-ampo, ikonsiderar ang pagdapit kanila sa pagpamalandong sa mga pangutana sulod sa usa o duha ka minuto sa dili pa mopakigbahin. Aron matabangan nga ang kalihokan mahimong mura gyod og usa ka panel, ikonsiderar ang pagdapit sa mga ginikanan o ubang mga batan-on sa pagtambong niining kataposang bahin sa klase.

Ether 2

Katuyoan sa leksiyon: Kini nga leksiyon makatabang sa mga estudyante nga mahibalo kon unsaon sa pagtinguha sa tabang sa Ginoo sa pagsulbad sa ilang mga problema.

• Pagpangandam sa estudyante: Dapita ang mga estudyante sa pagtambong nga andam mopakigbahin og mga kasinatian diin sila o ang uban nga ilang nailhan nakadawat sa tabang sa Ginoo aron sa pagsulbad sa mga problema.

• Sugyot sa pagtudlo pinaagi sa videoconference: Ikonsiderar ang pag-email sa mga estudyante sa tsart alang sa pagtuon sa Ether 2. Sa dili pa ibutang ang mga estudyante ngadto sa mga breakout room, ikonsiderar ang pag-assign og usa ka estudyante sa matag grupo nga mahimong tigsulat ug ipakigbahin ang ilang screen aron ang ilang grupo makasulat diha sa tsart nga magkauban. Inig mahuman na ang mga grupo, dapita ang usa o duha ka grupo sa pagpakigbahin sa ilang screen ngadto sa klase ug ipakita ang ilang nahuman nga tsart.

Ether 3

Katuyoan sa leksiyon: Kini nga leksiyon gituyo aron sa pagtabang sa mga estudyante nga mapainubsanong maghupot og hugot nga pagtuo diha kang Jesukristo.

• Pagpangandam sa estudyante: Dapita ang mga estudyante nga maghunahuna og tulo ka tawo nga ilang gidayeg gikan sa kasaysayan sa Simbahan o sa mga kasulatan ug sa unsang paagi kini nga mga tawo nagpakita og hugot nga pagtuo kang Jesukristo.

• Handout: “Ang Hugot nga Pagtuo sa Igsoong Lalaki ni Jared”

• Mga bidyo: “Faith and the Goal” (4:40); “Rebuilding My Faith When I Felt Lost” (6:26)

• Sugyot sa pagtudlo pinaagi sa videoconference: Ikonsiderar ang pagbahin sa mga estudyante ngadto sa mga breakout room sa mga grupo nga tag-upat aron buhaton ang mga kalihokan A, B, C, ug D. Pagdapit og usa ka sakop sa matag grupo nga mahimong lider ug magdesisyon kon kinsa ang mobuhat sa unsa nga buluhaton ug kon unsa nga han-ay ang ilang pagpakigbahin. Kon walay igong mga estudyante alang sa eksaktong mga grupo sa tinag-upat, ikonsiderar ang pagbaton og pipila ka mga grupo nga tinagutlo. Dili kinahanglan nga ang matag grupo mokompleto sa tanan nga upat ka mga kalihokan.

Ether 4–5

Katuyoan sa leksiyon: Kini nga leksiyon gituyo aron sa pagtabang sa mga estudyante nga makasabot unsay ilang mahimo aron makaangkon og dugang nga pagpadayag.

• Pagpangandam sa estudyante: Dapita ang mga estudyante sa pagbasa sa Ether 4 isip kabahin sa ilang inadlaw nga pagtuon sa kasulatan, mangita sa mga kamatuoran nga makatabang kanila nga makadawat og dugang nga pagpadayag gikan sa Ginoo.

• Butang: Usa ka butang nga bililhon kanimo o sa imong pamilya

• Sugyot sa pagtudlo pinaagi sa videoconference: Ikonsiderar ang pagpadala og mensahe sa dili pa ang klase mohangyo og pipila ka mga estudyante nga mopakita og usa ka butang nga bililhon ngadto kanila o sa ilang mga pamilya atol sa leksiyon.

Rebyo 24 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante sa pagpalawom sa ilang pagsabot ug sa pagpasabot sa mga kamatuoran nga makita sa nagkalain-laing mga tudling sa doktrinal nga kahanas gikan sa Basahon ni Mormon.

• Pagpangandam sa estudyante: Ikonsiderar ang pagdapit sa mga estudyante sa mainampoong pagpili og tudling sa doktrinal nga kahanas sa Basahon ni Mormon nga gusto nilang mas masabtan. Awhaga sila sa paghisgot sa tudling ngadto sa usa ka miyembro sa pamilya, suod nga higala, o lider sa Simbahan ug sa pagtambong nga andam mopakigbahin sa unsay ilang nakat-onan mahitungod sa tudling gikan sa ilang diskusyon.

• Sugyot sa pagtudlo pinaagi sa videoconference: Ikonsiderar ang pag-assign sa matag estudyante sa pagpadala og mga pangutana mahitungod sa usa ka tudling sa doktrinal nga kahanas ngadto sa laing estudyante. Mahimo nimo kini pinaagi sa pag-assign sa matag estudyante og usa ka numero ug hangyoa sila sa pagpadala sa ilang mga pangutana ngadto sa tawo nga adunay maong numero dugangan og usa (ang estudyante nga adunay labing taas nga numero magpadala og mga pangutana ngadto sa numero uno). Dayon maningkamot ang mga estudyante sa pagtubag sa mga pangutana ug ipadala kini og balik sa kataposan sa leksiyon.