Ether 4–5

“Pagbutyag Ngadto Kanila sa Akong Tanan nga mga Pagpadayag”

Gibati ba nimo nga andam ka nga makakat-on pa gikan sa Ginoo? Kon dili, unsay imong mabuhat? Ang Ginoo misugo ni Moroni sa pagselyo sa natala nga panan-awon sa igsoon nga lalaki ni Jared ug mipasabot nga kini nga mga sinulat ipadayag kon ang mga tawo makabaton og hugot nga pagtuo sama sa nabatonan sa igsoon nga lalaki ni Jared. Kini nga leksiyon gituyo aron sa pagtabang kanimo nga makasabot unsa ang imong mahimo aron makaangkon og dugang nga pagpadayag.

Tabangi ang mga estudyante nga makakita og personal nga kahulogan diha sa mga kasulatan.Dasiga ang mga estudyante sa paggamit sa nagkalain-laing mga kahanas sa pagtuon aron sa pagpalambo sa ilang pagsabot sa mga kasulatan. Mahimong mangita ang mga estudyante og mga detalye diha sa sugilanon, maghimo og mga pagtandi ug mga koneksiyon tali sa mga asoy ug sa ilang kaugalingong mga kinabuhi, ug matino kon unsaon nila paggamit ang unsay ilang nakat-onan.

Pagpangandam sa estudyante: Dapita ang mga estudyante sa pagbasa sa Ether 4 isip kabahin sa ilang inadlaw nga pagtuon sa kasulatan, mangita sa mga kamatuoran nga makatabang kanila nga makadawat og dugang nga pagpadayag gikan sa Ginoo.

Mga Posibleng Kalihokan sa Pagkat-on

Kon kita andam na

Paghunahuna og usa ka butang nga bililhon kaayo kanimo o sa imong pamilya.

Sama pananglit, mahimo nimong ipakita o ihulagway ang usa ka butang nga bililhon kanimo.

• Bisan og ganahan ka nga mopakigbahin niini nga butang ngadto sa uban, nganong mag-amping ka man kaayo sa pagtugot sa usa ka gamay nga bata sa pagdala niini?

• Unsa kaha ang gikinahanglan nga makat-onan o buhaton sa usa ka bata sa dili pa ikaw mosalig kaniya sa butang?

Sa samang paagi, ang Ginoo ganahan nga mopadayag sa mga kamatuoran ngari kanato, apan Siya naghulat hangtod nga kita andam sa pagdawat niini (tan-awa sa Alma 12:9–11).

Ang giselyo nga bahin sa Basahon ni Mormon

Ang usa ka ehemplo sa Ginoo nga naghulat sa pagpadayag sa kamatuoran hangtod nga kita maandam mao ang sinelyohan nga bahin sa Basahon ni Mormon. Si Joseph Smith gimandoan nga dili moabli o mohubad niana nga bahin (tan-awa sa Ether 5:1). Kini naglangkob sa usa ka rekord sa panan-awon nga gihatag ngadto sa igsoon nga lalaki ni Jared.

Aron matabangan ka nga makat-on mahitungod sa giselyohan nga bahin sa Basahon ni Mormon, gamita ang mga kasulatan nga gilista sa parentesis sa pagtubag sa mosunod nga tinuod o dili tinuod nga mga pangutana.

Ikonsiderar ang pagdapit sa mga estudyante sa pagpangita sa mga tubag niining tinuod o dili tinuod nga mga pangutana diha sa gagmay nga mga grupo. Sa laing paagi, mahimo nimong dapiton ang mga estudyante sa pagbasa sa mga pamahayag ug sa pagtag-an sa mga tubag, dayon basaha ang mga bersikulo aron makita kon husto ba kini.

Ang unang tulo ka mga tubag tinuod, samtang ang kataposang duha dili tinuod.

1. Ang Manluluwas mipakita sa Iyang Kaugalingon ngadto sa igsoon nga lalaki ni Jared ug nangalagad ngadto kaniya (Ether 3:20).

2. Ang Ginoo mipakita ngadto sa igsoon nga lalaki ni Jared sa tanan nga mga lumulupyo sa yuta, milabay ug sa umaabot, nga walay pagpugong sa bisan unsa gikan kaniya (Ether 3:25; 4:4).

3. Ang Ginoo misugo sa igsoon nga lalaki ni Jared sa pagrekord sa unsay iyang nahibaloan ug sa pagselyo sa talaan. Kini diha sa usa ka pinulongan nga ang Ginoo milibog ug dili mabasa kon walay balaan nga mga tighubad (Ether 3:21–22, 24, 27; 4:1).

4. Ang Ginoo mihatag sa igsoon nga lalaki ni Jared og tulo ka mga bato nga mahimong gamiton sa paghubad sa talaan (Ether 3:23–24, 28).

5. Walay usa nga nakabasa sa rekord sa igsoon nga lalaki Jared (Ether 4:2–5).

Pag-angkon og dugang nga pagpadayag

Pinaagi ni Moroni, ang Ginoo mipadayag unsay kinahanglan natong buhaton aron moduol ngadto Kaniya, makadawat og pagpadayag, ug mangandam sa atong kaugalingon sa pagdawat sa dugang nga pagpadayag nga anaa sa sinelyohan nga bahin sa Basahon ni Mormon.

Isulat diha sa pisara ang dili kompleto nga baroganan nga gilista sa ubos.

Basaha pag-ayo ang Ether 4:5–15, mangita og mga paagi sa pagkompleto sa mosunod nga kamatuoran. Ang hugpong sa mga pulong nga “niini nga mga butang” sa mga bersikulo 8 ug 11 nagpasabot sa Basahon ni Mormon. Ang usa ka tabil, sama sa panig-ingnan nga gihatag sa bersikulo 15, usa ka kurtina o piraso nga panapton nga gigamit sa pagtabon o pagtago sa usa ka butang.

• Ang Ginoo mopanalangin kanato og dugang nga pagpadayag samtang kita …

Dapita ang mga estudyante sa pagsulat diha sa pisara og mga hugpong sa mga pulong gikan sa mga kasulatan nga tukma nga makakompleto niini nga baroganan. Mahimo usab nilang ilakip ang mga bersikulo diin ilang nakit-an kadto nga mga hugpong sa mga pulong. Ang mosunod mao ang pipila ka mga panig-ingnan:

• “mohinulsol … ug mahimo nga limpyo sa atubangan sa Ginoo” (Ether 4:6)

• “maghupot sa hugot nga pagtuo” (Ether 4:7)

• “[motuo] niini nga mga butang” (nagpasabot sa gipadayag na sa Ginoo, ilabi na sa Basahon ni Mormon) (Ether 4:8, 11)

• “[moduol ngadto] [sa Manluluwas]” (Ether 4:13–15)

• mag-ampo “uban sa usa ka masulub-on nga kasingkasing ug usa ka mahinulsulon nga espiritu” (Ether 4:15)

Ikonsiderar ang pagpangutana kon ang mga estudyante adunay bisan unsang mga pangutana mahitungod niini nga mga hugpong sa mga pulong. Kon anaa, buhata ang mosunod nga kalihokan:

Kon makatabang kini kanimo nga mas makasabot sa bisan hain niini nga mga hugpong sa mga pulong, pangitaa ang mahinungdanong mga pulong diha sa Giya ngadto sa mga Kasulatan, o sa Gospel Library App. Sama pananglit, mahimong makatabang ang pagpangita sa “masulub-on nga kasingkasing” diha sa Giya ngadto sa mga Kasulatan.

Aron matabangan ang mga estudyante nga makasabot ug mobati sa kaimportante niini nga mga buhat, dapita sila sa pagbuhat bisan usa lang sa mosunod:

1. Paghunahuna og usa ka ehemplo sa kasulatan o sa modernong adlaw sa usa ka tawo nga naghimo sa usa o daghan pa niini nga mga buhat. Isulat kon sa unsa nga paagi kini nga mga buhat misangpot sa pagtabang ug sa pagpadayag gikan sa Ginoo.

2. Hunahunaa ang usa ka higayon sa dihang ang pagbuhat sa usa o daghan pa niini nga mga buhat misangpot sa tubag o giya gikan sa Ginoo diha sa imong kinabuhi. (Ang usa ka panag-ingnan mahimong ang pagpamalandong sa unsay imong nakat-onan ug ang pagtuo pinaagi sa imong pagtuon hangtod karon sa Basahon ni Mormon ug sa unsang paagi kini misangpot sa pagpadayag sa imong kinabuhi.)

Dapita ang mga estudyante sa pagpakigbahin sa ilang mga ehemplo ug mga kasinatian.

• Ngano sa imong hunahuna nga ang Ginoo manalangin kanato og dugang nga pagpadayag samtang kita nagpuyo sa paagi nga Iyang gihulagway sa mga bersikulo 5–15?

• Ngano kaha nga ang pagkapakyas nga mahimong sama sa matang sa mga tawo nga gihulagway sa Ginoo naghimo kanato nga dili andam alang sa dugang nga pagpadayag?

• Unsa ang gitudlo niini kanimo mahitungod sa Ginoo ug sa matang sa mga tawo nga Iyang gusto nga kita mamahimo?

Ang Ginoo mopadayag sa sinielyohan nga bahin sa Basahon ni Mormon sa Iyang “kaugalingon nga panahon” (2 Nephi 27:21) kon kita mogamit sa sama nga hugot nga pagtuo sa igsoon nga lalaki ni Jared (tan-awa sa Ether 4:7). Sa susama, mahimong adunay dugang nga pagpadayag nga ang Ginoo naghulat sa paghatag kanimo. Sa pagtapos niini nga leksiyon, buhata ang mosunod:

• Rebyoha ang paghulagway niini nga mga bersikulo niadtong kinsa naggamit sa hugot nga pagtuo ug gibalaan, pamalandongi kon unsa nga mga paagi ikaw sama kanila ug sa unsa nga mga paagi nga gikinahanglan nimo nga molambo.

• Pamalandong ug pag-ampo aron masayod kon unsay gusto sa Ginoo nga imong buhaton aron makadawat og dugang nga pagpadayag gikan Kaniya. Isulat diha sa imong journal sa pagtuon ang imong mga hunahuna ug mga pagbati.

Pagdapit og pipila ka mga estudyante sa pagpakigbahin sa ilang mga hunahuna ug mga pagbati mahitungod sa unsay ilang nakat-onan karon, kon dili kaayo kini personal. Ipakigbahin usab ang imong kaugalingong mga hunahuna ug pagpamatuod.

Komentaryo ug Background nga Impormasyon

Ether 3:23–24. Unsa ang duha ka bato nga gihisgotan?

Ang duha ka mga bato nga gihatag sa Ginoo ngadto sa igsoon nga lalaki ni Jared kabahin sa gitawag og Urim ug Thummim. “Si Joseph Smith migamit niini sa paghubad sa Basahon ni Mormon ug sa pag-angkon og ubang mga pagpadayag” (“Urim ug Thummim,” BIble Dictionary).

Unsa pa ang akong mabuhat aron makadawat og dugang nga pagpadayag gikan sa Ginoo?

Si Presidente Russell M. Nelson mitudlo:

Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history. …

… Ako mosaad nga samtang kamo magpadayon nga magmasulundon, mopahayag og pasalamat alang sa matag panalangin nga gihatag sa Ginoo kaninyo, ug samtang kamo mapailobon nga motahod sa panahon sa Ginoo, pagatagaan kamo sa kahibalo ug pagsabot nga inyong gipangita. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Si Elder David A. Bednar sa Korum sa Napulog Duha ka Apostoles mitudlo:

Ang espiritu sa pagpadayag anaa sa matag tawo kinsa nagdawat pinaagi sa tukma nga awtoridad sa priesthood sa makaluwas nga mga ordinansa sa bunyag pinaagi sa pagpaunlod alang sa kapasayloan sa mga sala ug sa pagpandong sa mga kamot alang sa gasa sa Espiritu Santo—ug kinsa naglihok diha sa hugot nga pagtuo sa pagtuman sa priesthood nga sugo sa “pagdawat sa Espiritu Santo.” … Ang sinsero nga tinguha ug pagkatakos nagdapit sa espiritu sa pagpadayag nganhi sa atong mga kinabuhi. (David A. Bednar, “Ang Espiritu sa Pagpadayag,” Liahona, Mayo 2011, 87-88)

Dugang nga mga Kalihokan sa Pagkat-on

Ether 4:10–11. Nagtuo sa mga pulong sa Ginoo

Kon mapuslanon ang paghisgot sa mas lawom nga motuo sa unsay gipadayag na sa Ginoo, lakip ang Basahon ni Mormon, dapita ang mga estudyante sa pagbasa o sa pagrebyo sa Ether 4:10–11, mangita kon unsay mahitabo kon kita mopili nga motuo sa mga pulong nga gihatag na sa Ginoo kanato (tan-awa usab sa Moroni 10:3–6). Ang mga estudyante mahimong moila og usa ka baroganan sama sa kon kita motuo sa mga pulong sa Ginoo, nan Siya mopamatuod sa kamatuoran niini ngari kanato pinaagi sa Espiritu Santo. Ikonsiderar ang pagpangutana sama sa mosunod:

Ngano sa imong hunahuna nga kinahanglan una natong tuohan ang mga pulong sa Ginoo sa dili pa kita masayod sa ilang kamatuoran?

Unsa ang pipila ka mga pamaagi diin atong mapakita sa Ginoo nga kita motuo sa Iyang mga pulong?

Sa unsang paagi nga ang pagpakita og pagtuo sa mga pulong sa Ginoo sa usa niini nga mga paagi nagdala kanimo sa pagdawat og kompirmasyon sa kamatuoran niini pinaagi sa Espiritu Santo?

Ether 5:1–4. Ang Tulo ka mga Saksi sa Basahon ni Mormon

Aron makatabang sa paghatag og gibug-aton sa kamahinungdanon sa pagtuo sa Basahon ni Mormon, ikonsiderar ang pagtuon mahitungod sa Tulo ka mga Saksi sa Basahon ni Mormon. Dapita ang mga estudyante sa pagbasa sa Ether 5:2–4, mangita sa unsay gisugo ni Moroni nga buhaton ni Joseph Smith. (Mahimong makatabang ang pagkahibalo nga si Moroni nagsulat direkta ngadto ni Joseph Smith sobra sa 1,400 ka tuig sa wala pa niya kini mabasa.)

Ang mga estudyante mahimong mobasa sa pagpamatuod ni David Whitmer, Oliver Cowdery, ug Martin Harris diha sa “Ang Pagpamatuod sa Tulo ka mga Saksi” sa sinugdanan sa Basahon ni Mormon. Dapita ang mga estudyante sa pagpakigbahin kon sa unsa nga paagi ang pagpamatuod sa Tulo ka mga Saksi nakatabang kanila sa pagtuo sa Basahon ni Mormon. Mahimo usab nga isulat sa mga estudyante ang ilang kaugalingong saksi sa Basahon ni Mormon o kon sa unsang paagi paminaw nila ilang madugangan ang ilang kahibalo ug pagpamatuod niini. Kon ang mga estudyante gusto og dugang nga impormasyon mahitungod sa Tulo ka mga Saksi, mahimo nilang basahon ang apendiks C sa Dali, Sunod Kanako-Alang sa mga Indibidwal ug mga Pamilya: Basahon ni Mormon 2020.