Sa unsang paagi nga ang imong komunikasyon ngadto sa Ginoo mausab kon ikaw mag-atubang og mga hagit? Sa dihang ang daotang mga tawo misulay sa pagtukod og tore aron makaabot sa langit, ang Ginoo milibog sa ilang pinulongan aron sila dili makasabot sa usag usa (tan-awa sa Genesis 11:1–9). Ang igsoon nga lalaki ni Jared nangamuyo ngadto sa Ginoo, naghangyo nga Siya moluwas sa iyang pamilya ug mga higala niini nga kalibog (tan-awa sa Ether 1:34–37). Ang Ginoo mitubag sa iyang kinasingkasing nga mga pag-ampo uban sa kapuangod ug kaluoy. Kini nga leksiyon gituyo aron sa pagdasig kanimo sa pag-ampo nga mas sinsero ug makanunayon.
Pagtudlo sa sukaranan nga mga konsepto. Ang mga estudyante mahimong kanunay nga makadungog mahitungod sa sukaranang mga konsepto sa ebanghelyo ni Jesukristo (sama sa pag-ampo). Ang pagtabang sa mga estudyante nga makasabot kon sa unsang paagi kini nga mga sukaranan nga mga konsepto makapanalangin sa ilang mga kinabuhi makatabang kanila nga magpadayon nga moapil sa mga leksiyon diin kini nga mga sukaranan nga mga konsepto gitudlo.
Pagpangandam sa estudyante: Dapita ang mga estudyante sa pagbasa sa Ether 1:34–37 ug sa pagmarka sa hugpong sa mga pulong nga “pangamuyo ngadto sa Ginoo.” Awhaga sila sa pagtambong nga andam mopakigbahin unsa ang kahulogan niini nga hugpong sa mga pulong ngadto kanila ug sa unsang paagi kini mahimong lahi sa mga paagi nga kita usahay mag-ampo.
Mga Posibleng Kalihokan sa Pagkat-on
Sinsero ug makanunayon nga mga buhat
Ikonsiderar ang pagpakita o ang pagsulat diha sa pisara sa mosunod nga mga pamahayag nga sulati-ang-blangko. Dapita ang mga estudyante nga magpares-pares o mag-grupo og gagmay nga mga grupo ug mopakigbahin kon unsaon nila pagsulat ang mga blangko.
Paghunahuna og usa ka buhat nga maayo nga buhaton, sama sa magtuon, mag-ehersisyo, o magserbisyo sa uban. Gamita kana nga buhat sa mosunod nga mga pamahayag, ug kompletoha ang mga hugpong sa mga pulong sa tukmang paagi.
Kon ang usa ka tawo (buhat) usahay, nan .
Kon ang usa ka tawo (buhat) nga sinsero ug makanunayon sa hataas nga panahon, nan .
Unsaon kaha nimo pagkompleto kining sama nga duha ka mga pamahayag gamit ang buhat sa pag-ampo?
Ikonsiderar ang pagsulat sa mga tubag sa mga estudyante diha sa pisara sa mosunod nga pangutana.
Unsa ang pipila ka mga rason nga tingali dili kita kanunay nga sinsero o makanunayon sa atong mga pag-ampo sama sa atong gitinguha?
Dapita ang mga estudyante sa pagpamalandong sa ilang mga tubag sa mga pangutana sa mosunod nga parapo. Ayaw sila dapita sa pagpakigbahin sa ilang mga tubag.
Paggahin og kadiyot sa pagpamalandong sa imong kaugalingong mga pag-ampo. Unsa ang nakatabang kanimo nga mahimong sinsero ug makanunayon? Unsa kaha ang nakapugong kanimo nga mahimong sinsero ug makanunayon? Ngano kaha nga gusto nimong mouswag?
Sa imong pagtuon niini nga leksiyon, pangita og mga kamatuoran nga makatabang kanimo sa imong mga pag-ampo.
Ang basahon ni Ether
Niini nga punto sa Basahon ni Mormon, si Moroni milakip sa basahon ni Ether. Kini naglangkob sa istorya sa mga Jaredite. Gihubad kini gikan sa 24 ka bulawan nga mga palid nga nakaplagan sa mga tawo nga gipadala ni Limhi (tan-awa sa Mosiah 8:7–11; Ether 1:1–2). Kini nga basahon nagsugod sa asoy sa igsoon nga lalaki ni Jared ug sa iyang mga pag-ampo ngadto sa Ginoo. Tan-awa ang mosunod nga timeline (mga petsa gibana-bana) aron makita kon kanus-a siya nagpuyo kon itandi sa ubang mga tawo nga imong natun-an sa Basahon ni Mormon karong tuiga:
Ikonsiderar ang pagpakita sa mosunod nga timeline aron matabangan ang mga estudyante nga makasabot kanus-a nagpuyo ang mga Jaredite. Ang pagsabot niini nga konteksto sa mga kasulatan makatabang sa mga estudyante nga makabaton og dugang nga mga panglantaw samtang sila nagtuon.
Basaha ang Ether 1:33 aron makita kon unsa ang nanghitabo samtang nagsugod ang istorya sa mga Jaredite.
Unsa ang imong nahibaloan mahitungod sa “dako nga tore” ug “ang Ginoo milibog sa pinulongan sa mga katawhan” (Ether 1:33)?
Paminaw sa mga tubag sa mga estudyante ug ipamubo ang mosunod nga istorya o tan-awa ang mosunod nga bidyo kon mapuslanon.
Kon kini nga istorya dili pamilyar kanimo, ikonsiderar ang pagtan-aw sa bidyo nga “The Tower of Babel” (0:58), makita sa ChurchofJesusChrist.org, o basaha ang Genesis 11:1–9 (tan-awa usab angikaduhang parapo sa ulohan nga pahina sa Basahon ni Mormon).
Unsa kaha ang bation nga mabuhi niining panahona?
Nagapangamuyo sa Dios inubanan sa hugot nga pagtuo
Usahay, ang mga kasulatan naglangkob sa balik-balik nga mga hugpong sa mga pulong aron sa paghatag niadtong mga hugpong sa mga pulong og dugang nga gibug-aton o kamahinungdanon. Ang pagpangita niining gibalik-balik nga mga hugpong sa mga pulong makatabang kanato nga mas makasabot kon unsa ang gisulayan nga itudlo sa dinasig nga tagsulat.
Basaha ang Ether 1:34–37 aron mahibaloan kon sa unsang paagi si Jared ug ang iyang igsoon nga lalaki nagtinguha sa pagsulbad sa ilang mga problema. Ikonsiderar ang pagmarka sa gibalikbalik nga mga hugpong sa mga pulong nga nagpakita kon sa unsang paagi ang igsoon nga lalaki ni Jared nag-ampo ug giunsa pagtubag sa Ginoo.
Unsay imong nakat-onan gikan sa mga hugpong sa mga pulong nga imong gimarkahan?
Paminaw og maayo samtang motubag ang mga estudyante. Isulat diha sa pisara ang bisan unsang tinuod nga mga baroganan nga ilang gipakigbahin.
Usa ka baroganan nga atong makat-onan gikan niini nga asoy mao nga kon kita mangamuyo ngadto sa Dios diha sa hugot nga pagtuo, Siya magmaluloy-on kanato.
Dapita ang mga estudyante sa paghinumdom sa ilang pagpangandam alang sa klase. Human masulat sa mga estudyante ang ilang mga hunahuna mahitungod sa mosunod nga mga pag-aghat, ikonsiderar ang pagpares kanila ug sa pagdapit kanila sa pagpaambit sa ilang mga tubag.
Isulat kon unsaon nimo pagpasabot kini nga baroganan ngadto sa usa ka tawo. Ilakip ang mosunod nga mga punto diha sa imong pagpasabot:
Unsa sa imong hunahuna ang gipasabot sa pagpangamuyo ngadto sa Ginoo diha sa hugot nga pagtuo ug sa unsang paagi kini mahimong lahi gikan kon giunsa usahay nato sa pag-ampo
Unsa ang gitudlo kanimo sa mga tubag sa Ginoo ngadto sa igsoon nga lalaki ni Jared mahitungod Kaniya
Pipila ka mga paagi nga ang Ginoo mahimong motubag sa atong mga pag-ampo uban sa kaluoy
Aron makakita og usa ka modernong ehemplo sa Ginoo nga mitubag diha sa kaluoy sa sinsero ug makanunayon nga pag-ampo, tan-awa ang “Mga Tubag sa Pag-ampo” gikan sa time code 2:17 hangtod sa 4:32, nga makita sa ChurchofJesusChrist.org.
Importante kini nga makaamgo nga wala kita masayod kon unsa ka dugay nga nadawat sa igsoon nga lalaki ni Jared ang iyang mga tubag. Si Elder Brook P. Hales sa Seventy mipakigbahin sa mosunod:
Imahe
Elder Brook P. Hales
Ang Amahan nakaila kanato, nasayod sa atong mga panginahanglan, ug motabang kanato sa hingpit. Usahay kana nga tabang ihatag sa takna nga gikinahanglan gayod o diha-diha dayon human nga kita nangayo alang sa balaan nga tabang. Usahay ang atong labing bug-os ug takos nga tinguha wala matubag sa paagi nga atong gilaoman, apan atong masuta nga ang Dios adunay mas dako nga mga panalangin nga gitagana. Ug usahay ang atong matarong nga mga tinguha dili mahatag niining kinabuhia. (Brook P. Hales, “Mga Tubag sa Pag-ampo,” Liahona, Mayo 2019, 12)
Ngano kaha sa imong hunahuna nga kini nga mga pagtulun-an importante nga atong hinumdoman?
Kon ang mga estudyante makabenepisyo gikan sa dugang nga pagtuon kon unsaon sa Dios pagtubag sa mga pag-ampo, ikonsiderar ang pagbuhat sa dugang nga kalihokan nga giulohan og “Mga tubag sa mga pag-ampo” niini nga punto sa leksiyon.
Kon ang ilang mga tubag dili kaayo personal, ikonsiderar ang pagdapit sa mga estudyante sa pagpakigbahin sa pipila ka mga paagi nga ang Ginoo mipakita og kaluoy alang kanila samtang sila nag-ampo ngadto Kaniya. Mahimo usab nimong idugang ang imong kaugalingong mga kasinatian.
Pagkamakanunayon sa pag-ampo
Basaha ang Ether 1:38–43; 2:5, 13–15, mangita og dugang nga mga panabot mahitungod sa pag-ampo ug sa mga tubag sa Ginoo.
Dapita ang mga estudyante sa pagpakigbahin kon unsay ilang nakat-onan. Kon mapuslanon, ipangutana ang pipila sa mosunod nga mga pangutana:
Unsa nga mga hugpong sa mga pulong diha sa Ether 1:43 ug 2:14 ang nagpakita kon unsa ang gibati sa Ginoo mahitungod sa atong pagkamakanunayon sa pag-ampo? Ngano kaha nga Siya gusto nga kita mag-ampo ngadto Kaniya sa kanunay?
Ang igsoon nga lalaki ni Jared adunay panahon nga siya dili kaayo makanunayon sa iyang mga pag-ampo (tan-awa sa Ether 2:14). Unsa ang pipila ka mga rason nga tingali dili kaayo kita makanunayon sa atong mga pag-ampo karon?
Pagpalambo sa pag-ampo
Handurawa nga ikaw anaa sa panel nga panaghisgot sa mga batan-on kon unsaon pagtabang ang kabatan-on sa pagpalambo sa ilang mga pag-ampo.
Ikonsiderar ang pagdapit og pipila ka mga estudyante ngadto sa atubangan sa lawak klasehanan alang sa panel nga panaghisgot. Ang mga estudyante mahimong maghimo og ilang kaugalingong mga pangutana alang sa panel o gamiton ang mga pangutana sa ubos.
Unsay usa ka butang nga imong nabuhat o mabuhat aron mahimong mas makahuloganon o sinsero ang imong mga pag-ampo?
Unsay imong gihimo nga nakatabang kanimo nga mag-ampo sa makanunayon? Unsa pa ang ubang mga butang nga mahimo nimo?
Sa unsang paagi nga ang paghunahuna mahitungod sa imong relasyon sa Langitnong Amahan nakaimpluwensiya sa pagkamakanunayon ug pagkasinsero sa imong mga pag-ampo? (Tan-awa sa Giya ngadto sa mga Kasulatan, “Pag-ampo.”)
Tinguhaa ang pagdasig sa Espiritu Santo ug pamalandongi ang bisan unsang mga kausaban nga imong gibati nga kinahanglan nimong himoon sa imong mga pag-ampo. Paghimo og usa ka piho nga tumong ug pasalig sa pagsunod sa bisan unsang mga impresyon nga imong madawat.