Rebyo 24 sa Doktrinal nga Kahanas

Sabta ug Ipasabot

Ang doktrinal nga kahanas makatabang kanimo nga masabtan ug mapasabot ang doktrina sa Manluluwas sa imong kaugalingong mga pulong. Kini nga leksiyon maghatag kanimo og oportunidad sa pagpalawom sa imong panabot ug sa pagpasabot sa mga kamatuoran nga makita sa nagkalain-laing mga tudling sa doktrinal nga kahanas gikan sa Basahon ni Mormon.

Pagkat-on og dugang pa mahitungod sa imong mga estudyante.Pangita og mga oportunidad nga makaila sa mga estudyante. Ang obserbasyon ug sinsero nga mga pangutana makatabang kanimo nga makahibalo og dugang pa mahitungod sa unsay importante sa matag estudyante. Sa imong pagsabot og maayo bahin sa imong mga estudyante, ang Espiritu Santo makatabang kanimo sa pagtutok sa imong pagtudlo sa ilang mga panginahanglan.

Pagpangandam sa estudyante: Ikonsiderar ang pagdapit sa mga estudyante sa mainampoong pagpili og tudling sa doktrinal nga kahanas sa Basahon ni Mormon aron tun-an kon unsay gusto nilang mas masabtan. Awhaga sila sa paghisgot sa tudling ngadto sa usa ka miyembro sa pamilya, suod nga higala, o lider sa Simbahan ug sa pagtambong nga andam mopakigbahin sa unsay ilang nakat-onan mahitungod sa tudling gikan sa ilang diskusyon.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Pagpangutana

Ikonsiderar ang pagdapit sa mga estudyante sa pagpangita og usa ka tawo diha sa klase nga tingali wala kaayo nila nailhan. Dapita sila sa paggahin og pipila ka minuto sa pagpangutana aron matabangan sila nga makaila sa usag usa. Kon mapuslanon, hatagi sila og mga pananglitan sa mga pangutana nga mahimo nilang ipangutana, sama sa “Unsay gusto nimong buhaton?” ug “Unsa ang pipila sa imong paboritong mga asignatura sa eskwelahan?”

Hunahunaa ang usa ka tawo nga imong nailhan na pag-ayo.

• Giunsa nimo siya pag-ila?

• Unsa ang papel sa pagpangutana diha sa imong abilidad sa pagkaila kanila?

• Unsa kaha ang kalainan sa inyong relasyon kon wala pa ka makapangutana?

Sama nga importante nga mangutana aron makaila sa usa ka tawo sa personal, importante usab nga mangutana samtang magtuon ka sa mga kasulatan aron mas makaila ug makasabot kang Jesukristo pinaagi kanila.

Si Presidente Russell M. Nelson mitudlo, “Ang pagkab-ot sa giya sa kasulatan gitabangan pinaagi sa pagpangutana og may kalabotan nga mga pangutana” (“Living by Scriptural Guidance,” Ensign, Nov. 2000, 18).

Ang pagpangutana mahitungod sa mga tudling sa doktrinal nga kahanas makatabang kanato nga mas makasabot niini ug mas makadapit sa paggiya sa Ginoo sa atong mga kinabuhi.

Ikonsiderar ang pagpakita sa kataposang 12 ka mga pakisayran sa kasulatan sa doktrinal nga kahanas sa Basahon ni Mormon o ipakita sa mga estudyante kon asa nila kini makita diha sa Mahinungdanon nga Dokumento sa Doktrinal nga Kahanas (2023). Kon gitinguha, gamita ang tanan nga 24 ka mga tudling sa doktrinal nga kahanas sa Basahon ni Mormon alang niini nga pagrebyo o pagpili lang og pipila, depende sa mga panginahanglan sa klase.

Ikonsiderar ang paghimo sa mosunod nga kalihokan isip usa ka klase gamit ang usa sa mga tudling sa doktrinal nga kahanas. Dayon dapita ang mga estudyante nga balikon ang kalihokan gamit ang lain nga tudling sa doktrinal nga kahanas nga ilang gipili. Mahimong magtinabangay ang mga estudyante diha sa mga grupo, sa mga pares, o sa tinagsa-tagsa, depende sa ilang mga panginahanglan ug mga gusto.

Pagpili og usa sa mga tudling sa doktrinal nga kahanas nga gusto nimong mas masabtan ug basaha kini pag-ayo. Pagpili og labing menos duha ka mga pangutana nga mahimo nimong ipangutana mahitungod sa tudling aron mas makasabot niini ug isulat kini. Sama pananglit, samtang magbasa ka sa 3 Nephi 27:20 mahimo kang mangutana, “Unsay buot ipasabot sa pagasantoson?” O samtang magbasa ka sa Moroni 10:3–5 mahimo kang mangutana, “Unsa ang buot ipasabot sa pagpangutana ‘uban sa tinuod nga katuyoan’?”

Pangitaa ang mga tubag sa mga pangutana nga imong gihunahuna; gamita ang mga himan sa pagtuon sa kasulatan sama sa Giya ngadto sa mga Kasulatan, o bisan ang mga pakigpulong sa kinatibuk-ang komperensiya. Mahimo kang mogamit og ubang mga estratehiya sa pagtuon sa kasulatan nga imong nahibaloan, sama sa pagtuon sa naglibot nga mga bersikulo aron mas makasabot sa konteksto sa tudling.

Aron matabangan ang mga estudyante nga makig-interaksiyon sa usag usa, ikonsiderar ang paghangyo kanila sa pagsulat sa tudling sa doktrinal nga kahanas nga ilang gipili ug sa ilang mga pangutana sa usa ka piraso nga papel nga adunay ilang ngalan niini. Dapita ang mga estudyante nga ibaylo ang ilang mga papel sa laing estudyante. Sa laing paagi, dapita ang mga estudyante sa pagpasa sa ilang mga papel ngadto sa atubangan aron ang mga papel mahimong isagol-sagol ug sa sinulagma iapod-apod ngadto sa ubang mga estudyante. Hangyoa ang mga estudyante sa pagrekord sa mga tubag sa mga pangutana diha sa papel nga gihatag kanila. Human sa igo nga panahon, dapita ang mga estudyante sa pag-uli sa mga papel ngadto sa mga estudyante kansang mga ngalan anaa niini.

Hatagi ang mga estudyante og panahon sa pagpamalandong sa mga tubag nga gisulat sa ubang mga estudyante ug, kon mapuslanon, sa pagpangita og dugang nga mga tubag diha sa mga kasulatan, pinaagi sa pag-ampo, ug sa uban pa.

Hinumdomi, mahimong dili ka makakita og mga tubag sa tanan nimong mga pangutana samtang nagtuon ka. Apan samtang magpadayon ka sa pagpakita og hugot nga pagtuo diha sa Ginoo, Siya motabang kanimo nga makahibalo sa kamatuoran sa unsay imong gipangita.

Dapita ang pipila ka mga estudyante sa pagpakigbahin sa tudling sa doktrinal nga kahanas nga ilang gipili, pipila sa mga pangutana nga ilang gisulat, ug sa mga tubag nga ilang nadiskobrehan o sa ilang mga klasmeyt. Dugang pa, ikonsiderar ang pagpangutana kon unsa ang natabang sa tudling kanila sa pagsabot mahitungod sa Manluluwas o sa Iyang ebanghelyo.

Kon itugot sa panahon (o sa laing adlaw), ikonsiderar ang pagdapit sa mga estudyante nga balikon ang kalihokan gamit ang laing tudling sa doktrinal nga kahanas.

Dasiga ang mga estudyante sa pagpadayon sa pagpangutana mahitungod sa mga kasulatan ug sa pagpangita og mga tubag.