« មរមន ៩:៧–២៧ ៖ ‹ ព្រះនៃអព្ភូតហេតុ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« មរមន ៩:៧–២៧ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
មរមន ៩:៧–២៧
« ព្រះនៃអព្ភូតហេតុ »
ពេលខ្លះ នៅពេលអានអំពីអព្ភូតហេតុនៅក្នុងព្រះគម្ពីរ យើងប្រហែលជាឆ្ងល់ថា ហេតុអ្វីបានជាវាមិនកើតមានអព្ភូតហេតុស្រដៀងគ្នានេះនៅក្នុងជំនាន់របស់យើង ។ មរ៉ូណៃបានដឹងថា មនុស្សមួយចំនួននឹងមានសំណួរបែបនេះនៅសម័យចុងក្រោយ ។ មេរៀននេះអាចជួយអ្នកឲ្យយល់អំពីរបៀប ការមានជំនឿលើព្រះអាចឲ្យទ្រង់ធ្វើអព្ភូតហេតុអស្ចារ្យនៅក្នុងជីវិតរបស់អ្នកបាន ។
ស្ថាបនាសេចក្ដីជំនឿលើព្រះយេស៊ូវគ្រីស្ទ ។ ការសិក្សាបទគម្ពីរអាចជួយសិស្សឲ្យស្គាល់ព្រះយេស៊ូវគ្រីស្ទ ។ សូមលើកទឹកចិត្តពួកគេឲ្យចូលទៅជិតព្រះអង្គសង្គ្រោះ ដោយផ្តោតលើការប្រែចិត្តជឿ និងដោយការអនុវត្តសេចក្តីជំនឿលើទ្រង់ នៅពេលដែលពួកគេសិក្សា ។
ការរៀបចំសិស្ស ៖ សូមអញ្ជើញសិស្សឲ្យអាន ឬស្ដាប់សុន្ទរកថាដោយអែលឌើរ រ៉ូណល អេ រ៉ាសបាន « មើលចុះ ! យើងជាព្រះនៃអព្ភូតហេតុទាំងឡាយ » ហើយគិតអំពីអ្វីដែលពួកគេរៀន ឬសំណួរអ្វីដែលពួកគេមានអំពីអព្ភូតហេតុទាំងឡាយនោះ ។ សុន្ទរកថានេះមាននៅលើគេហទំព័រ ChurchofJesusChrist.org°។
សកម្មភាពរៀនសូត្រដែលអាចមាន
ព្រះនៃអព្ភូតហេតុ
ដើម្បីជួយសិស្សពិភាក្សាអំពីរបៀប ដែលព្រះបន្តធ្វើអព្ភូតហេតុក្នុងចំណោមកូនចៅរបស់ទ្រង់សព្វថ្ងៃនេះ សូមពិចារណាចែកចាយបទពិសោធន៍ ឬសាច់រឿងមួយ ។ អ្នកអាចស្នើសុំសិស្សឲ្យពិចារណាទៅលើមូលហេតុ ដែលមនុស្សមួយចំនួនចាត់ទុកអព្ភូតហេតុជារឿងចៃដន្យ ។
យើងអាចចាត់ទុកព្រឹត្តិការណ៍ជាច្រើនក្នុងជីវិតរបស់យើងថា ជាអព្ភូតហេតុ ។ ប៉ុន្តែអ្នកខ្លះអាចចាត់ទុកវា គ្រាន់តែជាការចៃដន្យប៉ុណ្ណោះ ។ សូមគិតពីឧទាហរណ៍មួយចំនួនអំពីអព្ភូតហេតុដែលអ្នកខ្លះអាចច្រឡំថាជាការចៃដន្យ ។
-
តើអ្នកគិតថាមានអ្វីខ្លះដែលបណ្តាលឲ្យមនុស្សយល់ច្រឡំអំពីអព្ភូតហេតុថាជាការណ៍កើតឡើងដោយចៃដន្យ ?
-
ហេតុអ្វីបានជាវាមានសារៈសំខាន់សម្រាប់នរណាម្នាក់ ដែលមានសេចក្ដីជំនឿថា ព្រះកំពុងធ្វើអព្ភូតហេតុក្នុងជីវិតរបស់យើងនាពេលសព្វថ្ងៃនេះ ?
សូមពិចារណាអំពីសេចក្តីជំនឿរបស់អ្នកថា ព្រះអាចធ្វើអព្ភូតហេតុបាន ។ តើអ្នកជឿជាក់ទៅលើអព្ភូតហេតុនៅក្នុងព្រះគម្ពីរ ក្នុងជីវិតរបស់អ្នកដទៃ និងក្នុងជីវិតរបស់អ្នកខ្លាំងកម្រិតប៉ុនណា ?
មរ៉ូណៃថ្លែងទីបន្ទាល់អំពីអព្ភូតហេតុរបស់ព្រះ
មរ៉ូណៃដែលបានមើលឃើញសម័យរបស់យើង បានសរសេរសារលិខិតទៅកាន់អ្នកដែលមិនជឿថា អព្ភូតហេតុនៅតែអាចកើតឡើងបាន ។
សូមអាន មរមន ៩:៧–១១ ដោយរកមើលពីអ្វីដែល មរ៉ូណៃបានបង្រៀនអំពីព្រះ ។
-
តើអ្នកចាប់អារម្មណ៍អ្វីខ្លះអំពីខគម្ពីរទាំងនេះ ?
-
តើអ្នកអាចរកឃើញសេចក្តីពិតអ្វីខ្លះ ?
សូមពិចារណាសរសេរសេចក្តីពិតទាំងនេះនៅលើក្ដារខៀន ។
មានសេចក្តីពិតពីរដែលមរ៉ូណៃបានបង្រៀន គឺថា ព្រះនៅតែដដែល ទោះពីថ្ងៃម្សិល ថ្ងៃនេះ និងរហូតតទៅ ហើយថា ព្រះ គឺជាព្រះនៃអព្ភូតហេតុ ។
-
តើចំណេះដឹងអំពីសេចក្ដីពិតទាំងនេះអាចមានឥទ្ធិលលើសេចក្ដីជំនឿរបស់យើងលើព្រះយ៉ាងដូចម្ដេច ?
សូមគិតរកវិធីមួយដែលអ្នកអាចជួយដល់សិស្សឲ្យគិតកាន់តែស៊ីជម្រៅអំពីការបង្រៀនរបស់មរ៉ូណៃនៅក្នុងជំពូកនេះ ។ របៀបមួយដែលអាចឲ្យសិស្សបង្កើតកូនសៀវភៅតូចៗដែលសង្ខេប និងផ្តល់ឧទាហរណ៍នៃការបង្រៀនរបស់មរ៉ូណៃ ។ សិស្សអាចធ្វើកិច្ចការរៀងៗខ្លួន ឬជាក្រុមតូចៗបាន ។ សូមឲ្យក្រដាស ប្រដាប់ប្រដាសសម្រាប់សរសេរ និងការណែនាំដែលចាំបាច់ ។ ប្រហែលជាអ្នកអាចឲ្យរូបភាពព្រះអង្គសង្គ្រោះកំពុងធ្វើអព្ភូតហេតុទៅពួកគេ រួចហើយឲ្យពួកគេអាចកាត់រូបភាពទាំងនេះចេញ ហើយយកវាទៅបិទនៅនឹងលើក្របកូនសៀវភៅនោះ ។ សិស្សក៏អាចធ្វើជាបទបង្ហាញឌីជីថល ឬប្រភេទអ្វីផ្សេងទៀតតាមការជ្រើសរើសរបស់ពួកគេផងដែរ ។
សូមស្រមៃគិតអំពីវិធីដែលអាចជួយដល់មរ៉ូណៃ ក្នុងការចែកចាយសារលិខិតរបស់គាត់ ដោយរៀបចំបទបង្ហាញដែលពន្យល់អំពីសេចក្តីពិតទាំងនេះ ។
បង្កើតកូនសៀវភៅដោយបត់ក្រដាសជាពីរ ដែលអាចឲ្យអ្នកមានក្របទំព័រមួយ មានពីរផ្នែកនៅខាងក្នុងនិងក្របផ្នែកខាងក្រោយ ។ ដើម្បីជួយរៀបចំកូនសៀវភៅរបស់អ្នក សូមពិចារណាដាក់ឈ្មោះ ឬចំណងជើងនៅផ្នែកនីមួយៗដោយមានដាក់រូបភាព ឬគូរូបភាពនៅលើក្របនេះ ។
-
ផ្នែកទី មួយ ( ក្រប ) ៖ « ព្រះគឺជាព្រះនៃអព្ភូតហេតុ » ។
-
ផ្នែកទី ពីរ ៖ « ឧទាហរណ៍ពីអព្ភូតហេតុ » ។
-
ផ្នែកទី បី ៖ « អព្ភូតហេតុកើតឡើងនៅថ្ងៃនេះ » ។
-
ផ្នែកទី បួន ៖ « របៀបយាងអញ្ជើញព្រះឲ្យបង្កើតអព្ភូតហេតុ » ។
សូមបន្ថែមគំនិត អារម្មណ៍ ចំណាប់អារម្មណ៍ និងចំណេះដឹងដែលអ្នកមាននៅពេលអ្នកសិក្សានៅពេញមេរៀនទាំងមូល ។
ឧទាហរណ៍ពីអព្ភូតហេតុ
សូមអាន មរមន ៩:១១–១៨ ដោយរកមើលអព្ភូតហេតុនានា ដែលមរ៉ូណៃចង់ឲ្យយើងស្គាល់ ។ នៅលើទំព័រទីពីរនៃកូនសៀវភៅរបស់អ្នក សូមសរសេរនូវអ្វីដែលអ្នកបានរកឃើញ ។
បន្ទាប់ពីអ្នកបានរកឃើញពីអព្ភូតហេតុមួយចំនួន ដែលមរ៉ូណៃបានយោងរួចទៅហើយ សូមរាយបញ្ជីអព្ភូតហេតុផ្សេងទៀតមកពីបទគម្ពីរដែលអ្នកអាចនឹកឃើញ ។
-
តើអព្ភូតហេតុទាំងនេះជួយអ្នកឲ្យយល់ពីអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
អព្ភូតហេតុកើតឡើងនៅថ្ងៃនេះ
សូមអាន មរមន ៩:១៩ ដោយរកមើលពីអ្វីដែលមរ៉ូណៃបង្រៀនអំពីអព្ភូតហេតុនៅថ្ងៃនេះ ។
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់បានបង្រៀនអំពីរបៀបដែលយើងអាចទទួលស្គាល់អព្ភូតហេតុនៅក្នុងជំនាន់របស់យើង ។
អព្ភូតហេតុ ទីសម្គាល់ និងការណ៍អស្ចារ្យទាំងឡាយកើតមាននៅក្នុងចំណោមអ្នកដើរតាមព្រះយេស៊ូវគ្រីស្ទសព្វថ្ងៃនៅក្នុងជីវិតរបស់បងប្អូន និងជីវិតខ្ញុំ ។ អព្ភូតហេតុគឺជាសកម្មភាពដ៏ទេវភាព ការបើកសម្តែង និងជាការបង្ហាញឲ្យឃើញនៃព្រះចេស្តាដ៏គ្មានដែនកំណត់របស់ព្រះ និងជាការបញ្ជាក់មួយថា ទ្រង់គឺ « នៅតែដដែល ទោះពីថ្ងៃម្សិល ថ្ងៃនេះ និងរហូតតទៅ » ។…
បងប្អូនជាច្រើននាក់បានធ្វើជាសាក្សីនៃអព្ភូតហេតុ ច្រើនជាងអ្វីដែលបងប្អូនដឹងទៅទៀត ។ អព្ភូតហេតុទាំងនោះអាចមើលទៅតូចតាច បើសិនជាប្រៀបធៀបទៅព្រះយេស៊ូវ ដែលបានធ្វើឲ្យមនុស្សស្លាប់រស់ឡើងវិញ ។ ប៉ុន្តែភាពអស្ចារ្យមិនមែនជាធាតុផ្សំនៃអព្ភូតហេតុនោះទេ លើកលែងតែវាមកពីព្រះប៉ុណ្ណោះ ។ ( អែលឌើរ រ៉ូណល អេ រ៉ាសបាន « មើលចុះ ! យើងជាព្រះនៃអព្ភូតហេតុទាំងឡាយ » លីអាហូណា ខែ ឧសភា ឆ្នាំ ២០២១ ទំព័រ ១០៩–១១០ )
-
តើសេចក្ដីថ្លែងការណ៍នេះអាចជួយឲ្យពួកយើងយល់អ្វីខ្លះអំពីអព្ភូតហេតុ ?
-
តើមានអព្ភូតហេតុធំ និងតូចអ្វីខ្លះ ដែលកើតចេញមកពីព្រះនៅពេលសព្វថ្ងៃនេះ ?
នៅលើទំព័រទីបីនៃកូនសៀវភៅរបស់អ្នក ដែលមានចំណងជើងថា « អព្ភូតហេតុកើតឡើងនៅថ្ងៃនេះ » សូមសរសេរអព្ភូតហេតុ ដែលអ្នក ឬនរណាម្នាក់ដែលអ្នកស្គាល់បានមើលឃើញ ។
សូមពិចារណាដោយអញ្ជើញសិស្សឲ្យចែកចាយអព្ភូតហេតុដែលពួកគេមាន ។ អ្នកមិនគួរសុំឲ្យពួកគេចែកចាយអ្វីដែលពួកគេគិតថា មានលក្ខណៈផ្ទាល់ខ្លួន ឬពិសិដ្ឋពេកទេ ។ ការណ៍នេះប្រហែលជាពេលវេលាដែលសមស្របមួយក្នុងការចែកចាយ អំពីបទពិសោធន៍នៃអព្ភូតហេតុដែលអ្នកមានរួមទាំងរឿងតូច ដែលអាចចាត់ទុកថា ជារឿងដែលកើតឡើងចៃដន្យផងដែរ ។
សម្រាប់វីដេអូដែលជាឧទាហរណ៍ អ្នកអាចបង្ហាញវីដេអូអំពី « Sanctify Yourselves » ឬបទពិសោធន៍មួយដែលបានចែកចាយដោយអែលឌើរ រ៉ូណាល់ អេ រ៉ាសបាន នៅក្នុង « តាមរយៈការតាក់តែងដ៏ទេវភាព » ចាប់ពីនាទី ទី ៧:១៦ ដល់ ៨:១៩ ។
Sanctify Yourselves
តាមរយៈការតាក់តែងដ៏ទេវភាព
របៀបយាងអញ្ជើញព្រះឲ្យបង្កើតអព្ភូតហេតុ
សូមគិតអំពីអព្ភូតហេតុមួយចំនួន ដែលអ្នកមានគិតក្នុងចិត្តថា សំខាន់បំផុត ឬសម្រាប់ពេលបច្ចុប្បន្ននេះ ។
សូមអាន មរមន ៩:២០–២៨ ដោយរកមើលអ្វីដែលព្រះសុំឲ្យយើងធ្វើ ដើម្បីទ្រង់អាចប្រទានពរដល់យើងជាអព្ភូតហេតុ ។
-
តើយើងអាចអញ្ជើញព្រះឲ្យបង្កើតអព្ភូតហេតុនៅក្នុងជីវិតរបស់យើងបានដោយរបៀបណា ?
សូមអានសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ឬមើលវីដេអូ « អំណាចនៃសន្ទុះខាងវិញ្ញាណ » ចាប់ពីនាទី ទី ១៣:៣០ ដល់ ១៤:០៥ ដែលមាននៅលើគេហទំព័រ ChurchofJesusChrist.org ។
អំណាចនៃសន្ទុះខាងវិញ្ញាណ
ព្រះអម្ចាស់នឹងប្រទានពរដល់ បងប្អូន នូវអព្ភូតហេតុ បើ បងប្អូនជឿលើទ្រង់ « ដោយឥតសង្ស័យអ្វី » ។ សូមធ្វើកិច្ចការខាងវិញ្ញាណដើម្បីស្វែងរកអព្ភូតហេតុ ។ សូមអធិស្ឋានទូលសូមព្រះឲ្យជួយបងប្អូនអនុវត្តសេចក្ដីជំនឿបែបនោះ ។ ខ្ញុំសូមសន្យាថា បងប្អូនអាចដកពិសោធន៍ដោយផ្ទាល់ថា ព្រះយេស៊ូវគ្រីស្ទ « ទ្រង់រមែងចម្រើនកម្លាំងដល់អ្នកដែលល្វើយ ហើយចំណែកអ្នកដែលគ្មានកម្លាំងសោះ នោះទ្រង់ក៏ប្រទានឲ្យ » ។ ( រ័សុល អិម ណិលសុន « អំណាចនៃសន្ទុះខាងវិញ្ញាណ » លីអាហូណា ខែឧសភា ២០២២ ទំព័រ ១០០ )
-
តើអ្នកចាប់អារម្មណ៍អ្វីខ្លះមកពីប្រសាសន៍របស់ប្រធាន ណិលសុន ?
-
តើកិច្ចការខាងវិញ្ញាណអ្វីខ្លះ ដែលយើងអាចនឹងត្រូវធ្វើ ដើម្បីស្វែងរកអព្ភូតហេតុ ?
សូមគិតពិចារណាអញ្ជើញសិស្សឲ្យចែកចាយអំពីកូនសៀវភៅរបស់ពួកគេជាមួយសិស្សផ្សេងទៀតនៅក្នុងថ្នាក់ ។ ពួកគេអាចបញ្ចូលអ្វីទាំងអស់ ដែលពួកគេរៀនមកពីមិត្តភក្តិរបស់ពួកគេទៅក្នុងកូនសៀវភៅនេះ ។ បន្ទាប់មក អ្នកអាចពិភាក្សាសំណួរខាងក្រោមនេះ ។
-
តើអ្នកបានរៀន និងទទួលបានអារម្មណ៍បែបម៉េចខ្លះអំពីព្រះ នៅពេលដែលអ្នកសិក្សា មរមន ៩ ?
-
តើអ្នកនឹងធ្វើអ្វីខ្លះ ដើម្បីយាងអញ្ជើញអព្ភូតហេតុរបស់ទ្រង់ចូលមកក្នុងជីវិតរបស់អ្នក ?