“Mamona 9:7–27: ‘O Se Atua o Vavega,” Tusi Lesona a le Faiaoga o le Tusi a Mamona (2024)

“Mamona 9: 7–27,” Tusi Lesona a le Faiaoga o le Tusi a Mamona

Mamona 9:7–27

“O Se Atua o Vavega”

O nisi taimi pe a faitau e uiga i vavega i tusitusiga paia, atonu tatou te mafaufau pe aisea tatou te le maua ai ni vavega faapena i o tatou aso. Na iloa e Moronae o le a i ai i nisi tagata lenei fesili i aso e gata ai. O lenei lesona e mafai ona fesoasoani ia te oe ia malamalama ai o le faatuatua i le Atua e mafai ai ona Ia faia vavega i lou olaga.

Fausia le faatuatua ia Iesu Keriso. O le suesueina o tusitusiga paia e mafai ona fesoasoani i tagata aoga ia iloa Iesu Keriso. Fautuaina i latou e faalatalata atu i le Faaola e ala i le taulai atu i mataupu faavae e liua ai ma e ala i le faatinoina o le faatuatua ia te Ia a o latou suesue.

Sauniuniga a le tagata aoga: Valaaulia tagata aoga e faitau pe faalogologo i le saunoaga a Elder Ronald A. Rasband “Faauta! O A‘u o se Atua o Vavega” ma mafaufau e uiga i mea latou te aoaoina po o a ni a latou fesili e uiga i vavega. O loo maua lenei saunoaga i le ChurchofJesusChrist.org.

Gaoioiga e Ono Mafai Ona Aoao Ai

O Se Atua o Vavega

Ina ia fesoasoani i tagata aoga e talanoaina pe faapefea ona faaauau e le Atua ona faia vavega i Ana fanau i aso nei, mafaufau e faasoa atu se aafiaga po o se tulaga faataitai. E mafai ona e fai atu i tagata aoga e mafaufau pe aisea e vaai ai nisi o tagata i vavega o ni mea na tutupu talafeauga.

E mafai ona tatou mafaufau i le tele o mea e tutupu i o tatou olaga e ofoofogia. Peitai, o nisi atonu e vaai atu ia i latou ua na o ni mea na tupu talafeauga. Mafaufau i ni nai faataitaiga o vavega e ono sese ai nisi o ni mea talafeauga.

O le a sou manatu o le a le mea e mafua ai ona ave sese e tagata vavega o ni mea na tutupu talafeauga?
Aisea o le a taua ai mo se tasi le i ai o le faatuatua o loo galueaiina e le Atua vavega i o tatou olaga i aso nei?

Mafaufau i lou faatuatua e mafai e le Atua ona faia vavega. O le a le malosi o lou talitonu i vavega i tusitusiga paia, i olaga o isi, ma i lou lava olaga?

Ua molimau mai Moronae i vavega a le Atua

O Moronae, o le na vaai i o tatou aso, na tusia se savali ia i latou o e faafitia e mafai lava ona tutupu vavega.

Faitau le Mamona 9:7–11, ma vaavaai mo mea na aoao mai e Moronae e uiga i le Atua.

O le a se mea e tulaga ese ia te oe mai nei fuaiupu?
O a upumoni e mafai ona e faailoaina?

Mafaufau e tusi upumoni nei i luga o le laupapa.

O upumoni e lua na aoao mai e Moronae o le E tutusa lava le Atua ananafi, i le aso, ma le faavavau ma o le Atua o le Atua o vavega.

E mafai faapefea e le malamalama i nei upumoni ona tosina ai lo tatou faatuatua i le Atua?

Fatu se auala e mafai ona e fesoasoani ai i tagata aoga e mafaufau loloto atili ai e uiga i aoaoga a Moronae i lenei mataupu. O se tasi o auala o le fai atu lea i tagata aoga e fai se tamaitusi e aotele ma tuuina mai ai ni faataitaiga o aoaoga a Moronae. E mafai ona galulue taitoatasi tagata aoga pe i ni vaega toalaiti. Tuuina atu pepa, meafaigaluega tusitusi, ma faatonuga e tatau ai. Atonu e mafai ona e maua ni ata o le Faaola o loo faia vavega mo i latou e ‘oti ese ai ma faakelu e faaaoga o se faavaa mo le tamaitusi. E mafai foi e tagata aoga ona faia se aoaoga faatekinolosi po o se isi ituaiga o a latou filifiliga.

Vaai faalemafaufau i le mafai ona fesoasoani ia Moronae e faasoa atu lana savali e ala i le sauniaina o se aoaoga e faamalamalama ai nei upumoni.

Fatu se tamaitusi e ala i le gagau o se pepa i le afa, ona ia te oe lea o se faavaa, lua vaega i totonu, ma se pitoitua. Ina ia fesoasoani e faatulaga lau tamaitusi, mafaufau e faaigoa vaega taitasi ma tuuina atu se atapue po o se atatusi i luga o le faavaa.

Vaega muamua (faavaa): “O le Atua o se Atua o vavega.”
Vaega lua: “Faataitaiga o vavega.”
Vaega tolu: “O loo tutupu vavega i aso nei.”
Vaega fa: “Auala e valaaulia ai le Atua e faia vavega.”

I le gasologa o le lesona, faaopoopo i ai mafaufauga, lagona, uunaiga, ma malamalamaaga o ia te oe a o e suesue.

Faataitaiga o vavega

Faitau le Mamona 9:11–18, ma vaavaai mo vavega na manao Moronae ia tatou iloa. Lisi i le itulau lona lua o lau tamaitusi mea na e mauaina.

A uma ona e faailoaina nisi o vavega na ta‘ua e Moronae, lisi isi vavega mai tusitusiga paia e mafai ona e mafaufau i ai.

O a ni mea ua fesoasoani ai nei vavega ia te oe e te malamalama ai e uiga i le Tama Faalelagi ma Iesu Keriso?

O vavega o loo tutupu i aso nei

Faitau le Mamona 9:19, ma vaavaai mo mea o loo aoao mai e Moronae e uiga i vavega i aso nei.

Na aoao mai Elder Ronald A. Rasband o le Korama a Aposetolo e Toasefululua e uiga i le auala tatou te ono iloa ai vavega i o tatou aso.

E anoanoai vavega, o faailoga, ma mea ofoofogia i e o mulimuli ia Iesu Keriso i ona po nei, i o outou olaga ma i lo’u foi. O vavega o ni aga faalelagi, o faaaliga, ma faailoaga o le mana e leai se tuaoi o le Atua ma o se faamautinoaga “e tutusa o Ia ananafi, le aso, ma le faavavau.” …

E toatele outou ua molimauina vavega, e sili atu nai lo mea ua outou iloaina. Atonu e foliga mai e faatauvaa pe a faatusatusa ia Iesu o faatutuina e ua oti. Ae o lona maoae e le tulagaese ai se vavega, vagana na sau mai le Atua. (Ronald A. Rasband, “Faauta! O Au o se Atua o Vavega,” Liahona, Me 2021, 109–10)

O le a se mea ua fesoasoani ai lenei fuaitau ia i tatou e malamalama ai e uiga i le vavega?
O a nisi o vavega tetele ma laiti e sau mai le Atua i aso nei?

I le itulau lona tolu o lau tamaitusi ua faaigoaina “O Vavega o loo tutupu i le asō,” tusi ai i lalo ni vavega na e molimauina pe na molimauina foi e i latou e te iloaina.

2:3

Auala e valaaulia ai le Atua e faia vavega

Mafaufau i ni vavega e te lagona e sili ona manaomia pe faamoemoeina i aso nei.

Faitau le Mamona 9:20–28, ma vaavaai mo mea ua poloaiina i tatou e le Atua e fai ina ia mafai ona Ia faamanuiaina i tatou i vavega.

E mafai faapefea ona tatou valaaulia le Atua e faia vavega i o tatou olaga?

Faitau le saunoaga lenei a Peresitene Russell M. Nelson pe matamata le vitio “The Power of Spiritual Momentum,” mai le faailo taimi 13:30 i le 14:05, o loo maua i le ChurchofJesusChrist.org.

17:18

O le a faamanuia e le Alii oe i vavega pe afai e te talitonu ia te Ia, “ma le lē masalosalo i se mea.” Fai le galuega faaleagaga e saili atu ai vavega. Ia ōle atu ma le agaga tatalo i le Atua e fesoasoani mai ia te oe ia faatino lena ituaiga o faatuatua. Ou te folafola atu e mafai ona e lagonaina mo oe lava ia o Iesu Keriso “Na te avatua le malosi i e ua vaivai; a o e ua leai se malosi na te faatuputele i ai le malosi.” (Russell M. Nelson, “O Le Mana o le Malosiaga Faaleagaga,” Liahona, Me 2022, 100)

O le a se mea e tulaga ese ia te oe e uiga i le saunoaga a Peresitene Nelson?
O le a le galuega faaleagaga e ono manaomia ona tatou faia e saili ai vavega?

Mafaufau e valaaulia tagata aoga e faasoa mai a latou tamaitusi i isi o le vasega. E mafai ona latou faaopoopo i ai so o se mea latou te aoaoina mai a latou tupulaga. Ona talanoaina lea o fesili nei.

O le a se mea na e aoaoina ma lagonaina e uiga i le Atua a o e suesueina le Mamona 9?
O le a se mea o le a e faia e valaaulia ai Ana vavega i lou olaga?

Manatu ma Talaaga o Faamatalaga

Ae faapefea pe afai ou te tatalo mo se vavega ma e foliga mai e le oo mai lava?

Na saunoa mai Elder Ronald A. Rasband o le Korama a Aposetolo e Toasefululua:

14:37

E i ai taimi tatou te faamoemoe ai mo se vavega e faamalolo se e pele, e toe mimilo se taga e le amiotonu, pe faamalulu le loto o se agaga ua italili pe faaseseina. O le tilotilo atu i mea e ala i mata faaleolaga nei, tatou te mananao ai i le Alii ia faasalaveia, e toe fau le mea ua nuti. E ala i le faatuatua, o le a oo mai le vavega, e ui atonu e le o la tatou taimi faatulagaina po o le faaiuga sa tatou mananao ai. Pe o le uiga o lena mea ua itiiti lo tatou faatuatua pe ua tatou le agavaa mo Lana faasalavei? Leai. O pele i tatou a le Alii. (Ronald A. Rasband, “Faauta! O Au o se Atua o Vavega,” Liahona, Me 2021, 111)

O a vavega o loo faia e le Faaola i aso nei atonu ou te lei mafaufauina?

Sa aoao mai Peresitene Dallin H. Oaks o le Au Peresitene Sili:

O le suiga o tino poo le puipuia o malumalu o vavega…ae o se vavega e sili atu o se suiga tele lea o le loto e se atalii po o se afafine o le Atua (tagai Mosaea 5:2). O se suiga o le loto, e aofia ai uiga faaalia fou, mea e faamuamua, ma manaoga, e sili atu ona taua nai lo so o se vavega e aofia ai le tino. (Dallin H. Oaks, “Vavega,” Ensign, Iuni 2001, 17)

Na molimau mai Elder Donald L. Hallstrom o le Fitugafulu:

Ou te molimau atu i le aso i vavega. O le avea ma se ataliio le Atua o se vavega. O le mauaina o se tino i Lona faatusa ma foliga o se vavega. O le meaalofa o le Faaola o se vavega. O le Togiola a Iesu Keriso o se vavega. O le faamoemoe mo le ola e faavavau o se vavega. …

E tusa lava po o le a le tatou aganuu, tagatanuu, mea ua tatou faia pe afai ua tatou salamo, po o le a se mea atonu na faia ia i tatou—tatou te mauaina uma avanoa tutusa i nei vavega. (Donald L. Hallstrom, “Pe Ua Uma Ea le Aso o Vavega?” Liahona, Nov. 2017, 90)