Eteru 1

“Tagi atu i le Alii”

E faapefea ona suia au fesootaiga ma le Alii pe a e feagai ma luitau? Ina ua taumafai tagata amioleaga e fausia se olo e oo atu ai i le lagi, sa faaeseeseina e le Alii la latou gagana ina ia le mafai ona latou malamalama i le tasi ma le isi (tagai Kenese 11:1–9). Sa tagi atu le uso o Iareto i le Alii, ma aioi atu faapea o le a Ia faasaoina lona aiga ma uo i lenei fenumiai (tagai Eteru 1:34–37). Sa tali mai le Alii i ana tatalo faatauanau ma le agaalofa ma le alofa mutimutivale. O lenei lesona ua faamoemoe e musuia ai oe ia tatalo ma le faamaoni atili ma le faifai pea.

Aoaoina atu o manatu faavae autu. Atonu e masani ona faalogo tagata aoga e uiga i manatu faavae autu i le talalelei a Iesu Keriso (e pei o le tatalo). O le fesoasoani ai i tagata aoga ia iloa pe mafai faapefea e nei manatu faavae autu ona faamanuiaina o latou olaga e fesoasoani ia i latou e tumau ai le auai i lesona lea e aoao atu ai nei manatu faavae autu.

Sauniuniga a le tagata aoga: Valaaulia tagata aoga e faitau le Eteru 1:34–37 ma faailoga le fasifuaitau “tagi atu i le Alii.” Fai atu ia i latou e o mai saunia e faasoa mai po o le a le uiga o lenei fasifuaitau ia i latou ma pe faapefea ona ese mai nai auala tatou te tatalo ai i nisi taimi.

Gaoioiga e Ono Mafai Ona Aoao Ai

Faatinoga faamaoni ma faifai pea

Mafaufau e faaali atu pe tusi i luga o le laupapa faamatalaga nei [e manaomia ai] le faatumuina o avanoa. Valaaulia tagata aoga e fai paga po o ni vaega toalaiti ma faasoa mai pe mafai faapefea ona latou faatumuina avanoa.

Mafaufau i se faatinoga e lelei ona faia, e pei o le suesue, faamalositino, po o le auauna atu i isi. Faaaoga lena faatinoga i faamatalaga nei, ma faauma fasifuaitau i se auala talafeagai.

• Afai e i ai se tasi (faatinoga) i nisi taimi, ona .

• Afai o se tasi (faatinoga) faamaoni ma faifai pea mo se taimi umi, ona .

• E mafai faapefea ona e faaumaina nei lava faamatalaga e lua e faaaoga ai le faatinoga o le tatalo?

  Mafaufau e tusi tali a tagata aoga i le fesili lenei i luga o le laupapa.

• O a nisi o mafuaaga atonu tatou te le faamaoni ai pe tumau i a tatou tatalo e pei ona tatou moomoo i ai?

Valaaulia tagata aoga e mafaufau loloto i a latou tali i fesili i le parakalafa lenei. Aua le valaauliaina i latou e faasoa mai a latou tali.

Faaalu sina taimi e mafaufau loloto ai i au lava tatalo. O le a se mea e fesoasoani ia te oe ia faamaoni ma tumau ai? O le a se mea e ono taofia ai oe mai le faamaoni ma tumau pea? Aisea e te ono manao ai e faaleleia atili?

A o e suesueina lenei lesona, vaavaai mo upumoni e ono fesoasoani ia te oe i au tatalo.

O Le Tusi a Eteru

I le taimi lea i le Tusi a Mamona, sa faaaofia ai e Moronae le tusi a Eteru. O loo i ai le tala o sa Iareto. Sa faaliliuina mai papatusi auro e 24 na maua e tagata na auina atu e Limae (tagai Mosaea 8:7–11; Eteru 1:1–2). O lenei tusi e amata i le tala i le uso o Iareto ma ana tatalo i le Alii. Vaai i le faasologa o taimi nei (o aso e taumatemate) e iloa ai le taimi na ia ola ai pe a faatusatusa i isi tagata na e suesueina i le Tusi a Mamona i lenei tausaga:

Mafaufau e faaali atu le faasologa o taimi lenei e fesoasoani ai i tagata aoga ia malamalama i le taimi na ola ai sa Iareto. O le malamalama ai i lenei faatatauga o mau e mafai ona fesoasoani i tagata aoga e maua ai nisi malamalamaaga loloto a o latou suesue.

Faitau le Eteru 1:33 e vaai ai po o le a le mea na tupu a o amata le tala ia sa Iareto.

• O le a se mea ua e iloa e uiga i le “olo tele” ma “le Alii ua [faaeseeseina] le gagana a le nuu” (Eteru 1:33)?

Faalogologo i tali a tagata aoga ma aotele le tala lenei pe matamata le vitio lenei pe a aoga.

Afai e te le masani i lenei tala, mafaufau e matamata le vitio “The Tower of Babel” (0:58), o loo maua i le ChurchofJesusChrist.org, pe faitau le Kenese 11:1–9 (tagai foi i le parakalafa lona lua o le itulau autu i le Tusi a Mamona).

• Mata o a ni lagona o le ola ai i lea taimi?

Tagi atu i le Atua i le faatuatua

E i ai taimi, o loo i ai i tusitusiga paia ni fasifuaitau fai soo e tuuina atu ai i na fasifuaitau se faamamafa sili atu po o le taua. O le vaavaaiai mo nei fasifuaitau faifai pea e mafai ona fesoasoani tatou te malamalama atili ai i mea sa taumafai le tusitala musuia e aoao atu.

Faitau le Eteru 1:34–37 e iloa ai pe na faapefea ona saili Iareto ma lona uso e foia o la faafitauli. Mafaufau e maka ia fasifuaitau o loo ta’ua soo o loo faaalia ai le ala na tatalo ai le uso o Iareto ma le ala na tali mai ai le Alii.

• O a ni mea na e aoao mai i fasifuaitau na e makaina?

Faalogo ma le toto’a a o tali mai tagata aoga. Tusi i luga o le laupapa so o se mataupu faavae moni latou te faasoa mai.

O se tasi o mataupu faavae tatou te aoao mai i lenei tala e faapea a o tatou tagi atu i le Atua i le faatuatua, o le a ia agaalofa mai ia i tatou.

Valaaulia tagata aoga e toe tomanatu i a latou lava sauniuniga mo le vasega. A uma ona tusi e tagata aoga o latou manatu e uiga i uunaiga nei, mafaufau e tuu i latou i ni paga ma valaaulia i latou e faasoa mai a latou tali.

Tusi i lalo pe faapefea ona e faamalamalama atu lenei mataupu faavae i se tasi. Faaaofia ai manatu nei i lau faamalamalamaga:

• O le a sou manatu i le uiga o le tagi atu i le Alii i le faatuatua ma pe faapefea ona ese lenei mea mai le auala tatou te tatalo ai i nisi taimi

• O tali a le Alii i le uso o Iareto ua aoao ai oe e uiga ia te Ia

• O nisi o auala e ono tali mai ai le Alii i a tatou tatalo ma le agaalofa

Ina ia vaai i se faataitaiga i ona po nei o le tali mai o le Alii i le agaalofa i le tatalo faamaoni ma le faatumauina pea, matamata le “O Tali i Tatalo” mai le faailo taimi 2:17 i le 4:32, o loo maua i le ChurchofJesusChrist.org.

E taua le iloa e faapea tatou te le iloa po o le a le umi ona faatoa maua ai lea e le uso o Iareto ana tali. Na faasoa mai e Elder Brook P. Hales o le Fitugafulu le mea lenei:

E silafia e le Tama i tatou, silafia o tatou manaoga, ma o le a fesoasoani atoatoa mai ia i tatou. O nisi taimi e tuuina mai lena fesoasoani i le taimi lava lena po o se taimi vave pe a maea ona tatou ōle atu mo le fesoasoani faalelagi. O nisi taimi o o tatou manaoga faamaoni ma agavaa e lē taliina mai i le auala tatou te faamoemoe i ai, ae tatou te iloa e i ai faamanuiaga silisili a le Atua ua faapolopoloina. Ma o nisi taimi, o o tatou manaoga amiotonu e lē tuuina maia i lenei olaga. (Brook P. Hales, “O Tali i Tatalo,” Liahona, Me 2019, 12)

• Aisea e te lagona ai o nei aoaoga e taua mo i tatou ia manatuaina?

  Afai o le a manuia tagata aoga mai le suesue atili e uiga i le ala e tali mai ai le Atua i tatalo, mafaufau e fai le gaoioiga faaopoopo ua faaautuina “Tali i tatalo” i le taimi lea o le lesona.

Afai e le patino tele a latou tali, mafaufau e valaaulia tagata aoga e faasoa mai nisi o auala na faaalia ai e le Alii le agaalofa mo i latou a o latou tatalo atu ia te Ia. E mafai foi ona e faaopoopo iai ou lava aafiaga.

O le tumau ai i le tatalo

Faitau le Eteru 1:38–43; 2:5, 13–15, ma vaavaai mo nisi malamalamaaga e uiga i le tatalo ma tali a le Alii.

Valaaulia tagata aoga e faasoa atu mea na latou aoaoina. Afai e aoga, fai atu nisi o fesili nei:

• O a fasifuaitau i le Eteru 1:43 ma le 2:14 o loo faaalia ai lagona o le Alii e uiga i lo tatou tumau i le tatalo? Aisea e te manatu ai e finagalo o Ia ia tatou tatalo atu ia te Ia e le aunoa?

• Sa i ai se taimi na le faia ai e le uso o Iareto ana tatalo (tagai Eteru 2:14). O a nisi o mafuaaga atonu tatou te le ogatusa ai i le faia ai o a tatou tatalo i aso nei?

Faaleleia o le tatalo

Manatu faapea o loo e i ai i se talanoaga faavaega a le autalavou e uiga i le auala e fesoasoani ai i le autalavou ia faaleleia a latou tatalo.

Mafaufau e valaaulia ni nai tagata aoga i luma o le potu mo se talanoaga faavaega. E mafai ona saunia e tagata aoga a latou lava fesili mo le laulau (vaega) pe faaaoga fesili o loo i lalo.

• O le a se mea na e faia pe e mafai ona e faia ina ia atili anoa pe faamaoni atili ai au tatalo?

• O le a se mea ua e faia e fesoasoani ai ia te oe e tatalo e le aunoa? O a isi mea e mafai ona e faia?

• E ono mafai faapefea e le mafaufau ai e uiga i lou sootaga ma le Tama Faalelagi ona uunaia ai le tumau ma le faamaoni o au tatalo? (Tagai i le Lolomi Fefiloi Tusi Paia, “Tatalo.”)

Saili le musumusuga a le Agaga Paia ma mafaufau loloto i so o se suiga e te lagona e tatau ona e faia i au tatalo. Fai se sini patino ma tuuto atu e mulimuli i so o se uunaiga e te maua.

Manatu ma Talaaga o Faamatalaga

O ai le igoa o le uso o Iareto?

Sa faamatala e Elder George Reynolds (1842–1909) o le Fitugafulu e faapea i Katelani, sa tuuina atu ai e le Perofeta o Iosefa Samita (1805–44) se igoa ma se faamanuiaga i le atalii o Elder Reynolds Cahoon ma tuuina atu ia te ia le igoa o Mahonri Moriancumer. Ina ua maea le faamanuiaga, sa ta’u atu e le Perofeta o le igoa lea o le uso o Iareto. (Tagai Book of Mormon Student Manual Rel. 121–122 [2009], 362.)

E faapefea ona faamanuiaina i tatou e ala i tatalo faamaoni ma le aunoa?

Matamata le “O Tatalo o le Faatuatua” mai le faailo taimi 6:57 i le 8:40 e tagai ai i le saunoaga a Henry B. Eyring o le Au Peresitene Sili o tuuina mai ni fautuaga.

Sa faamatala mai e Elder Peter M. Johnson o le Fitugafulu:

Tatalo atu i le Tama i le suafa o Iesu Keriso i aso uma, aso uma, aso uma. E ala atu i le tatalo e mafai ai ona tatou lagonaina le alofa o le Atua ma faaali atu lo tatou alolofa mo Ia. E ala i le tatalo tatou te faailoa atu ai le lotofaafetai ma ōle atu mo le malosi ma le lototele e gauai atu ai o tatou loto i le finagalo o le Atua ma ia taialaina ma taitaiina i mea uma. (Peter M. Johnson, “Mana e Faatoilalo ai le Fili,” Liahona, Nov. 2019, 111)

Gaoioiga Faaopoopo e Aoao Ai

O se isi amataga

Mafaufau e faaali atu fesili i gagana eseese ma fesili atu i tagata aoga po o a mea ua latou malamalama i ai. I se isi itu, valaaulia tagata aoga o e tautatala i se gagana atonu e le malamalama ai le vasega e fai mai ni fesili i le vasega. Fai atu i tagata aoga e faasoa mai o latou lagona pe afai latou te nonofo i se nofoaga e le mafai ona latou malamalama i mea na fai mai ai isi. A o latou suesueina le Eteru 1, valaaulia tagata aoga e mafaufau pe faapefea ona pei lenei tulaga o le mea na feagai ma le uso o Iareto ma mea e mafai ona latou aoao mai i lana fofo.

O se isi mataupu faavae: Afai tatou te tatalo e le aunoa ma le faatuatua i le Atua, e mafai ona tatou maua faamanuiaga e sili atu nai lo mea ua tatou talosagaina

Afai o le a manuia tagata aoga mai le suesueina o se isi upumoni i lenei lesona, valaaulia i latou e vaavaai mo le mataupu faavae o loo i luga a o latou suesueina le Eteru 1:35–43. Fai atu ia i latou e fatu se siata e pei o lea o loo i lalo e faatumu a o latou suesue:

O le mea sa ole atu ai le uso o Iareto	O Mea Sa saunia e le Alii

Fai atu ia i latou e faasoa mai mea na latou aoaoina e uiga i le Tama Faalelagi mai lenei faataitaiga. E mafai foi ona latou faasoa mai ni faataitaiga mai o latou olaga, olaga o isi, ma isi tala o tusitusiga paia lea na tuuina mai ai e le Alii faamanuiaga i luga atu o na faamanuiaga na talosagaina.

O Tali i tatalo

Atonu e i ai ni fesili a tagata aoga e uiga i le mafuaaga e foliga mai ai e le tali manino mai e le Atua a latou tatalo e pei ona sa Ia faia i le uso o Iareto. Atonu e te manao e tuuina atu se vaaiga faataitai i tagata aoga o se mea e pei o lenei:

Ina ua uma ona suesue i le tala i le uso o Iareto i le seminare, sa sāua i lau faalogo i se tasi o lau vasega o fai mai, “E le tali moni mai le Atua i a’u tatalo, e matua lē faapena lava.”

Tuu atu i tagata aoga e faaalu sina taimi e saili ai punaoa mamana ua filifilia e mafai ona fesoasoani i se tasi o lagona faapena. Valaaulia tagata aoga e faasoa mai i le vasega ni mea na latou mauaina.