Eteru 4–5

“Fofola Atu o A’u Faaaliga Uma ia te i Latou”

Pe ua e lagona le saunia e aoaoina atili mai le Alii? Afai e leai, o le a se mea e mafai ona e faia? Na poloaiina e le Alii ia Moronae e faamaufaailogaina faamaumauga o faaaliga o le uso o Iareto, ma faamalamalama atu o nei tusitusiga o le a faaalia pe a maua e tagata le faatuatua e pei o le uso o Iareto. O lenei lesona ua faamoemoe e fesoasoani ia te oe e malamalama ai i mea e mafai ona e faia e maua ai nisi faaaliga faaopoopo.

Fesoasoani i tagata aoga ia maua le faauigaina patino i tusitusiga paia. Uunaia tagata aoga e faaaoga tomai eseese osuesuega e faalautele ai lo latou malamalama i tusitusiga paia. E mafai e tagata aoga ona latou vaavaai mo auiliiliga i le faasologa o talafaasolo, fai ni faatusatusaga ma ni fesootaiga i le va o tala faatusi paia ma o latou lava olaga, ma fuafua pe o le a faapefea ona latou faaaogaina mea sa latou aoaoina.

Sauniuniga a le tagata aoga: Valaaulia tagata aoga e faitau le Eteru 4 o se vaega o a latou suesuega o tusitusiga paia i aso taitasi, ma vaavaai mo upumoni e mafai ona fesoasoani ia i latou e maua ai faaaliga faaopoopo mai le Alii.

Gaoioiga e Ono Mafai Ona Aoao Ai

Pe a tatou saunia

Mafaufau i se mea faitino e sili ona taua ia te oe po o lou aiga.

Mo se faataitaiga, atonu e te manao e faaali pe faamatala se mea e taua ia te oe.

• E ui atonu e te fiafia e faasoa atu lenei mea faitino i isi, aisea e te ono faaeteete ai i le faatagaina o se tamaitiiti laitiiti e na te taulimaina?

• O a mea o le a manaomia ona aoao pe faia e se tamaitiiti ae e te le i faatuatuaina o ia i lena mea faitino?

E faapena foi, e fiafia le Alii e faaali mai upumoni ia i tatou, ae e faatali o Ia seia oo ina tatou saunia e talia (tagai Alema 12:9–11).

O le vaega ua faamaufaailogaina o le Tusi a Mamona

O se faataitaiga a le Alii o loo faatalitali e faaali mai le upumoni seia oo ina tatou saunia o le vaega lea ua faamaufaailogaina o le Tusi a Mamona. Sa poloaiina Iosefa Samita e aua nei tatalaina pe faaliliuina lena vaega (tagai Eteru 5:1). O loo i ai se faamaumauga o le faaaliga na tuuina atu i le uso o Iareto.

Ina ia fesoasoani ia te oe e aoao e uiga i le vaega ua faamaufaailogaina o le Tusi a Mamona, faaaoga mau o loo lisi atu faapuipui e tali ai fesili sa’o pe sese nei.

Mafaufau e valaaulia tagata aoga e sue ia tali i nei fesili sa’o pe sese i ni vaega toalaiti. I se isi itu, e mafai ona e valaaulia tagata aoga e faitau ia faamatalaga ma mate ia tali, ona faitau lea o fuaiupu e vaai pe sa’o.

O tali muamua e tolu e sa’o, ae o tali mulimuli e lua e sese.

1. Sa faaali atu e le Faaola o Ia lava i le uso o Iareto ma sa auauna mo ia (Eteru 3:20).

2. Sa faaali atu e le Alii i le uso o Iareto tagata uma o le lalolagi, i le tuanai ma le lumanai, e le i taofia se mea mai ia te ia (Eteru 3:25; 4:4).

3. Na poloaiina e le Alii le uso o Iareto e tusifaamaumau ia mea sa ia aoaoina ma ia faamaufaailogaina ia talafaamaumau. Sa tusia i se gagana sa faaeseeseina e le Alii ma sa le mafai ona faitauina e aunoa ma ni faamatalaupu paia (Eteru 3:21–22, 24, 27; 4:1).

4. Na tuuina atu e le Alii i le uso o Iareto ni maa se tolu e mafai ona faaaoga e faaliliu ai le faamaumauga (Eteru 3:23–24, 28).

5. E leai se tasi na faitauina le faamaumauga a le uso o Iareto (Eteru 4:2–5).

Mauaina o nisi faaaliga faaopoopo

E ala mai ia Moronae, na faaali mai ai e le Alii mea e tatau ona tatou faia e o atu ai ia te Ia, maua faaaliga, ma saunia i tatou lava e maua faaaliga faaopoopo o loo i ai i le vaega ua faamaufaailogaina o le Tusi a Mamona.

Tusi le mataupu faavae le atoa ua lisiina atu i lalo i luga o le laupapa.

Faitau toto’a le Eteru 4:5–15, ma vaavaai mo auala e faauma ai le upumoni lenei. O le fasifuaitau “nei mea” i fuaiupu 8 ma le 11 e faasino i le Tusi a Mamona. O se veli, e pei o le faataitaiga o loo tuuina mai i le fuaiupu 15, o se pupuni po o se fasi ie e faaaoga e ufiufi ai pe nana ai se mea.

• O le a faamanuiaina i tatou e le Alii i nisi faaaliga faaopoopo pe a tatou …

Valaaulia tagata aoga e tusi i luga o le laupapa fasifuaitau mai tusitusiga paia e mafai ona faauma sa’o ai lenei mataupu faavae. E mafai foi ona aofia ai fuaiupu na latou maua ai na fasifuaitau. O nisi nei o faataitaiga:

• “salamo … ma faamamaina i luma o le Alii” (Eteru 4:6)

• “faaaoga le faatuatua” (Eteru 4:7)

• “[talitonu] i nei mea” (e faatatau i mea ua uma ona faaali mai e le Alii, aemaise lava le Tusi a Mamona) (Eteru 4:8, 11)

• “o mai i [le Faaola]” (Eteru 4:13–15)

• tatalo “ma le loto momomo ma le agaga salamo” (Eteru 4:15)

Mafaufau e fesili atu pe i ai ni fesili a tagata aoga e uiga i nei fasifuaitau. Afai e iai, fai le gaoioiga lenei:

Afai o le a fesoasoani ia te oe e malamalama atili ai i so o se tasi o nei fasifuaitau, sue upu autu i le Taiala i Tusitusiga Paia, le Taiala o Autu, po o le Gospel Library App. Mo se faataitaiga, atonu e fesoasoani le sueina o le “loto momomo” i le Taiala i Tusitusiga Paia.

Ina ia fesoasoani i tagata aoga ia malamalama ma lagonaina le taua o nei faatinoga, valaaulia i latou e fai se tasi o mea nei:

1. Mafaufau i se faataitaiga faatusi paia po o se faataitaiga faaonaponei o se tasi o loo faia se tasi pe sili atu o nei faatinoga. Tusi pe na faapefea ona taitai atu nei faatinoga e fesoasoani ai atoa ma [le mauaina o] faaaliga mai le Alii.

2. Mafaufau i se taimi na faia ai se tasi pe sili atu o nei faatinoga na taitaiina atu ai i se tali po o se taitaiga mai le Alii i lou olaga. (O se tasi o faataitaiga o le ono mafaufau lea loloto i mea ua e aoaoina mai ma talitonu i ai e ala i au suesuega i le Tusi a Mamona atoa ma le ala na taitai atu ai i faaaliga i lou olaga.)

Valaaulia tagata aoga e faasoa mai o latou aafiaga ma faataitaiga.

• Aisea e te manatu ai o le a faamanuiaina i tatou e le Alii i le tele atu o faaaliga a o tatou ola i le ala na Ia faamatalaina i fuaiupu 5–15?

• Aisea e ono avea aie avea ma ituaiga o tagata ua faamatalaina e le Alii e avea ai i tatou ma mea e le saunia ai mo nisi faaaliga faaopoopo?

• O le a se mea o aoao mai e lenei mea ia te oe e uiga i le Alii ma le ituaiga o tagata e finagalo o Ia ia avea ai i tatou?

O le a faaali mai e le Alii le vaega ua faamaufaailogaina o le Tusi a Mamona i Lona “taimi tatau ai” (2 Nifae 27:21) pe a tatou faatinoina lea lava faatuatua e tasi e pei o le uso o Iareto (tagai Eteru 4:7). E faapena foi, atonu o loo i ai nisi faaaliga faaopoopo o loo faatalitali mai le Alii e tuuina atu ia te oe. Ina ia faamae’a lenei lesona, ia fai mea nei:

• Toe iloilo le faamatalaga o loo i nei fuaiupu o i latou o e faatinoina le faatuatua ma ua faapaiaina, mafaufau loloto pe o a ni auala e te pei ai o i latou ma pe o a ni auala atonu e manaomia ona e faaleleia.

• Mafaufau loloto ma tatalo ia iloa po o le a le mea e finagalo le Alii e te faia e maua ai nisi faaaliga faaopoopo mai ia te Ia. Tusi i lau api talaaga mo suesuega ou mafaufauga ma lagona.

Valaaulia ni nai tagata aoga e faasoa mai o latou manatu ma lagona e uiga i mea sa latou aoaoina i le aso, pe afai e le patino tele i latou. Faasoa atu foi ou lava manatu ma lau molimau.

Manatu ma Talaaga o Faamatalaga

Eteru 3:23–24. O a maa e lua sa ta’ua?

O maa e lua na tuuina atu e le Alii i le uso o Iareto o ni vaega o se mea ua faaigoaina o le Urima ma le Tumema. “Sa faaaogaina e Iosefa Samita i le faaliliuina o le Tusi a Mamona ma i le mauaina o isi faaaliga” (“Urima ma le Tumema,” Bible Dictionary).

O le a se isi mea e mafai ona ou faia ia maua ai nisi faaaliga faaopoopo mai le Alii?

Na aoao mai Peresitene Russell M. Nelson:

E leai se mea na te tatalaina le lagi e faapei o le tuufaatasiga o le mama a’ia’i, usiusitai sa’olele, sailiga ma le naunautai, taumafa i aso taitasi i le afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafa’asolopito o aiga. …

… Ou te folafola atu a e faaauau pea ona usiusitai, faaalia le lotofaafetai mo faamanuiaga uma ua foai atu e le Alii ia te oe, ma afai e te faamamaluina ma le onosai le taimi a le Alii, o le a foai atu ia te oe le poto ma le malamalama o loo e sailia. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95–96)

Na aoao mai Elder David A. Bednar o le Korama o Aposetolo e Toasefululua:

E avanoa le agaga o faaaliga mo tagata uma o ē mauaina e ala i le pule e tatau ai o le perisitua ia sauniga faaola o le papatisoga, i le faatofuina mo le faamagaloina o agasala ma le faaee atu o lima mo le meaalofa o le Agaga Paia—ma o lē foi o loo galue i le faatuatua e faataunuu le poloaiga faaleperisitua ia “talia le Agaga Paia.” … O le naunautai faamaoni ma le agavaa e valaaulia ai le agaga o faaaliga i o tatou olaga. (David A. Bednar, “O Le Agaga o Faaaliga,” Liahona, Me 2011, 87)

Gaoioiga Faaopoopo e Aoao Ai

Eteru 4:10–11. Talitonu ai i afioga a le Alii

Afai e aoga le talanoaina ma le loloto atili ma le talitonu ai i mea ua uma ona faaali mai e le Alii, e aofia ai le Tusi a Mamona, valaaulia tagata aoga e faitau pe iloilo le Eteru 4:10–11, ma vaavaai mo le mea o le a tupu pe afai tatou te filifili e talitonu i upu ua uma ona tuuina mai e le Alii ia i tatou (tagai foi i le Moronae 10:3–6). Atonu e faailoa mai e tagata aoga se mataupu faavae e pei o tatou talitonu i afioga a le Alii, ona Ia faamautu mai lea o lo latou moni ia i tatou e ala i le Agaga Paia. Mafaufau e fai atu fesili e pei o nei:

Aisea e te manatu ai e tatau ona tatou muai talitonu i afioga a le Alii ae tatou te lei iloaina lo latou moni?

O a nisi o auala e mafai ona tatou faaali atu ai i le Alii tatou te talitonu i Ana afioga?

Na faapefea e le faaalia o le talitonuga i afioga a le Alii i se tasi o nei auala ona taitai atu ai oe ia maua se faamautinoaga o lo latou moni e ala i le Agaga Paia?

Eteru 5:1–4. O Molimau e Toatolu o le Tusi a Mamona

Ina ia fesoasoani e faamamafa atu le taua o le talitonu i le Tusi a Mamona, mafaufau e suesue e uiga i Molimau e Toatolu o le Tusi a Mamona. Valaaulia tagata aoga e faitau le Eteru 5:2–4, ma vaavaai mo mea na faatonuina e Moronae ia Iosefa Samita e fai. (Atonu e fesoasoani le iloa sa tusi sa’o Moronae ia Iosefa Samita i le silia ma le 1,400 tausaga a o lei faitauina e ia.)

E mafai e tagata aoga ona faitau le molimau a Tavita Uitimera, Oliva Kaotui, ma Matini Harisi i le “O Le Mau a Molimau e Toatolu” i le amataga o le Tusi a Mamona. Valaaulia tagata aoga e faasoa mai pe faapefea e le mau a Molimau e Toatolu ona fesoasoani ia i latou e talitonu ai i le Tusi a Mamona. E mafai foi e tagata aoga ona tusi i lalo a latou lava molimau o le Tusi a Mamona po o o latou lagona e mafai ona faateleina ai lo latou malamalama ma le molimau e uiga i ai. Afai e mananao tagata aoga i nisi faamatalaga i Molimau e Toatolu, e mafai ona latou faitau le Faaopoopoga I i le Sau, Mulimuli Mai ia te Au - Mo Tagata Taitoatasi ma Aiga: Tusi a Mamona 2020.