Iloiloga 24 o le Atamai i Aoaoga Faavae

Malamalama ma Faamatala

O le atamai i aoaoga faavae e mafai ona fesoasoani ia te oe e malamalama ai ma faamatala le aoaoga faavae a le Faaola i au lava upu. O lenei lesona o le a tuuina atu ai ia te oe se avanoa e faalolotoina ai lou malamalama ma faamatala ai upumoni o loo maua i fuaitau eseese o le atamai i aoaoga faavae mai le tusi a Mamona.

Aoao atili e uiga i au tagata aoga. Vaavaai mo avanoa e faamasani ai i tagata aoga. O le maitau ma fesili faamaoni e mafai ona taitai atu ai oe e aoao atili ai e uiga i mea e taua i se tagata aoga. A o e malamalama atili ai e uiga i au tagata aoga, e mafai ona fesoasoani le Agaga Paia ia te oe e taulai atu lau aoaoga i o latou manaoga.

Sauniuniga a le tagata aoga: Mafaufau e valaaulia tagata aoga e filifili ma le agaga tatalo se fuaitau o le atamai i aoaoga faavae o le Tusi a Mamona e suesue ai mea latou te mananao e malamalama atili i ai. Fai atu ia i latou e talanoaina le fuaitau ma se tagata o le aiga, uo mamae, po o se taitai o le Ekalesia ma o mai saunia e faasoa mai mea ua latou aoaoina e uiga i le fuaitau mai la latou talanoaga.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

Fai atu o fesili

Mafaufau e valaaulia tagata aoga e sue se tasi i le vasega atonu latou te le iloa lelei. Valaaulia i latou e faaalu ni minute se lua e fai atu ai ni fesili e fesoasoani ai ia i latou ia iloa e le tasi le isi. Afai e aoga, tuu atu ia i latou ni faataitaiga o fesili latou te ono fesili ai, e pei o le “O le a se mea e te manao e fai?” ma le “O a nisi o mataupu e sili ona e fiafia i ai i le aoga?”

Mafaufau i se tasi e te iloa lelei.

• Na faapefea ona e iloaina i latou?

• O le a le matafaioi na faia e le fai atu o fesili i lou tomai na mafai ai ona e iloa i latou?

• E faapefea ona ese la outou sootaga pe ana faapea e te lei faia lava ni fesili?

E pei lava ona taua le fai atu o fesili ia iloa ai se tasi, e taua foi le fai o fesili a o e suesue i tusitusiga paia ia iloa atili ai ma malamalama ia Iesu Keriso e ala ia i latou.

Na aoao mai Peresitene Russell M. Nelson, “O le ausiaina o le taitaiga faatusi paia e faatupulaia e ala i le faia o fesili tatau” (“Ola i Taitaiga Faatusitusiga Paia,” Ensign, Nov. 2000, 18).

O le faia o fesili e uiga i fuaitau o le atamai i aoaoga faavae e mafai ona fesoasoani tatou te malamalama atili ai ma valaaulia atoatoa ai le fesoasoani a le Alii i o tatou olaga.

Mafaufau e faaali atu mau faasino mulimuli e 12 o le Tusi a Mamona o le atamai i aoaoga faavae pe faaali atu i tagata aoga le mea e mafai ona latou maua ai i le Pepa Autu o le Atamai i Aoaoga Faavae (2023). Afai e manaomia, faaaoga fuaitau uma e 24 o le atamai i aoaoga faavae o le Tusi a Mamona mo lenei toefaamanatu, pe filifili na o ni nai fuaitau, e fuafua i manaoga o le vasega.

Mafaufau e fai le gaoioiga lenei o se vasega e faaaoga ai se tasi o fuaitau o le atamai i aoaoga faavae. Ona valaaulia lea o tagata aoga e toe fai le gaoioiga e faaaoga ai se fuaitau ese o le atamai i aoaoga faavae o la latou filifiliga. E mafai e tagata aoga ona galulue i vaega, i paga, pe taitoatasi, e fuafua i o latou manaoga ma fiafiaga.

Filifili se tasi o fuaitau o le atamai i aoaoga faavae e te manao e malamalama lelei atili i ai ma faitau iai ma le faaeteete. Faailoa mai ia le itiiti ifo ma le lua ni fesili e mafai ona e fesili atu ai e uiga i le fuaitau ina ia malamalama atili i ai ma tusi i lalo. Mo se faataitaiga, a o e faitau i le 3 Nifae 27:20 e mafai ona e fesili, “O le a le uiga o le faapaiaina?” Pe a o e faitau i le Moronae 10:3–5 e mafai ona e fesili, “O le a le uiga o le fesili ‘ma le manatu moni i ai’?”

Saili mo tali i fesili sa e mafaufau i ai; faaaoga meafaigaluega mo le suesueina o tusitusiga paia e pei o le Taiala i Tusitusiga Paia, Taiala mo Autu, po o lauga foi o konafesi aoao. E mafai ona e faaaogaina isi auala e suesue ai tusitusiga paia e te iloa, e pei o le suesueina o fuaiupu o loo siomia ai ina ia malamalama atili ai i le faatatauga o le fuaitau.

Ina ia fesoasoani i tagata aoga e felagolagomai o le tasi ma le isi, mafaufau e fai atu ia i latou e tusi le fuaitau o le atamai i aoaoga faavae na latou filifilia ma a latou fesili i se isi fasipepa faatasi ai ma o latou igoa. Valaaulia tagata aoga e faafesuiai a latou pepa ma se isi tagata aoga. I se isi foi faiga, valaaulia tagata aoga e tuuina atu a latou pepa i luma ina ia mafai ona faafefiloi ma tufatufa atu i so o se isi tagata aoga. Fai atu i tagata aoga e tusi tali i fesili o i luga o le pepa na tuuina atu ia i latou. A ua uma ua lava le taimi, valaaulia tagata aoga e toe tufa atu pepa i tagata aoga o loo iai o latou igoa i luga.

Tuu atu i tagata aoga se taimi e mafaufau loloto ai i tali na tusia e isi tagata aoga ma, afai e aoga, e saili mo tali faaopoopo i tusitusiga paia, e ala i le tatalo, ma isi mea faapena.

Manatua, atonu e te le maua ni tali i au fesili uma a o e suesue. Ae a o faaauau pea ona e faatinoina le faatuatua i le Alii, o le a Ia fesoasoani ia te oe ia iloa le moni o mea o loo e sailia.

Valaaulia ni nai tagata aoga e faasoa mai le fuaitau o le atamai i aoaoga faavae na latou filifilia, o nisi o fesili na latou tusia, ma tali na mauaina e i latou po o a latou uo i le vasega. Ma le isi, mafaufau e fesili atu po o le a le mea na fesoasoani le fuaitau ia i latou e malamalama ai e uiga i le Faaola po o Lana talalelei.

Afai e lava le taimi (po o se isi aso), mafaufau e valaaulia tagata aoga e toe fai le gaoioiga e faaaoga ai se isi fuaitau o le atamai i aoaoga faavae.

Fautuaina tagata aoga e faaauau pea ona fai atu fesili e uiga i tusitusiga paia ma le sailia o tali.