“Eteru 2: “Taitaiina Pea e lē Aunoa e le Aao o le Alii,” Tusi Lesona a le Faiaoga o le Tusi a Mamona (2024)
“Eteru 2,” Tusi Lesona a le Faiaoga o le Tusi a Mamona
Eteru 2
“Taitaiina Pea e lē Aunoa e le Aao o le Alii”
Pe na e feagai ea ma se filifiliga po o se faafitauli faigata ma sa e le mautonu i le mea e fai? A o fausia e le uso o Iareto ma lona nuu vaa e sopoia ai le vasa, sa latou fetaiai ma ni faafitauli ogaoga. Sa galue le uso o Iareto ma le faatuatua i le Alii ma sailia Lana taitaiga i luitau taitasi. O lenei lesona e mafai ona fesoasoani ia e iloa ai pe faapefea ona saili atu le fesoasoani a le Alii i le foiaina o ou faafitauli.
Tuu atu i tagata aoga ni avanoa e saili ai faaaliga faaletagata lava ia. Na aoao mai Peresitene Dallin H. Oaks o le Au Peresitene Sili “o le a fesoasoani tusitusiga paia tatou te maua ai tali uma o a tatou fesili patino, aua e ala i le faitauina o [tusitusiga paia] tatou te valaaulia ma faaagavaa ai i tatou lava mo le musumusuga a le Agaga Paia, lea o le a taitai atu ai i tatou i le upumoni atoa” ( “Studying the Scriptures,” BYU-Hawaii devotional adress [Mati. 14, 1986], 18–21). Vaavaai mo avanoa e fesoasoani ai i tagata aoga e saili le fesoasoani a le Alii i o latou faafitauli patino a o latou suesue i tusitusiga paia.
Sauniuniga a le tagata aoga: Valaaulia tagata aoga e o mai saunia e faasoa mai ni aafiaga na latou maua ai po o isi latou te iloa le fesoasoani a le Alii e foia ai faafitauli.
Gaoioiga e Ono Mafai Ona Aoao Ai
Faafitauli ma faaiuga
Valaaulia tagata aoga e galulue taitoatasi, i paga, po o ni vaega toalaiti e fai le gaoioiga lenei.
I se isi itu, e mafai e tagata aoga ona faasoa faalilolilo i luga o fasipepa ia faafitauli ma atugaluga o loo feagai ma i latou ma a latou tupulaga. Afai e aoga, mafaufau e lisi i luga o le laupapa faafitauli e sili ona taatele, pe fai i tagata aoga e lisi mai mea latou te manatu o faafitauli pito i luga e tolu o loo feagai ma i latou.
Vaai faalemafaufau i se tasi i luga o ala o faasalalauga faaagafesootai na faia se lisi o mea sa ia manatu o faafitauli masani ia e tolu e sili ona taatele ma o loo faapopoleina ai le autalavou i aso nei. O lenei tagata na lisiina atu mea nei:
-
Uunaiga faamalosi ia lelei i le aoga
-
Fegalegaleai lelei faatasi ma uo
-
Fuafua mo le lumanai
-
E te ioe i filifiliga a lenei tagata? Aisea pe aisea foi e leai ai?
-
O a isi faafitauli po o atugaluga e mafai ona e faaaofia i luga o le lisi? Aisea?
Valaaulia tagata aoga e tomanatu ma le fifilemu i fesili nei. E ono fesoasoani le faitau lemu i fesili.
-
O a ni ou atugaluga ma ni faafitauli silisili?
-
E te sailia le fesoasoani a le Alii ia i latou? E faapefea?
-
O le a sou mautinoa faapea o le fesoasoani a le Alii e mafai ai ona e faatoilaloina ou atugaluga ma faafitauli?
Filifili se tasi o faafitauli po o faaiuga na e mafaufau i ai e te manaomia ai le fesoasoani a le Alii. A o e suesue, saili mo upumoni e mafai ona taiala ai oe ia maua le fesoasoani mai le Tama Faalelagi ma Iesu Keriso i le faafitauli po o le faaiuga na e filifilia.
Saunia ai mo le fesoasoani a le Alii
Sa mulimuli sa Iareto i le taitaiga a le Alii ma fausia vaa e “sopoia vai e tele” (Eteru 2:6) seia oo ina latou taunuu i le matafaga o le “sami tele” (Eteru 2:13). Ona poloaiina lea o i latou e le Alii e toe fausia vaa “e pei o vaa ia ua uma ona [latou] fausia” (Eteru 2:16) e sopoia ai le “sami tele” i le nuu folafolaina. Sa fetaiai le uso o Iareto ma ni luitau ogaoga a o ia saili e mulimuli i faatonuga a le Alii mo se malaga umi lava.
Mafaufau e tusia le siata lenei i le laupapa pe valaaulia tagata aoga e tusi i a latou api talaaga mo suesuega. Atonu e aoga le vaevae o tagata aoga i ni paga po o ni vaega toalaiti e faitau le Eteru 2:16–25; 3:1, 4, 6 ma faatumu faatasi le siata. Pe mafaufau e valaaulia tagata aoga e faitau fuaitau ma faatumu le siata e i latou lava ona faatusatusa lea ma [siata a] se paga po o se vaega toalaiti.
|
O le a le mea na faia e le uso o Iareto ma ona tagata? |
O a fesili po o atugaluga na i ai i le uso o Iareto? |
Na faapefea ona tali atu le Alii i ana fesili? |
|---|---|---|
-
E faapefea ona faatatau nei fuaiupu i o tatou olaga?
Mafaufau e tusi tali a tagata aoga i le laupapa ma valaaulia tagata aoga e tusi i a latou apitalaaga o suesuega.
O se mataupu faavae e tasi e mafai ona tatou aoaoina e faapea a o tatou valaau atu i le Tama Faalelagi i le tatalo ma faia la tatou vaega e foia o tatou faafitauli, e mafai ona tatou maua le fesoasoani a le Alii.
-
O a ni auala eseese e tali atu ai le Alii i fesili a le uso o Iareto? (Tagai Eteru 2:19–23.)
E tusa ai ma le saunoaga a Peresitene Harold B. Lee (1899–1973), o le fesili a le Alii i le Eteru 2:23, “O le a se mea tou te mananao ia ou faia ina ia outou maua se malamalama i totonu o o outou vaa?,” sa talitutusa ma le fai atu o mea nei:
“O le a se mea e te fautuaina e tatau ona tatou faia ina ia maua ai le malamalama?” …
… Sa pei na fetalai atu le Alii ia te ia, “Vaai, na ou tuuina atu ia te oe se mafaufau e mafaufau ai, ma sa ou tuuina atu ia te oe le faitalia e faaaoga ai. Ia e faia nei mea uma e te mafaia e fesoasoani ai ia te oe lava i lenei faafitauli; ma, a uma ona e faia mea uma e te mafaia, o le a ou laa atu e fesoasoani ia te oe.” …
… Afai e te manao i le faamanuiaga, aua nei na ona tootuli i lalo ma tatalo e uiga i ai. Ia saunia outou lava i auala uma e mafai ona outou faia ina ia mafai ai ona outou agavaa e maua faamanuiaga o loo outou sailia. (Harold B. Lee, Ia Outou Tutu i Nofoaga Paia [1974], 243–44)
-
Aisea e ono tuuina mai ai e le Alii i nisi o tulaga se taitaiga patino a o isi taimi e finagalo o Ia ia tatou fautuaina atu se fofo ma saili Lana fesoasoani e foia ai o tatou faafitauli?
-
Aisea atonu e finagalo ai le Alii i o tatou mafaufauga ma taumafaiga faatasi ma a tatou tatalo?
-
E mafai faapefea e auala e tali mai ai le Alii i a tatou fesili ma atugaluga ona fesoasoani ia i tatou e tuputupu a’e ai?
Mafaufau po o fea o gaoioiga nei atonu e sili ona lelei mo tagata aoga, pe tuu atu ia i latou e filifili se gaoioiga se tasi.
Ina ia fesoasoani ia te oe e mafaufau loloto pe faapefea ona faatatau lenei mataupu faavae ia i tatou i o tatou aso, fai se tasi o gaoioiga nei:
-
Tusi e uiga i le ala na tali atu ai le Alii ia te oe po o se tasi e te iloa ma ni faatonuga patino e foia ai se faafitauli po o le auala na Ia finagalo e te fautuaina atu ai se fofo ma saili Lana faamanuiaga. Tusifaamaumau mea ua e aoaoina mai lenei aafiaga.
-
Filifili le mea e te manatu o se tasi o faafitauli po o atugaluga taatele mo le autalavou i aso nei. Mafaufau po o le a se mea e mafai ona fai e se tasi e faatoilalo ai lenei faafitauli ma pe mafai faapefea ona ia sailia le fesoasoani a le Alii.
Afai e i ai i tagata aoga ni faataitaiga i ona po nei o lenei mataupu faavae i lona faatinoga, valaaulia i latou e faasoa mai. Mafaufau e faasoa atu foi se faataitaiga a oe lava ia.
Faaaogaina patino
Mafaufau i le faafitauli po o le faaiuga na e filifilia i le amataga o le lesona. Faaopoopo manatu nei i lau siata:
|
O le a se mea na ou faia pe mafai ona ou faia e foia ai pe faatoilalo ai lo’u faafitauli? |
O a ni fesili po o ni atugaluga o ia te au e mafai ona ou avatu i le Alii? |
O a ni auala e ono oo mai ai le fesoasoani po o le tali a le Alii? |
Valaaulia tagata aoga e toe tomanatu pe faasoa mai a latou lava tapenaga mo le vasega. Ona fautuaina lea o i latou e fai mea nei.
Saili le fesoasoani a le Tama Faalelagi e ala i le Agaga Paia ia iloa le mea e tatau ona e faia. Manatua le mea ua e iloa e uiga i le Tama Faalelagi ma Iesu Keriso e tuuina atu ai ia te oe le mafanafana e sailia ai le La’ua fesoasoani.