Eteru 6

Ua Malaga Atu Sa Iaretō i le Laueleele na Folafolaina

Vaai faalemafaufau pe faamata o a ni lagona mo Sa Iaretō e ulu atu i o latou vaa ma sopoia le vai tele a o latou malaga atu i le laueleele na folafolaina. E ui ina sa umi ma faigata la latou malaga, ae sa iloa e Sa Iaretō sa fesoasoani le Alii ia i latou i le aluga o le ala. E mafai foi e le Alii ona fesoasoani ia i tatou i le taimi o la tatou malaga i le olaga faitino ma toe foi atu i le afioaga o le Tama Faalelagi. O lenei lesona e mafai ona fesoasoani ia te oe e faatatau tusitusiga paia ina ia aoao ai upumoni e mafai ona fesoasoani ia te oe i le taimi o lau malaga i le olaga.

Fesoasoani i tamaiti aoga taitasi ia saofagā i le aafiaga faaleaoaoga. Ia iloa ma le faamaoni e manaomia tamaiti aoga taitasi ma e i ai sona sao e fai. O nisi tamaiti aoga atonu e sili atu ona naunau e auai nai lo isi. Fai se taumafaiga faaopoopo ma ia fatufatua’i e faamalosiau ai i tamaiti aoga taitasi e saofagā i ni auala anoa.

Sauniuniga a le tamaitiiti aoga: E mafai e tamaiti aoga ona faitau le Eteru 6:1–12 ma mafaufau e uiga i vaega o lenei tala e mafai ona faatatau faafaatusa i o latou olaga. O le gaoioiga suesue mo nei fuaiupu i le Sau, Mulimuli Mai ia te A’u—Mo Tagata Taitoatasi ma Aiga: Tusi a Mamona 2024 e mafai ona fesoasoani i lenei mea.

Gaoioiga e Ono Mafai Ona Aoao Ai

O le malaga o le olaga

O mea nei ua faamoemoe e fesoasoani e saunia ai tamaiti aoga e faatatau a latou suesuega o le Eteru 6 i o latou olaga. E faaopoopo atu i le valaaulia o tamaiti aoga e faamaea le gaoioiga i a latou api faamaumau mo suesuega, mafaufau e faamaea i luga o le laupapa.

E mafai ona faatusatusa o tatou olaga faaletino i se malaga umi, faatasi ai ma le taunuuga manaomia o le ola e faavavau. I lau api faamaumau mo suesuega, tusi le “O A’u” i le tasi itu o le itulau ma le “Ola e Faavavau” i le isi itu. I le va o nei ulutala e lua, tusi i lalo nisi o faafitauli e mafai ona tulai mai i le taimi o la tatou malaga lea e faigata ai mo i tatou ona toe foi atu ma le agavaa i le Tama Faalelagi. Ona mafaufau lea pe o faapefea ona alu lau malaga agai atu i le ola e faavavau ma po o le fea o faafitauli ua faailoa mai o loo e feagai ai i le taimi nei.

O le asō o le a e suesue ai e uiga i le faigamalaga na faia e Sa Iaretō i le nuu folafolaina ina ua uma ona latou fauina o latou vaa. A o e suesue, vaavaai mo upumoni e mafai ona fesoasoani ia te oe e faatoilalo ai faafitauli e te feagai ai i lau malaga toe foi atu i le afioaga o le Atua.

Faatatauga o mau i lou olaga

O laasaga nei e mafai ona fesoasoani ia te oe e faatusatusa, pe faatatau ai, mea o le a e faitauina i tusitusiga paia i ou tulaga faaletagata lava ia. I lau api faamaumau mo suesuega, tusi ai le ulutala “O auala e faatatau ai tusitusiga paia i lo’u olaga.” Tusi laasaga nei i lalo o le ulutala.

Faaali atu laasaga nei ina ia mafai e tamaiti aoga ona kopi i totonu o a latou api talaaga.

1. Saili mo auiliiliga taua.

2. Fai ni faatusatusaga.

3. Saili lesona aoga.

4. Filimaoti le faaaogaina patino.

A o lei tuuina atu i tamaiti aoga se avanoa e faataitai ai ona faaaoga nei laasaga e i latou lava, mafaufau e fai faatasi o se vasega le faataitaiga lenei. Ia mautinoa e sefe le tele o le taimi mo tamaiti aoga e faataitai ai e i latou lava i se taimi mulimuli ane o le lesona.

Laasaga 1: Saili auiliiliga taua

Faitau le Eteru 6:1–3, ma vaavaai mo faamatalaga taua. E mafai ona aofia i nei auiliiliga ia tagata, nofoaga, meafaitino, po o faatinoga o loo faamamafaina ai.

Fai atu i tamaiti aoga e faasoa mai ni auiliiliga taua na latou maua i nei fuaiupu. E mafai ona tusia nei mea i luga o le laupapa. E mafai ona e faasino atu mea nei:

O se tasi o faamatalaga taua atonu na e matauina e faapea, na faasusuluina e le Alii ia maa na mua’i tuuina atu e le uso o Iareto ia te Ia (tagai Eteru 3:1–6) ina ia maua e Sa Iaretō le malamalama i o latou vaa.

Laasaga 2: Fai ni faatusatusaga

Mafaufau pe mafai faapefea ona faatusatusa ia auiliiliga na e faailoaina i le laasaga na uma atu i se mea faaleagaga po o tulaga i lou olaga.

• O a faatusatusaga e mafai ona e faia i auiliiliga na e faailoaina i le laasaga na mavae atu nei?

Mo se faataitaiga, atonu na e faatusatusaina maa susulu i punavai o le malamalama faaleagaga ua faamanuiaina ai i tatou e le Tama Faalelagi, e pei o aoaoga ma faataitaiga a Iesu Keriso, le Agaga Paia, tusitusiga paia, ma perofeta soifua. (Tagai i le Salamo 119:105; Ioane 8:12; ma le 1 Nifae 17:13. E mafai ona e fefaasinoa’i nei fuaiupu ma le Eteru 6:3.)

Laasaga 3: Saili lesona e aoga

Mafaufau po o a lesona po o upumoni e te aoaoina a o e faatusatusaina nei fuaiupu i lou olaga po o se mea faaleagaga. Mafaufau foi i mea ua e aoaoina e uiga i le Tama Faalelagi ma Iesu Keriso.

• O a nisi o lesona po o upumoni ua e aoaoina mai nei fuaiupu? O le a se mea ua e maua e mafai ona fesoasoani ia te oe i lou olaga i lea aso ma lea aso?

O se upumoni e tasi e mafai ona tatou aoaoina o le E tuuina mai e le Tama Faalelagi ma Iesu Keriso ia i tatou le taitaiga ma le malamalama e fesoasoani ai ia i tatou i la tatou malaga i le olaga faitino.

E mafai ona e valaaulia tamaiti aoga e faasoa mai nisi o auala na saunia ai e le Atua mo i latou le taitaiga ma le malamalama faaleagaga i o latou olaga.

Laasaga 4: Fuafua le faaaogaina patino

Manatunatu pe mafai faapefea ona e faaaogaina i lou olaga ia lesona na e faailoaina i le laasaga ua mavae atu.

• O le a se mea e mafai ona e faia e mulimuli pe maua atili ai le malamalama o le Atua i lou olaga?

Atonu na e mafaufau i faatinoga e pei o le faaleleia o au suesuega o tusitusiga paia, sailia ma le agaga tatalo o le taitaiga mai le Tama Faalelagi i au faaiuga i aso taitasi, po o le taumafai ma le filiga atili e faatumauina le Agaga Paia e avea ma au soa tumau.

Faataitai le faatatauina o isi fuaiupu mai lenei tala

E mafai e tamaiti aoga ona faamaea taitoatasi le gaoioiga suesue lenei, faatasi ma se paga, po o se vaega toalaiti.

Suesue le vaega o totoe o le tala i le malaga a Sa Iaretō i le nuu folafolaina e ala i le faitauina o le Eteru 6:4–12. Vaavaai mo nisi auala e mafai ona fesootai ai le malaga a Sa Iaretō i lau malaga i le olaga. A o e suesue, faataitai ona faaaoga le faagasologa o laasaga e fa mo le faatatauina o tusitusiga paia.

Ia gauai faapitoa atu i mea ua aoao mai e nei fuaiupu ia te oe e uiga i le Tama Faalelagi ma Iesu Keriso.

Afai ua lava se taimi o tamaiti aoga e suesue ai, ona talanoa lea i mea na latou aoaoina. Afai latou te manaomia nisi fesoasoani, mafaufau e fai atu fesili e pei o nei:

• O a ni mea ua aoaoina ai oe e nei fuaitau e uiga i le Tama Faalelagi ma Iesu Keriso?

• O a nisi o “matagi malosi” (Eteru 6:5) ua faatagaina i tatou e le Alii e oo i ai i o tatou olaga? E mafai faapefea ona tatou faamautinoa o o tatou tofotofoga po o luitau o le a fesoasoani ia i tatou e latalata atili atu ai i le Atua?

• O a nisi o auala atonu e te lagona ai le “tanumia” (Eteru 6:6) i lau malaga i le olaga nei? O le a se mea na e vaaia i le fuaiupu e 7 e mafai ona fesoasoani ia te oe i taimi faapena?

• Aisea e te manatu na viia ai e Sa Iaretō le Alii i le taimi o la latou malaga faigata? (tagai Eteru 6:9). O le a se mea e mafai ona fesoasoani ia te oe e lagona ai le lotofaafetai i le Atua, e tusa lava pe o e feagai ma tofotofoga?

A uma le talanoaga, valaaulia tamaiti aoga e mafaufau pe mafai faapefea e mea sa latou suesueina i le asō ona fesoasoani ia i latou i o latou olaga, e aofia ai ma faafitauli na latou faailoaina muamua mai. Fautuaina i latou e tusi ia latou api faamaumau mo suesuega soo se uunaiga faaleagaga po o ni malamalamaaga latou te mananao e manatua.

Molimau atu e uiga i upumoni na talanoaina i le asō. Fautuaina le tamaiti aoga e faaauau le faatatauina o mea latou te faitauina i tusitusiga paia i o latou olaga.

Manatu ma Talaaga o Faamatalaga

Eteru 6:4 O le a le uiga e faapea na tuuina atu e Sa Iaretō i latou lava i le Atua?

Na aoao mai Elder L. Todd Budge o le Au Fitugafulu:

O loo faamaumauina faapea ona “o atu [lea o le au Sa Iaretō] i o latou … vaa, ma tuuvaa atu i le sami, ma tuu atu i latou lava i le Alii lo latou Atua” [Eteru 6:4; faaopoopo le faamamafa]. O le tuu atu o lona uiga o le faatuatuaina po o le lafoaia. E lei ō le au sa Iaretō i totonu o vaa ona sa latou iloa tonu le auala o le a galulue ai mea i le latou malaga. Sa latou o atu i totonu ona ua latou aoao e faalagolago i le mana, agalelei, ma le alofa mutimutivale o le Alii, ma o lea sa latou loto ai ia lafo atu i latou lava ma soo se masalosalo po o popolega na ia i latou i le Alii. (L. Todd Budge, “Faalagolago Tumau ma Malosi,” Liahona, Nov. 2019, 47)

Eteru 6:5–7. E mafai faapefea ona puipuia au i taimi o tofotofoga ma luitau o loo feagai ma au i le olaga?

Na aoao mai Peresitene James E. Faust (1920–2007) o le Au Peresitene Sili:

Tatou te feagai uma lava ma matagi matautia o le tiapolo ma tai fana’e o le eleelea e lē ese ma le tulaga na feagai ma Sa Iaretō a o latou malaga atu i le laueleele na folafolaina. Sa felafoa’iina i latou i luga o galu o le sami ma “sa oo ina tele taimi sa tanumia ai i latou i le loloto o le sami, ona o galu mauga sa fati i o latou luga, ma afa tetele foi ma matautia na pogai mai i le malosi tele o le matagi” (Eteru 6:6). Ae sa puipuia i latou aua “a o tanumia i latou i le moana sa leai se vai sa afaina ai latou, ona sa maopo lelei o latou vaa e pei o se ipu” (Eteru 6:7). I o tatou taimi o loo i ai ni vaa e puipuia ai mai nei matagi matautia faaleagaga, ma o nei vaa o o tatou malumalu, aiga, korama, uarota, ma siteki. (James E. Faust, “Matou te Talitonu ia te Oe!,” New Era, Oke. 2006, 8–9)

Aisea e mafai ai ona fesoasoani le mafaufau i le auala o loo agai ai la’u malaga i le olaga?

Matamata le vitiō “The Journey” (3:46). I lenei vitiō, ua faasoa mai ai e Elder Dieter F. Uchtdorf o le Korama a Aposetolo e Toasefululua aafiaga ma malamalamaaga e mafai ona fesoasoani ia i tatou i la tatou malaga i le olaga faaletino.

Gaoioiga Faaopoopo e Aoao Ai

Faaaogaina o mau-faasino

Atonu e fesoasoani le valaaulia o tamaiti aoga e sue mau e fesootai i upumoni o loo latou suesueina mai le malaga a Sa Iaretō. E mafai ona latou lisiina mau faasino latou te maua i autafa o fuaiupu e faatatau i ai mai le Eteru 6 i a latou tusitusiga paia. E mafai ona maua e tamaiti aoga a latou lava mau, pe e mafai foi ona e faasoa atu ni mau fesootai (e pei o mau nei), valaaulia tamaiti aoga e suesue ma iloa pe faapefea ona fesootai ia fuaiupu i le Eteru 6.

Eteru 6:2–3, 10—Salamo 119:105; Ioane 8:12; 1 Nifae 17:13

Eteru 6:4—Faataoto 3:5–6; Mosaea 7:19; Alema 38:5

Eteru 6:5–8—Mataio 7:24–25; Helamana 5:12; 2 Nifae 4:18–20, 35

Eteru 6:9—1 Tesalonia 5:18; 1 Nifae 18:16; Alema 34:38

Eteru 6:11—12 Nifae 31:20; Mosaea 24:15; Mataupu Faavae ma Feagaiga 24:8

Eteru 6:12—Salamo 145:8–9; Luka 17:11–19; Alema 7:23

Gaoioiga tusiata

E tele elemene o le malaga a Sa Iaretō o loo faamatala mai i le Eteru 6:1–12 o le a manaia le vaai faalemafaufau i ai. Ina ia faia lenei mea, e mafai e tamaiti aoga ona fatu se ata e faatusa i se manatu faavae po o se mea na tupu mai se tasi pe sili atu foi o fuaiupu latou te suesueina. E mafai foi ona latou tusia se fasifuaitau mai le mau o loo latou taulai atu i ai i se mea i la latou ata. Ona mafai lea ona faasoa mai e tamaiti aoga ma faamatala atu a latou ata i se paga po o se vaega toalaiti. E mafai ona faasoa mai e ni nai tamaiti aoga a latou ata ma le vasega.

Lesona faaopoopo mai le faigamalaga a Sa Iaretō

Ina ia fesoasoani i tamaiti aoga e faailoa mai upumoni e mafai ona latou aoao mai le faigamalaga a Sa Iaretō, mafaufau e faaali atu le “Faalagolago Tumau ma Malosi Atu” mai le taimi faailo 2:58 i le 9:46. I lenei lauga, ua faasoa mai ai e Elder L. Todd Budge o le Au Fitugafulu le tele o auala e mafai ona fesootai ai le malaga a Sa Iaretō i le laueleele na folafolaina i o tatou olaga.