Eteru 12:1–22

Mauaina o se Molimau o le Upumoni

O le a se mea na fesoasoani ia te oe i au taumafaiga e aoao upumoni faaleagaga? Ina ua mavae ona faamatalaina le tele o tausaga o le talafaasolopito a Sa Iaretō, na faailoa mai e Moronae le talaiga a le perofeta o Eteru. Ona faasoa mai lea e Moronae nisi o faamanuiaga e oo mai i le faatinoina o le faatuatua ia Iesu Keriso, e aofia ai le ala e mafai ai e le tofotofoina o lo tatou faatuatua ona fesoasoani ia i tatou ia maua se molimau o le upumoni. O lenei lesona ua faamoemoe e fesoasoani ia te oe e faatino le faatuatua e maua ai se molimau faaleagaga o le upumoni.

Saunia oe lava e aoao atu. Ona e molimau mai le Agaga i le upumoni ma o le punavai o le liuaina, o faiaoga mamana o le talalelei e saunia i latou lava faaleagaga ae latou te lei aoao atu. Valaaulia le Agaga Paia i lau sauniuniga o le lesona e ala i le tatalo faamaoni, ma saili e mulimuli i Lana taitaiga a o e taulai atu i le aoaoina atu o aoaoga faavae ma mataupu faavae.

Sauniuniga a le tamaitiiti aoga: Valaaulia tamaiti aoga e mafaufau i faataitaiga mai tusitusiga paia lea na taitai atu ai faatinoga faamaoni i molimau faaleagaga, faamanuiaga, po o tali mai le Atua.

Gaoioiga e Ono Mafai Ona Aoao Ai

“E faapefea ona e iloa”?

Sa faasoa mai e Sister Rebecca L. Craven, Fesoasoani Lua i le Au Peresitene Aoao o Tamaitai Talavou, le aafiaga lenei sa ia maua a o talanoa atu i se tamaitai talavou:

E i ai so’u aafiaga manaia ma se tamaitai talavou pele, o le sa fai maia se fesili faamaoni: “Sister Craven, e faapefea ona e iloa e i ai se mea e moni e uiga i le Ekalesia? Aua ou te lē lagonaina lava se mea.”

Ae ou te le’i oso atu i se tali, sa muamua ona ou fai atu ia te ia ni nai fesili. “Faamatala mai ia te a’u e uiga i au lava suesuega o tusitusiga paia.”

Sa ia tali mai, “Ou te lē faitauina ni tusitusiga paia.”

Sa ou fesili atu, “Ae a le faitau faatasi ma lou aiga? Pe tou te suesueina faatasi le Sau, Mulimuli Mai ia te A’u ?”

Sa fai mai o ia, “E leai.”

Sa ou fesili e uiga i ana tatalo: “O a ou lagona pe a e tatalo?”

Sa ia tali mai, “Ou te lē tatalo.” (Rebecca L. Craven, “Fai Le Mea e Sili Ona Taua,” Liahona, Me 2022, 62)

• E faavae i ou aafiaga, o le a sau tala e fai atu e fesoasoani ai i lenei tamaitai talavou?

A uma ona talanoaina e tamaiti aoga le fesili, valaaulia i latou e faasoa mai ni faataitaiga o upumoni patino atonu e manaomia e tagata e sailia ai se molimau faaleagaga. Tusi a latou tali i luga o le laupapa. (O tali e mafai ona aofia ai se molimau e moni le Tusi a Mamona, o le ola ai i se olaga mama ma amiomama e taua, po o le Upu o le Poto o se tulafono a le Atua.)

Mafaufau i upumoni faaleagaga e te manao e maua ai se molimau faaleagaga po o se molimau malosi atu. Mafaufau e tusi mea nei i lau api faamaumau mo suesuega. A o e suesue i le asō, vaavaai mo aoaoga e mafai ona fesoasoani ia te oe e maua ai se molimau faaleagaga pe faamalosia ai lau molimau.

“O le tofotofoina o lou faatuatua”

A o faaauau pea ona otootoina e Moronae le talafaamaumau o Sa Iaretō, sa ia faailoa atu le auaunaga a le perofeta o Eteru. E ui i le fananau mai i le faatagataotauaina ma le ola ai faatasi ma tagata o e sa teena perofeta (tagai Eteru 11:20–23), ae sa ola Eteru i se olaga amiotonu ma sa valaauina e le Atua e avea ma perofeta.

Faitau le Eteru 12:2–5, ma vaavaai pe na faapefea ona taliaina e Sa Iaretō le talaiga a Eteru.

• Aisea na mumusu ai tagata e talitonu i upu a Eteru?

Faitau le Eteru 12:6, ma vaavaai mo mea na aoao mai e Moronae e uiga i le ala tatou te maua ai se molimau faaleagaga o le upumoni.

O leEteru 12:6 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Na faasoa mai e Elder Richard G. Scott (1928–2015) o le Korama a Aposetolo e Toasefululua se tasi o uiga o le fasifuaitau tofotofoina o lou faatuatua:

E mafai ona e aoao e faaaoga ma le mataalia atili le faatuatua e ala i le faaaogaina o lenei mataupu faavae na aoao mai e Moronae: “O le faatuatua o mea ia ua faamoemoe i ai ae le vaaia; o le mea lea, aua tou te masalosalo ona ua outou le vaaia, aua tou te le maua se molimau seia uma ona tofotofoina o lo outou faatuatua” [Eteru 12:6; faaopoopo le faamamafa]. O le mea lea, soo se taimi e tofotofo ai lou faatuatua, o le galue lena ma le agavaa i se musumusuga, o le a e maua ai se molimau faamaonia a le Agaga. O na lagona o le a faamalosia ai lou faatuatua. A o faaauau pea ona e faia lena mamanu, o le a atili ai ona malosi lou faatuatua. (Richard G. Scott, “O Le Mana Lagolago o le Faatuatua i Taimi o le Le Mautonu ma Tofotofoga,” Liahona, Me 2003, 76)

• O le a se mea na e aoaoina mai le Eteru 12:6 ma lenei faamatalaga e mafai ona fesoasoani i se tasi e manao ia maua se molimau faaleagaga po o se molimau malosi atu o le upumoni?

O se upumoni e tasi e mafai ona tatou aoao mai le Eteru 12:6 o le afai tatou te mananao i se molimau faaleagaga, ona tatau lea ona tatou faatinoina muamua le faatuatua ia Iesu Keriso ma Lana talalelei.

Sa faamatala e Sister Rebecca L. Craven le ala na ia tali atu ai i le tamaitai talavou sa ia talanoa i ai:

O la’u tali ia te ia, sa faigofie, “Afai e te manao e iloa se mea, o le a tatau ona e faia se mea.”

Pe le moni ea lena mea i soo se mea tatou te mananao e aoao pe iloa? Sa ou valaaulia la’u uo fou e amata ona fai le talalelei a Iesu Keriso: tatalo, suesue, auauna atu i isi, ma faalagolago i le Alii. E le oo mai le liua a o leai se mea e fai. E oo mai e ala i le mana o le Agaga Paia a o tatou faia se taumafaiga ma le loto i ai ia iloa e ala i le fesili, saili, ma le tu’itu’i. E oo mai e ala i le faia. (Rebecca L. Craven, “Fai Le Mea e Sili Ona Taua,” Liahona, Me 2022, 62)

• Aisea e te manatu ai o le faatinoina o le faatuatua ia Iesu Keriso e ala i a tatou faatinoga o se vaega taua o le mauaina o se molimau faaleagaga e uiga ia te Ia ma Lana talalelei?

• E mafai faapefea e le ola ai i le talalelei a le Faaola ona aafia ai o tatou lagona mo Ia?

Faataitaiga o le faatuatua

Mafaufau i aafiaga na e maua ai pe maua ai e isi se molimau faaleagaga o se taunuuga o le ola ai i le talalelei a le Faaola ma faaaoga le faatuatua ia te Ia.

Valaaulia ni nai tamaiti aoga e faasoa a latou aafiaga ua latou mafaufau i ai. Faamalamalama i tamaiti aoga e le tatau ona latou faasoa mai ni aafiaga e patino tele ma e lē faalauaiteleina. Mafaufau e faasoa atu sou lava aafiaga o se vaega o lenei talanoaga. E mafai foi ona faaaoga le vitiō lenei.

Ina ia vaai i se faataitaiga o se tasi sa faamalosia ona o le faatinoina o le faatuatua i le Faaola, matamata i le “Faatuatua Mama ma Faigofie” (5:21), o loo maua i le ChurchofJesusChrist.org.

A o faaauau e Moronae lana lauga, sa ia faasoa atu le tele o faataitaiga o tagata taitoatasi o e na faamanuiaina a o latou faatinoina le faatuatua ia Iesu Keriso.

Mo le gaoioiga lenei, mafaufau e vavae tamaiti aoga i ni vaega se fa ma tofi atu i vaega taitasi se tasi o seti nei o fuaiupu e suesue: Eteru 12:7–10, 11–14, 15–18, 19–22. Valaaulia vaega taitasi e faasoa mai i le vasega ia faataitaiga o le faatuatua sa latou faitau i ai.

Faitau le Eteru 12:7–22, ma vaavaai pe na faapefea ona faamanuiaina e le Alii nei tagata o e sa faaalia le faatuatua ia te Ia. Mafaufau e faailoga faataitaiga e tulaga ese ia te oe.

• O le fea o nei faataitaiga o le faatuatua na sili ona faagaeetia ai oe? Aisea?

• E mafai faapefea e se tasi pe sili atu o faataitaiga na e suesueina ona fesoasoani ia te oe i ou tulaga faaletagata lava ia?

Mafaufau pe mafai faapefea ona e faaaogaina mea ua e aoaoina i le asō i lou olaga. Tusi ni faatinoga se lua pe tolu e mafai ona e faia e faaaoga ai le faatuatua ia Iesu Keriso ma maua ai pe faamalosia ai lau molimau i le talalelei a le Faaola.

Manatu ma Talaaga o Faamatalaga

Eteru 12:6. O le a le uiga o le faaaoga o le faatuatua ma le faamoemoe i mea e le o vaaia?

Na aoao mai e Sister Bonnie L. Oscarson, o lē sa avea ma Peresitene Aoao o Tamaitai Talavou:

O nisi taimi tatou te taumafai ai e fai agai i tua. Mo se faataitaiga, atonu tatou te faia le auala lenei: O le a ou fiafia e ola i le tulafono o le sefuluai, ae e tatau ona ou iloa muamua pe moni. Atonu foi tatou te tatalo ina ia maua se molimau i le tulafono o le sefuluai ma faamoemoe o le a faamanuia i tatou e le Alii i lena molimau ae tatou te lei faatumuina lava se lisiti o le sefuluai. E le faapena le auala e fai ai. O loo faamoemoe le Alii ia i tatou ina ia faatino le faatuatua. E tatau ona tatou totogi ma le faamaoni e le aunoa se sefuluai atoa ina ia maua ai se molimau i le sefuluai. E faatatau lenei lava mamanu e tasi i mataupu faavae uma o le talalelei, pe o le tulafono o le ola mama, o le mataupu faavae o le tauagafau, o le Upu o le Poto, po o le tulafono o le anapogi. (Bonnie L. Oscarson, “Ia Outou Liua,” Liahona, Nov. 2013, 77)

Eteru 12:12 O fea e mafai ona ou maua ai isi tala o vavega faaonaponei na āfua mai i le faatuatua?

Matamata i le “O Se Vavega o le Taua” e aoao ai mai ia Peresitene Thomas S. Monson (1927–2018) le ala e mafai ai e le faatuatua ia Iesu Keriso ma le mana o Lana perisitua ona taitai atu ai i vavega.

Faitau e uiga i le faatuina mai e Iosefa Samita o se tagata mai lona moega ina ua uma ona faaalia e le tagata lona faatuatua ia Iesu Keriso (tagai i le Au Paia: O Le Tala o le Ekalesia a Iesu Keriso o le Au Paia o Aso e Gata Ai, vol. 1. O Le Tagavai o le Upumoni, 402–403).

Gaoioiga Faaopoopo e Aoao Ai

Se isi amataga

E mafai ona valaaulia tamaiti aoga e mafaufau pe aisea e mafai ai ona taua le faia o mea i se faatulagaga faapitoa. Mo se faataitaiga, e mafai ona e fai atu i tamaiti aoga e tusi numera 1, 2, ma le3 i soo se faasologa lava i luga o se fasipepa. Ona faaali atu lea o galuega nei ma valaaulia tamaiti aoga e mafaufau pe o le a le mea e tupu pe afai latou te taumafai e faataunuu ia galuega i le faasologa lea faatoā latou filifilia:

• (1) Fai ou totini. (2) Fai ou seevae. (3) Nonoa ou seevae.

• (1) Tatala lau kulimi fulunifo. (2) Tuu ni kulimi fulunifo i luga o lau pulumu fulunifo. (3) Fufulu ou nifo.

• (1) Tatala le polokalama o feau tusitusia i luga o lau telefoni. (2) Ta se sāvali. (3) Auina atu le sāvali.

Valaaulia tamaiti aoga e mafaufau i ni auala e mafai ai ona taua le faia o ni faatinoga faigofie i le faasologa sa’o pe a oo i mataupu faaleagaga.

Eteru 12:1–4 O le faamoemoe ma le faatuatua e mafai ona taula ai o tatou agaga

Afai e mafai ona manuia tamaiti aoga mai le aoaoina pe faapefea ona galulue faatasi ia mataupu faavae o le faatuatua ma le faamoemoe, mafaufau e valaaulia i latou e tusi se vaa ma faaigoaina “O Lo’u Olaga.” O le isi, valaaulia i latou e tusi se taula e fesootai i le vaa, faaigoa o le “Faatuatua ma le Faamoemoe,” ma tusi ni galu faataamilo i le vaa. Fesili i tamaiti aoga po o a mea e ono faatusa i ai galu pe afai e faatusa le vaa i o latou olaga. Valaaulia tamaiti aoga e faamatala mai faamanuiaga o se taula, ma faitau faatasi le Eteru 12:1–4 . Mafaufau e fai atu fesili e pei o nei:

• O le a le uiga o le i ai o se nofoaga i le aao taumatau o le Atua? (Fuafua e faasino le vasega i le Mataio 25:31–34 mo se fesoasoani.)

• E faapefea i le faatuatua ia Iesu Keriso ona faatagaina i tatou ia faamoemoe “ma le mautinoa” mo se nofoaga i le aao taumatau o le Atua?

• Na faapefea ona taula saogalemu oe e lou faatuatua ma le faamoemoe i taimi faigata po o afā patino?

Eteru 12:6. Mau-fefaasinoai

Ina ia fesoasoani i tamaiti aoga ia loloto lo latou malamalama i le aoaoga faavae o loo aoao mai i le Eteru 12:6, mafaufau e valaaulia i latou e suesue i mau mo fuaitau o loo aoao mai ai ni faiga po o ni manatu faapena. Lisi mau faasino latou te maua i luga o le laupapa (faataitaiga e aofia ai le Ioane 7:17; Eperu 11:1; Alema 32:21–31). Ona mafai lea ona valaaulia tamaiti aoga e fai se filifili o mau, e fesootai ai fuaitau na latou maua i tua i le Eteru 12:6.

Eteru 12:7–22 “I le meaalofa a lona Alo ua saunia ai e le Atua se ala e sili atu ona lelei”

O se vaega o la latou suesuega o le Eteru 12:7–22, e mafai ona valaaulia tamaiti aoga e aoao atili e uiga i le ala na faamanuiaina ai e Iesu Keriso nisi o tagata o loo ta’ua i nei fuaiupu. O vaefaamatalaga mo nei fuaiupu i le Eteru 12 o loo i ai mau fefaasinoai i tala o loo latou faasino i ai. E mafai ona valaaulia tamaiti aoga e faitau nei tala ma gauai atu i le ala na faamanuiaina ai e Iesu Keriso ia tagata a o latou faatinoina lo latou faatuatua ia te Ia. A uma ona suesue le vasega, e mafai ona e valaaulia i latou e faasoa mai mea na latou aoaoina e mafai ona faateleina ai lo latou lava faatuatua ia Iesu Keriso.