Atamai i Aoaoga Faavae: Eteru 12:6

“Tou Te Le Maua Se Molimau seia uma ona Tofotofoina o Lo Outou Faatuatua”

I lau suesuega o le Eteru 12:1–22, sa e aoao ai i le auala e faaaoga ai le faatuatua ia Iesu Keriso ma Lana talalelei a o lei mauaina se molimau faaleagaga o le upumoni (tagai Eteru 12:6). O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Eteru 12:6, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Uunaia tamaiti aoga e faaaoga mataupu faavae o le mauaina o le malamalama faaleagaga. A oo ina sili atu le toafimalie o tamaiti aoga i le faaaogaina o mataupu faavae o le mauaina o le malamalama faaleagaga, o le a faigofie lava ona latou faaaogaina i a latou fesili o i ai. Ia faifai pea ma fatufatua’i a o e valaaulia i latou e toe faamanatu ia mataupu faavae i ni auala eseese.

Sauniuniga a le tamaitiiti aoga: Valaaulia tamaiti aoga e saili mo fuaitau o mau e mafai ona fesoasoani i se tasi e faatino le faatuatua ia Iesu Keriso. Ina ia maua ni mau, e mafai ona latou suesue i le autu o le ‟Faatuatua” i le Taiala i Tusitusiga Paia po o le Topical Guide.

Gaoioiga e Ono Mafai Ona Aoao Ai

O lenei lesona i fuaitau o le atamai i aoaoga faavae ua faatulagaina ia aoaoina pe a uma le lesona o le “Eteru 12:1-22,” o le lesona faatatau mo le fuaitau o le atamai i aoaoga faavae Eteru 12:6. Afai e manaomia le toe tuu atu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

I le lesona talu ai, sa e aoaoina ai le upumoni lenei mai le Eteru 12:6: Afai tatou te mananao i se molimau faaleagaga, ona tatau lea ona tatou faatinoina muamua le faatuatua ia Iesu Keriso ma Lana talalelei.

Mafaufau e valaaulia tamaiti aoga e faataitai ona faamalamalama atu aoaoga o le Eteru 12:6 i se paga. E mafai ona e faaali atu se fesili e pei o fesili nei mo tamaiti aoga e talanoaina.

• O le a le fautuaga o loo tuuina mai i le Eteru 12:6 ia i latou o e o i ai ni fesili e le’i taliina pe lei ‟vaai” foi i le upumoni?

Fesoasoani i tamaiti aoga e tauloto le mau faasino ma le fasifuaitau autu o le mau mo le Eteru 12:6. O se tasi lenei o auala e faatino ai lenei mea.

Na aoao mai Peresitene Ezra Taft Benson (1899–1994) e faapea, o tagata uma lava e i’u lava ina tuuina atu i le puipui o le faatuatua ma e tatau ona tulai atu (tagai ‟The Book of Mormon Is the Word of God,” Ensign, Me 1975, 65). I se isi faaupuga, e tatau i tagata uma ona filifili mo i latou lava i le faatuatua e talitonu, ma iloa, le upumoni.

Tusi se ata o se puipui tele ma se ata o oe lava ia o loo tu i ona luma. Faaaoga le ‟pa o le faatuatua” e fesoasoani ia te oe e tauloto ai le mau faasino i le Eteru 12:6 ma le fasifuaitau autu o le mau. Teuteu lou puipui i le tusia o le ‟Eteru 12:6” i le pito i luga, ona tusi lea ‟Tou te le maua se molimau seia uma ona tofotofoina o lo outou faatuatua” i luga o le puipui mo ni nai taimi. A tumu avanoa uma i luga o lou puipui i le fasifuaitau autu o le mau, taumafai e fai leotele mo ni nai taimi e aunoa ma le tilotilo i ai.

Faataitai le faaaogaina

A o lei amataina le gaoioiga faataitai o le faaaogaaga, mafaufau i ni auala fatufatua’i e lagolago ai tamaiti aoga i le aoaoina ma le iloiloina o mataupu faavae o le mauaina o le malamalama faaleagaga. O le faia soo o lena mea o le a fesoasoani ia i latou ia faamanuiaina atili ai i le iloaina pe faapefea ona faaaoga nei mataupu faavae.

O se tasi auala e faia ai lenei mea o le tusia lea o mataupu faavae uma e tolu o le mauaina o le malamalama faaleagaga i luga o le laupapa. Ona tusi lea o manatu po o manatu mai mataupu faavae taitasi i soo se faasologa ma valaaulia tamaiti aoga e faafetaui manatu ma mataupu faavae sa’o.

Faasoa atu le ata faataitai lea i tamaiti aoga pe mafaufau i lau lava ata faataitai e ausia ai le faamoemoega lava lea e tasi.

O Christiana ma Niceta o se uo lelei lava. O Christiana o se tagata o Le Ekalesia a Iesu Keriso o le Au Paia o Aso e Gata Ai. E taumafai malosi o ia e avea ma se faataitaiga lelei ia Niceta, o le e lē talitonu i tapuaiga faatulagaina. E masani ona fesiligia e Niceta ia talitonuga o Christiana ma taumanatunatu pe aisea e auai ai o ia i le lotu i le Aso Sa, totogi le sefuluai, ola i le Upu o le Poto, ma filifili e laei tauagafau.

Ua faamalamalama atu e Christiana ia Niceta ua ia lagonaina o poloaiga ma tulaga faatonuina o loo ia ola ai e moni ma ua auina mai e le Atua. Sa tali mai ma le agalelei Niceta, ‟E mafai faapefea ona e faapea atu ua e iloa e moni nei mea? E mafai faapefea ona e iloa o soo se mea e le mafai ona e vaaia e moni?”

Mafaufau e vavae tamaiti aoga i ni vaega toalaiti ma valaaulia i latou e talanoaina pe mafai faapefea ona latou faaaogaina mataupu faavae o le mauaina o le malamalama faaleagaga ma le Eteru 12:6 i lenei tulaga. Faamanatu i tamaiti aoga o ata faataitai o le atamai i aoaoga faavae ua mamanuina e tuuina atu ai ia i latou ni avanoa e faataitai ai e faaaoga ai mataupu faavae o le mauaina o le malamalama faaleagaga. O o latou manatu ma tali e le manaomia ona polesiina pe atoatoa.

E mafai ona e valaaulia tamaiti aoga e amata la latou talanoaga i le fesili atu, ‟O le fea o mataupu faavae o le mauaina o le malamalama faaleagaga o le a e amata ai e fesoasoani ai i lau uo? Aisea?” O fesili nei e mafai foi ona fesoasoani mo tamaiti aoga e tagai i ai i le taimi o la latou talanoaga.

Iloilo manatu faavae ma fesili faatasi ai ma se vaaiga e faavavau

• O a ni manatu po o ni upumoni e te manao e fesoasoani ia Niceta ia malamalama atili ai? Aisea?

• O le a se mea e mafai ona e faasoa atu ia Niceta e uiga i le Alii ma le ala e galue ai o Ia ia i tatou?

Saili le malamalama atili e ala i punavai paia filifilia

• O a aoaoga mai le Eteru 12:6 e ono fesoasoani i lenei tulaga? Aisea?

  Afai e mafai ona manuia tamaiti aoga mai le vaaia o se faamatalaga talafeagai mai se taitai o le Ekalesia e fai ma faataitaiga, mafaufau e faasoa atu le saunoaga a Sister Bonnie L. Oscarson mai le vaega o ‟Faamatalaga ma Talaaga” o le lesona talu ai.

• O a nisi o fuaitau faaopoopo o mau po o faamatalaga mai taitai o le Ekalesia e mafai ona tuuina mai ai le fesoasoani ma le taitaiga mo Niceta?

Faatino i le faatuatua

• O a ni aafiaga na e maua po o isi i le faatinoina o le faatuatua ia Iesu Keriso? E mafai faapefea e le faasoaina atu o nei mea ia Niceta ona fesoasoani e faaosofia ai o ia e faatino i le faatuatua?

• O a ni faatinoga faamaoni e mafai ona e fautuaina atu mo Niceta e amata ona fai?

A uma ona talanoaina e tamaiti aoga a latou talanoaga, mafaufau e valaaulia ni nai tagata e faasoa mai pe na faapefea ona latou tali atu ma mea na latou aoaoina mai lea aafiaga.

Mafaufau foi e talanoaina ma tamaiti aoga pe faapefea ona aoga lenei gaoioiga ia i latou i le taimi nei ma i le lumanai. Mo se faataitaiga, e mafai ona e valaaulia tamaiti aoga e mafaufau i tulaga o i ai nei po o le lumanai lea e mafai ai e aoaoga a Eteru 12:6 ma mataupu faavae o le mauaina o le malamalama faaleagaga ona fesoasoani ia i latou po o isi e galulue e ala i se tofotofoga o le faatuatua ma i’u ai ina maua se molimau faamautuina o le upumoni.

Toefaamanatu o le atamai i aoaoga faavae

I le taimi o se lesona i le lumanai, tusi i luga o le laupapa se ata o se puipui ma se ata o se tagata o loo tu i le pito i luma. Valaaulia tamaiti aoga e mafaufau pe o le fea mau faasino o le atamai i aoaoga faavae e fesootai i le ata (Eteru 12:6), ma fautuaina i latou e faataitai ona tauloto le fuaitau autu o le mau ma se paga. O le fuaitau autu o le mau o le “Tou te le maua se molimau seia uma ona tofotofoina o lo outou faatuatua.”