Etera 12:23–27

“Amin’izany, ny zavatra malemy dia hataoko tonga matanjaka ho azy”

I Môrônia manoratra eo amina takelaka

Rehefa nanohy namintina ny Bokin’i Etera i Môrônia, dia natahotra izy ndrao ny Jentilisa haneso ny asany noho ny fahalemeny amin’ny fanoratana. Namaly ny Tompo fa rehefa manatona Azy amim-panetren-tena sy finoana isika, dia azony avadika ho tanjaka ny zavatra malemy (jereo ny Etera 12:27). Ity lesona ity dia natao hanampiana anao hanatona an’i Jesoa Kristy mba handresy fahalemena amin’ny alalan’ny fahasoavany.

Mandrafeta sahanasa fianarana izay manasa fandinihan-tena. Ny fiainana ny filazantsaran’i Jesoa Kristy dia mitaky fianarana tsy miovaova sy fahavononana hanao asa amim-pinoana. Mandrafeta sahanasa fandalinana izay mamela ny mpianatra hanombana ny tenan’izy ireo sy hahita ny fomba ahafahan’ny fampiharana fitsipika ara-pilazantsara mitahy ny fiainan’izy ireo. Amporisiho ny mpianatra hiezaka hanaraka ny bitsiky ny Fanahy rehefa mandalina.

Fanomanana ny mpianatra: Asao ny mpianatra hamaky ny Etera 12:27 sy hieritreritra fahalemena eo amin’ny fiainan’izy ireo izay tian’izy ireo horesena amin’ny alalan’ny fanampian’ny Mpamonjy.

Sahanasa fianarana azo atao

Fahalemena sy tanjaka

Manasà mpianatra iray ho eny alohan’ny efitrano ary hamita asa iray izay hitaky tanjaka ara-batana kokoa noho ny ananany amin’izao fotoana izao. Ifanakalozy hevitra ny fomba hampivelarana ny tanjaka ilaina mba hahombiazana amin’io asa io.

Miatrika fahalemena isika rehetra eto amin’ny fiainana an-tany. Mety hahakivy izany indraindray. Ao amin’ity lesona ity ianao dia hianatra mombana lamina iray nampianarin’ny Tompo an’i Môrônia izay afaka mamadika ny fahalemena ho tanjaka.

Ny ahiahin’i Môrônia

Nampiandraiketina an’i Môrônia ny asa famintinana ny tantaran’ny Jaredita , ary fantany fa hovakin’olona maro io tantara io amin’ny hoavy . Nony vitany ny asa famintinana nataony dia noraketiny an-tsoratra ny sasany tamin’ny heviny farany ary nataony tao anatin’izany ny ahiahiny sy fanahiany manokana momba ny zavatra nasaina nataony.

Vakio ny Etera 12:23–25, hitadiavana ny ahiahy nananan’i Môrônia.

• Inona no nampanahy manokana an’i Môrônia?

Hevero ny hifanakalo hevitra sy hitanisa miaraka amin’ny iray kilasy ireo fahalemena matetika ananan’ny zatovo. Azon’ny mpianatra atao ny misaintsaina am-pahanginana sy mirakitra an-tsoratra ao amin’ny diary fandalinan’izy ireo ny sasany amin’ny fahalemen’izy ireo manokana izay tian’izy ireo horesena. Hazavao fa tsy hizara ireny eritreritra manokana ireny amin’ny kilasy ny mpianatra.

Ny valin-tenin’ny Tompo tamin’i Môrônia

Vakio ny Etera 12:26–27, hitadiavana ny fomba namalian’ny Tompo ny ahiahin’i Môrônia.

Ny Etera 12:27 dia andinin-tsoratra masina fifehezana fotopampianarana. Hevero ny hanisy marika ireo andinin-tsoratra masina fifehezana fotopampianarana amina fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hanazatra tena hampihatra ny fotopampianarana nampianarina tao amin’io andininy io amina fanontaniana na toe-java-misy iray.

Ampio ny mpianatra hanadihady ireo fanambarana ao amin’ny andininy 27 izay voatanisa eo ambany. Mety ho azonao atao ny mampanoratra azy ireo eny amin’ny solaitrabe, eo amina ampahefa-paribolana samy hafa, ny tsirairay avy amin’ireo andian-teny. Azonao atao ny mitarika fifanakalozan-kevitra miaraka amin’ny iray kilasy amin’ny alalan’ny fampiasana ny votoatiny eo ambany.

Azonao atao, ho solon’izany, ny mizara ny mpianatra ho vondrona tsikelikely ary manome taratasy iray ny vondrona tsirairay. Ataovy mizara ny taratasin’izy ireo ho efajoro efatra ny vondrona. Azon’ny mpianatra atao ny mirakitra an-tsoratra ao amin’ny efajoro tsirairay ny iray amin’ireo andian-teny avy ao amin’ny andininy 27. Avy eo dia azon’ny mpianatra atao, ao anaty vondrona, ny mamorona fanontaniana izay afaka manampy azy ireo hahatakatra ny andian-teny tsirairay. Aorian’ny firaketana ny fanontanian’izy ireo, dia azon’izy ireo atao ny mizara ireo andian-teny ary ny tsirairay dia hikatsaka valiny amin’ireo fanontaniana noraketin’izy ireo.

“Ary raha manatona Ahy ny olona, dia hasehoko azy ny fahalemeny”

• Inona araka ny eritreritrao no dikan’ny hoe manatona an’i Kristy?

Mety hoe fanaovana sy fihazonana fanekempihavanana amin’i Kristy ary fisafidianana ny hanaraka ireo fampianarany ny ohatra nasehony no valin-teny sasantsasany mety homen’ny mpianatra. Mba hahitana fanampiana hafa amin’ny famaliana io fanontaniana io, dia azonao atao ny mampijery ny mpianatra ny lahatsoratra hoe “How to Come unto Christ [Ahoana no hanatonana an’i Kristy]” nataon’ny Loholona Jeffrey R. Holland, izay hita ao amin’ny ChurchofJesusChrist.org.

Mariho fa ny Tompo dia milaza fa hasehony antsika ny fahalementsika raha manatona Azy isika.

• Nahoana no fitahiana ho antsika izany?

Ny teny hoe fahalemena ao amin’io andian-teny io dia manondro ny toetsika lavo, izay ahitana ny “zavatra malemy” eo amin’ny tsirairay sy ny tsy fahafahantsika ho tonga lafatra.

• Inona no ianaranao avy amin’ny Etera 12:27 momba ny antony itiavan’ny Mpamonjy ny hanekenao ny fahalemenao?

Ampio ny mpianatra hahatakatra fa ny fanekena amim-panetren-tena ny fahalementsika sy ny tsy fahatomombanantsika dia afaka mitarika antsika hiantso ny Raintsika any An-danitra hanome fanampiana masina. Amin’ny alalan’ny fahasoavany no ahafahan’ny Tompo mamadika fahalemena ho tanjaka. (Jereo ny 2 Korintiana 12:6–10; Etera 12:37.)

Azonao atao ihany koa ny mizara ny teny nataon-dRahalahy Douglas D. Holmes ao amin’ny fizaràna hoe “Fanazavana sy fampahalalana avy amin’ny zava-miseho”.

Asao ny mpianatra hisaintsaina amim-pahanginana raha nasehon’ Andriamanitra azy ireo ny fahalemen’izy ireo tato ho ato. Omeo toky izy ireo fa famantarana tsara izany fa manatona Azy izy ireo.

“Omeko ho an’ny olona ny fahalemena mba hahazoany mietry”

Mamakia ohatra sasantsasany momba ana olona ao amin’ny soratra masina izay nanaiky ny fahalemen’izy ireo:

• Etera 3:2: Ny rahalahin’i Jareda

• Môzià 4:2: Ny vahoakan’i Benjamina Mpanjaka

• Nanampy ireo olona ao amin’ireo tantara ireo hanetry tena tamin’ny fomba ahoana ny faneken’izy ireo ny fahalemen’izy ireo?

• Nahoana araka ny eritreritrao no tian’ny Tompo hanetry tena isika?

“Ampy ho an’ny olon-drehetra ny fahasoavako mba hanetreny tena eo anoloako”

• Inona araka ny eritreritrao ny dikan’ny hoe ampy ho an’ny olon-drehetra izay manetry tena eo anoloan’ny Mpamonjy ny fahasoavany?

Raha manahirana ny mpianatra ny mamaly ilay fanontaniana teo aloha, dia hevero ny hizara ity teny nambaran’ny Loholona Kevin S. Hamilton ity.

Nanazava toy izao ny Loholona Kevin S. Hamilton ao amin’ny Fitopololahy:

Loholona Kevin S. Hamilton

Ny fahasoavan’i [Jesoa Kristy] manohana sy mampahery dia manome hery antsika handresena ireo sakana rehetra sy ireo olana rehetra ary ireo fahalemena rehetra rehefa mikatsaka ny hiova isika.

Notanterahan’ny Mpamonjy ny Sorompanavotany tsy manam-petra sy mandrakizay mba hahafahantsika miova marina tokoa sy mibebaka ary mihatsara kokoa. Azo ateraka indray isika raha ny marina. Afaka mahatohitra ireo fahazarana sy fiankinan-doha isika, eny fa na dia ny “fironana hanao ratsy” aza [Môzià 5:2]. (Kevin S. Hamilton, “Hataoko tonga matanjaka ny zavatra malemy,” Liahona, mey 2022, 51–52)

Mariho ny fomba niainan’ny vahoakan’i Benjamina Mpanjaka ny fahasoavan’ny Tompo ao amin’ny Môzià 4:3.

• Iza ao amin’ny soratra masina ihany koa no naneho fa ampy hanampiana antsika handresy ireo fahalementsika ny fahasoavan’ny Mpamonjy?

Ohatra mety hozarain’ny mpianatra i Almà (jereo ny Môzià 27:24–29) sy ireo zanakalahin’i Môzià (jereo ny Môzià 28:4).

“Raha manetry tena eo anoloako izy ary manam-pinoana Ahy, amin’izany, ny zavatra malemy dia hataoko tonga matanjaka ho azy”

Nasongadin’ny Loholona Hamilton fa ny “zavatra malemy” ao amin’io andininy io dia mety hanondro ny fitondrantenantsika izay fahalemena.

Ny Loholona Kevin S. Hamilton

Na koa hoe, rehefa manova ireo toetra maha lavo antsika aloha isika, izany hoe ny fahalementsika, dia afaka hanova ireo fitondran-tenantsika isika, na ireo fahalementsika. (Kevin S. Hamilton, “Hataoko tonga matanjaka ny zavatra malemy,” Liahona, mey 2022, 51)

Mba hanampiana ny mpianatra hieritreritra ny zavatra nianaran’izy ireo androany, dia asao izy ireo hanao ny iray na izy roa amin’ireto sahanasa manaraka ireto ao amin’ny diary fandalinan’izy ireo.

1. Raketo an-tsoratra, ao anatina andiam-pehezanteny iray misy fehezanteny telo farafahakeliny, ny zavatra nianaranao sy tianao hotsarovana avy amin’io lesona io.

2. Farito, ao anatina andiam-pehezanteny iray misy fehezanteny telo farafahakeliny, ny fomba hampiharanao ny zavatra nianaranao androany.

Fanazavana sy fampahalalana avy amin’ny zava-miseho

Nahoana no fitahiana izany hoe asehon’ Andriamanitra ahy izany ny fahalemeko?

Nanazava toy izao ny Rahalahy Douglas D. Holmes, izay mpanolotsaina teo aloha tao amin’ny Fiadidian’ny Zatovolahy Maneran-tany:

Rahalahy Douglas D. Holmes

Mety ho tsy dia valisoa loatra amin’ny fahatongavana amin’ny fahalalana an’ Andriamanitra kokoa ny [fahitana ny tenantsika amina toetra lavo]. Moa ve isika tsy mila Andriamanitra izay manao izay hananantsika fahatsapana tsara momba ny tenantsika sy mampiorina antsika? Eny, saingy maniry ny hanana sy hanompo Andriamanitry ny fahamarinana ihany koa isika, Andriamanitra izay tsy mampiasa zavatra mamitaka fa zava-misy, Andriamanitra izay tsy manao zavatra ho mariky ny fahalalam-pomba fa amim-pahefana sy amim-boninahitra. Tsy hoe te hahafantatra fotsiny an’ Andriamanitra isika fa te ho tonga tahaka Azy, ary mandra-pahitantsika ny tenantsika amin’ny tena maha izy antsika, dia tsy afaka ny ho tonga amin’ny tena maha Izy Azy isika. (Douglas D. Holmes, “The Doctrine of Christ: Our Daily Walk [Ny fotopampianaran’i Kristy: Zavatra iainantsika isan’andro],” [Fampaherezam-panahy tao amin’ny Oniversiten’i Brigham Young, 17 jan, 2017], 3, speeches.byu.edu)

Ahoana raha manohy manao ilay fahadisoana aho?

Nanantitrantitra toy izao ny Loholona Dale G. Renlund ao amin’ny Kôlejin’ny Apôstôly Roambinifolo:

Loholona Dale G. Renlund

Na dia efa nibebaka tamin-kitsim-po aza isika dia mety mbola hanao fahadisoana ihany. Ny fanaovana fahadisoana dia tsy midika hoe tsy nahomby ilay fibebahana, fa mety maneho ny fahalemen’ny olombelona fotsiny. Mampahery tokoa ny mahafantatra fa “tsy mitovy ny fijerin’ny Tompo ny fahalemena sy ny fikomiana.” Tsy tokony hisalasala isika ny amin’ny fahafahan’ny Mpamonjy manampy antsika amin’ny fahalementsika satria “feno famindram-po mandrakariva [ny Tompo] rehefa miresaka mikasika ny fahalemena” [Richard G. Scott, “Herin’ny tena manokana avy amin’ny Sorompanavotan’i Jesoa Kristy,” Liahona, nôv. 2013, 83]. (Dale G. Renlund, “Ny toetranao araka an’ Andriamanitra sy ny anjaranao mandrakizay,” Liahona, mey 2022, 76)

Ireto horonan-tsary manaraka ireto dia maneho olona izay namadika fahalemena ho tanjaka tamin’ny alalan’ny fanampian’ny Tompo.

“Weak Things Become Strong [Tonga matanjaka ny zavatra malemy]” (1:32)

“Faith Murray’s Story: Overcoming Adversity through Service [Tantaran’i Faith Murray: Mandresy fahoriana amin’ny alalan’ny fanompoana]” (4:52)

“Wheelz: Overcoming Is Possible [Wheelz: Azo atao ny mandresy]” (7:13)

“With All Your Heart [Amin’ny fonao rehetra]” (3:26)

Sahanasa fianarana fanampiny

Ny fitahiana entin’ny fanatonana an’i Kristy

Manerana ny soratra masina, isika dia mahita ny fanasana hanatona an’i Kristy. Tranga iray amin’izany.ny ao amin’ny Etera 12:27. Raha toa ka hahazoan’ny mpianatra tombony ny fijerena tranga hafa amin’io fanasana sy ireo fitahiana nampanantenaina, dia azonao atao ny manasa ny mpianatra hizaha ny soratra masina hahitana ny andian-teny hoe “manatona an’i Kristy” na “manatona ahy” amin’ny alalan’ny fampiasana fanampiana amin’ny fandalinana soratra masina na ny fampiharana Médiathèque de l’Évangile. Rehefa mahita ireo fanasana izy ireo, dia azon’izy ireo atao ny mamantatra hoe fitahiana inona no tonga rehefa manatona an’i Kristy isika. Mety ho ao anatin’ny ohatra hitan’izy ireo ny Matio 11:28–30 sy ny 3 Nefia 9:14–15. Rehefa hitan’ny mpianatra ireo soratra masina dia azonao atao ny manao lisitra eny amin’ny solaitrabe ireo fitahiana sy manasa ny mpianatra hifanakalo hevitra momba ny fomba ilana ireo fitahiana ireo eo amin’ny fiainan’ny zatovo ankehitriny.

Ohatra amin’ny hoe atanjahin’i Kristy mba handresy fahalemena

I Mosesy sy i Enoka dia ohatra roa amin’ny olona izay namadika ny fahalemen’izy ireo ho tanjaka tamin’ny alalan’ny fanampian’ny Tompo. Azon’ny mpianatra atao ny mandalina ny iray amin’ireo ohatra ireo ao amin’ny andinin-tsoratra masina mifandray ain’izany. Rehefa mandalina izy ireo, dia asao hisaintsaina ny zavatra ampianarin’ireo tantara ireo momba ny hery sy fahafahan’ny Mpamonjy mamadika fahalemena ho tanjaka.

• Mosesy (Eksodosy 4:1, 10–12)

• Enôka (Mosesy 6:31–34)

Amporisiho ny mpianatra hijery tsara ireo valin-tenin’ny Mpamonjy tamin’i Mosesy sy i Enôka momba ny fahalemen’izy ireo. Avy eo dia azonao atao ny manontany hoe “Inona araka ny eritreritrao no holazain’ny Mpamonjy aminao momba ny fahalemenao?”