« ចំណេះចំណានខាងគោលលទ្ធិ ៖ អេធើរ ១២:២៧—ការយកឈ្នះលើភាពទន់ខ្សោយរបស់យើង » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ចំណេះចំណានខាងគោលលទ្ធិ ៖ អេធើរ ១២:២៧ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ចំណេះចំណានខាងគោលលទ្ធិ ៖ អេធើរ ១២:២៧
ការយកឈ្នះលើភាពទន់ខ្សោយរបស់យើង
នៅក្នុងការសិក្សារបស់អ្នកអំពី អេធើរ ១២:២៣–២៧ អ្នកបានរៀនថា ប្រសិនបើយើងបន្ទាបខ្លួន ហើយអនុវត្តសេចក្តីជំនឿលើព្រះអម្ចាស់ នោះទ្រង់អាចប្រែក្លាយភាពទន់ខ្សោយរបស់យើងទៅជាភាពខ្លាំងវិញ ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ អេធើរ ១២:២៧ ពន្យល់គោលលទ្ធិ និងអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្តែង ។
សូមផ្តល់ពេលវេលាឲ្យសិស្សអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ។សូមផ្តល់ការណែនាំច្បាស់លាស់ឲ្យសិស្ស ហើយបន្ទាប់មកផ្តល់ពេលវេលាឲ្យពួកគេអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ។ សូមអនុញ្ញាតឲ្យពួកគេស្វែងរកចម្លើយដោយខ្លួនឯង ។ សូមលើកទឹកចិត្តសិស្សឲ្យងាកទៅរកព្រះអម្ចាស់ ហើយទុកចិត្តលើទ្រង់ឲ្យអស់ពីចិត្ត ។
ការរៀបចំសិស្ស ៖ សូមអញ្ជើញសិស្សឲ្យព្យាយាមទន្ទេញ អេធើរ ១២:២៧ ។
សកម្មភាពរៀនសូត្រដែលអាចមាន
មេរៀនវគ្គបទគម្ពីរចំណេះចំណានខាងគោលលទ្ធិនេះត្រូវបានរៀបចំឡើងដើម្បីបង្រៀនបន្ទាប់ពីមេរៀន « អេធើរ ១២:២៣–២៧ » ដែលជាមេរៀនបរិបទសម្រាប់វគ្គបទគម្ពីរចំណេះចំណានខាងគោលលទ្ធិ អេធើរ ១២:២៧ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង សូមប្រាកដថា មេរៀនបរិបទដែលត្រូវគ្នានេះត្រូវបានបង្រៀននៅអំឡុងសប្តាហ៍នោះផងដែរ ។
ពន្យល់ និងទន្ទេញ
សូមដាក់សកម្មភាពដែលងាយស្រួលមួយឲ្យសិស្សធ្វើ ដើម្បីជួយពួកគេឲ្យពន្យល់ពីគោលលទ្ធិដែលបានបង្រៀននៅក្នុង អេធើរ ១២:២៧ ។ ខាងក្រោមនេះគឺជាសកម្មភាពមួយដែលអាចធ្វើបាន ។
ដោយមិនឲ្យមើលគម្ពីរ អេធើរ ១២:២៧ សូមសាកល្បងមើលថាតើអ្នកអាចបំពេញចន្លោះដែលបាត់ក្នុងប្រយោគនេះ ដោយផ្អែកលើការបង្រៀនរបស់ព្រះអម្ចាស់ទៅដល់មរ៉ូណៃបានដែរឬទេ ៖
-
ប្រសិនបើខ្ញុំ និង នោះព្រះយេស៊ូវគ្រីស្ទនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែវិញសម្រាប់ខ្ញុំ ។
-
តើអ្នកគិតថា មានអ្វីទៅដែលសំខាន់ដែលមនុស្សម្នាក់ត្រូវចងចាំអំពីប្រយោគនេះ ?
សូមជួយសិស្សឲ្យរៀនទន្ទេញសេចក្ដីយោង និងឃ្លាបទគម្ពីរគន្លឹះ ។ សិស្សអាចធ្វើដូចខាងក្រោមនេះជាដៃគូ ឬជាក្រុមតូចៗ ។ សូមពិចារណាកំណត់ពេលវេលាមួយ ដើម្បីធ្វើឲ្យប្រាកដថា សិស្សមានពេលគ្រប់គ្រាន់ដើម្បីអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងផ្នែក « ការអនុវត្តជាក់ស្តែង » នៃមេរៀននេះ ។
ដើម្បីជួយអ្នកឲ្យទន្ទេញចាំទាំងសេចក្តីយោង និងឃ្លាបទគម្ពីរគន្លឹះ សូមរំឭកវាទាំងពីរឡើងវិញឲ្យបានពីរបីដង ហើយបន្ទាប់មកព្យាយាមសរសេរវាចេញពីការចងចាំនៅក្នុងសៀវភៅកំណត់ហេតុការសិក្សារបស់អ្នក ។
អេធើរ ១២:២៧ ៖ « ហើយបើសិនជាមនុស្សលោកមករកយើង … នោះយើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ។
សូមប្រៀបធៀបអ្វីដែលអ្នកបានសរសេរចេញពីការចងចាំជាមួយនឹងសេចក្តីយោង និងឃ្លាបទគម្ពីរគន្លឹះខាងលើ ហើយធ្វើការកែតម្រូវដែលចាំបាច់ ។ សូមព្យាយាមសរសេរសេចក្តីយោង និងឃ្លាបទគម្ពីរគន្លឹះឲ្យបានបី ឬបួនដងទៀត ឬរហូតដល់អ្នកអាចសរសេរវាចេញមកពីការចងចាំ ។
ការអនុវត្តជាក់ស្តែង
សូមផ្តល់ឱកាសឲ្យសិស្សពិនិត្យមើលគោលការណ៍នៃការទទួលបានចំណេះដឹងខាងវិញ្ញាណឡើងវិញ ។ សូមពិចារណាអញ្ជើញសិស្សបីនាក់ឲ្យសរសេរគោលការណ៍មួយនៃការទទួលបានចំណេះដឹងខាងវិញ្ញាណដាក់នៅលើក្ដារខៀន ។ សូមអញ្ជើញសិស្សបន្ថែមទៀតឲ្យសរសេរការពន្យល់នៅជាប់នឹងគោលការណ៍នីមួយៗចេញពីការចងចាំ ។ សូមផ្តល់ពេលពីរបីនាទីឲ្យសិស្សពិនិត្យមើលគោលការណ៍ទាំងនេះនៅក្នុង កថាខណ្ឌទី ៥–១២ នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ហើយបន្ថែមព័ត៌មានលម្អិតដែលពួកគេអាចនឹងភ្លេច ។
សកម្មភាពខាងក្រោមនេះមានគោលបំណងជួយសិស្សឲ្យអនុវត្តគោលការណ៍ទាំងឡាយនៃការទទួលបានចំណេះដឹងខាងវិញ្ញាណទៅនឹងភាពទន់ខ្សោយដែលពាក់ព័ន្ធមួយ ។ សិស្សអាចបំពេញសកម្មភាពនេះលើកដំបូងជាក្រុមតូចៗ ឬជាថ្នាក់ទាំងមូល ។ បន្ទាប់មក សិស្សអាចធ្វើសកម្មភាពនេះឡើងវិញជាលក្ខណៈបុគ្គលសម្រាប់ភាពទន់ខ្សោយផ្សេង ឬសម្រាប់ភាពទន់ខ្សោយផ្ទាល់ខ្លួនជាច្រើនទៀត ។
ប្រសិនបើអ្នកចូលចិត្តប្រើសាច់រឿង សូមមើលយោបល់ណែនាំនៅក្នុងផ្នែក « សកម្មភាពរៀនសូត្របន្ថែម » នៃមេរៀននេះ ។
-
នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីភាពទន់ខ្សោយមួយចំនួនដែលអាចបណ្តាលឲ្យយុវវ័យម្នាក់មានអារម្មណ៍ថា គ្មានសមត្ថភាព ឬមិនគ្រប់គ្រាន់ ។
-
សូមជ្រើសរើសភាពទន់ខ្សោយមួយក្នុងចំណោមភាពទន់ខ្សោយទាំងនេះ ដែលអ្នកគិតថាពាក់ព័ន្ធសម្រាប់យុវវ័យជាច្រើន ហើយកត់ត្រាពីរបៀបដែលយុវវ័យម្នាក់អាចអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ដើម្បីយកឈ្នះលើភាពទន់ខ្សោយនេះបាន ។
-
របៀបមួយដើម្បីធ្វើការណ៍នេះបាន អាចជាការសរសេរអំពីគោលការណ៍នីមួយៗនៃការទទួលបានចំណេះដឹងខាងវិញ្ញាណនៅក្នុងសៀវភៅកំណត់ហេតុការសិក្សារបស់អ្នក នៅក្រោមភាពទន់ខ្សោយដែលអ្នកបានជ្រើសរើសដើម្បីផ្តោតលើ ។ បន្ទាប់មក អ្នកអាចសរសេរគោលការណ៍នីមួយៗនៅខាងក្រោមអំពីរបៀបដែលគោលការណ៍នីមួយៗអាចអនុវត្តបានចំពោះភាពទន់ខ្សោយ ឬអ្នកអាចកត់ត្រាសំណួរដែលនរណាម្នាក់អាចសួរអំពីគោលការណ៍នេះ ។
អ្នកអាចបង្ហាញឧទាហរណ៍ខាងក្រោមនេះដល់សិស្សបាន ។ ការធ្វើបែបនេះអាចជួយដល់ពួកគេ នៅពេលពួកគេអនុវត្តកិច្ចការនេះផ្ទាល់ខ្លួន ។
ឧទាហរណ៍ ប្រសិនបើអ្នកត្រូវជ្រើសរើសភាពទន់ខ្សោយ ឬបញ្ហាបារម្ភមួយ ដូចជា « យុវវ័យចំណាយពេលលេងទូរសព្ទច្រើនពេក » នោះការសរសេរចូលទៅក្នុងសៀវភៅកំណត់ហេតុរបស់អ្នកអាចមើលទៅដូចខាងក្រោមនេះ ៖
យុវវ័យចំណាយពេលលេងទូរសព្ទច្រើនពេក
ធ្វើសកម្មភាពដោយសេចក្ដីជំនឿ
-
ប្រហែលជាអ្នកដែលពិបាកនឹងការធ្វើបែបនេះអាចអធិស្ឋានសូមជំនួយជាក់លាក់បន្ថែមទៀតចំពោះបញ្ហានេះ ។ មុនពេលអធិស្ឋាន ពួកគេអាចជញ្ជឹងគិតអំពីជំនួយអ្វីដែលពួកគេត្រូវការសម្រាប់ថ្ងៃនោះ ។ ពួកគេប្រហែលជាអាចអធិស្ឋានមុនពេលពួកគេប្រើទូរសព្ទរបស់ពួកគេ ។
-
ព្រះបានប្រទានបច្ចេកវិទ្យាឲ្យយើងដើម្បីប្រទានពរដល់ជីវិតរបស់យើង និងដើម្បីជួយយើង និងអ្នកដទៃឲ្យកាន់តែមានភាពជិតស្និទ្ធជាមួយទ្រង់ តើយើងអាចប្រើប្រាស់វាតាមរបៀបនេះបានដោយរបៀបណា ?
-
អេធើរ ១២:២៧ ៖ តើយើងអាចបង្ហាញព្រះអម្ចាស់ដោយរបៀបណា ថាយើងមានចិត្តរាបទាប ទុកចិត្តលើទ្រង់ ហើយត្រូវការជំនួយរបស់ទ្រង់ដើម្បីកែលម្អចំណុចនេះ ?
ទស្សនវិស័យដ៏អស់កល្បជានិច្ច
-
ប្រសិនបើនរណាម្នាក់មិនយកឈ្នះលើរឿងនេះទេ តើវានឹងប៉ះពាល់ដល់ទំនាក់ទំនង និងការងារនាពេលអនាគត ព្រមទាំងភាពអស់កល្បរបស់ពួកគេយ៉ាងដូចម្ដេច ?
-
តើខ្ញុំដឹងអ្វីខ្លះអំពីព្រះ និងបទដ្ឋានរបស់ទ្រង់ ? ហេតុអ្វីបានជាការប្រើប្រាស់បច្ចេកវិទ្យារបស់យើងមានសារៈសំខាន់ចំពោះទ្រង់ ?
ប្រភពដែលបានតែងតាំងដ៏ទេវភាព
-
ខ្ញុំដឹងថា ប៊ីស្សពរបស់ខ្ញុំបាននិយាយអំពីរឿងនេះ ហើយខ្ញុំចាំថា គាត់និយាយអំពីអ្វីដែលគាត់បានធ្វើ ។ ខ្ញុំនឹងសួរគាត់ថា តើធនធានអ្វីដែលគាត់បានប្រើប្រាស់ និងអ្វីខ្លះដែលបានជួយដល់គាត់ ។
នៅពេលអ្នកបានបញ្ចប់ហើយ សូមបំពេញសកម្មភាពពីមុនម្តងទៀត ។ នៅលើកនេះ សូមផ្តោតលើភាពទន់ខ្សោយជាក់លាក់មួយដែលអ្នកចង់ឲ្យទ្រង់ជួយ ។ អ្នកនឹងពុំត្រូវបានសុំឲ្យចែកចាយពីរឿងនេះជាមួយអ្នកដទៃឡើយ ។
សូមពិចារណាទុកពេលឲ្យសិស្សពិចារណាពីបទពិសោធន៍របស់ពួកគេ ហើយចែកចាយអ្វីដែលពួកគេបានរៀនមកពីសកម្មភាពនៅថ្ងៃនេះ ។ សូមថ្លែងទីបន្ទាល់អំពីព្រះចេស្ដា និងសេចក្តីប្រាថ្នារបស់ព្រះអង្គសង្គ្រោះដើម្បីជួយកែលម្អ និងប្រែក្លាយពួកយើងឲ្យកាន់តែដូចទ្រង់ ។
ការរំឭកចំណេះចំណានខាងគោលលទ្ធិ
សូមប្រើសកម្មភាពរំឭកឡើងវិញខាងក្រោមនេះនៅក្នុងមេរៀនដែលអ្នកនឹងបង្រៀនភ្លាមៗបន្ទាប់ពីមេរៀននេះ ។
សូមសួរសិស្សថា តើពួកគេអាចចងចាំឃ្លាបទគម្ពីរគន្លឹះអំពី អេធើរ ១២:២៧ ឬអត់ ។ នៅក្នុងថ្នាក់រៀន សូមសូត្រឡើងវិញនូវសេចក្ដីយោងបទគម្ពីរ និងឃ្លាបទគម្ពីរគន្លឹះ « អេធើរ ១២:២៧ ៖ ហើយបើសិនជាមនុស្សលោកមករកយើង … នោះយើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ឲ្យបានពីរបីដង ។