Ethëri 12:28–41

Jezu Krishti: “Burimi i të Gjithë Drejtësisë”

Në varësi të asaj që kërkojmë, ne mund të gjejmë shumë të mira ose shumë të këqija në botë. Pasi mësoi për shkatërrimin e jareditëve dhe dëshmoi shkatërrimin e nefitëve, Moroni iu përgjërua të gjithë lexuesve të tij ta kërkonin Jezu Krishtin dhe bekimet që Ai ka për të ofruar. Ky mësim mund të të ndihmojë të ndiesh një dëshirë më të madhe për ta kërkuar Jezu Krishtin në jetën tënde.

Ndihmojini nxënësit t’i dallojnë bekimet e Zotit në jetën e tyre. Krahas dhënies mësim të fakteve rreth Jezu Krishtit, jepuni nxënësve mundësi për të reflektuar mbi dashurinë, fuqinë dhe mëshirën e Tij. Nxitini ata t’i kujtojnë përvojat kur e kanë ndier fuqinë dhe mëshirën e Shpëtimtarit të shtrihet tek ata ose njerëzit që ata i duan. Bërja e kësaj mund t’i ndihmojë nxënësit të vijnë te Jezu Krishti në mënyrë më të plotë.

Përgatitja e nxënësve: Merreni parasysh t’u jepni nxënësve një kopje të materialit të përvojës së Plakut Melvin J. Ballard, që është e përfshirë në këtë mësim. Ftojini ata të vijnë të përgatitur për të treguar se çfarë mësuan dhe ndien rreth Jezu Krishtit nëpërmjet leximit të përvojës së Plakut Ballard.

Veprimtari të Mundshme të të Mësuarit

Burime

Merreni parasysh ta paraqitni përkufizimin dhe figurën vijuese.

Një burim përkufizohet si “burimi nga i cili del ose furnizohet diçka”, për shembull, “një burim uji që buron nga toka” (Merriam-Webster.com Dictionary, “burim”).

• Nëse do të kishe mundësi të përdorje një burim mrekullibërës që do të të furnizonte me një fluks të vazhdueshëm të gjithçkaje që do të zgjidhje, çfarë do të doje që të prodhonte?

Vizato një figurë të shpejtë të një burimi që prodhon atë që zgjodhe dhe shpjegoje shkurtimisht se përse do ta doje atë.

Merreni parasysh t’i ftoni disa nxënës t’i tregojnë shkurtimisht vizatimet e tyre.

Lexoje vargun tek Ethëri 12:28, duke kërkuar burimin të cilit iu referua Zoti pasi i dha mësim Moronit rreth aftësisë së Tij për t’i kthyer dobësitë tona në pika të forta.

• Cili është burimi të cilit iu referua Zoti?

• Çfarë të mëson ky varg rreth mënyrës se si ne vijmë te Krishti?

Një e vërtetë që na mëson ky varg është se besimi, shpresa dhe dashuria hyjnore na sjellin te Jezu Krishti, Burimi i të Gjithë Drejtësisë.

• Përse është “Burimi [i] të Gjithë Drejtësisë” një titull i mirë për Jezu Krishtin?

• Çfarë mendon ose ndien se buron vazhdimisht prej Tij?

• Si mendon se zhvillimi i besimit, shpresës dhe dashurisë hyjnore na sjell te Jezusi?

Për veprimtarinë vijuese të sugjeruar, merreni parasysh t’i vendosni nxënësit në grupe me nga tre veta. Ftojeni secilin person të mendojë dhe t’ia tregojë grupit të tij një shembull.

Renditi disa nga shembujt që e ilustrojnë mënyrën se si Shpëtimtari është Burimi i të Gjithë Drejtësisë. Këta shembuj mund të vijnë nga shkrimet e shenjta, nga jeta jote ose nga jeta e njerëzve që ti njeh. Nëse ke nevojë për ndihmë për të menduar për një shembull, mund të lexosh rrëfimin e Shpëtimtarit te Marku 2:1–12 ose të shikosh materialin filmik “Jesus Forgives Sins and Heals a Man Stricken with Palsy” [“Jezusi Fal Mëkatet dhe Shëron Një Njeri të Goditur nga Paraliza”] (2:57).

Përsiat se si këta shembuj ndikojnë në ndjenjat e tua ndaj Jezu Krishtit. Mendo për dëshirën tënde të tanishme për të ardhur te Jezu Krishti dhe për të marrë pjesë në drejtësinë që vjen prej Tij. A është dëshira jote aq e fortë sa do të doje të ishte? Përse po ose përse jo?

Ndërsa vazhdon të studiosh, kërko të vërteta rreth Jezu Krishtit që mund të ndikojnë në mënyrë pozitive në dëshirën dhe aftësinë tënde për të ardhur tek Ai dhe për të marrë pjesë në drejtësinë që ofron Ai.

Dhuratat që burojnë nga Krishti

Lexo tek Ethëri 12:29–37, duke kërkuar bekimet që u ofron Jezu Krishti atyre që vijnë tek Ai me besim, shpresë dhe dashuri hyjnore.

• Çfarë bekimesh tha Moroni se vijnë nga kërkimi i Jezusit?

• Cilin prej këtyre bekimeve ke përjetuar ti ose të tjerët ndërsa e ke kërkuar Shpëtimtarin?

• Cilin prej këtyre bekimeve e pret me shumë padurim për ta marrë në të ardhmen? Përse?

Kërko Jezusin

Në fund të kapitullit tek Ethëri 12, Moroni tregoi një përvojë të shenjtë që pati. Lexo vargun 39 dhe përpiqu të imagjinosh se si mund të ketë qenë ajo përvojë për Moronin.

Lexoje dhe merre parasysh ta shenjosh ftesën e Moronit te vargu 41.

• Pasi pati përvojën që ai e përshkroi te vargu 39, përse mendon se Moroni do të na e ofronte këtë ftesë?

Ashtu si Moroni, Plaku Melvin J. Ballard (1873–1939), i Kuorumit të Dymbëdhjetë Apostujve, pati një përvojë të shenjtë me Shpëtimtarin. Lexoje përshkrimin e tij të kësaj përvoje dhe provo sërish ta imagjinosh se si duhet të ketë qenë.

“E gjeta veten time një mbrëmje në ëndrrat e natës në atë ndërtesë të shenjtë, tempullin. Pas një periudhe lutjesh dhe gëzimi, më informuan se duhet të kem privilegjin të hyj në njërën nga ato dhoma, për të takuar një personazh të lavdishëm dhe, ndërsa hyra në dhomë, pashë, të ulur mbi një platformë të ngritur, qenien më të lavdishme që kishin soditur ndonjëherë sytë e mi ose që kisha imagjinuar ndonjëherë të ekzistonte në të gjitha botët e përjetshme.

Ndërsa iu afrova që të njiheshim, Ai u ngrit dhe eci drejt meje me krahët të shtrirë dhe më buzëqeshi ndërsa e tha butësisht emrin tim. Edhe sikur të jetoj një milion vjet, nuk do ta harroj kurrë atë buzëqeshje. Ai më mori në krahët e Tij dhe më puthi, më shtrëngoi pas kraharorit të Tij dhe më bekoi, derisa u duk sikur palca e kockave të mia po shkrinte! Pasi Ai përfundoi, rashë te këmbët e Tij dhe, ndërsa i lava me lotët dhe puthjet e mia, pashë shenjat e gozhdëve në këmbët e Shëlbuesit të botës. Ndjenja që pata në praninë e Atij që i ka të gjitha gjërat në duart e Tij, të të pasurit të dashurisë së Tij, përzemërsisë së Tij dhe bekimeve të Tij ishte e tillë që, nëse mund të marr atë për të cilën pata vetëm një parashikim, do ta jepja gjithçka që jam, gjithçka që shpresoj të jem ndonjëherë, për të ndier atë që ndjeva atëherë!

… E shoh Jezusin jo tani mbi kryq. Nuk e shoh ballin e Tij të shpuar me gjemba, as duart e Tij të copëtuara nga gozhdët, por e shoh Atë duke buzëqeshur, me krahët e shtrirë, duke na thënë ne të gjithëve: ‘Ejani tek unë!’” (Melvin J. Ballard, “I Know That He Lives”, Ensign, dhjetor 2014, f. 80)

• Çfarë të bëri përshtypje më shumë nga përvoja e Plakut Ballard? Përse?

• Çfarë mendimesh ose ndjenjash rreth Shpëtimtarit të sjellin në mend përvojat e Plakut Ballard dhe të Moronit?

Për ta përmbyllur mësimin, merreni parasysh t’u jepni nxënësve ftesën vijuese. Mund të jetë e dobishme të tregoni rreth dëshirave tuaja vetjake për të kërkuar Jezu Krishtin dhe bekimet që kanë ardhur ndërsa e keni kërkuar Atë.

Përsiat për atë që ke mësuar dhe ndier sot. Çfarë ndikoi më shumë në dëshirën tënde për ta kërkuar Jezusin në jetën tënde? Zotohu të veprosh sipas ndonjërës prej nxitjeve ose mbresave që ke pasur.

Komente dhe Informacion për Rrethanat

Çfarë është dashuria hyjnore?

Plaku Marvin J. Ashton (1915–1994), i Kuorumit të Dymbëdhjetë Apostujve, dha mësim:

“Dashuri hyjnore e vërtetë nuk është diçka që e dhuroni; ajo është diçka që e fitoni dhe e bëni pjesë të vetes. Dhe kur virtyti i dashurisë hyjnore rrënjoset në zemrën tuaj, atëherë nuk jeni më i njëjti njeri. …

Ndoshta dashuria hyjnore më e madhe vjen kur jemi të sjellshëm me njëri-tjetrin, kur nuk e gjykojmë apo kategorizojmë dikë tjetër, kur thjesht i besojmë për mirë njëri-tjetrit apo qëndrojmë të heshtur. Dashuria hyjnore është pranimi i ndryshimeve, dobësive dhe mangësive të dikujt; të qenit i duruar me dikë që na ka zhgënjyer; ose qëndresa ndaj shtysave për t’u ndier të fyer kur dikush nuk e trajton diçka ashtu si mund të kishim shpresuar. Dashuria hyjnore është të mos pranosh të përfitosh nga dobësia e një tjetri dhe të qenit të gatshëm për ta falur dikë që na ka prekur. Dashuri hyjnore do të thotë të shpresojmë më të mirën për njëri-tjetrin.” (Marvin J. Ashton, “The Tongue Can Be a Sharp Sword”, Ensign, maj 1992, f. 19)

Ethëri 12:41. Si mund ta kërkoj Jezusin dhe çfarë bekimesh mund të vijnë ndërsa e bëj këtë?

Presidenti Rasëll M. Nelson premtoi:

“Nëse vazhdoni të mësoni gjithçka mundeni rreth Jezu Krishtit, ju premtoj se … do të shtohet edhe aftësia juaj për t’u larguar nga mëkati. Dëshira juaj për t’i mbajtur urdhërimet do të ngrihet në qiell.” (Rasëll M. Nelson, “Profetët, Udhëheqja dhe Ligji Hyjnor” [takimi shpirtëror mbarëbotëror për të rinjtë në moshë madhore, 8 janar 2017], broadcasts.ChurchofJesusChrist.org)

Shiko materialin filmik “Wise Men Still Seek Him” [“Njerëzit e Mençur Ende e Kërkojnë Atë”] (3:31) ose “Seek, and Ye Shall Find” [“Kërkoni dhe Do Të Gjeni”] nga kodi kohor 13:59 deri në 15:16 për të parë disa shembuj që mund të ndihmojnë për t’iu përgjigjur kësaj pyetjeje.

Veprimtari Plotësuese të të Mësuarit

Ethëri 12:36–38. Gjykimi i Zotit

Ethëri 12:36–38 reflekton për të vërtetën vijuese: Zoti nuk do të na bëjë përgjegjës për ligësinë e atyre që na rrethojnë. Ai do të na gjykojë në bazë të dëshirave dhe veprave tona vetjake. Nëse nxënësit mund të kenë dobi nga të kuptuarit më mirë të kësaj të vërtete, merreni parasysh t’u tregoni sa vijon.

Hajrëm Smithi, pasi e burgosën padrejtësisht në burgun e Karthixhit, e hapi faqen tek Ethëri 12 në kopjen që kishe të Librit të Mormonit. Ai dhe vëllai i tij, Profeti Jozef Smith, do të martirizoheshin së shpejti në atë qeli për bindjet e tyre. Pak para martirizimit të tyre, Hajrëmi lexoi vargjet 36–38 (shihni te Doktrina e Besëlidhje 135:4–5). Ftojini nxënësit të lexojnë me kujdes tek Ethëri 12:36–38, duke kërkuar prova për të vërtetën e sipërme të theksuar me ngjyrë të zezë. Merreni parasysh të bëni pyetje si ato në vijim:

• Si mendoni, çfarë kuptimi mund të kenë pasur vargjet 36–38 për Hajrëmin në atë kohë?

• Cilat janë disa rrethana me të cilat jeni përballur ose mund të përballeni, në të cilat të vërtetat në këto vargje do të ishin të dobishme?

• Çfarë ju ndihmojnë këto vargje të kuptoni rreth Atit Qiellor dhe Jezu Krishtit? Përse ato të vërteta janë të rëndësishme për ju?

Karakteri i Krishtit

Nxënësit mund të kenë dobi duke u përqendruar më shumë në karakteristikat e Jezu Krishtit tek Ethëri 12:29–41. Pasi ta përcaktoni tek Ethëri 12:28 titullin e Shpëtimtarit “Burimi [i] të Gjithë Drejtësisë”, ftojini nxënësit ta shkruajnë këtë titull në mes të një letre. Përreth tij ata mund të renditin se çfarë mësojnë nga ky titull rreth karakterit të Krishtit.

Ftojini ata të lexojnë tek Ethëri 12:29–41, të përcaktojnë karakteristika shtesë të Shpëtimtarit dhe t’i shtojnë ato në listat e tyre. Për shembull, ata mund të vënë re tek Ethëri 12:29 se si Shpëtimtari na ngushëllon dhe se vullneti i Tij është gjithmonë i drejtë. Mund të jetë gjithashtu e dobishme të vini në dukje mësimin e Moronit se dashuria që Ati Qiellor dhe Jezu Krishti kanë për ne është dashuri hyjnore (shihni tek Ethëri 12:32–34). Pasi nxënësit t’i kenë përfunduar listat e tyre, ftojini ata të kërkojnë ndihmën e Zotit për ta zhvilluar vetë njërën prej këtyre karakteristikave.