Մորոնի 2–3

Քահանայության իշխանություն

Աստծո կողմից տրված իրական քահանայության իշխանությունը կարևոր է Փրկչի Եկեղեցում: Ապագա սերունդներին ուղղված իր վերջին խոսքերում Մորոնին ուսուցանել է քահանայության արարողությունները կատարելու իշխանության մասին: Դրանով նա պահպանեց կարևոր ճշմարտություններ այն մասին, թե ինչպես է օգտագործվում քահանայությունը: Այս դասը կօգնի ձեզ հասկանալ քահանայության իշխանությունը Փրկչի Եկեղեցում:

Օգնեք ուսանողներին կենտրոնանալ Հիսուս Քրիստոսի վրա։ Խորհեք, թե ինչպես են սուրբ գրություններն ուսուցանում սկզբունքներ, որոնք օգնում են մեզ ավելի լավ հասկանալ Փրկչին: Ուսանողներին առաջարկեք փնտրել, թե ինչ կարող են սովորել Հիսուս Քրիստոսի զորության, ողորմության և ազդեցության մասին ավետարանի սկզբունքներից, որոնք նրանք բացահայտում են սուրբ գրություններում:

Ուսանողի նախապատրաստում․ կարող եք առաջարկել ուսանողներին խոսել քահանայություն կրող մարդու կամ մեկ այլ մարդու հետ, որը ծառայում է Եկեղեցու կոչումներում: Ուսանողները կարող են հարցնել այդ մարդուն, թե նա ինչ զգացումեր ունի իր պարտականությունները կատարելու համար Փրկչի իշխանությունը ստանալու վերաբերյալ։

Հնարավոր ուսումնական վարժություններ

Դասից առաջ թաքցրեք այն առարկաները, որոնք ձեզ անհրաժեշտ են դասի ընթացքում, օրինակ՝ կավիճը, մարկերները կամ ձեր սուրբ գրությունները: Ուսանողներին առաջարկեք գտնել առարկան և հարցրեք, թե ինչու է այն անհրաժեշտ դասի համար:

Հիշեցրեք ուսանողներին, որ շատ պարզ և արժեքավոր ճշմարտություններ կորսվել են Մեծ ուրացության ժամանակ (տես 1 Նեփի 13.26–27, 32): Մորոնիի գրվածքներն ուսուցանում են Փրկչի Եկեղեցու կազմակերպման մասին կարևոր ճշմարտություններ, որոնք կորսվել են ուրացության ժամանակ:

«Արժեք»

Մորոնին իր տնտեսության քահանայություն վերջին կրողներից էր Ամերիկա մայրցամաքում: Նա գիտեր, որ իր մահից հետո Փրկչի Եկեղեցու և Նրա քահանայության իշխանության մասին կարևոր գիտելիքները կկորսվեն: Իր վերջին խոսքերում Մորոնին գրեց այն, ինչն իր կարծիքով կարող էր «արժեքավոր լինել» ապագա սերունդների համար (Մորոնի 1.4): Նա գրել է քահանայության իշխանության և արարողությունների մասին, որոնք հասանելի են միայն Փրկչի Եկեղեցում:

Երբ հարություն առած Փրկիչն այցելեց նեփիացիներին, «նա իր ձեռքով դիպավ իր ընտրած աշակերտներին» և «նրանց Սուրբ Հոգու պարգևը շնորհելու զորություն տվեց» (3 Նեփի 18.36–37): Մորոնին իր հիշատակարանում ներառեց տասներկու նեփիացի աշակերտներին ուղղված Փրկչի ցուցումներն այն մասին, թե ինչպես շնորհել Սուրբ Հոգու պարգևը:

Ուսանողների համագործակցությունը բարելավելու համար առաջարկեք նրանց դասընկերոջ հետ կամ փոքր խմբերով աշխատել հետևյալ վարժությունը կատարելու վրա: Ուսանողները կարող են ուսումնասիրել Մորոնի 2 կամ 3 գլուխները, այնուհետև կիսվել իրենց սովորածով որևէ մեկի հետ, ով այլ գլուխ է ուսումնասիրել: Ուսանողների ուսումնասիրությունն ուղղորդելու համար նրանց կարող են տրվել հետևյալ տեղեկությունները։

Սուրբ Հոգու պարգևը շնորհելու իշխանություն

Կարդացեք Մորոնի 2.1–3 հատվածները՝ փնտրելով, թե ինչ արժեքավոր բան է ուսուցանել Մորոնին:

• Ի՞նչ գտաք այս հատվածներում, որն ըստ ձեզ արժեքավոր է:

• Ըստ ձեր իմացածի, քահանայության ինչպիսի՞ իշխանություն է անհրաժեշտ՝ Սուրբ Հոգու պարգևը շնորհելու համար:

• Ի՞նչ ճշմարտություններ կարող ենք սովորել Մորոնի 2 գլխից։

Ճշմարտություններից մեկն այն է, որ Մելքիսեդեկյան քահանայություն կրողները Սուրբ Հոգու պարգևը Եկեղեցու մկրտված անդամներին շնորհում են ձեռնադրումով։

• Ըստ ձեզ, ինչո՞ւ է Սուրբ Հոգու շնորհումն այդքան կարևոր: (Դա ցույց տվող պատմությունը կարող եք կարդալ Գործք Առաքելոց 8.14–24 հատվածներում):

• Իմացությունը, որ Սուրբ Հոգու պարգևը շնորհելու իշխանությունը գալիս է Փրկչից, ինչպե՞ս կարող է ազդել այս պարգևի վերաբերյալ ձեր զգացմունքների վրա:

• Սուրբ Հոգու պարգևն ինչպե՞ս է օրհնել ձեր կյանքը։

Կարգել մարդկանց քահանայության պաշտոններում

Այնուհետև Մորոնին բացատրեց, թե ինչպես կարգել քահանաներին և ուսուցիչներին:

Կարդացեք Մորոնի 3.1–4 հատվածները՝ փնտրելով, թե մարդիկ ինչպես են կարգվում քահանայության պաշտոններում:

• Ի՞նչ նկատեցիք քահանայության պաշտոններում մարդկանց կարգման վերաբերյալ։

Ուսանողները կարող են կարդալ և միմյանց կապել Հավատո Հանգանակ 1․5 հատվածը և Մորոնի 3 գլուխը։

Թեև Մորոնին 3 գլխում հատուկ նշվում է քահանայության պաշտոնների և ուսուցիչների կարգման մասին, իշխանությունը վերաբերում է նաև բոլոր նրանց, ովքեր կոչումներ ունեն Փրկչի Եկեղեցում:

• Ինչո՞ւ է անհրաժեշտ, որ Փրկչի Եկեղեցում ծառայող մարդիկ ունենան Նրա իշխանությունը:

Եթե հնարավոր է, քահանայության իշխանության գիծը բերեք դասարան։

Քահանայության իշխանությունը գալիս է Հիսուս Քրիստոսից: Բոլոր նրանք, ովքեր կոչումներ ունեն Եկեղեցում, ունեն քահանայության իշխանություն, և նրանք, ովքեր կարգվել են Ահարոնյան կամ Մելքիսեդեկյան քահանայության պաշտոններում, ունեն քահանայության իշխանության գիծ: Այս գիծը հետագծում է քահանայություն կրողի իշխանությունը մինչև Հիսուս Քրիստոսը: Մելքիսեդեկյան քահանայություն կրողներն իրենց իշխանության գծի գրառման վերաբերյալ կարող են հարցում կատարել ChurchofJesusChrist.org կայքում։ Եկեղեցին Ահարոնյան քահանայություն կրողների համար իշխանության գծերի գրառումներ չի տրամադրում: Այնուամենայնիվ, եթե Ահարոնյան քահանայություն կրողը ձեռնադրվել է Մելքիսեդեկյան քահանայություն կրողի կողմից, նա կարող է իմանալ իրեն կարգած մարդու իշխանության գծի մասին:

Տասներկու Առաքյալների Քվորումից երեց Ջեֆրի Ռ. Հոլլանդը բացատրել է.

Աստվածային իշխանությամբ գործելը պահանջում է ավելին, քան պարզապես հասարակական համաձայնագիր: Այն չի կարող առաջանալ աստվածաբանական ուսուցումից կամ համայնքի կողմից լիազորությամբ: Ոչ, Աստծո լիազորված աշխատանքում պետք է լինի ավելի մեծ զորություն, քան այն, ինչ ունեն մարդիկ եկեղեցու նստատեղերում կամ փողոցներում կամ սեմինարիաներում՝ մի փաստ, որը շատ ազնիվ կրոնական հետազոտողներ գիտեին և բացեիբաց ընդունում էին սերունդների ընթացքում, որը հանգեցրեց Վերականգնմանը: …

… [Եկեղեցում յուրաքանչյուր քահանայություն կրողի քահանայության իշխանության գիծը] շարունակական շղթայով ձգվում է դեպի հրեշտակային սպասավորներ, որոնք եկել են Աստծո Որդու կողմից՝ կրելով այս անզուգական պարգևը երկնքից: (Ջեֆրի Ռ. Հոլլանդ, «“Our Most Distinguishing Feature», Լիահոնա, մայիս 2005 թ․, 44)

Կարող եք ուսանողներին մի շղթա ցույց տալ: Բացատրեք, որ շղթայի առաջին օղակը ներկայացնում է Հիսուս Քրիստոսին, իսկ երկրորդ օղակը՝ նրանց, ում Նա կարգել է քահանայության: Երրորդ օղակը ներկայացնում է նրանց, ում ձեռնադրել են քահանայության և այդպես շարունակ՝ սերնդե սերունդ, մինչև մեր օրերում քահանայություն կրողները, որոնք ներկայացված են շղթայի վերջին օղակով:

• Ինչո՞ւ է կարևոր, որ քահանայության իշխանությունը կարող է հետագծվել մինչև Հիսուս Քրիստոսը:

• Հիսուս Քրիստոսի հետ այս կապի մասին իմանալն ինչպե՞ս կարող է ազդել քահանայության միջոցով ձեր ստացած արարողությունների, կոչումների կամ օրհնությունների վերաբերյալ ձեր զգացողության վրա։

Ուսանողները կարող են կիսվել դասին պատրաստվելու վերաբերյալ:

Ուսանողները կարող են նաև վերանայել Մորոնի 2 և 3 գլուխները՝ փնտրելով նմանություններ գլուխների միջև և ներկայացնել, թե ինչ նմանություններ են գտել:

Կիսվեք ձեր սովորածով

Եթե ուսանողների համար օգտակար կլինի ցուցադրել Մորոնի 2–3 գլուխներում սովորածի վերաբերյալ իրենց ըմբռնումը, քննարկեք հետևյալ սցենարը։

Պատկերացրեք, որ ձեր ընտանիքի անդամը պատրաստվում է մկրտվել և հաստատվել, կարգվել քահանայության կամ ձեռնադրվել կոչման համար: Ինչո՞վ կարող եք կիսվել նրա հետ Մորոնի 2 կամ 3 գլուխներից, որպեսզի օգնեք հասկանալ իրադարձության նշանակությունը:

Բացատրական և պատմական տեղեկություններ

Ի՞նչ է անում քահանայությունը մեզ համար։

Նախկինում Առաջին նախագահությունից նախագահ Դիտեր Ֆ․ Ուխդորֆն ասել է.

Your Potential, Your Privilege

Բոլորս գիտենք, որ քահանայությունը ոչ թե անուն է կամ կոչում, այլ շատ ավելին է: Մարգարե Ջոզեֆ Սմիթն ուսուցանել է. «Քահանայությունը հավիտենական սկզբունք է և գոյություն է ունեցել Աստծո հետ հավերժությունից … մինչև հավերժություն, առանց օրերի սկզբի կամ տարիների վերջի» [Եկեղեցու նախագահների ուսմունքները. Ջոզեֆ Սմիթ (2007), 104]։ Այն կրում է «նույնիսկ Աստծո գիտության բանալիները» [Վարդապետություն և Ուխտեր 84․19]։ Իրականում, քահանայության միջոցով «բացահայտվում է աստվածայնության զորությունը» [Վարդապետություն և Ուխտեր 84․20]։

Քահանայության օրհնությունները մեր հասկացողության սահմաններից դուրս են: Մելքիսեդեկյան քահանայություն հավատարիմ կրողները կարող են «դառնալ … ընտրյալներն Աստծո» [Վարդապետություն և Ուխտեր 84․34]։ Նրանք «Հոգու միջոցով սրբագործվում են՝ ի նորացումն իրենց մարմինների» [Վարդապետություն և Ուխտեր 84․33], և, ի վերջո, կարող են ստանալ «այն ամենն, ինչ Հայրն ունի» [Վարդապետություն և Ուխտեր 84․38]։ Գուցե դժվար լինի ըմբռնել, սակայն դա գեղեցիկ է, և ես վկայում եմ, որ դա ճշմարիտ է: (Դիտեր Ֆ. Ուխդորֆ, «Ձեր ներուժը՝ ձեր արտոնությունը», Լիահոնա, մայիս 2011 թ., 58)

Ո՞վ կարող է զգալ քահանայության օրհնությունները:

Առաջին Նախագահությունից նախագահ Դալլին Հ. Օուքսը նշել է.

Ի տարբերություն քահանայության բանալիների և քահանայության արարողությունների, քահանայության օրհնությունները նույն պայմաններով հասանելի են և տղամարդկանց, և կանանց։ Սուրբ Հոգու պարգևը և տաճարի օրհնություններն այդ ճշմարտության հայտնի օրինակներն են։ (Դալլին Հ. Օուքս, «Քահանայության բանալիները և իշխանությունը», Լիահոնա, մայիս 2014 թ․, 52)

Օժանդակ ուսումնական վարժություններ

Քահանայության պաշտոնները

Նախքան Մորոնի 2 գլխի ճշմարտությունը բացահայտելը, ուսանողները կարող են գրատախտակին թվարկել Ահարոնյան և Մելքիսեդեկյան քահանայության պաշտոնները և նշել այն պաշտոնները, որոնք կարող են շնորհել Սուրբ Հոգու պարգևը: Հարցրեք ուսանողներին, թե ինչպես ենք դա իմանում։ Այնուհետև ուսանողները կարող են օգտվել ցանկից՝ գտնելու համար այն հատվածը, որն ուսուցանում է դա: Անհրաժեշտության դեպքում, ուղղորդեք նրանց ուսումնասիրել որոշ հատվածներ (տես Վարդապետություն և Ուխտեր 20.38, 41, 43, 107.18):

Քահանայության իշխանության գիծը

Կարող եք բերել և դասից առաջ դասարանի հետ կիսվել ձեր ընտանիքից, ծխից կամ ճյուղից որևէ մեկի քահանայության իշխանության գծի գրառումով: Կարող եք թղթե շղթա պատրաստել: Առաջին օղակի վրա գրեք «Հիսուս Քրիստոս» անունը։ Երկրորդ օղակի վրա գրեք «Աշակերտներ՝ ներառելով Պետրոսին, Հակոբոսին և Հովհաննեսին»: Շարունակեք շղթայի վրա գրել իշխանության գծի յուրաքանչյուր քահանայություն կրողի անունը: Օգնեք ուսանողներին տեսնել, որ այսօր Եկեղեցու քահանայությունը նույն քահանայությունն է, որն օգտագործել է Փրկիչը՝ հրաշքներ գործելու և Իր Հոր աշխատանքը կատարելու համար:

Մորոնի 2–6։ Քահանայության արարողությունները

Եթե ձեզ անհրաժեշտ է համատեղել դասերը, կարող եք ուսուցանել Մորոնի 2–6 գլուխները՝ փնտրելով քահանայության արարողությունները: Ուսանողներին առաջարկեք հիշել, թե ինչ արարողությունների են իրենք մասնակցել և ինչպես են արարողություններն օգնել իրենց ավելի մոտենալ Փրկչին: Այնուհետև նրանք կարող են խորհել, թե ինչպիսի արարողությունների են իրենք մասնակցելու ապագայում (հաղորդություն, տաճարային արարողություններ և այլն) և ինչպես կարող են պատրաստվել՝ մասնակցելու դրանց: Կարող եք վերանայել Եկ, հետևիր ինձ․ Տան և Եկեղեցու համար․ Մորմոնի Գիրք 2024 գրքույկի «Մորոնի 2–6․ Քահանայության արարողությունները պետք է սպասավորվեն՝ ինչպես Տերը պատվիրում է» բաժինը։

Մորոնի 2–3։ Տեսանյութ՝ «Քահանայության օրհնությունները»

Մորոնի 2–3 գլուխներն ուսուցանելիս կարող եք ցուցադրել «Քահանայության օրհնությունները» տեսանյութը (3:04), որտեղ Տասներկու Առաքյալների Քվորումից Երեց Ռոբերտ Դ. Հեյլսը (1932–2017) բացատրում է այն եղանակները, որոնցով քահանայությունը կարող է օրհնել մեր կյանքը։

Blessings of the Priesthood