Moronae 4–5

O Le Faamanatuga

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua valaauliaina i tatou e auai i sauniga paia ma osia feagaiga ma lo tatou Tama Faalelagi. Pe a tatou taumafai e tausia a tatou feagaiga, e faamanuiaina i tatou e le Tama Faalelagi. O le sauniga tatou te auai soo i ai o le faamanatuga. O lenei lesona e mafai ona fesoasoani ia te oe e tausia le feagaiga e te osia pe a e ai ma inu i le faamanatuga ina ia mafai ona e maua le Agaga o le Alii e faatasi ma oe.

Malamalama i manaoga o le aoaoina o tamaiti aoga. Saili ia malamalama i manaoga o le aoaoina o tamaiti aoga i lau vasega. E mafai ona aofia ai mea e fiafia i ai le tagata aoao faapea foi ma soo se luitau tau i le aoaoina. Vaavaai mo ni auala e faaaoga ai metotia eseese e aoao ai, e pei o fesoasoani vaaia, galuega faalevaega, po o suesuega faaletagata lava ia, ina ia mafai ona aoaoina e tamaiti aoga le tele o ni mea mai o latou aafiaga i le seminare.

Sauniuniga a le tamaitiiti aoga: Mafaufau e valaaulia tamaiti aoga e o mai saunia i le vasega e tauloto se vaega telē o tatalo o le faamanatuga i le telē e mafai ona latou manatuaina.

Gaoioiga e Ono Mafai Ona Aoao Ai

Aisea e te alu ai i le lotu?

Ina ia saunia tamaiti aoga e suesue i le faamanatuga, mafaufau e faasoa atu le tala lenei po o se aafiaga patino e uiga i le taua o le faamanatuga.

Sa faasoa mai e Sister Cheryl A. Esplin, o lē sa avea muamua ma se fesoasoani i le Au Peresitene Aoao o le Peraimeri, se fesili na fesili atu ai se atalii i lona tamā e 96 tausaga le matua: “Tamā, aisea e te alu ai i le lotu? E le mafai ona e vaai, e le mafai ona e faalogo, e faigata ona e fealuai. Aisea e te alu ai i le lotu?” (“O Le Faamanatuga—o se Toefaafouina o le Agaga,” Liahona, Nov. 2014, 14).

• O le a sou manatu na faapefea ona taliina e le tamā lenei fesili?

“Sa tali atu le tamā, “O le faamanatuga. Ou te alu e ’ai ma inu i le faamanatuga’” (Cheryl A. Esplin, “O Le Faamanatuga,” 14).

• O le a se mea ua e iloa e uiga i le faamanatuga atonu na mafua ai ona tali atu le tamā i lenei auala?

  O fesili nei ua faamoemoe e te manatunatu ai mo oe lava ia. Mafaufau e valaaulia tamaiti aoga e faamaumau a latou tali i totonu o a latou api faamaumau mo suesuega. Atonu foi e aoga le valaaulia o i latou e fai ni fesili e uiga i le faamanatuga.

• O le a le taua o le faamanatuga ia te oe? Aisea?

• O a ni taumafaiga e te faia ia maua ai se aafiaga anoa i le faamanatuga?

O se vaega o lana talafaamaumau, sa faaaofia ai e Moronae ia tatalo na tuuina atu muamua e Iesu Keriso ia sa Nifaē mo le faatautaiga o le faamanatuga (tagai i le Moronae 4:1–2). A o e suesue i nei tatalo i le Moronae 4–5, faalogologo mo uunaiga ia iloa ai mea e mafai ona e faia e tausia ai feagaiga e te osia pe a ai ma inu i le faamanatuga.

O le faamanatuga

A tatou aai ma feinu i le faamanatuga, tatou te osia se feagaiga ma le Tama Faalelagi ma faafou feagaiga na tatou osia i le papatisoga (tagai i le Mosaea 18:8–10; Mataupu Faavae ma Feagaiga 20:37). “O le feagaiga o se maliliega paia lea i le va o le Atua ma se tagata po o se vaega o tagata. Ua faatulaga e le Atua ni tuutuuga fitoitonu, ma ua Ia folafola mai e faamanuia i tatou pe a tatou usitai i nei tuutuuga” (Autu o le Talalelei, “Feagaiga,” ChurchofJesusChrist.org).

Mafaufau e kopi le siata lenei i luga o le laupapa ma valaaulia le vasega e faatumu le koluma agavale e faaaoga ai le Moronae 4:3. E mafai foi e tamaiti aoga ona kopi i totonu o a latou api o faamaumau mo suesuega.

O Le Feagaiga o le Faamanatuga

O mea ou te folafola atu e fai	Auala e tausia ai a’u folafolaga

• E faapefea ona e aoteleina mea tatou te folafola atu pe a tatou aai i le areto?

O se tasi o auala e aotele ai la tatou vaega o le feagaiga o le faamanatuga o le, a o tatou aai ma feinu i le faamanatuga, tatou te folafola atu o le a tatou loto e ave i o tatou luga le suafa o le Faaola, manatua pea o Ia, ma tausi Ana poloaiga.

E mafai ona faatulaga tamaiti aoga i ni vaega taitoatolu. Tofi atu i vaega taitasi se tasi o folafolaga tatou te osia o se vaega o le feagaiga o le faamanatuga. Valaaulia le vaega e talanoaina a latou folafolaga atofaina ma faasoa mai ni manatu e mafai ona faaaoga e faatumu ai le koluma lona lua i le siata.

A uma ua lava se taimi, faatulaga le vasega i ni vaega fou taitoatolu. E tatau i vaega fou taitasi ona i ai ni tamaiti aoga o e sa suesue i elemene ese o le feagaiga o le faamanatuga. Valaaulia tamaiti aoga e talanoaina mea na latou aoaoina i a latou vaega muamua ma fesoasoani le tasi i le isi e faatumu le koluma lona lua i le siata.

Afai o le a manuia tamaiti aoga mai le suesue atili i le uiga o le tauaveina o le suafa o le Faaola i o latou luga, mafaufau e faaaoga le faamatalaga ma fesili nei. Mafaufau e valaaulia tamaiti aoga e tomanatu pe o le a le telē o lo latou mananao i mea e finagalo ai le Faaola e faatusatusa i mea latou te mananao ai po o mea e manao ai le lalolagi mo i latou.

E mafai foi ona e faaaogaina le Mosaea 18:8–10 ma le Ioane 14:15 e fesoasoani ai i tamaiti aoga ia loloto lo latou malamalama i auala e tausia ai feagaiga o le faamanatuga.

• O le a sou manatu o le a le uiga o le loto e ave i o tatou luga le suafa o le Faaola?

Na faamalamalama mai e Peresitene Henry B. Eyring o le Au Peresitene Sili:

Tatou te folafola atu e tauave Lona suafa i o tatou luga. O lona uiga e ao ona tatou vaai ia i tatou lava o ni Ona [soo]. O le a tatou faamuamua o Ia i o tatou olaga. O le a tatou mananao i mea e finagalo i ai o Ia nai lo mea tatou te mananao i ai po o mea ua aoao mai le lalolagi ia tatou mananao i ai. (Henry B. Eyring, “That We May Be One,” Ensign, Me 1998, 67)

• E mafai faapefea ona e tauaveina lelei le suafa o le Faaola i ou luga?

• O a ni auala e mafai ai e le tauaveina o le suafa o le Faaola i o tatou luga ona fesoasoani ia i tatou ia avea faapei o Ia?

Ia maua pea Lona Agaga e faatasi ma i tatou.

Faitau le Moronae 4:3 ma le 5:2, ma vaavaai mo mea e tutusa ma eseese ai i le va o le tatalo o le areto ma le tatalo o le uaina (vai).

• O a ni mea e tutusa ai na e mauaina?

• O le a le mea o le a faia e le Tama Faalelagi pe afai tatou te tausia feagaiga tatou te osia i le taimi o le faamanatuga?

O se tasi o mataupu faavae tatou te aoaoina o le, a o tatou tausia feagaiga tatou te osia i le taimi o le faamanatuga, e mafai ona tatou maua pea le Agaga o le Alii e faatasi ma i tatou.

• Mafaufau pe faapefea e lou naunau e tausia folafolaga nei ona fesoasoani e te agavaa ai e maua pea le Agaga o le Alii e faatasi ma oe:

  • Ave le suafa o le Faaola i ou luga.

  • Manatua pea o Ia.

  • Tausi Ana poloaiga.

• E faapefea ona faamanuiaina oe mai le i ai pea o le Agaga Paia e faatasi ma oe?

Na aoao mai e Peresitene Dallin H. Oaks o le Au Peresitene Sili le auala e mafai ai ona tatou taulimaina le faamanatuga ma faamanuiaina ai e ala i le tausia o ona feagaiga. Faitau le faamatalaga lenei pe matamata le vitiō “The Aaronic Priesthood and the Sacrament”mai le faailo taimi 6:48 i le 7:22 ChurchofJesusChrist.org.

Ua poloaiina i tatou ina ia salamo mai a tatou agasala ma ia o mai i le Alii ma se loto momomo ma se agaga salamo, ma taumamafa i le faamanatuga e ōgatasi ma ona feagaiga. A tatou faafouina a tatou feagaiga o le papatisoga i le auala lenei, e faafouina e le Alii aafiaga faamama o o tatou papatisoga. O le auala lenei e faamamaina ai i tatou ma e mafai ai ona faatasi pea Lona Agaga ma i tatou. O le taua o lenei mea ua faamaonia i le poloaiga a le Alii tatou te aai ma feinu i le faamanatuga i vaiaso taitasi (tagai i le Mataupu Faavae ma Feagaiga 59:8–9). (Dallin H. Oaks, “The Aaronic Priesthood and the Sacrament,” Ensign, Nov. 1998, 38)

Tausia o le feagaiga o le faamanatuga

Mafaufau e faasoa atu lau molimau e uiga i le faamanatuga ma valaaulia tamaiti aoga e mananao e faia foi faapea.

Valaaulia tamaiti aoga e mafaufau i mea e mafai ona latou faia e tausia ai a latou feagaiga o le faamanatuga. Mafaufau e faaali atu le parakalafa lenei ma valaaulia tamaiti aoga e tali i totonu o a latou api talaaga. E mafai foi ona e fautua atu o le tausia o feagaiga o le faamanatuga e mafai ona avea ma se tasi o a latou sini o le atina’ega a le autalavou.

Mafaufau i au taumafaiga e tausia folafolaga e te faia pe a e ai ma inu i le faamanatuga. O a mea o loo sologa lelei? O a mea e mafai ona faaleleia?

Filifili se folafolaga se tasi pe sili atu lea e te manao e taula’i atu i ai. Tusi i lalo se mea patino e mafai ona e faia. Atonu e te manao e mafaufau loloto i lenei mea i le isi taimi e te tagofia ai le faamanatuga.

Ia gauai atu pe faapefea e le tausia o au feagaiga ona fesoasoani ia te oe ia maua le Agaga Paia e faatasi ma oe ma le eseesega e te vaaia i lou olaga.

Manatu ma Talaaga o Faamatalaga

O le a le sootaga i le va o le papatisoga ma le faamanatuga?

Na aoao mai Peresitene Russell M. Nelson:

Tatou te ulu atu i le ala o feagaiga e ala i le papatisoina ma osia la tatou feagaiga muamua ma le Atua. O taimi taitasi tatou te aai ai i le faamanatuga, tatou te toe folafola atu ai e tauave i o tatou luga le suafa o le Faaola, ia manatua pea o Ia, ma tausi Ana poloaiga. I le isi itu, ua faamautinoa mai e le Atua ia i tatou o le a tatou maua pea le Agaga o le Alii e faatasi ma i tatou. (Russell M. Nelson, “O Le Mana o le Malosiaga Faaleagaga,” Liahona, Me 2022, 98)

E mafai faapefea ona ou manatuaina pea le Faaola?

Sa aoao mai Peresitene Henry B. Eyring o le Au Peresitene Sili:

O nei upu mai tatalo o le faamanatuga e tatau ona faamatalaina ai o tatou olaga i aso taitasi: “Ia manatua pea o ia.” O “Ia” o loo faasino ia Iesu Keriso. O upu e sosoo ai, “ma tausi i ana poloaiga,” ua fautua mai ai le uiga o le manatua pea o Ia [Mataupu Faavae ma Feagaiga 20:77]. A tatou manatua pea Iesu Keriso, e mafai ona tatou fesili atu i tatalo leleoa, “O le a se mea e finagalo o Ia ou te faia?” (Henry B. Eyring, “Tatalo o le Faatuatua,” Liahona, Me 2020, 28)

Na faasoa mai e Elder Gerrit W. Gong o le Korama a Aposetolo e Toasefululua ni auala se ono e mafai ai ona tatou manatua pea le Faaola:

O vaiaso taitasi, i le aai ma feinu ai i le faamanatuga, tatou te osi feagaiga ai e manatua pea o Ia. I le faaaogaina o le toeitiiti lava 400 o mau faasino i le upu manatua, o auala nei e ono e mafai ona tatou manatua ai pea o Ia.

Muamua, e mafai ona tatou manatua pea o Ia e ala i le mauaina o le mautinoa i Ana feagaiga, folafolaga, ma faamautinoaga. …

Lua, e mafai ona tatou manatua pea o Ia e ala i le faailoaina o Lona aao i o tatou olaga atoa. …

Tolu, e mafai ona tatou manatua pea o Ia e ala i le faatuatua pe a faamautinoa mai i tatou e le Alii “o ia o lē ua salamo i ana agasala, o ia lava lea ua faamagaloina, ma o A’u, o le Alii, e lē toe manatuaina lava i latou” (Mataupu Faavae ma Feagaiga 58:42; tagai fo’i i le Isaia 43:25]. …

Lona fa, e valaaulia e Ia i tatou ia manatua e Na te faafeiloai pea i tatou i le aiga. …

Lima, e mafai ona tatou manatua pea o Ia i le Sapati e ala i le faamanatuga. …

Ma le mea mulimuli, lona ono, ua valaaulia i tatou e lo tatou Faaola ia manatua pea o Ia e pei ona Ia manatua pea i tatou. (Gerrit W. Gong, “Ia Manatua Pea o Ia,” Liahona, Me 2016, 108–10)

Sa aoao mai Peresitene Dallin H. Oaks o le Au Peresitene Sili:

I le taimi o le lotu faamanatuga—ae maise lava i le taimi o le sauniga o le faamanatuga—e tatau ona tatou tulimatai atu e tapuai ma ia aloese mai isi gaoioiga uma, ae maise lava mai amioga e faalavelave ai i isi o loo tapuai. E oo lava foi i se tagata e moeiini filemu e le faalavelave lava i isi. O le sauniga o le faamanatuga e le o se taimi lea e faitau ai ni tusi po o mekasini. Le autalavou e, e le o se taimi o ni talanoaga taumusumusu i telefoni feaveai, po o ni feau feaveai i telefoni i tagata o loo i isi nofoaga. Pe a tatou aai ma feinu i le faamanatuga, tatou te osia se feagaiga paia e faapea, o le a tatou manatua pea le Faaola. O se tulaga faanoanoa le vaaia o tagata o loo solia lena feagaiga i le sauniga tonu o loo latou osia ai lea feagaiga. (Dallin H. Oaks, “Sauniga Faamanatuga ma le Faamanatuga,” Liahona, Nov. 2008, 18–19)

E mafai faapefea e le ai ma inu i le faamanatuga ona taula a’u i le Faaola?

Na aoao mai Elder Dale G. Renlund o le Korama a Aposetolo e Toasefululua:

O vaiaso taitasi tatou te aai ma feinu ai i le faamanatuga ma osia se feagaiga ma lo tatou Tama Faalelagi. Tatou te folafola atu e fesootai o tatou faasinomaga ma le Faaola e ala i le tautino atu o lo tatou naunau ia ave i o tatou luga Lona suafa, ia manatua pea o Ia, ma tausi Ana poloaiga. O le saunia ma le filiga ma le osia ma le agavaa o nei feagaiga i vaiaso taitasi e taula ai i tatou i le faavae mausali a le Faaola, ma fesoasoani ia i tatou e faapatinoina a tatou tautinoga, ma tuleia ai ma le malosi i tatou i luga o le ala o feagaiga. (Dale G. Renlund, “Tautinoga Mausali ia Iesu Keriso,” Liahona, Nov. 2019, 24)

Gaoioiga Faaopoopo e Aoao Ai

Moronae 4:1. “O ositaulaga o loo tufaina atu le tino ma le toto o Keriso”

Ina ia fesoasoani i alii talavou e talanoaina la latou matafaioi i le sauniaina ma le faatautaia o le faamanatuga, faasino i le Moronae 4:1. Ona valaaulia lea o alii talavou o e o ni ositaulaga i le Perisitua Arona e faasoa mai ni aafiaga na latou maua i le faatautaiga o le faamanatuga ma pe na faapefea ona fesoasoani nei aafiaga ia i latou e mulimuli ia Iesu Keriso. O alii talavou o e o ni a’oa’o i le Perisitua Arona e mafai foi ona faasoa mai ni aafiaga mai le sauniaina po o le tufaina o le faamanatuga.

Tusi tatalo o le faamanatuga mai lou manatuaga

Mafaufau e valaaulia tamaiti aoga e tusi ia tatalo o le faamanatuga mai le manatuaga. E mafai ona latou faia lenei mea taitoatasi, i vaega toalaiti pe o le vasega atoa i luga o le laupapa. E mafai ona latou faatusatusa a latou tali i le Moronae 4:3 ma le Moronae 5:2 (tagai foi i le Mataupu Faavae ma Feagaiga 20:77, 79).

Tulitatao i le 3 Nifae 18

Atonu e aoga le toe tulitatao o fuafuaga na faia e tamaiti aoga e manatua ai le Faaola ina ua latou suesueina le 3 Nifae 18. Mafaufau e valaaulia tamaiti aoga e faasoa mai mea na latou faia e manatua ai le Faaola ma pe na faapefea ona aafia ai o latou aafiaga i le faamanatuga.

Vitiō

Mafaufau e faaaoga se tasi o vitiō nei e fesoasoani ai ia malamalama tamaiti aoga i le taua o le faamanatuga:

“Faamoemoega o le Sauniga Faamanatuga” mai le faailo taimi 0:10 i le 1:05

“Molimau Faapitoa—Elder Oaks”