Moronae 10:1–7

Mauaina o Lau Lava Molimau o le Tusi a Mamona

Pe na e lagonaina ni uunaiga po o lagona mai le Agaga e moni le Tusi a Mamona? Afai o lea, o a ni aafiaga ma ni faatinoga na fesoasoani ia te oe e maua ai lenei mea? I nisi o ana tusitusiga mulimuli, sa faamamafa mai ai e Moronae o le Atua o le punavai o upumoni uma. E ala mai i le Atua, e mafai ai ona tatou maua se molimau patino i le moni o le Tusi a Mamona, le moni o Iesu Keriso, ma “le moni o mea uma lava” “[o] le mana o le Agaga Paia” (Moronae 10:5). O le lesona lenei e mafai ona fesoasoani e te iloa ai mo oe lava e moni le Tusi a Mamona.

Taulai i mataupu faavae e liua ai. Fesoasoani i tamaiti aoga ia iloa aoaoga faavae ma mataupu faavae e mafai ona faamalosia ai a latou sootaga ma le Tama Faalelagi ma Iesu Keriso. Uunaia tamaiti aoga e iloilo pe mafai faapefea e nei upumoni ona faaloloto lo latou liuaina ma fesoasoani ia i latou e faatino i le faatuatua.

Sauniuniga a le tamaitiiti aoga: Valaaulia tamaiti aoga e faitau le Moronae 10:1–7, ma vaavaai mo soo se upu po o fasifuaitau e fesoasoani latou te malamalama ai i mea e manaomia ia iloa ai le moni e uiga i le Tusi a Mamona.

Gaoioiga e Ono Mafai Ona Aoao Ai

O Se Molimau o le Tusi a Mamona

Mafaufau po o le fea o faamatalaga nei e sili ona e fesootai i ai i le taimi muamua na e amata suesue ai i le Tusi a Mamona:

• Ou te le o mautinoa pe ua ou iloa e moni le Tusi a Mamona.

• Ou te talitonu i isi o e na ta’u mai ia te au e moni le Tusi a Mamona.

• Ua ou lagonaina ni uunaiga mai le Agaga Paia e moni le Tusi a Mamona.

Mafaufau e uiga i lau molimau e uiga i le Tusi a Mamona i le taimi nei. A o e suesue, mafaufau i laasaga e sosoo ai e finagalo le Alii e te faia ia maua, faaloloto, pe tumau mausali ai i lau molimau.

Apoapoaiga a Moronae

Ina ua uma ona faamaumauina nisi o aoaoga a lona tamā, sa aoao mai e Moronae le ala e mafai ai e soo se tasi ona iloa mo i latou lava e moni le Tusi a Mamona.

Faitau le Moronae 10:3–5 ma mafaufau e faailoga mea na fai mai ai Moronae e uiga i le ala e mafai ai ona tatou iloa le moni o le Tusi a Mamona. E mafai ona e mafaufau e matamata le vitio “Moroni Invites All to Come unto Christ” mai le faailo taimi 4:39 i le 5:32, o loo maua i le ChurchofJesusChrist.org.

O leMoronae 10:4–5 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Mafaufau e tusi le faamatalaga lenei e le o uma i le laupapa ma valaaulia tamaiti aoga e faauma i a latou api faamaumau mo suesuega. Ona valaaulia lea o i latou e faauma o se vasega i luga o le laupapa.

• E mafai ona ou iloa e moni le Tusi a Mamona e ala i le mana o le Agaga Paia a o ou …

O le isi gaoioiga ua faatulagaina i fasifuaitau e tolu o le fautuaga a Moronae. Mafaufau pe ono faapefea ona e fesoasoani i tamaiti aoga ia faaloloto lo latou malamalama i nei fuaitau e tolu. E mafai ona e vaevaea tamaiti aoga i ni vaega toalaiti ma atofa i vaega taitasi se tasi o gaoioiga suesue lenei. Filimaoti pe sili le faaali atu o faatonuga mo nei gaoioiga pe tuu atu i vaega taitasi a latou lava kopi. A uma ona talanoaina e vaega a latou tali, e mafai ona latou faasoa mai i le vasega. E mafai foi e tamaiti aoga ona aotele o latou manatu i autafa o le faamatalaga o i le laupapa.

Faitau le Tusi a Mamona

Ua faamatala mai e Peresitene Russell M. Nelson nisi o faamanuiaga e mafai ona tatou maua e ala i le suesueina o le Tusi a Mamona. Mafaufau pe o faapefea ona e mauaina nei faamanuiaga a o e suesueina.

Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 62–63)

• Pe ua e mauaina soo se faamanuiaga na folafola mai e Peresitene Nelson ia i latou o e suesue i le Tusi a Mamona?

Valaaulia tamaiti aoga naunautai e faasoa mai nisi o auala na latou maua ai nei faamanuiaga. Ia mautinoa ia aua nei lagona e soo se tamaitiiti aoga le maasiasi pe afai e le mafai ona latou mafaufau i ni aafiaga. Faamautinoa atu ia i latou e mafai lava ona latou maua nei faamanuiaga a o faaauau pea ona latou suesue i le Tusi a Mamona.

O le iloaina o faamanuiaga lea e oo mai i le faitauina o le Tusi a Mamona e mafai ona faamautu ai e moni ma e mai le Atua.

Mafaufau loloto i le alofa mutimutivale o le Alii

• O a nisi o faataitaiga faatusi paia o tagata e mauaina le alofa mutimutivale o le Alii? E mafai ona e sueina ni nai tagata, e pei o Nifae (2 Nifae 4:20–25), Alema le Itiiti (Alema 36:17–21), po o sa Nifae na faamaloloina e le Faaola i le taimi o Lana asiasiga (3 Nifae 17:6–9).

• O a nisi o faataitaiga o le alofa mutimutivale o le Alii i lou olaga po o le olaga o se tasi e te iloa?

• Aisea e te manatu ai o le mafaufau loloto i le alofa mutimutivale o le Alii e mafai ona fesoasoani ia te oe e maua ai se molimau o le Tusi a Mamona e ala i le Agaga Paia?

Ole atu i le Atua ma le loto faamaoni, manatu moni, ma le faatuatua ia Keriso

• O le a sou manatu i le uiga o le, ole atu i le Atua ma se loto faamaoni? Ma le manatu moni? Ma le faatuatua ia Iesu Keriso (Moronae 10:4)? Afai e te manaomia se fesoasoani i le taliina o lenei fesili, faitau le Iosefa Samita—Talafaasolopito 1:10–17, ma vaavaai pe na faapefea ona faalatalata atu Iosefa Samita talavou i lana tatalo ma se loto faamaoni, manatu moni, ma le faatuatua ia Keriso. (Manatua: O le fasifuaitau manatu moni o lona uiga o le taimi lava e te maua ai se tali i au tatalo, o le a e faatinoina ma le faamaoni le faaaliga ua e mauaina.)

• E mafai faapefea e le faia o lenei mea ona fesoasoani tatou te maua ai se molimau o le Tusi a Mamona e ala i le Agaga Paia?

O la’u molimau patino e uiga i le Tusi a Mamona:

Sa faasoa mai e Peresitene Henry B. Eyring o le Au Peresitene Sili lona aafiaga i le faaaogaina o le folafolaga a Moronae. Faitau le faamatalaga lenei pe matamata le vitio “A Living Testimony” mai le faailo taimi 13:51 i le 14:31, o loo maua i le ChurchofJesusChrist.org.

Ou te faamoemoe ua outou faamaonia uma lena folafolaga mo oe lava ia, pe o le a e faia foi i se taimi lata mai. Atonu o le a le oo mai le tali i se aafiaga se tasi ma le mamana faaleagaga. Ia te au lava ia na oo filemu mai muamua. Ae o taimi taitasi ou te faitau ai ma tatalo e uiga i le Tusi a Mamona, ua atili ai ona oo mai ma le malosi naua.

Ou te le faalagolago i le mea na tupu i aso ua mavae. Ina ia tausi maluina la’u molimau ola o le Tusi a Mamona, e tele ina ou maua le folafolaga a Moronae. Ou te le faataugamalieina lena faamanuiaga o se molimau faapea o se aia tatau e tumau. (Henry B. Eyring, “O Se Molimau Ola,” Liahona, Me 2011, 127)

• E mafai faapefea ona faatatau upu a Peresitene Eyring ia i tatou e tusa lava pe faafia ona tatou faitauina le Tusi a Mamona?

• O a ni auala e mafai ai e le Agaga Paia ona molimau mai ia i tatou i le moni o le Tusi a Mamona?

• E mafai faapefea e se molimau o le Tusi a Mamona ona faamalosia lou sootaga ma, ma le molimau e uiga i le Tama Faalelagi ma Lona Alo, o Iesu Keriso?

Valaaulia tamaiti aoga e faasoa mai a latou molimau o le Tusi a Mamona ma pe na faapefea ona latou iloa e moni. E mafai foi ona e faasoa atu lau lava molimau.

O mea nei e mafai ona fesoasoani i tamaiti aoga e faaaoga ai le Moronae 10:3–5.

Tusi i lalo i lau api faamaumau mo suesuega mea e mafai ona e faia e faaaoga ai mataupu faavae o loo aoaoina i le Moronae 10:3–5. Mafaufau pe mafai faapefea ona faaauau pea ona e suesue i le Tusi a Mamona, mafaufau loloto i le alofa mutimutivale o le Alii, ma ole atu i le Atua mo se molimau e ala i le Agaga Paia. O fea ma o afea o le a e faia ai nei mea? E ono faapefea ona tali mai e le Alii au tatalo?

Manatu ma Talaaga o Faamatalaga

Na faapefea ona iloa e isi e moni le Tusi a Mamona?

O punaoa nei e mafai ona fesoasoani ia te oe e malamalama ai ma aoao mai aafiaga o isi. O loo maua uma i le ChurchofJesusChrist.org

• “Receiving a Testimony of the Book of Mormon, Part 1” (1:30), na saunia e Peresitene Boyd K. Packer

• “How I Know the Book of Mormon is True” (1:11)

• “Found through the Power of the Book of Mormon,” na saunia e Elder Rubén V. Alliaud, mai le faailo taimi 1:21 i le 4:39

• “Turn to Him and Answers Will Come” mai le faailo taimi 0:00 i le 1:06, na saunia e Elder James B. Martino

• “If You Really Want to Know, You Will Know,” na saunia e Elder Walter F. González

Sa maua e Sister Zina Young ma Sister Eliza R. Snow, o uluai tagata liliu mai ma taitai i le Ekalesia toefuataiina, se molimau i ni auala eseese.

Na fai mai Zina na ia “vaai muamua i le Tusi a Mamona, lena tusi uiga ese, fou, o loo taatia i luga o le faamalama o le latou potu malolo” ina o 14 ona tausaga. A o ia uuina mai le tusi, sa “oo mai faatasi ma se tosinaga malū a le Agaga Paia lea sa ou oomiina ai i lo’u fatafata ma se lagona o le fiafia tele, ma ou memumemu ao ou faia, ‘O le mea moni lenei, le mea moni, le mea moni!’”

Sa lei faigofie ona oo mai le talitonuga maumaututu mo Elisa. Sa auai muamua lona tina ma lona uso i le Ekalesia. Sa feiloai Eliza ia Iosefa Samita ma manatu ai, sa ia te ia “se foliga faamaoni.” Sa faalogo o ia i le toalua o Molimau e Toatolu—o tamalii sa vaai ma taulimaina papatusi auro—o talanoa e uiga i le tusi, ma ni “molimau faagaeetia tele” na te lei faalogo muamua lava i ai. E ui i lea, sa lei manao o ia e vave minoi ma faaseseina ai. I le mafaufau ai atonu o na mea uma o se “mea e vave ona toe mou ese,” na alu ai le fa o tausaga o ia suesueina tusitusiga paia ona faatoa “mautinoa … lea o lona loto” ma sa tonu loa ia te ia e papatisoina. (Janiece Johnson, “A Witness of One’s Own,” Ensign, Dec. 2020, 37)

E mafai faapefea ona faamanuiaina au i le i ai o la’u lava molimau?

Na aoao mai Peresitene Dieter F. Uchtdorf, ao avea ma Fesoasoani Lua i le Au Peresitene Sili:

Atonu e fai mai nisi, o laasaga ua faigata tele pe e le aoga ai foi se taumafaiga. Ae ou te fautua atu o lenei molimau patino o le talalelei ma le Ekalesia o le mea aupito sili lea ona taua e mafai ona e mauaina i lenei olaga. E le gata o le a faamanuia ma taiala ai oe i lenei olaga, ae o le a i ai foi sona aafiaga tuusao i lou olaga i le faavavau atoa. (Dieter F. Uchtdorf, “Mauaina o se Molimau o le Malamalama ma le Upumoni,” Liahona, Nov. 2014, 22)

Na faasoa mai Peresitene Russell M. Nelson:

E te le tau tuufesili po o le a le mea e moni (Moronae 10:5). E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e mauaina lau oe lava ia molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona ave’esea se molimau na tuuina atu i lou loto ma le mafaufau e uiga i le mea e moni. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95)

Gaoioiga Faaopoopo e Aoao Ai

Faasoaina atu o a latou molimau o le Tusi a Mamona

Ina ia faaiuina le lesona, mafaufau e tuu atu i tamaiti aoga taitasi se kopi o le Tusi a Mamona e tusi ai a latou molimau. E mafai e tamaiti aoga ona tuuina atu nei kopi o le Tusi a Mamona i se tasi latou te iloa ua latou lagona ua saunia e taliaina. I se isi itu, e mafai e tamaiti aoga ona tuuina atu nei kopi o le Tusi a Mamona i faifeautalai i le lotoifale e faasoa atu i a latou taumafaiga talai.

Fatu se mea faitino e malamalama ai i le Moronae 10:3–5

Ina ia fesoasoani ia i latou ia malamalama i upu o i le Moronae 10:3–5, e mafai e tamaiti aoga ona fatuina se ata e talitutusa ma mea o loo maua i le vaega o le “Fuaitau i luga o lea Fuaitau” o le mekasini o le Mo Le Malosi o le Autalavou . Tagai Fepuari 2021, Fepuari 2022, po o isi lomiga lata mai nei mo faataitaiga.

Moronae 10. “Apoapoa’i”

Faamanatu i tamaiti aoga o le upu apoapoa’i o lona uiga ia faamalosiau pe uunaia malosi. Mafaufau e valaaulia tamaiti aoga e vaai i le Moronae 10 mo le tele o taimi o loo faaaoga ai e Moronae lenei upu. O le a le mea o loo valaaulia i tatou e Moronae e fai? O a nisi o auala patino e mafai ona tatou mulimuli ai i nei valaaulia?

E mafai e le Agaga Paia ona fesoasoani ia tatou iloa le moni o mea uma

E mafai e tamaiti aoga ona faitau le Moronae 10:5–7 ma vaavaai pe mafai faapefea e le Agaga Paia ona fesoasoani ia i latou i a latou aoaoga uma . Talanoa pe mafai faapefea e le iloaina o lenei mea ona tosina ai le aoaoina e tamaiti aoga o le talalelei ma le faalelalolagi. E mafai foi ona outou talanoaina le auala e mafai ai e le Agaga Paia ona fesoasoani ia i tatou ia iloa le mea moni mai le mea sese.