Moronae 10:8–25

“O Meaalofa Lelei Uma e Mai ia Keriso”

O le a se meaalofa ua e mauaina na faia ai se eseesega anoa i lou olaga? O le a le mea na ta’u atu e lenei meaalofa ia te oe e uiga i le tagata na tuuina atu? Na molimau mai Moronae i meaalofa ua tuuina mai e le Atua i Ana fanau e ala i le Agaga ina ia manuia ai i latou. Ona apoapoai mai lea o Moronae i le aufaitau ia iloa ma maua nei meaalofa faaleagaga. O lenei lesona e mafai ona fesoasoani ia te oe e saili ai meaalofa a le Agaga.

Fesoasoani i tamaiti aoga ia lagona le faaaloalogia ma le faatauaina. O tamaiti aoga taitasi o se atalii/afafine o le Atua e i ai uiga auaumama, taleni, ma meaalofa tulaga ese. Ia mataala ma iloa pe a taumafai tamaiti aoga e saofaga i ni auala lelei. Uunaia se uiga faaalia o le taliaina ma le alofa i tagata uma o le vasega.

Sauniuniga a le tamaitiiti aoga: Valaaulia tamaiti aoga e aoao e uiga i meaalofa a le Agaga. E mafai ona latou faaaogaina fesoasoaniga mo le suesueina o tusitusiga paia e pei o tusiga o Autu o le Talalelei “Meaalofa Faaleagaga,” o loo maua i le topics.ChurchofJesusChrist.org.

Gaoioiga e Ono Mafai Ona Aoao Ai

Meaalofa

Mafaufau i nisi o tagata fai meaalofa sili ona lelei e te iloa.

• O a ni uiga o i ai i nei tagata e avea ai i latou ma tagata fai meaalofa lelei?

Na aoao atu e Iesu Keriso Ona soo e uiga i se tasi o uiga o le Tama Faalelagi i le Mataio 7:9–11. Faitau fuaiupu nei, ma vaavaai mo le mea na aoao mai e le Faaola e uiga i le Tama.

Mafaufau e lisi tali a tamaiti aoga i le fesili o loo i luga o le laupapa. E faalagolago i tali a tamaiti aoga, e mafai ona tou faitauina o se vasega ia fuaiupu o loo lisi atu i le faaiuga o le fesili.

• O a nisi o meaalofa sili ona taua ua tuuina mai po o finagalo lo tatou Tama Faalelagi e tuuina mai ia i tatou? (Afai e manaomia, faitau le Ioane 3:16; 2 Nifae 31:12; ma le Mataupu Faavae ma Feagaiga 14:7.)

O le asō o le a e maua ai se avanoa e aoao ai e uiga i meaalofa mai le Atua lea o loo faasino i ai o meaalofa a le Agaga po o meaalofa faaleagaga. A o e suesue, mafaufau pe faapefea ona avea nei meaalofa ma faamaoniga o le alofa o le Tama Faalelagi ma Iesu Keriso mo oe ma isi. Mafaufau foi pe mafai faapefea e le faamanuiaina i nei meaalofa ona tosinaina lou lotofaafetai ma le alofa mo le Tama Faalelagi ma Iesu Keriso.

O meaalofa faaleagaga mai le Atua

Faaali atu le faauigaga lenei ina ia mafai ai e tamaiti aoga ona faaaofia i totonu o a latou api faamaumau mo suesuega.

O meaalofa faaleagaga e mafai ona faauigaina o ni “faamanuiaga po o tomai ua tuuina mai e le Atua i Ana fanau e ala mai le mana o le Agaga Paia. O meaalofa a le Agaga e tuuina mai e faamanuia ma ia aoga ia i latou o e alolofa i le Alii ma saili e tausi Ana poloaiga. (Tagai i le Mataupu Faavae ma Feagaiga 46:9.)” (Autu o le Talalelei, “Meaalofa Faaleagaga,” topics.ChurchofJesusChrist.org).

Faitau le Moronae 10:8, ma vaavaai mo mea na aoao mai e Moronae e uiga i meaalofa faaleagaga.

• O le a se mea sa e aoaoina e uiga i meaalofa faaleagaga mai i lenei fuaiupu?

O se upumoni e tasi e mafai ona tatou aoao mai i lenei fuaiupu o le, e tuuina mai e le Atua i Ana fanau meaalofa a le Agaga ina ia latou manuia ai.

• O le a sou manatu e mafai faapefea ona tatou faaaogaina faamanuiaga po o tomai e tuuina mai e le Atua ia i tatou e ala i le Agaga Paia e fesoasoani ai ia i tatou lava po o isi?

Mafaufau i ni au fesili o i ai pea e uiga i meaalofa faaleagaga. Tusi nei fesili i lau api faamaumau mo suesuega. A o faaauau pea ona e suesue, vaavaai mo aoaoga e fesoasoani e tali ai au fesili.

Mafaufau e valaaulia tamaiti aoga e faasoa mai nisi o a latou fesili. E mafai ona e tusia i le laupapa. Atonu e i ai ni fesili a tamaiti aoga e talitutusa ma fesili nei: O a ni faataitaiga o meaalofa faaleagaga? O a ni meaalofa faaleagaga ua faamanuiaina ai au e le Atua? E mafai faapefea ona ou maua meaalofa faaleagaga?

O a ni faataitaiga o meaalofa faaleagaga?

Na faasoa mai e Moronae ni nai faataitaiga o meaalofa faaleagaga e mafai ona tuuina mai e le Atua ia i tatou. Faitau le Moronae 10:9–16, ma vaavaai mo nei faataitaiga.

Atonu e fesoasoani le iloa o le aoao atu “le upu o le poto” (fuaiupu 9) e mafai ona faasino i le tomai e fesoasoani ai i isi e faaaoga faamasinoga lelei pe faaaoga lo latou malamalama; aoao atu le “upu o le malamalama” (fuaiupu 10) e mafai ona faasino i le tomai e fesoasoani ai i isi ia o mai i se malamalama o le Atua ma Ana tulafono; ma “ituaiga uma o gagana” (fuaiupu 15) e mafai ona faasino i le tomai e tautala ai i gagana ese po o gagana e le mailoa.

• O a meaalofa a le Agaga na ta’ua i nei fuaiupu?

• O a nisi o faataitaiga o le auala na e vaai ai i le faaaliaina o nei meaalofa?

Na aoao mai Elder Bruce R. McConkie (1915–85) o le Korama a Aposetolo e Toasefululua e faapea “o meaalofa faaleagaga e le gata mai le aofai ma e le mafaitaulia ituaiga eseese” (A New Witness for the Articles of Faith [1985], 371).

Mafaufau e valaaulia tamaiti aoga e mafaufau i faataitaiga o meaalofa faaleagaga e mafai ona faamanuia ai i latou e le Atua e faaopoopo atu i meaalofa o loo lisiina i le Moronae 10. Afai e manaomia, e mafai ona e faasoa atu faataitaiga e pei o nei:

E mafai e le Atua ona faamanuia i tatou i se aofaiga e le gata mai o meaalofa faaleagaga, e aofia ai le faatuatua ia Iesu Keriso, faaaliga faaletagata lava ia, gafatia faateleina e tausi ai poloaiga, ma le lagonaina o le alofa faaKeriso mo isi.

Ina ia saunia tamaiti aoga e talanoaina fesili nei, valaaulia i latou e mafaufau e uiga i taimi i o latou olaga na faamanuiaina ai i latou i meaalofa faaleagaga mai le Atua. E mafai ona e valaaulia i latou e faasoa mai ni faataitaiga e le patino tele. E mafai foi ona e faasoa atu ni aafiaga musuia mai i lou lava olaga.

• O le a se mea ua e aoaoina e uiga i le Tama Faalelagi pe a e mafaufau i meaalofa e finagalo o Ia e tuu mai ia i tatou?

• E mafai faapefea e meaalofa faaleagaga ona fesoasoani ia i tatou ia avea atili e faapei o le Atua?

E mafai faapefea ona tatou maua meaalofa faaleagaga?

Faitau le Moronae 10:24–25, 30, ma vaavaai mo mea na aoao mai e Moronae e uiga i le mauaina o meaalofa faaleagaga mai le Atua.

• O a ni mea na aoao mai e nei fuaiupu ia te oe e uiga i le ala e mafai ai ona faamanuiaina i tatou i meaalofa a le Agaga?

O faamatalaga nei e mafai ona faaaoga e fesoasoani ai i tamaiti aoga ia malamalama lelei i auala e mafai ona latou mulimuli ai i le fautuaga a Moronae e “taofimau i” meaalofa faaleagaga (Moronae 10:30). Mafaufau e faaali atu nei faamatalaga ma valaaulia ni volenitia e faitau leotele.

Na faasoa mai e Peresitene George Q. Cannon (1827–1901) o le Au Peresitene Sili se auala se tasi e mafai ona tatou sailia ai meaalofa faaleagaga:

Afai e i ai se tasi o i tatou e le atoatoa, o lo tatou tiute le tatalo mo le meaalofa o le a faapea ona tatou atoatoa ai. … E leai se tagata e tatau ona faapea mai, “Oi, e le mafai ona ou tuua lenei mea; o lo’u a natura lea.” E le ta’uamiotonuina ai o ia, ona o le mafuaaga ua folafola mai e le Atua … e tuuina mai meaalofa o le a aveesea ai [o tatou vaivaiga]. (George Q. Cannon, “Sailia o Meaalofa Faaleagaga,” Liahona, Ape. 2016, 80)

Na faasoa mai e Peresitene Henry B. Eyring o le Au Peresitene Sili se isi auala e mafai ai ona tatou agavaa mo meaalofa a le Agaga:

Tatou te atiina ae meaalofa faaleagaga e ala i le tausia o poloaiga ma taumafai e ola i se olaga e le ponā. E manaomia ai le faatuatua ia Iesu Keriso ina ia salamo ma ia faamamaina e ala i Lana Togiola. (Henry B. Eyring, “Auauna Atu ma le Agaga,” Liahona, Nov. 2010, 59)

• O le a se mea na e aoaoina mai nei faamatalaga e uiga i auala e mafai ona faamanuiaina ai i tatou i meaalofa faaleagaga?

• Aisea e te manatu ai o faatinoga o loo ta’ua e manaomia ina ia agavaa ai mo meaalofa a le Agaga?

Tuu atu i tamaiti aoga se taimi e mafaufau ai e uiga i mea ua latou aoaoina ma le auala o le a latou faaaogaina ai e ala i le faasoa atu o faatonuga nei. Ona molimau atu lea i upumoni sa e suesueina i le aso ma fautuaina tamaiti aoga e saili i meaalofa faaleagaga.

Mafaufau i mea ua e aoaoina i le asō e uiga i meaalofa faaleagaga e te manao e manatua, e aofia ai le ala e mafai ai e meaalofa faaleagaga ona faia se eseesega i lou olaga. Filimaoti po o le a se mea o le a e faia ina ia maua atili ai meaalofa faaleagaga e finagalo le Tama Faalelagi e faamanuia ai oe. Tusi faamaumau ou manatu ma uunaiga i lau api faamaumau mo suesuega.

Manatu ma Talaaga o Faamatalaga

O a isi meaalofa faaleagaga o i ai?

Na aoao mai Elder Marvin J. Ashton (1915-1994) o le Korama a Aposetolo e Toasefululua:

Sei o tatou iloiloina nisi o meaalofa e le iloagofie: o le meaalofa o le ole atu; o le meaalofa o le faalogologo; o le meaalofa o le lagona ma faaaoga le leo itiiti ma le filemu; o le meaalofa o le mafai ona tagi; o le meaalofa o le aloese i finauga; o le meaalofa o le lotogatasi; o le meaalofa o le aloese i le tautu i upu; o le meaalofa o le saili o le mea sao; o le meaalofa o le le tuuai fua; o le meaalofa o le vaai i le Atua mo le taitaiga; o le meaalofa o le avea ma soo; o le meaalofa o le manatu alofa i isi; o le meaalofa o le mafai ona mafaufau loloto; o le meaalofa o le faia o tatalo; o le meaalofa o le tuuina atu o se molimau malosi; ma le meaalofa o le maua o le Agaga Paia. (Marvin J. Ashton, “There Are Many Gifts,” Ensign, Nov. 1987, 20)

O a ni faataitaiga o tagata ua faamanuiaina i meaalofa faaleagaga?

O faataitaiga nei o tagata taitoatasi o e na faamanuiaina i meaalofa faaleagaga i taimi o mafatiaga. Mafaufau i mea ua aoao atu e nei faataitaiga ia te oe e uiga i le Tama Faalelagi ma Iesu Keriso.

• Faataitaiga 1: Sa matua manaomia e Amanda Barnes Samita le fesoasoani a le Alii ina ua mavae le fanaina o lona atalii e ono tausaga o Alema, ma lavea ai lona suilapalapa e se au faatupu faalavelave i le Vili Falaomata a Hawn i Misuri, ISA, i le 1838. Sa fasiotia le toalua o Amanda ma le isi o ona atalii i le osofaiga.

  Ina ia vaai i le ala na faamanuiaina ai e le Alii ia Amanda i ona taimi o puapuaga, faitau i le mataupu 30 o le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 (2018), mai le fasifuaitau “Sa fou le manu’a” i le itulau 354 e oo i le parakalafa o loo i le itulau 355 o loo amata i le “O le taimi lava sa ia iloaina ai …” Ona faitau lea i le mataupu e 32 mai le fasifuaitau “A o sosola ese le Au Paia mai Misuri …” i le itulau e 378 e oo i le parakalafa o loo i le itulau e 379 o loo amata i le “O le le amanaiaina o ia …”

• Faataitaiga 2: A o galue Peresitene Russell M. Nelson o se fomai tipitipi o le fatu a o lei avea ma se Aposetolo, sa feagai o ia ma se tulaga lea sa ia manaomia ai le fesoasoani a le Alii.

Gaoioiga Faaopoopo e Aoao Ai

Gaoioiga fefaasinoa’i

Afai o le a manuia tamaiti aoga mai le toe faamanatuina o isi faataitaiga o meaalofa faaleagaga o loo lisiina i tusitusiga paia, valaaulia i latou e fefaasinoa’i pe faafesootai le 1 Korinito 12:1–11 ma le Mataupu Faavae ma Feagaiga 46:8–26 i le Moronae 10:8–16. E mafai ona e vaevaeina le vasega i ni vaega se lua ma valaaulia le tasi vaega e suesue fuaitau i le 1 Korinito 12 a o le isi e suesue fuaitau i le Mataupu Faavae ma Feagaiga 46. Valaaulia i latou e faasoa mai mea na latou mauaina ma pe na faapefea ona faaopoopo atu i lo latou malamalama o mea sa aoao mai i le Moronae 10. O a ni malamalamaaga faaopoopo na latou maua e uiga i meaalofa faaleagaga pe e uiga i le Tama Faalelagi ma Iesu Keriso?

Moronae 10:19. O le natura le fesuisuia’i o le Atua

Afai o le a manuia tamaiti aoga mai le aoao atili e uiga i le natura le fesuisuia’i o le Atua, mafaufau e taulai atu i le Moronae 10:19. Valaaulia tamaiti aoga e faasoa mai faamaoniga o meaalofa faaleagaga na latou vaaia i tusitusiga paia, talafaasolopito o le Ekalesia, ma o latou olaga patino. O faataitaiga mai le vaega “Faamatalaga ma Faamatalaga o Talaaga” e mafai ona faaaogaina o se vaega o lenei talanoaga. Ona valaaulia lea o tamaiti aoga e faasoa mai mea ua aoao mai e lenei mea e uiga i le Tama Faalelagi ma Iesu Keriso. Fai atu ia i latou e faitau le Moronae 10:19 e vaai ai i mea na aoao mai e Moronae e uiga i le natura le fesuisuia’i o le Atua. Aisea e taua ai le malamalama i lenei mea?