“Molonai 10:26–34: ‘Haʻu kia Kalaisi,’” Tohi ʻa Molomoná – Tohi Lēsoni ʻa e Faiakó (2024)
“Molonai 10:26–34,” Tohi ʻa Molomoná – Tohi Lēsoni ʻa e Faiakó
Molonai 10:26–34
“Haʻu kia Kalaisi”
Naʻe ʻomi kitautolu ki māmani ke tau ako mo tupulaki kae lava ke tau maʻu ʻa e moʻui taʻengatá. Ke tokoniʻi kitautolú, naʻe fekauʻi mai ʻe he Tamai Hēvaní Hono ʻAlo ko Sīsū Kalaisí. Kuó Ne ui foki mo ha kau palōfita ke akoʻi mo fakamoʻoni kia Sīsū Kalaisi. ʻI he ngaahi veesi fakaʻosi ʻo e Tohi ʻa Molomoná, naʻe fakaafeʻi ʻe Molonai ʻa e taha kotoa ke muimui ki he Fakamoʻuí. ʻE lava ke tokoni ʻa e lēsoni ko ʻení ke ke “haʻu kia Kalaisi, pea hoko ʻo haohaoa ʻiate ia” (Molonai 10:32).
Poupouʻi ʻa e kau akó ke feinga ke hoko ʻo hangē ko Sīsū Kalaisí. Tokoni ki he kau akó ke nau fakatokangaʻi ʻa e ngaahi ueʻi mei he Laumālie Māʻoniʻoní ke ʻiloʻi ha ngaahi founga te nau lava ai ʻo hangē ko Sīsū Kalaisí. Poupouʻi e kau akó ke nau fakakaukau ʻi he faʻa lotu ki ha ngaahi sitepu pau te nau lava ʻo fakahoko ʻi heʻenau feinga ke hoko ʻo hangē ko e Fakamoʻuí.
Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ʻenau fakakaukau ki he ʻuhinga ʻo e kupuʻi lea “haʻu kia Kalaisí.” ʻE lava ke kumi ʻe he kau akó ʻa e kupuʻi leá ʻi he polokalama Gospel Library kapau ʻoku nau fiemaʻu tokoni.
Ngaahi ʻEkitivitī Ako ʻOku Ala Fakahokó
Fakatokangaʻi ange: ʻOku nofotaha ʻa e lēsoni ko ʻení ʻi he tokāteline ʻoku akoʻi ʻi he Molonai 10:26–34. ʻE maʻu ʻe he kau akó ha faingamālie ke lipooti ʻenau ngaahi aʻusia ʻi hono ako kakato ʻo e Tohi ʻa Molomoná ʻi he lēsoni “Siviʻi Hono 10 Hoʻo Akó.”
Ngaahi taumuʻa ʻo e Tohi ʻa Molomoná
Fakakaukau ke fakaʻaliʻali ha fakatātā ʻo ha ngaahi meʻa kehekehe pe ʻomi kinautolu ki he kalasí. Kole ki he kau akó ke fakamatalaʻi fakanounou ʻa e taumuʻa ʻo e meʻa takitaha. Puke hake leva ha tatau ʻo e Tohi ʻa Molomoná pea aleaʻi hono taumuʻá.
ʻI he peesi talamuʻaki ʻo e Tohi ʻa Molomoná, naʻe fakahā ai ʻe Molonai naʻe hiki ʻa e Tohi ʻa Molomoná ke fakalotoʻi kitautolu “Ko Sīsū ʻa e Kalaisí.” Ko e foʻi lea “Kalaisí” ko e lea “faka-Kalisi ia ʻo e Mīsaiá. Ko hono ʻuhingá ko e Palōfita, Taulaʻeiki, Tuʻi, mo e Tokotaha Fakahaofi kuo pani” (Fakahinohino ki he Ngaahi Folofolá “Mīsaiá,” scriptures.ChurchofJesusChrist.org).
-
Kuo fakamālohia fēfē nai ʻe hono ako ʻo e Tohi ʻa Molomoná hoʻo tui kia Sīsū Kalaisí?
-
Kuo tokoniʻi fēfē nai koe ʻe hoʻo ako ʻa e Tohi ʻa Molomoná ke ke muimui kia Sīsū Kalaisí?
ʻOku fakataumuʻa ʻa e fehuʻi ko ʻení ke fakakaukauloto fakataautaha ki ai.
-
Ko e hā hoʻo ongo ki he tūkunga lolotonga hoʻo feinga ke muimui kiate Iá?
Ngaahi fakaafe fakaʻosi ʻa Molonaí
Hili hono akoʻi ʻe Molonai ʻa e ngaahi meʻafoaki ʻo e laumālié mo e fakatokanga fekauʻaki mo e ngaahi nunuʻa ʻo e taʻetuí, naʻá ne lea fekauʻaki mo e Tohi ʻa Molomoná.
Lau ʻa e Molonai 10:27–29, ʻo kumi ʻa e meʻa naʻe kikiteʻi ʻe Molonai ʻe hokó.
-
Ko e hā hoʻo fakakaukau ki haʻo feʻiloaki mo Molonai ʻi he taimi ʻo e fakamaauʻanga lahí?
Naʻe fai mai leva ʻe Molonai ʻene naʻinaʻi fakaʻosí, pe ngaahi fakaafé.
Lau ʻa e Molonai 10:30–34, ʻo kumi ʻa e meʻa naʻe fakaafeʻi kitautolu ʻe Molonai ke tau faí pea mo e ngaahi tāpuaki kuo talaʻofa mai naʻá ne vahevahé
Ko e taumuʻa ʻo e ngāue ko ʻení ke tokoni ki he kau akó ke fakaloloto ʻenau mahino ki ha niʻihi ʻo e ngaahi kupuʻi lea ʻa Molonaí.
Te ke lava ʻo fakaʻaliʻali ʻa e saati ko ʻení pe toe tā ia ʻi he palakipoé. Kapau te ke toe tā ia ʻi he palakipoé, hiki ʻa e hingoa ʻo e kōlomu takitaha pea ʻai ke lau ʻe he kau akó ʻa e Molonai 10:30–34 pea hiki ʻa e meʻa ʻoku totonu ke hiki ʻi he kōlomu takitaha. Hili iá, te ke lava ʻo tānaki ki ai ʻa e ngaahi potufolofolá mo e ngaahi tokoni ki he akó ke fakaloloto ʻenau mahinó.
Fakakaukau ke vahevahe ʻa e ngaahi fakaafe mo e ngaahi palōmesi ko ʻení ʻi he kau akó pea fakaafeʻi kinautolu ke fakamatalaʻi ki he kalasí honau ʻuhingá. ʻE lava ke ako ʻa e kau akó ʻi ha fanga kiʻi kulupu iiki. Hili ha taimi feʻunga, fakaafeʻi ʻa e kau akó ke aleaʻi ʻa e meʻa naʻa nau maʻú. ʻE lava ke tokoni ʻa e ngaahi fehuʻi ʻoku ʻoatu ʻi he sātí ki hono tataki ʻo e fealēleaʻakí.
Te ke lava foki ʻo fakapipiki ha ʻū laʻipepa ʻoku ʻi ai ʻa e ngaahi fakaafe, ngaahi palōmesi, mo e ngaahi potufolofola ʻoku fekauʻaki mo iá ʻi he loki akó. Fakaafeʻi ʻa e kau akó ke nau ʻalu takai ʻi he lokí ʻo ako ʻa e ngaahi fakaafé mo e ngaahi palōmesí.
|
Meʻa kuo pau ke tau faí (ngaahi fakaafe ʻa Molonaí) |
Ko e ngaahi talaʻofa ʻa e Tamai Hēvaní |
|---|---|
Meʻa kuo pau ke tau faí (ngaahi fakaafe ʻa Molonaí) Puke maʻu ‘a e meʻa kotoa pē ʻoku leleí. (Vakai, Molonai 7:19; Tokāteline mo e Ngaahi Fuakava 6:7.) Fakaʻehiʻehi mei he ngaahi meʻafoaki koví mo e ngaahi meʻa taʻemaʻá. (Vakai, 2 Nīfai 4:27–28; Molomona 9:28.) Fakafisi ʻa kitautolu mei he anga taʻe-māʻoniʻoni kotoa pē. (Vakai, Liliu ʻa Siosefa Sāmita, Mātiu 16:25–29; Mōsaia 3:19.) ʻOfa ki he ʻOtuá ʻaki hotau iví, ʻatamaí, mo e mālohí kotoa. (Vakai, Mātiu 22:36–38; ʻAmenai 1:26.) | Ko e ngaahi talaʻofa ʻa e Tamai Hēvaní ʻOku feʻunga ʻEne ʻaloʻofá pea te Ne lava ʻo fakahaohaoaʻi kitautolu. (Vakai, 2 Nīfai 10:24; 25:23; ʻEta 12:27; Fakahinohino ki he Ngaahi Folofolá, “ʻAloʻofá,” scriptures.ChurchofJesusChrist.org.) ʻE fakamāʻoniʻoniʻi kitautolu mo tau maʻu ha fakamolemole ʻo ʻetau ngaahi angahalá. (Vakai, 3 Nīfai 27:20; Tokāteline mo e Ngaahi Fuakava 76:41; Fakahinohino ki he Ngaahi Folofolá, “Fakamāʻoniʻoniʻí,” scriptures.ChurchofJesusChrist.org.) Te tau hoko ʻo māʻoniʻoni taʻe ʻi ai ha ʻila. (Vakai, Levitiko 19:2; Tokāteline mo e Ngaahi Fuakava 87:8; Fakahinohino ki he Ngaahi Folofolá, “Toputapú,” scriptures.ChurchofJesusChrist.org.) |
-
Ko e ngaahi fakaafe pe palōmesi fē ʻoku ʻuhingamālie taha kiate koé, pea ko e hā hono ʻuhingá?
-
ʻE tokoniʻi fēfē koe ʻi hoʻo ngāueʻi ʻa e ngaahi fakaafe ko ʻení ke ke haʻu kia Sīsū Kalaisí?
-
Ko e hā ha ngaahi tefitoʻi moʻoni te tau lava ʻo ako mei he Molonai 10:30–34?
Ko e tefitoʻi moʻoni ʻe taha ʻoku tau akó ko e taimi ʻoku tau haʻu ai kia Sīsū Kalaisí, ʻe lava ke fakahaohaoaʻi kitautolu ʻiate Ia.
“Haʻu kia Kalaisi, pea hoko ʻo haohaoa ʻiate ia”
ʻE lava ke ke huluʻi ʻa e foʻi vitiō “Come unto Christ: 2014 Theme Song (Haʻu kia Kalaisi: Hiva ʻo e Kaveinga 2014)” (4:48), ʻoku maʻu ʻi he ChurchofJesusChrist.org. Fakaafeʻi ʻa e kau akó ʻi heʻenau sió ke fakalaulauloto ki he founga kuo tokoniʻi ai kinautolu ʻe he ʻaloʻofa ʻa e Fakamoʻuí ʻi he taimi ʻo ʻenau faingataʻaʻiá.
-
Ko e hā naʻe fai ʻe Sīsū Kalaisi kae lava ke tau maʻu ʻa e ngaahi talaʻofa ʻi he Molonai 10:30–34 pea hoko ʻo haohaoa ʻiate Iá?
-
Kuó ke mamata fēfē ki he ngāue ʻa e ʻaloʻofa (tokoni pe mālohi fakalangi) ʻa e Tamai Hēvaní mo Sīsū Kalaisí ʻi hoʻo moʻuí?
Ke tokoni ki he kau akó ke nau haʻu kakato ange kia Kalaisi, fakakaukau ke vahevahe ʻenau fakamoʻoni ki he mālohi ʻo e Fakamoʻuí ke fakahaohaoaʻi mo fakamaʻa kitautolu kapau te tau haʻu kiate Ia.
ʻE lava ke tokoni ʻa e ngaahi fehuʻi ko ʻení ki he kau akó ke nau fakakaukau ki ha meʻa te nau lava ʻo fai ke haʻu ai kia Kalaisi pea hoko ʻo haohaoa ʻiate Iá. Mahalo te ke fie fakaʻaliʻali ʻa e ngaahi fehuʻí ni pea fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó. ʻOange ha taimi ki he kau akó ʻi he kalasí ke fakahoko ʻenau ngaahi filí, kapau ʻe lava. Kapau ʻoku ngāue ʻa e kau akó ki he ngaahi taumuʻa fakalakalaka ʻa e toʻu tupú ʻa ia ʻoku tokoni ke nau haʻu kia Kalaisí, ʻe lava ke hokohoko atu ʻenau ngāueʻi ʻa e ngaahi taumuʻa ko iá.
-
ʻOku ʻi ai nai ha faʻahinga meʻa taʻe faka-ʻOtua ʻi heʻeku moʻuí ʻoku fiemaʻu ke u siʻaki (hangē ko e ngaahi ivi tākiekina ʻo e mītiá pe ngaahi tōʻonga koví)?
-
Te u lava fēfē ʻo ʻofa lahi ange ki he ʻOtuá ʻaki hoku iví, ʻatamaí, mo e mālohí kotoa?
-
ʻE tokoniʻi fēfē au ʻe hono fakahoko ʻo e ngaahi meʻa ko ʻení ke u hangē ko Sīsū Kalaisí?