Sesyon 1

Mga Resulta sa Pagkat-on: Kini nga sesyon sa workshop makatabang sa mga tigkat-on nga (1) maprayoridad ang ilang mahangtorong mga ilhanan isip mga anak sa Dios, mga anak sa pakigsaad, ug mga disipulo ni Jesukristo; ug (2) makasabot nga sila makapili sa mga panalangin nga gitanyag sa Langitnong Amahan ug sa Iyang Anak ngadto kanila.

Mga Posibleng Kalihokan sa Pagkat-on

Unsay gusto sa Langitnong Amahan nga mahibaloan sa mga young adult?

Ikonsiderar ang pagsugod sa leksiyon pinaagi sa pagpakita sa mosunod nga mga larawan ug pagpasabot:

Mga pundok sa mga young adult nga midagsa sa Conference Center plaza sa wala pa magsugod ang tibuok kalibotan nga debosyonal niadtong Mayo 15, 2022.

Si Presidente Russell M. Nelson namulong atol sa tibuok kalibotan nga debosyonal alang sa mga young adult niadtong Mayo 15, 2022.

Ang mga young adult nagpundok sa Conference Center sa Dakbayan sa Salt Lake aron maminaw gikan ni Presidente Russell M. Nelson ug sa iyang asawa, si Sister Wendy Nelson, niadtong Dominggo, Mayo 15, 2022.

Niadtong Mayo 15, 2022, liboan ka young adult gikan sa tibuok kalibotan ang nagpundok sa personal ug pinaagi sa teknolohiya aron maminaw sa propeta sa Ginoo, si Presidente Russell M. Nelson, nga mopakigbahin og mensahe nga alang gayod kanila.

• Unsa man ang anaa sa tambag sa propeta nga lahi gikan sa tambag ni bisan kinsa?

Ipasabot nga sa iyang mensahe, si Presidente Nelson mipakigbahin og mahinungdanon nga mga kamatuoran nga makaapektar og maayo sa atong mga kinabuhi, karon ug hangtod sa kahangtoran. Dasiga ang mga estudyante samtang sila magtuon nga magmabinantayon ug irekord ang mga pag-aghat gikan sa Espiritu Santo nga makatudlo nila kon unsa ang gusto sa Ginoo nga ilang mahibaloan ug buhaton.

Tan-awa og dungan ang “Mga Pagpili alang sa Kahangtoran” gikan sa time code nga 8:08 hangtod sa 11:25. Dapita ang mga estudyante nga maminaw og maayo kon unsa ang gusto sa propeta sa Ginoo nga ilang mahibaloan ug masabtan. Ikonsiderar usab ang pagdapit sa mga estudyante nga pangitaon ang “Mga Pagpili alang sa Kahangtoran” diha sa Librarya sa Ebanghelyo aron nga makasubay sila ug mamarkahan kon unsa ang mahinungdanon alang nila.

Paghatag og kahigayonan alang sa mga estudyante nga mopakigbahin kon unsa ang mahinungdanon ngadto nila o nakapatandog sa ilang mga kasingkasing, ingon man bisan unsa nga mga pangutana nga tingali naa nila.

• Ngano sa imong hunahuna nga ang “Mga Pagpili alang sa Kahangtoran” ang angay nga ulohan sa iyang pakigpulong?

Mahimo nimong ipasabot nga si Presidente Nelson migamit og hulagway sa pulong nga pagpili sa unom ka higayon sa pahayag nga bag-o lang nilang nadungog.

• Unsa ang inyong nakat-onan gikan sa mga pulong ni Presidente Nelson mahitungod sa kamahinungdanon sa atong mga pagpili sa kahangtoran?

Isulat sa pisara o ipakita ang mosunod:

1. Hibaloi ang kamatuoran kon si kinsa kamo.

2. Hibaloi ang kamatuoran mahitungod sa unsay gitanyag kaninyo sa Langitnong Amahan ug sa Iyang Anak.

3. Hibaloi ang kamatuoran nga may kalabotan sa inyong pagkakabig.

Hatagi og gibug-aton ang pulong nga kamatuoran diha sa pisara pinaagi sa paglinya nini. Ipasabot nga ang Ginoo naglaom sa Iyang mga propeta sa pagtudlo og kamatuoran kanunay, labi na kon ang kalibotan naglibog o nasaag. Kining tulo ka kamatuoran gikan sa Dios nga gipakigbahin sa propeta motugbang sa mga pilosopiya sa kalibotan. Niini nga sesyon, atong tutokan ang unang duha ka kamatuoran.

Hibaloi ang kamatuoran kon si kinsa kamo

Ipakita ang mosunod nga pahayag ni Presidente Nelson ug awhaga ang mga estudyante sa pagpamalandong ngano nga kini mao ang unang butang nga gusto sa Ginoo nga ilang masabtan:

Nagtuo ako nga kon ang Ginoo direktang mamulong kaninyo karong gabhiona, ang unang butang nga Iyang segurohon nga inyong masabtan mao ang inyong tinuod nga pagkatawo. …

… Kinsa man kamo?

Una ug labing importante, kamo anak sa Dios.

Ikaduha, isip miyembro sa Simbahan, kamo anak sa pakigsaad. Ug ikatulo, kamo disipulo ni Jesukristo.

• Ngano man kaha nga kini mao ang unang butang nga gusto sa Ginoo nga inyong masabtan?

Isulat ang “anak sa Dios,” “anak sa pakigsaad,” ug “disipulo ni Jesukristo” diha sa pisara. Aron matabangan ang mga estudyante nga mapalawman ang ilang pagkasabot niining tulo ka ilhanan, dapita ang matag estudyante sa pagpili og usa ug pagpangita sa Librarya sa Ebanghelyo alang sa mga kasulatan o propetikanhong mga pahayag nga makatabang nila nga mas masabtan kini. Hatagi og higayon ang mga estudyante sa pagpakigbahin sa unsay ilang nakaplagan. Samtang sila mopakigbahin, isulat ang pakisayran sa kasulatan o kinutlo ubos sa tukma nga ulohan. Tingali ganahan ang mga estudyante nga irekord kini nga mga lista alang sa umaabot nga pagtuon.

Anak sa Dios

Aron matabangan ang mga estudyante nga makasabot sa ilang ilhanan isip mga anak sa Dios, basaha o ipakita ang mosunod nga pahayag o ipapangita kini sa mga estudyante sa “Mga Pagpili alang sa Kahangtoran” diha sa Librarya sa Ebanghelyo. Dapita ang mga estudyante sa pagpangita kon unsa ang gilaoman ni Presidente Nelson nga makulit sa ilang mga kasingkasing:

Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa “Ako Anak sa Dios.” Apan kana ba nga mahangtorong kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tentasyon?

Nahadlok ko nga tingali kanunay ninyong nadungog kini nga kamatuoran nga kini daw mas sama sa usa ka motto [slogan] kay sa balaanon nga kamatuoran. Ug gani, ang paagi nga kamo maghunahuna mahitungod kon kinsa gayod kamo makaapekto sa hapit matag desisyon nga inyong himoon.

• Ngano kaha nga ang paghinumdom sa inyong ilhanan isip anak sa Dios makaapektar sa hapit matag desisyon nga inyong pagahimoon?

• Unsa kaha ang mahimong hulagway kon kini nga kamatuoran mapatik sa inyong kasingkasing kay sa usa lamang ka motto?

Hatagi og kahigayonan ang mga estudyante sa pagsukod kon unsa ka lawom ang pagkapatik niini nga kamatuoran diha sa ilang mga kasingkasing pinaagi sa pagdapit kanila nga pamalandongan ang mosunod nga duha ka pangutana:

• Unsa ka sagad kini nga kamatuoran makaapekto sa mga desisyon nga imong himoon sa inadlaw-adlaw nga buhat?

• Sa unsang paagi nga kining kamatuoran nakaluwas kaninyo sa dihang nag-atubang kamo og tentasyon?

Kon makatabang, pwede usab nimo nga ikonsiderar ang pagpakigbahin sa mga ehemplo sa kasulatan niini nga kamatuoran nga napatik sa mga kasingkasing sa katawhan (sama pananglitan, Moises 1:4–21; Mga Buhat 17:23–28).

Uban pa nga mga Ilhanan

Dapita ang mga estudyante sa paghimo og lista nga may labing minos 10 ka pulong o mga timaan nga puwedeng magamit sa paghulagway sa ilang kaugalingon (sama pananglitan, anak nga lalaki, anak nga babaye, estudyante, atleta, empleyado, magdadayeg sa esport, nasyonalidad, gidak-an nga lungsod, ug uban pa). Dayon ipakigbahin sa mga estudyante ang ilang mga lista diha sa usa ka gamay nga grupo.

Ipasabot nga si Presidente Nelson misulti nga ang mga “timaan makalingaw ug magpakita sa inyong suporta alang sa bisan unsang gidaghanon sa positibo nga mga butang.”

Dapita ang mga estudyante nga ibutang ang ilang mga lista sa mga timaan sigon sa giprayoridad nga han-ay, nga ang “1” mao ang labing mahinungdanon alang kanila. Human sa pagbuhat niini, sila mahimong mopakigbahin sa mga sakop sa ilang grupo sa ilang giprayoridad nga mga lista ug unsa ang ilang rason nganong ila kining gihan-ay sa paagi nga ilang gihimo.

Ipakita ang mosunod nga pahayag o ipapangita kini sa mga estudyante diha sa “Mga Pagpili alang sa Kahangtoran” diha sa Librarya sa Ebanghelyo. Dapita ang mga estudyante nga bantayan ang mga timaan nga gihatag ni Presidente Nelson sa iyang kaugalingon ug giunsa niya kini sa pagprayoridad:

Kon akong ihan-ay ang kaimportante sa mga titulo nga magamit ngari kanako, ako moingon: Una, ako anak sa Dios—anak nga lalaki sa Dios—dayon anak sa pakigsaad, dayon usa ka disipulo ni Jesukristo ug mapahinungoron nga miyembro sa Iyang gipahiuli nga Simbahan.

Sunod ang akong madungganong mga titulo isip usa ka bana ug amahan, dayon Apostol ni Ginoong Jesukristo.

Ang tanang uban nga mga timaan nga naggamit kanako—sama sa medikal nga doktor, tig-opera, maniniksik, propesor, tenyente, kapitan, PhD, Amerikano, ug uban pa—mabutang dapit sa ubos sa lista.

Ipakita ang mosunod nga mga pangutana ug dapita ang mga estudyante sa paghisgot niini diha sa ilang mga grupo:

• Aduna bay usa ka butang nga mas mahinungdanon diha kanimo o pangutana mahitungod sa kon giunsa pagprayoridad ni Presidente Nelson ang iyang mga timaan/mga ilhanan?

• Unsa ang peligro kon sayop ang pagkahan-ay? Sama pananglitan, unsa kaha kon gibutang ni Presidente Nelson ang “propesor” nga una sa “disipulo ni Jesukristo”?

Si Presidente Nelson mihulagway sa pipila ka negatibo nga mga sangpotanan tungod sa mga timaan. Tan-awa og dungan ang “Mga Pagpili alang sa Kahangtoran” gikan sa time code nga 15:25 hangtod sa 18:31. Dapita ang mga estudyante sa pagtino og bisan unsang mga pulong o hugpong sa mga pulong nga naghulagway sa negatibong mga sangpotanan tungod sa mga timaan [label]. Ang mga estudyante mahimong mosubay sa mga pulong ni Presidente Nelson diha sa Librarya sa Ebanghelyo ug markahan kon unsa ang mahinungdanon alang kanila.

Human mapaminaw kini nga pahayag, dapita ang mga estudyante sa paghisgot sa mosunod nga mga pangutana diha sa ilang mga grupo:

• Unsa ang inyong nakat-onan mahitungod sa mga timaan gikan sa mga pulong ni Presidente Nelson? Unsa ang pipila ka peligro nga mahitabo gikan sa paghatag og timaan?

Sunod niini nga panaghisgotan, magdungan og tan-aw sa “Mga Pagpili alang sa Kahangtoran” gikan sa time code nga 18:32 hangtod sa 19:48. Dapita ang mga estudyante sa pagpaminaw sa unsay gitudlo ni Presidente Nelson mahitungod sa pagdumala sa nagkalain-laing timaan, mga titulo, ug mga timailhan nga tingali gihatag kanato. Ang mga estudyante mahimong mosubay sa mga pulong ni Presidente Nelson diha sa Librarya sa Ebanghelyo ug markahan kon unsa ang mahinungdanon alang kanila.

• Sa unsang paagi nga ang pagprayoridad sa mga timaan sama sa “anak sa Dios,” “anak sa pakigsaad,” ug “disipulo ni Jesukristo” makatabang sa pagpanalipod batok sa mga peligro sa paghatag og timaan nga gipahimangno kanato ni Presidente Nelson?

Ipasabot nga ang pagpatigbabaw sa atong tulo ka labing “malahutayon” ug “nag-unang mga titulo” isip ang atong tulo nga nag-una wala magpasabot nga si Presidente Nelson naghangyo kanato nga wagtangon ang tanang uban pang mga ilhanan. Siya hinuon nagtambag kanato nga segurohon nga kita wala motugot niini nga motangtang, mohulip, o mag-una sa prayoridad sa atong labing mahinungdanong mga ilhanan.

• Unsa ang pipila ka paagi nga si Satanas karon naningkamot nga kamo ug ang inyong mga higala motangtang, mohulip, o wala moprayoridad sa inyong ilhanan isip anak sa Dios, anak sa pakigsaad, ug disipulo ni Jesukristo?

Mainampingon nga ikonsiderar kon giunsa pagtubag sa imong mga estudyante ang nahauna nga pangutana. Pag-amping nga ang panaghisgotan dili mahimong panaglalis. Seguroha nga nakatutok kini sa Ginoo, sa Iyang doktrina, ug sa atong mga paningkamot nga himoong prayoridad ang atong labing mahinungdanon nga mga ilhanan.

Kon ang mga estudyante mopakigbahin og mga ehemplo nga mibati nga napugos nga motangtang, mohulip, o dili moprayoridad sa ilang “tulo ka malahutayon nga titulo” isip resulta sa kadili motuo og Dios, pagbugalbugal o pagbiaybiay, puwede nimong ikonsiderar ang dungan nga pagbasa sa mga tudling sa kasulatan mahitungod ni Korihor (tan-awa sa Alma 30:12–53) o ang pana-awon ni Lehi (tan-awa sa 1 Nephi 8:21–34).

Hibaloi ang kamatuoran mahitungod sa unsay gitanyag kaninyo sa Langitnong Amahan ug sa Iyang Anak.

Aron ang mga estudyante maawhag sa pag-apil niini nga bahin sa pakigpulong ni Presidente Nelson, ikonsiderar ang paghimo og sitwasyon nga pagatun-an [case study] sama sa mosunod:

Si Tom usa ka aktibo nga Santos sa Ulahing mga Adlaw. Nagdako siya sa Simbahan, kasamtangan nga naghupot og calling, ug nagtuman sa iyang buluhaton sa pagpangalagad. Apan, bag-ohay lang nanlimbasog siya nga mobati og kalipay ug pagkakontento. Si Tom wala makonsiderar sa promosyon sa trabaho. Nagtuo siya nga siya ang klaro kaayo nga pilion, ug ang wala pagkakuha niini nakapawala sa iyang pagsalig. Dungan niini, si Tom bag-ohay lang nga wala dapita sa kataposan sa semana nga biyahe kauban sa iyang grupo sa mga higala, ug nakabantay siya nga nagkaminos ang mga tubag sa iyang mga post sa social media. Samtang naghunahuna siya mahitungod niining mga kasinatian ug sa unsang paagi kini nakaapekto kaniya, si Tom nakaamgo nga sa hapit sa tibuok niyang kinabuhi, iyang gibase ang iyang gibati nga kamahinungdanon ug bili diha sa mga opinyon sa mga tawo kabahin niya.

Dapita ang mga estudyante sa paghisgot kauban sa ilang kapares kon unsa sa ilang hunahuna ang tingali wala pa masabti sa hingpit o gituohan ni Tom. Human sa pipila ka panaghisgot, tan-awa og dungan ang “Mga Pagpili alang sa Kahangtoran” gikan sa time code nga 20:49 hangtod sa 25:03. Dapita ang mga estudyante sa pagpangita alang sa mga pagtulun-an gikan ni Presidente Nelson nga makatabang sa usa ka tawo nga sama ni Tom. Ang mga estudyante mahimo usab nga mosubay sa mga pulong ni Presidente Nelson sa ilang personal nga mga kopya sa pakigpulong o diha sa Librarya sa Ebanghelyo aron ilang markahan kon unsa ang mahinungdanon alang kanila.

Imbes tun-an kining tibuok seksiyon sa pakigpulong ni Presidente Nelson, mahimo ra nimong tun-an ang mosunod nga mga porsiyon. Ang mga estudyante mahimong mangita niini nga bahin sa pakigpulong ug mobasa usab gikan niini:

Sa tanang kahangtoran, wala nay laing mas nakaila kaninyo o nagpakabana mahitungod kaninyo labaw kaysa gihimo sa [Dios]. Wala nay laing mas maduol kaninyo kaysa Kaniya. … Iyang gipakita ang Iyang kinadak-an nga gugma sa dihang Iyang gipadala ang Iyang Bugtong Anak aron mamatay alang kaninyo. …

Si Jesukristo mao lamang ang malahutayon nga tinubdan sa paglaom, kalinaw, ug hingpit nga kalipay alang kaninyo. Dili gayod masunod ni Satanas ang bisan unsa niini. Ug si Satanas dili gayod motabang kaninyo.

… Ang Dios mobuhat sa tanan nga Iyang mahimo, gawas lang sa paglapas sa inyong kabubut-on, aron motabang kaninyo nga dili mapakyas sa kinadak-an nga mga panalangin sa tanang kahangtoran.

Ikonsiderar ang pagpangutana sa mosunod nga mga pangutana aron matabangan nga mapalawman ang panaghisgotan:

• Unsa ang gitudlo ni Presidente Nelson nga makatabang kaayo sa usa ka tawo nga sama ni Tom?

• Unsa ang ubang hagit nga giatubang sa mga young adult diin ang mga pagtulun-an ni Presidente Nelson makatabang sa pagbuntog?

Pahinumdomi ang mga estudyante sa mga pagtulun-an ni Presidente Nelson gikan sa sinugdanan sa iyang pakigpulong kabahin sa kamahinungdanon sa atong mga pagpili nga modeterminar sa atong kaugmaon. Mahimo nimo silang pabasahon og usab sa mosunod nga mga parapo:

Ang akong katuyoan karong gabhiona mao ang pagseguro nga ang inyong mga mata bukas gayod sa kamatuoran nga kini nga kinabuhi mao gayod ang panahon nga makahimo kamo og desisyon kon unsa nga matang sa kinabuhi ang inyong gusto nga puy-an sa kahangtoran. Karon mao ang imong panahon sa “pag-andam sa pag-atubang sa Dios” [tan-awa sa Alma 12:24; 34:32]. …

Ang matag matarong nga pagpili nga inyong himoon dinhi maghatag gayod og dakong kaayohan karon. Apan ang matarong nga mga pagpili sa mortalidad mohatag og mas dakong kaayohan gayod sa kahangtoran. Kon kamo mopili nga mohimo og mga pakigsaad uban sa Dios ug magmatinud-anon niadto nga mga pakigsaad, kamo adunay saad sa “himaya nga idugang diha sa [inyong ulo] hangtod sa kahangtoran” [Abraham 3:26].

“Kini nga mga kamatuoran kinahanglang moaghat sa inyong kataposang pagbati sa knm—o kahadlok nga mapakyas. Kamo adunay potensiyal nga makaabot sa celestial nga gingharian. Ang kinadak-an nga knm mao ang kapakyas sa pagsulod sa celestial nga gingharian, mopuyo lamang sa mas ubos nga gingharian tungod kay dinhi sa yuta mipili ka nga mosunod lamang sa mga balaod sa mas ubos nga gingharian.

• Base sa unsay gisulti ni Presidente Nelson, ngano nga mahinungdanon ang mga pagpili nga atong buhaton karon?

Isip kabahin sa inyong panaghisgotan sa nahauna nga pangutana, tingali makatabang kaayo ang pagpasabot nga ang Langitnong Amahan ug si Jesukristo gusto nga kitang tanan makabalik ngadto Kanila (tan-awa sa 2 Nephi 26:33) ug mihatag og paagi aron kita makasinati sa mga panalangin sa kinabuhing walay kataposan. Kita makadawat lamang niini nga mga panalangin pinaagi sa paghimo og pagpili nga mopuyo sa celestial nga mga balaod nga gitukod sa Langitnong Amahan ug ni Jesukristo. Sa tinud-anay, ang mga pagpili sa kahangtoran kita ra ang maghimo.

Panapos

Ikonsiderar ang pagdapit sa mga estudyante sa pagpamalandong kon sa unsang paagi nga ang paghinumdom niini nga mga pagtulun-an gikan ni Presidente Nelson makaapekto sa ilang mga kinabuhi ug sa mga sitwasyon nga ilang giatubang. Ang mosunod nga pahayag ni Presidente Nelson ug ang kauban nga mga pangutana makatabang sa mga estudyante nga marebyo kon unsay ilang nakat-onan ug gibati ug maghimo og plano kon unsaon nila kini paggamit diha sa ilang mga kinabuhi.

Mao nga kinsa man kamo? Una ug labing importante, kamo anak sa Dios, anak sa pakigsaad, ug disipulo ni Jesukristo. Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya.

• Unsay inyong nakat-onan gikan sa mensahe ni Presidente Nelson nga gusto ninyong mahinumdoman?

• Unsa ang inyong gibati mahitungod sa inyong kaugalingon ug mahitungod sa Ginoo samtang kamo nagtuon karon?

• Unsa ang inyong buhaton aron madawat ang mga kamatuoran nga si Presidente Nelson mibati nga giawhag sa pagtudlo?

Ikonsiderar ang pagpakigbahin sa inyong pagpamatuod mahitungod sa unsay atong nakat-onan gikan sa pakigpulong ni Presidente Nelson. Dapita ang mga estudyante nga mainampoong maghunahuna kon kinsay ilang gibati nga nagkinahanglan nga makasabot sa mga kamatuoran nga gitudlo ni Presidente Nelson niini nga pakigpulong ug unsaon nga sila makadapit nila sa sunod nga sesyon.