Pasiuna

Minahal nga mga magtutudlo sa institute,

Sa iyang Enero 2024 nga pakigpulong sa S&I nga tinuig nga sibya sa pagbansay, si Elder Clark G. Gilbert miingon, “Samtang padayon namong gigamit ang mga workshop sa pagpalambo sa kaimportante ug paggamit sa institute, dapiton nako ang matag usa sa among magtutudlo sa institute sa pagpangita og mga oportunidad nga maghimo og pinatuyo nga mga workshop nga magtutok sa propetikanhong mga pagpunting nga among gilatid. Ako moawhag kaninyo sa paghatag og espesyal nga pagtagad sa mga pagtulun-an ni Presidente Nelson, nga hatagan og gibug-aton ang iyang piho nga mensahe, “Mga Pagpili alang sa Kahangtoran” (Clark G. Gilbert, ““Sulti, Ginoo, kay ang Imong Sulugoon Namati”” [S&I tinuig nga sibya sa pagbansay, Ene. 26, 2024], Gospel Library).

Kon nakabantay kamo, ang pakigpulong ni Presidente Russell M. Nelson atol sa Mayo 2022 nga tibuok kalibotan nga sibya alang sa mga young adult nga giulohan og “Mga Pagpili alang sa Kahangtoran” piho nga gidirekta ngadto sa mga young adult ug tinud-anay nga nagrepresentar sa tingog sa Ginoo ngadto kanila sa atong panahon (tan-awa sa Doktrina ug mga Pakigsaad 68:4). Isip mga magtutudlo sa institute, kamo adunay espesyal nga pribilehiyo ug kahigayonan sa pagtabang sa pagpakaylap sa tingog sa propeta sa Ginoo. Palihog hatagi og espesyal nga paghunahuna ug paningkamot ang paghatag og makapakat-on nga kasinatian diin ang mga young adult makasabot, mobati, ug mobuhat sa mga pagtulun-an sa pakigpulong ni Presidente Nelson“Mga Pagpili alang sa Kahangtoran.” Ang kauban nga mga materyal makaabag ninyo sa inyong mga paningkamot.

Giapil niini nga mga materyal ang usa ka set sa duha ka leksiyon nga mahimong gamiton aron sa paghatag og sama sa workshop nga matang sa kasinatian sa pagkat-on nga gibase sa pakigpulong ni Presidente Nelson. Dili tuyo nga itudlo ninyo kini nga mga leksiyon sa sama gayod nga mga pulong. Kondili, kini nga mga leksiyon maoy mga kapanguhaan samtang kamo mag-andam og usa ka kasinatian sa pagkat-on nga workshop alang sa inyong mga estudyante. Kamo gawasnon sa pagpahiangay sa mga leksiyon sigon sa pag-aghat nga inyong madawat. Sa sinugdanan sa mga plano sa leksiyon, inyong mabantayan ang pipila ka gitino nga mga resulta sa pagkat-on. Samtang inyong planohon ang mga kalihokan sa pagkat-on alang sa workshop, hinumdomi kini nga mga resulta ug tinguhaa ang pagplano og mga kalihokan sa pagkat-on nga makatabang sa mga estudyante nga makab-ot kini nga mga resulta. Gilaoman nga kini nga workshop mahuman sa duha o tulo ka sesyon, depende sa gitas-on sa matag sesyon.

Samtang inyong giandam ang inyong workshop, hinumdomi ang atong gimbuhaton sa paghatag og nakasentro kang Kristo, nakabase sa kasulatan, nakatutok sa tigkat-on nga mga kasinatian ug sa pagpakonektar sa atong pagtudlo ug sa mga kasinatian sa pagkat-on ngadto sa pag-awhag ug pagsaksi sa Espiritu Santo (tan-awa sa Chad H Webb, “Mga Mensahero sa mga Maayong Balita” [S&I nga tinuig nga sibya sa pagbansay, Ene. 27, 2023], Gospel Library). Tinguhaa usab nga ipatuman ang mga baroganan sa sama kang Kristo nga pagtudlo nga makita diha sa Pagtudlo sumala sa Pamaagi sa Manluluwas.

Kami naglaom sa maanindot nga mga kasinatian nga maangkon sa inyong mga estudyante samtang magbusog sila sa mga pulong ni Kristo sama sa gitudlo ni Presidente Nelson niining makatandog nga pakigpulong. Salamat sa inyong hugot nga pagtuo ug mga pagpamatuod ug sa tanan ninyong mga paningkamot nga mapanalanginan ang mga young adult nga inyong giserbisyohan.