Sesyon 2

Pagkat-on sa mga Resulta: Kini nga Sesyon makatabang sa mga estudyante nga madugangan ang ilang tinguha ug kapasidad sa pag-angkon sa responsibilidad sa ilang pagpamatuod ug pagkakabig.

Mga Posibleng Kalihokan sa Pagkat-on

Sesyon 1 nga rebyo

Mahimo kang mopakita og mga hulagway sama sa mosunod ug dapiton ang mga estudyante sa pag-atubang sa usa ka kauban ug mopakigbahin sa ilang nahinumdoman gikan sa miaging sesyon. Human sa igong panahon, pagdapit og pipila ka estudyante sa pagpakigbahin sa ilang mga tubag ngadto sa klase. Pangutana og follow-up nga mga pangutana aron maseguro nga nasabtan sa mga estudyante ang kaimportante niining tibuok kalibotan nga sibya.

Kon dili kini hisgotan sa mga estudyante, seguradoa nga masabtan nila nga kini nga pakigpulong mao lamang ang higayon nga si Presidente Russell M. Nelson namulong sa tanang young adult sa Simbahan sa samang higayon aron motudlo kanila sa unsay gusto sa Langitnong Amahan nga ilang mahibaloan.

Ipakita pag-usab ang mosunod nga tulo ka kamatuoran nga gipaila sa miaging sesyon:

1. Hibaloi ang kamatuoran kon si kinsa kamo.

2. Hibaloi ang kamatuoran mahitungod sa unsay gitanyag kaninyo sa Langitnong Amahan ug sa Iyang Anak.

3. Hibaloi ang kamatuoran nga may kalabotan sa inyong pagkakabig.

Pahinumdomi ang mga estudyante nga sa miaging higayon nakat-onan nila ang mahitungod sa unang duha niini nga mga kamatuoran.

• Unsa ang pipila ka makadaot nga mga pilosopiya nga mahimo kitang mapanalipdan sa nag-unang duha ka kamatuoran batok niini?

• Sa unsang paagi nga ang pagkahibalo sa unang duha ka kamatuoran makaapekto sa inyong dihadiha dayon nga kaugmaon ug sa inyong kahangtoran?

Ipasabot nga sa sesyon karon makakat-on kita og dugang mahitungod sa kamatuoran nga may kalabotan sa atong pagkakabig.

Hibaloi ang kamatuoran nga may kalabotan sa inyong pagkakabig

Ipasabot nga kon bation sa mga propeta nga ang mga pulong nga ilang gisulti importante kaayo nga atong hinumdoman ug masabtan, usahay balikbalikon nila ang ilang mga mensahe sa daghang mga kahimtang. Usahay tingali mogamit usab sila og mga pulong o hugpong sa mga pulong nga maghatag og gibug-aton sa importansiya sa ilang mga mensahe.

Ipakita o hatagi ang mga estudyante og magkatapad nga hulagway sa mosunod nga mga kinutlo gikan sa “Mga Pagpili alang sa Kahangtoran,” nga gihatag niadtong Mayo 2022, ug sa pakigpulong ni Presidente Nelson niadtong Oktubre 2022 nga kinatibuk-ang komperensiya nga nag-ulohan og “Buntoga ang Kalibotan ug Pangita og Kapahulayan.” Ang laing opsiyon mao ang pagtan-aw og dungan sa “Mga Pagpili alang sa Kahangtoran” gikan sa time code 25:57 hangtod sa 27:01, sundan sa “Buntoga ang Kalibotan ug Pangita og Kapahulayan” gikan sa time code 14:46 hangtod sa 15:33. Dapita ang mga estudyante sa pagtandi sa mosunod nga mga pamahayag.

“Mga Pagpili alang sa Kahangtoran” (Mayo 12, 2022)

Buntoga ang Kalibotan ug Pangita og Kapahulayan” (Okt. 2022)

Ang pagpangita og tubag niini nga mga pangutana magkinahanglan og paningkamot—dakong paningkamot. Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod. Buhata ang inadlaw, sinsero, mapainubsanon nga pag-ampo. Amumaha ang inyong kaugalingon gamit ang mga pulong sa karaan ug sa modernong panahon nga mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon sulod sa templo ug sa buhat sa family history. Samtang inyong himoon ang inyong pagpamatuod nga inyong kinatas-an nga prayoridad, bantayi ang mga milagro nga mahitabo sa inyong kinabuhi.

Akong ipaabot ngadto sa mga miyembro sa tibuok Simbahan sa samang sugo nga akong gihatag sa atong mga young adult sa miaging Mayo. Ako miawhag kanila—ug ako mangamuyo kaninyo karon—sa pag-ako sa responsibilidad sa inyong pagpamatuod ni Jesukristo ug sa Iyang ebanghelyo. Trabahoa kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye. Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.

• Unsa ang pihong mga pulong o mga hugpong sa mga pulong nga iyang gisubli ang talagsaon para ninyo?

• Unsa nga mga hunahuna o mga pagbati ang inyong nabatonan samtang inyong gitandi kining duha ka mga pamahayag?

Mahimong dapiton ang mga estudyante sa pag-link niining duha ka mga pamahayag ngadto sa ilang mga mobile device kon gusto nila. Mahimo usab silang dapiton sa pag-highlight sa mga pulong nga “ako mangamuyo kaninyo” sa duha ka pamahayag.

• Unsa nga mga aksiyon ang gisugyot ni Presidente Nelson sa “pag-ako sa responsibilidad sa inyong pagpamatuod”? (Ikonsiderar ang paglista sa mga tubag sa mga estudyante diha sa pisara.)

• Ngano kaha sa inyong hunahuna nga ang propeta “mangamuyo” kanato sa pag-ako sa responsibilidad sa atong mga pagpamatuod?

• Unsa ang gisaad sa propeta kanato kon atong himoon ang atong pagpamatuod nga maoy atong labing taas nga prayoridad?

Ikonsiderar ang pagsulat sa “Pag-ako sa Responsibilidad sa Inyong Pagpamatuod” diha sa pisara ug dapita ang mga estudyante sa pagpamalandong kon giunsa nila pagdumala ang ilang mga pagpamatuod.

Kini mahimong usa ka maayong panahon sa pagdapit sa mga estudyante sa pagsusi sa kaugalingon kon unsa ang ilang nahimo. Mahimo nilang gamiton ang kinutlo ni Presidente Nelson isip giya sa pagsusi sa ilang mga kaugalingon. Mahimo nilang basahon kini pag-usab sa hilom, mohunong human sa matag kapahayag [sentence] aron mamalandong kon unsay maayo nilang gibuhat ug unsay ilang mapahiangay sa ilang kinabuhi.

Kon tukma, mahimo kang mangulo og diskusyon ug dapita ang mga estudyante sa pagpakigbahin kon unsay nakatabang nila sa pag-ako sa responsibilidad sa ilang mga pagpamatuod.

Dapita ang mga estudyante sa pagkonsiderar sa pagpili og usa o duha ka punto sa pamahayag ni Presidente Nelson nga ilang gibati nga makatabang nila nga mas makadumala sa ilang mga pagpamatuod, ug awhaga sila sa pagplano kon unsaon nila sa pag-apil kana nga mga punto sa ilang kinabuhi.

Palamboa ang inyong pagpamatuod gamit ang kamatuoran

Kini nga bahin sa sesyon gituyo aron matabangan ang mga estudyante nga makatutok sa pagtuon sa Basahon ni Mormon isip usa ka sukaranan nga bahin sa pagpalambo ug pag-amuma sa ilang mga pagpamatuod.

Ikonsiderar ang pagpakita sa mosunod nga mga hulagway ug pagpangutana sa mga estudyante sa pangutana nga anaa sa ubos:

• Sa inyong kasinatian, unsaon ninyo pagkahibalo kon ang inyong pagpamatuod tingali kulang sa pag-atiman?

Ibutang ang mga estudyante ngadto sa gagmay nga mga grupo, ug hatagi ang matag grupo og butang nga kasulatan (usa ka poster, whiteboard, o susama nga butang). Itudlo ang mga pulong ni Presidente Nelson nga “palamboa kini gamit ang kamatuoran,” ug dapita ang matag grupo sa pagsulat og daghang paagi nga ilang mahunahunaan nga ang usa ka tawo makaamuma ug makapahimsog ug makapalambo sa ilang pagpamatuod gamit ang kamatuoran.

Human sa igong panahon, sultihi ang imong mga estudyante nga ipakigbahin nila kon sa unsang paagi ang ilang gisulat nakapalambo ug nakaamuma sa ilang mga pagpamatuod ug pagkakabig.

Si Presidente Nelson mipasabot og maayo sa mga panalangin nga moabot samtang atong palamboon ang atong mga pagpamatuod sa kamatuoran gikan sa Basahon ni Mormon. Ipakita ang mosunod nga pamahayag ug dapita ang mga estudyante sa pagpangita sa mga panalangin nga ilang nasinati:

Kon maghunahuna ako sa Basahon ni Mormon, maghunahuna ako sa pulong nga gahom. Ang mga kamatuoran sa Basahon ni Mormon adunay gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.

Minahal kong mga igsoon, mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona, bisan ang grabeng pagtakboy sa pornograpiya ug sa ubang matang sa adiksyon. (Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 62-63)

• Kanus-a kamo nakasinati og pipila niini nga mga panalangin?

• Aduna bay mga bersikulo o mga seksiyon sa Basahon ni Mormon nga nakatabang sa paglig-on sa inyong pagpamatuod? (Hatagi ang mga estudyante og gamayng panahon sa pagpamalandong ug pagpakigbahin kon gusto nila.)

Importante nga mahibaloan sa mga estudyante nga ang nag-unang rason nga ang Basahon ni Mormon mopalambo ug moamuma sa ilang pagtuo ug mga pagpamatuod mao nga kini nagpamatuod ni Jesukristo. Ipakigbahin ang mosunod nga pamahayag ni Presidente Nelson:

Ang Basahon ni Mormon nakasentro kang Jesukristo. Naglangkob kini sa labing importanting bahin sa Iyang mensahe. Gisulat kini alang kanato, alang sa atong panahon, alang sa atong kinabuhi. Samtang magtuon kita, mamalandong, ug mogamit sa mga baroganan nga gitudlo sulod sa mga pahina niini, atong madawat ang kalig-on sa pagsentro sa atong kinabuhi kang Jesukristo ug magpahimulos sa makalipay nga mga panalangin nga Iyang gisaad kanato, karon ug sa kahangtoran.

(Russell M. Nelson, Facebook, Oct. 17, 2021, facebook.com/russell.m.nelson)

Hatagi og gamayng panahon ang mga estudyante sa pagpangita og mga tudling gikan sa Basahon ni Mormon nga makatabang nila sa pagsentro sa ilang kinabuhi kang Jesukristo. Awhaga sila sa pagpakigbahin niini ngadto sa tawo nga naglingkod sa tapad o duol nila. Makahatag kini og oportunidad sa mga estudyante nga mapalig-on pinaagi sa unsay gipakigbahin nila ug sa ilang mga kaedad. Basin usab og andam ka nga mopakigbahin kon sa unsang paagi ang Basahon ni Mormon nakaamuma sa imong pagpamatuod.

Dapita ang mga estudyante sa paghunahuna kon giunsa nila pagpalambo sa ilang mga pagpamatuod sa kamatuoran gikan sa Basahon ni Mormon ug unsa ang gibati nila nga lahion sa pagbuhat o mas ayohon pa.

Mga Pangutana

Si Presidente Nelson miila sa ubang mga hagit nga atong maatubang samtang maningkamot kita sa pagpalambo sa atong mga pagpamatuod sa kamatuoran ug pag-amuma sa atong mga kaugalingon. Ang usa ka hagit tingali mao ang mga pangutana nga wala nato mahibaloi ang mga tubag. Ipares-pares ang mga estudyante ug hatagi ang matag estudyante og usa sa mosunod nga mga pamahayag nga katun-an. Dapita sila sa pagbasa ug sa pagmarka kon unsa ang labing makahuloganon para kanila.

Si Presidente Russell M. Nelson mipasabot:

Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Kat-oni ang tanan kutob sa inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya. Nagpuyo kita sa kapaigoan nga “walay [ma]tago” [Doktrina ug mga Pakigsaad 121:28]. Mao nga, sa paglabay sa panahon, ang Ginoo motubag sa atong tanang pangutana.

Sa pagkakaron, isubsob ang inyong kaugalingon diha sa buhong nga kapanguhaan sa pagpadayag nga dali ra kaayo natong ma-access. Ako mosaad nga ang pagbuhat sa ingon mopalig-on sa inyong pagpamatuod, bisan kon pipila sa inyong mga pangutana wala pa matubag. Ang inyong sinsero nga mga pangutana, nga gipangutana uban sa pagtuo, mosangpot kanunay sa mas hugot nga pagtuo ug dugang nga kahibalo. (“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 12, 2022], Librarya sa Ebanghelyo)

Elder Lawrence E. Corbridge, kanhi sakop sa Seventy nagtudlo:

Sugdi pinaagi sa pagtubag sa nag-una nga mga pangutana. Adunay nag-una nga mga pangutana ug adunay ikaduha nga mga pangutana. Tubaga og una ang nag-una nga mga pangutana. Dili tanang pangutana managsama ug dili tanang kamatuoran managsama. Ang nag-una nga mga pangutana mao ang labing importante. Ang tanang uban ubos ang kaimportante. Adunay pipila lamang ka nag-una nga mga pangutana. Akong isulti ang upat niini.

1. Aduna bay usa ka Dios kinsa mao ang atong Amahan?

2. Si Jesukristo ba mao ang Anak sa Dios, ang Manluluwas sa kalibotan?

3. Si Joseph Smith usa ba ka propeta?

4. Ang Simbahan ni Jesukristo sa mga Santos sa Ulahing mga Adlaw mao ba ang gingharian sa Dios dinhi sa yuta?

Sa kalainan, ang ikaduha nga mga pangutana mga walay kahumanan. Naglakip kini sa mga pangutana mahitungod sa kasaysayan sa Simbahan, sa dinaghan og asawa, sa mga tawo nga Aprikano ang kaliwat ug ang pagkapari, mga babaye ug ang pagkapari, giunsa paghubad ang Basahon ni Mormon, ang Perlas nga Labing Bililhon, ang DNA ug ang Basahon ni Mormon, kaminyoon sa managsama og sekso, ang lainlaing asoy sa Unang Panan-awon, ug uban pa.

Kon tubagon ninyo ang nag-unang mga pangutana, ang ikaduhang mga pangutana matubag usab, o dili na kaayo kini importante ug kamo makapadayon ra sa mga butang nga inyong nasabtan ug sa mga butang nga wala ninyo masabti ug sa mga butang nga inyong gikauyonan ug sa mga butang nga wala ninyo gikauyoni nga dili basta biyaan na lang ang tanan. (Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu)

Hatagi og panahon ang mga estudyante sa pagpakigbahin sa ilang kapares unsay ilang nakat-onan gikan sa pamahayag nga ilang gitun-an. Mahimo usab ninyong hisgotan ang mga panabot sa mga estudyante isip usa ka klase.

Aron matabangan ang mga estudyante nga maproseso pa ang unsay gitudlo ni Presidente Nelson ug Elder Corbridge, mahimo nimong gamiton ang mosunod nga pag-estudyo sa sitwasyon. Ipakita ang mosunod nga senaryo, o paghatag og kopya niini sa matag kapares. Dapita sila sa pagsusi kon magamit ba nila ang mga pagtulun-an ni Presidente Nelson ug Elder Corbridge sa pagtabang sa young adult niana nga senaryo.

Samtang nagtrabaho ang mga estudyante sa sitwasyon nga pagatun-an, paminaw ug pag-andam nga motabang sa mga estudyante samtang maghisgot sila og mga paagi nga makatabang sila ni Sandra.

Si Sandra usa ka batan-on nga estudyante sa kolehiyo. Mipasakop siya sa Simbahan pagka high school ug ganahan sa pagbati nga nahisakop sa suod ug mahigugmaong komunidad sa mga isig ka disipulo ni Jesukristo. Ganahan kaayo siya nga magkat-on mahitungod sa gipahiuli nga ebanghelyo ni Jesukristo ug nadani sa Basahon ni Mormon. Nasorpresa siya sa malinawong pagbati nga iyang nabatonan samtang gibasa niya ang basahon sa unang higayon. Apan sa dihang ang propesor sa usa sa iyang mga klase sa kolehiyo nahibalo nga si Sandra usa ka miyembro sa Simbahan, nagsugod siya sa pagpangutana kaniya mahitungod sa iyang mga gituohan. Sa dihang misulay siya sa pagtubag, gisundan kini sa propesor og mga pangutana nga wala niya mahibaloi ang mga tubag. Sa paningkamot nga makapangita og mga tubag, gisiksik ni Sandra ang internet ug nakasugat og mas daghan pang pangutana. Kon higala ka ni Sandra, unsaon nimo pagtabang kaniya sa pagnabigar niini nga sitwasyon?

Alang sa dugang nga paghulagway sa usa ka tawo nga nagnabigar og daghang mga pangutana nga wala nila mahibaloi unsaon pagtubag, ang mga estudyante mahimong madasig sa pagbasa sa pakigpulong ni Elder Robert S. Wood sa apendiks, o mahimo nimong i-summarize ang iyang kasinatian alang sa imong mga estudyante. Seguroha ang paghinumdom sa tahas sa Basahon ni Mormon sa pagnabigar ni Elder Wood sa mga pangutana nga gipangutana kaniya.

Kon ang mga higala ug pamilya mopahilayo

Kini nga seksiyon naglakip og gamay nga panaghisgot sa grupo nga makatabang sa mga estudyante kon ang ilang mga higala o mga sakop sa pamilya mobiya sa Simbahan.

Bahina ang mga estudyante ngadto sa gagmay nga mga grupo ug hatagi sila sa mosunod nga pamahayag, o ipapangita kini sa mga estudyante diha sa “Mga Pagpili alang sa Kahangtoran” sa Librarya sa Ebanghelyo. Mahimo usab nimong tan-awon kini nga clip sa time code nga 28:00 hangtod sa 29:10. Human sa pagbasa o pagtan-aw niini nga clip, dapita ang mga estudyante sa paghisgot sa nagsunod nga mga pangutana uban sa ilang mga grupo.

Kon ang mga higala ug pamilya mopalayo sa Simbahan, ipadayon ang paghigugma kanila. [Dili inyong katungdanan] ang paghukom sa pagpili sa laing tawo sama ra nga kamo dili usab angayan nga sawayon sa pagpabiling matinud-anon.

Karon, palihog paminawa ko kon ako mosulti: Ayaw itugot nga kamo mahisalaag pinaagi niadtong kansang mga pagduhaduha [tingali gipasamotan] sa mga butang nga dili ninyo makita diha sa ilang kinabuhi. Labaw sa tanan, ipakita sa inyong maduhaduhaon nga mga higala kon unsa kadako ang inyong paghigugma sa Ginoo ug sa Iyang ebanghelyo. Isorpresa ang ilang maduhaduhaon nga mga kasingkasing gamit ang inyong matuohon nga kasingkasing!

Samtang akohon ninyo ang responsibilidad sa inyong pagpamatuod ug mopatubo niini, mahimo kamong mas epektibo nga instrumento sa mga kamot sa Ginoo. Kamo “[m]adasig pinaagi sa usa ka maayo nga katuyoan” [Alma 43:45]—ang kawsa ni Jesukristo!

• Unsa kaha ang negatibong mga sangpotanan nga mahitabo tungod sa paghusga sa pagpili sa laing tawo?

• Ngano nga makatabang man ang pagkaamgo nga kadtong nagtinguha sa pagpahisalaag kaninyo tingali “naaghat sa mga butang nga dili ninyo makita sa ilang kinabuhi”?

• Unsa kaha ang mahitabo kon inyong isorpresa ang madudahon nga kasingkasing sa inyong matuohon nga kasingkasing?

Human sa ilang gagmay nga grupo nga mga panaghisgot, dapita ang mga estudyante sa pagpakigbahin og usa ka butang nga talagsaon nila sa ilang panaghisgot. Dapita ang ubang mga estudyante sa pagkomentaryo o pagpangutana mahitungod sa unsay gipakigbahin sa ilang mga klasmeyt.

Propetikanhong mga saad

Dapita ang mga estudyante sa pagbasa sa kataposang tulo ka parapo sa “Mga Pagpili alang sa Kahangtoran,” nga mangita sa mga panalangin ug mga saad sa Ginoo ngadto kanila. Mahimong dapiton ang mga estudyante sa pagpakigbahin sa ilang silingan sa usa ka panalangin ug saad nga labing makahuloganon para nila ug ngano.

Mahimo usab nimong dapiton ang pipila ka mga estudyante sa pagpakigbahin kon unsaon nila sa pahatag og laktod nga asoy kon unsa ang ilang nakat-onan gikan niini nga kasinatian.

Sa pagtapos niini nga kasinatian sa workshop, mahimo nimong dapiton ang mga estudyante sa pagrekord sa bisan unsa nga gusto nilang hunongon sa pagbuhat, ipadayon sa pagbuhat, o sugdan sa pagbuhat tungod sa ilang nakat-onan ug gibati niini nga workshop.

Mahimo nimong taposon ang imong pagpamatuod nga ang mga saad sa Ginoo “ang tanan matuman” sumala sa gipamulong sa Iyang sulugoon nga si Presidente Russell M. Nelson (tan-awa sa Doktrina ug mga Pakigsaad 1:38).