Fakataha Fika 1

Ngaahi Ola ʻo e Akó: ʻE lava ke tokoni ʻa e fakataha ako ko ʻení ki he kau akó ke (1) fakamuʻomuʻa honau tuʻunga taʻengata ko e fānau ʻa e ʻOtuá, fānau ʻo e fuakavá, mo e kau ākonga ʻa Sīsū Kalaisí pea (2) mahino kiate kinautolu ʻoku nau fili ʻa e ngaahi tāpuaki kuo foaki ange ʻe he Tamai Hēvaní mo Hono ʻAló.

Ngaahi ʻEkitivitī Ako ʻOku Ala Fakahokó

Ko e hā e meʻa ʻoku finangalo ʻa e Tamai Hēvaní ke ʻilo ʻe he kakai lalahi kei talavoú?

Fakakaukau ke kamata ʻa e lēsoní ʻaki hano fakaʻaliʻali ʻa e ngaahi ʻīmisi mo e fakamatala ko ʻení:

ʻI he ʻaho 15 ʻo Mē 2022, naʻe fakatahataha mai ai ha kakai lalahi kei talavou ʻe lauiafe ʻi he funga ʻo e māmaní pea ʻi he tekinolosiá ke fanongo ki he vahevahe ʻe he palōfita ʻa e ʻEikí ko Palesiteni Lāsolo M. Nalesoní ha pōpoaki naʻe fakataumuʻa pē maʻanautolu.

• Ko e hā e meʻa ʻoku kehe ai pē ʻa e faleʻi ha palōfita mei ha toe taha kehé?

Fakamatalaʻi ange naʻe vahevahe ʻe Palesiteni Nalesoni ʻi heʻene pōpoakí ha ngaahi moʻoni mahuʻinga te ne lava ʻo liliu lahi ʻetau moʻuí, ʻi he taimí ni pea aʻu ʻo taʻengata. Poupouʻi e kau akó ke nau tokanga mo lekooti lolotonga ʻenau akó ha faʻahinga ueʻi mei he Laumālie Māʻoniʻoní ʻe lava ke akoʻi kiate kinautolu ʻa e meʻa ʻoku finangalo ʻa e ʻEikí ke nau ʻilo mo fakahokó.

Mamata fakataha ʻi he “Ngaahi Fili ki he Taʻengatá” mei he taimi 8:08 ki he 11:25. Fakaafeʻi e kau akó ke nau fakafanongo fakalelei ki he meʻa ʻoku loto ʻa e palōfita ʻa e ʻEikí ke nau ʻiloʻi mo mahino kiate kinautolú. Fakakaukau foki ke fakaafeʻi e kau akó ke nau kumi ʻa e “Ngaahi Fili ki he Taʻengatá” ʻi he Gospel Library koeʻuhí ke nau lava ʻo muimui ki ai pea fakaʻilongaʻi ʻa e meʻa ʻoku mahuʻinga kiate kinautolú.

ʻOange ha faingamālie ki he kau akó ke vahevahe ʻa e meʻa naʻa nau mahuʻingaʻia aí pe ongo ki honau lotó, kae pehē foki ki ha faʻahinga fehuʻi pē ʻoku nau maʻu.

• ʻOkú ke pehē ko e hā ʻoku hoko ai ʻa e “Ngaahi Fili ki he Taʻengatá” ko ha tefito totonu ki heʻene leá?

Te ke lava ʻo fakamahinoʻi ange naʻe fakaʻaongaʻi tuʻo ono ʻe Palesiteni Nalesoni ha faʻunga ʻo e foʻi lea filí ʻi he fakamatala ne nau toki fanongoá.

• Ko e hā ha meʻa naʻá ke ako mei he ngaahi lea ʻa Palesiteni Nalesoni fekauʻaki mo e mahuʻinga ʻo ʻetau ngaahi filí ʻi he taʻengatá?

Hiki ʻi he palakipoé pe fakaʻaliʻali ʻa e ngaahi meʻa ko ʻení:

1. ʻIloʻi ʻa e moʻoni fekauʻaki mo koé.

2. ʻIloʻi ʻa e moʻoni fekauʻaki mo e meʻa kuo foaki atu ʻe he Tamai Hēvaní mo Hono ʻAló.

3. ʻIloʻi ʻa e moʻoni ʻoku fekauʻaki mo hoʻo uluí.

Fakamamafaʻi ʻa e foʻi lea moʻoni ʻi he palakipoé ʻaki hano laineʻi ia. Fakamatalaʻi ange ʻoku ʻamanaki mai ʻa e ʻEikí ke akoʻi maʻu pē ʻe Heʻene kau palōfitá ʻa e moʻoní, tautautefito ki he taimi ʻoku puputuʻu pe hē ai ʻa e māmaní. ʻOku hoko ʻa e ngaahi moʻoni ʻe tolu ko ʻeni mei he ʻOtuá naʻe vahevahe ʻe he palōfitá ke ne fakafepakiʻi ʻa e ngaahi fakakaukau fakapoto ʻo e māmaní. ʻI he fakataha ko ʻení, te tau nofotaha ai ʻi he ʻuluaki meʻa ʻe uá.

ʻIloʻi ʻa e moʻoni fekauʻaki mo koé

Fakaʻaliʻali ʻa e lea ko ʻeni ʻa Palesiteni Nalesoní pea kole ki he kau akó ke nau fakalaulauloto ki he ʻuhinga ʻe hoko ai ʻeni ko e ʻuluaki meʻa ʻe finangalo ʻa e ʻEikí ke mahino kiate kinautolú:

ʻOku ou tui kapau naʻe folofola fakahangatonu atu e ʻEikí kiate koe he pooni, ko e ʻuluaki meʻa te Ne fakapapauʻi ʻoku mahino kiate koé ko ho tuʻunga totonú. …

… Ko hai koe?

ʻUluaki mo mahuʻinga tahá, ko ha fānau koe ʻa e ʻOtuá.

Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi.

• ʻOkú ke pehē ko e hā e ʻuhinga ʻe hoko ai ʻeni ko e ʻuluaki meʻa ʻe finangalo ʻa e ʻEikí ke mahino kiate koé?

Tohiʻi ʻa e “fānau ʻa e ʻOtuá,” “fānau ʻo e fuakavá,” mo e “ākonga ʻa Sīsū Kalaisi” ʻi he palakipoé. Ke tokoni ke fakaloloto e mahino ʻa e kau akó ki he ngaahi tuʻunga ʻe tolu ko ʻení, fakaafeʻi e tokotaha ako takitaha ke fili ha tuʻunga ʻe taha pea fekumi ʻi he Gospel Library ki ha ngaahi potufolofola pe fakamatala fakaepalōfita ʻe tokoni ke mahino lelei ange ia kiate kinautolu. ʻOange ha taimi ki he kau akó ke vahevahe ʻa e meʻa naʻa nau maʻú. ʻI heʻenau vahevahé, hiki ʻa e fakamoʻoni fakafolofola ki he potufolofolá pe kupuʻi leá ʻi lalo ʻi he ʻuluʻi tohi totonú. Mahalo ʻe loto ʻa e kau akó ke lekooti ʻa e ngaahi lisi ko ʻení ki heʻenau ako ʻi he kahaʻú.

Fānau ʻa e ʻOtuá

Ke tokoni ke mahino lelei ange ki he kau akó honau tuʻunga ko e fānau ʻa e ʻOtuá, lau pe fakaʻaliʻali ʻa e fakamatala ko ʻení pe tuku ki he kau akó ke nau kumi ia ʻi he “Ngaahi Fili ki he Taʻengatá” ʻi he Gospel Library. Fakaafeʻi e kau akó ke kumi e meʻa ʻoku ʻamanaki ʻa Palesiteni Nalesoni ʻoku tohitongi ʻi honau lotó:

Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá. Kuo mou hivaʻi ʻa e foʻi moʻoni ko ʻení talu mei hoʻomou ako e ngaahi lea ʻo e “Fānau Au ʻa e ʻOtua.” Ka ʻoku tohitongi nai e moʻoni taʻengata ko iá ʻi homou lotó? Kuo fakahaofi nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí?

ʻOku ou manavasiʻi naʻa kuo mou fanongo ki he foʻi moʻoni ko ʻení ʻo tā tuʻo lahi pea hangē pē ia ha lea angamahení kae ʻikai ko ha foʻi moʻoni fakalangi. Ka ʻoku liliu ʻe he anga hoʻo fakakaukau ki hoʻo tuʻunga totonú, ʻa e meimei fili kotoa pē te ke fakahokó.

• ʻOkú ke pehē ko e hā e ʻuhinga ʻoku kaunga ai hono manatuʻi ho tuʻunga ko e fānau ʻa e ʻOtuá, ki he meimei fili kotoa pē te ke faí?

• ʻOkú ke pehē ʻoku ʻuhinga nai ki he hā ke tohitongi ʻa e foʻi moʻoni ko ʻení ʻi ho lotó ʻo fakafehoanaki ki heʻene hoko pē ko ha fakalea mālié?

ʻOange ha faingamālie ki he kau akó ke nau siviʻi ʻa e loloto ʻo e tohitongi ʻa e foʻi moʻoni ko ʻení ʻi honau lotó ʻaki hono fakaafeʻi ke nau fakalaulauloto ki he ongo fehuʻi ko ʻení:

• Ko e hā hono tuʻo lahi hono tokonia ʻe he foʻi moʻoni ko ʻení ʻa e ngaahi fili fakaʻaho ʻokú ke faí?

• Kuo fakahaofi fēfē nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí?

Kapau ʻe ʻaonga, te ke lava foki ʻo fakakaukau ke vahevahe ha ngaahi sīpinga fakafolofola ʻo hono tohitongi ʻa e foʻi moʻoni ko ʻení ʻi he loto ʻo e kakaí (hangē ko ʻení, Mōsese 1:4–21; Ngāue 17:23–28).

Ngaahi Meʻa Kehe ʻOku ʻIloʻi ʻAkí

Fakaafeʻi e kau akó ke nau faʻu ha lisi ʻo ha ngaahi foʻi lea pe fakahingohingoa ʻe 10 pe lahi ange ʻe lava ke fakaʻaongaʻi ke fakamatalaʻi ʻaki kinautolu (hangē ko ʻení, foha, ʻofefine, tokotaha ako, tokotaha sipoti, tokotaha ngāue, manako sipoti, tangataʻi fonua, kolo tupuʻanga, mo e alā meʻa peheé). Hili iá pea tuku leva ke vahevahe ʻe he kau akó ʻenau lisí mo ha kiʻi kulupu tokosiʻi.

Fakamatalaʻi ange naʻe pehē ʻe Palesiteni Nalesoni “ʻe lava ke fakafiefia ʻa e ngaahi fakahingohingoá pea fakahaaʻi hoʻo poupoú koeʻuhí ko ha ngaahi meʻa lelei ʻe niʻihi.”

Fakaafeʻi e kau akó ke fokotuʻutuʻu ʻenau lisi ʻo e ngaahi fakahingohingoá ʻi he hokohoko ʻo honau mahuʻingá, ʻo fakaʻaongaʻi ʻa e “1” ki he meʻa ʻoku mahuʻinga taha kiate kinautolú. Hili hono fai iá, te nau lava ʻo vahevahe mo e kau mēmipa ʻo ʻenau kulupú ʻa ʻenau lisi ʻo e ngaahi meʻa ne fakamuʻomuʻá pea mo ʻenau fakaʻuhinga ki he ʻuhinga ne nau fokotuʻutuʻu ai ʻi he founga ko iá.

Fakaʻaliʻali ʻa e fakamatala ko ʻení pe tuku ke kumi ia ʻe he kau akó ʻi he “Ngaahi Fili ki he Taʻengatá” ʻi he Gospel Library. Fakaafeʻi e kau akó ke nau fakatokangaʻi ʻa e ngaahi hingoa ʻoku fakhingoa ʻaki ʻe Palesiteni Nalesoni iá mo e founga ʻokú ne fakamuʻomuʻa ai kinautolú:

Kapau te u fakahokohoko fakatuʻunga e mahuʻinga ʻo e ngaahi meʻa ʻoku ʻiloʻi ʻaki aú, te u pehē: ʻUluakí, ko ha fānau au ʻa e ʻOtuá—ko ha foha ʻo e ʻOtuá—hoko leva ki aí ko ha foha ʻo e fuakavá, pea hoko ki aí ko ha ākonga ʻo Sīsū Kalaisi mo ha mēmipa mateaki ʻo Hono Siasi kuo fakafoki maí.

ʻE hoko mai ai hoku hingoa fakalāngilangi ko e husepāniti mo e tamaí, pea hoko mai leva ai e ʻAposetolo ʻo e ʻEiki ko Sīsū Kalaisí.

Ko e ngaahi hingoa kehe kotoa pē kuo ui ʻaki au—hangē ko ha toketā fakafaitoʻo, toketā faitafa, tokotaha fakatotolo, palōfesa, lafitani, ʻeikitau, PhD, tangata ʻAmelika, mo e alā meʻa pehē—ʻe toki hokohoko hifo ia he lisí ki lalo.

Fakaʻaliʻali e ngaahi fehuʻi ko ʻení pea fakaafeʻi e kau akó ke nau aleaʻi ia ʻi heʻenau ngaahi kulupú:

• ʻOku ʻi ai nai ha meʻa ʻoku ngali mahuʻinga kiate koe pe fakatupunga ha fehuʻia ʻa e founga naʻe fakamuʻomuʻa ai ʻe Palesiteni Nalesoni ʻa hono ngaahi fakahingoá/meʻa ʻoku ʻiloʻi ʻaki iá?

• Ko e hā e fakatuʻutāmaki ʻo hono fokotuʻutuʻu hala ʻa e hokohokó? Hangē ko ʻení, fēfē kapau naʻe fokotuʻu ʻe Palesiteni Nalesoni ʻa e “palōfesá” ke muʻomuʻa ia ʻi he “ākonga ʻa Sīsū Kalaisí”?

Naʻe fakamatalaʻi ʻe Palesiteni Nalesoni ha niʻihi ʻo e ngaahi nunuʻa kovi ʻe lava ke hoko ʻi he fakahingohingoá. Mamata fakataha ʻi he “Ngaahi Fili ki he Taʻengatá” mei he taimi 15:25 ki he 18:31. Fakaafeʻi e kau akó ke nau feinga ke ʻiloʻi ha faʻahinga foʻi lea pe kupuʻi lea pē ʻokú ne fakamatalaʻi ʻa e ngaahi nunuʻa kovi ʻe lava ke hoko ʻi he ngaahi fakahingohingoá. ʻE lava ke muimui ʻa e kau akó ki he ngaahi lea ʻa Palesiteni Nalesoni ʻi he Gospel Library pea fakaʻilongaʻi ʻa e meʻa ʻoku mahuʻinga kiate kinautolú.

Hili ʻa e fakafanongo ki he fakamatala ko ʻení, fakaafeʻi e kau akó ke nau aleaʻi e fehuʻi ko ʻení ʻi heʻenau kulupú:

• Ko e hā ha meʻa naʻá ke ako fekauʻaki mo e ngaahi fakahingohingoá mei he lea ʻa Palesiteni Nalesoní? Ko e hā ha niʻihi ʻo e ngaahi fakatuʻutāmaki ʻe lava ke hoko ʻi he fakahingohingoá?

Hili e fealēleaʻaki ko ʻení, mamata fakataha ʻi he “Ngaahi Fili ki he Taʻengatá” mei he taimi 18:32 ki he 19:48. Fakaafeʻi e kau akó ke nau fakafanongo ki he meʻa ʻoku akoʻi ʻe Palesiteni Nalesoni fekauʻaki mo hono tokangaʻi ʻo e ngaahi fakahingoá, ngaahi fakalāngilangí, mo e ngaahi meʻa ʻoku ʻiloʻi ʻaki kitautolu ʻa ia ʻoku lava ke tau maʻú. ʻE lava ke muimui ʻa e kau akó ki he ngaahi lea ʻa Palesiteni Nalesoni ʻi he Gospel Library pea fakaʻilongaʻi ʻa e meʻa ʻoku mahuʻinga kiate kinautolú.

• ʻE tokoni fēfē ʻa hono fakamuʻomuʻa e ngaahi fakaʻilonga hangē ko e “fānau ʻa e ʻOtuá,” “fānau ʻo e fuakavá,” mo e “ākonga ʻa Sīsū Kalaisí” ke maluʻi mei he ngaahi fakatuʻutāmaki ʻo e fakahingohingoá ʻa ia ne fakatokanga mai ʻe Palesiteni Nalesoni kiate kitautolú?

Fakamahinoʻi ange ʻoku ʻikai ʻuhinga hono hiki hake ʻetau ngaahi “tuʻunga tuʻuloa” mo “tefito” ʻe tolu ʻoku ʻilolahia tahá ke pehē ʻoku kole mai ʻe Palesiteni Nalesoni ke tau tukuange ʻa e ngaahi tuʻunga kehe kotoa pē. Ka ʻokú ne faleʻi mai ke fakapapauʻi ʻoku ʻikai ke tau tuku ke nau toʻo, fetongi, pe fakamuʻomuʻa ange ia ʻi he ngaahi meʻa ʻoku mahuʻinga tahá.

• Ko e hā ha ngaahi founga ʻoku lolotonga feinga ai ʻa Sētane ke feingaʻi koe mo ho toʻú ke mou toʻo, fetongi, pe fokotuʻu ke fakamuimui ʻa homou tuʻunga ko e fānau ʻa e ʻOtuá, fānau ʻo e fuakavá, mo e ākonga ʻa Sīsū Kalaisí?

Fakakaukauʻi fakalelei ʻa e founga ʻoku tali ʻaki hoʻo kau akó ʻa e fehuʻi kimuʻá. Tokanga ke ʻoua naʻa hoko ʻa e fealēleaʻakí ko ha fakakikihi. Fakapapauʻi ʻoku fakatefito ia ʻi he ʻEikí, ko ʻEne tokāteliné, mo ʻetau ngaahi feinga ke fakamuʻomuʻa hotau tuʻunga mahuʻinga tahá.

Kapau ʻoku ʻohake ʻe he kau akó ha ngaahi sīpinga ʻo e ongoʻi ʻoku teke kinautolu ke nau toʻo, fetongi, pe fokotuʻu ke fakamuimui ʻenau “ngaahi ikuʻanga tuʻuloa ʻe tolu” ko e ola ʻo e taʻetui ʻotuá, manukí, pe fakaangá, ʻe lava ke ke fakakaukau ke mou lau fakataha ha ngaahi potufolofola fekauʻaki mo Kolihola (vakai, ʻAlamā 30:12–53) pe ko e mata meʻa-hā-mai ʻa Līhaí (vakai, 1 Nīfai 8:21–34).

ʻIloʻi ʻa e moʻoni fekauʻaki mo e meʻa kuo foaki atu ʻe he Tamai Hēvaní mo Hono ʻAló.

Ke poupouʻi e kau akó ke nau kau mai ʻi he konga ko ʻeni ʻo e lea ʻa Palesiteni Nalesoní, fakakaukau ke faʻu ha fakamatala fakatātā hangē ko ʻení:

ʻOku mālohi ʻa Tomu ʻi he Siasí. Kuó ne tupu hake ʻi he Siasí, ʻoku lolotonga ʻi ai hono uiuiʻi, pea ʻokú ne fakahoko ʻene ngāue fakaetauhí. Neongo ia, ka kuó ne fāifeinga kimuí ni mai ke ne ongoʻi fiefia mo fiemālie. Naʻe ʻikai kau ʻa Tomu ʻi ha hiki ki ha lakanga foʻou ʻi he ngāué. Naʻá ne fakakaukau ko ia naʻe mahino ʻe fili ki he lakangá, pea naʻe hoko hono ʻikai fili iá ke ne loto-mamahi ai. ʻIkai ngata aí, naʻe ʻikai fakaafeʻi ʻa Tomu ki ha ʻeveʻeva he fakaʻosinga ʻo e uiké mo hono ngaahi kaungāmeʻá, pea ʻokú ne fakatokangaʻi ʻoku fakaʻau ke siʻisiʻi ange ʻa hono ʻomi ʻe he kakaí ha tali ki heʻene fakamatala ʻi he mītia fakasōsialé. ʻI he fakakaukau ʻa Tomu ki he ngaahi aʻusia ko ʻení mo e founga kuo nau uesia ai iá, kuo kamata ke ne fakatokangaʻi ko e konga lahi ʻo ʻene moʻuí, kuó ne fakatefito ʻene ongoʻi mahuʻingaʻiá ʻi he ngaahi fakakaukau ʻa e kakai kehé kiate iá.

Fakaafeʻi e kau akó ke aleaʻi mo honau hoá ʻa e meʻa ʻoku nau pehē ʻoku ʻikai mahino kakato pe tui ki ai ʻa Tomú. Hili ha fealēleaʻaki, mamata fakataha ʻi he “Ngaahi Fili ki he Taʻengatá” mei he taimi 20:49 ki he 25:03. Fakaafeʻi e kau akó ke nau kumi ha ngaahi akonaki meia Palesiteni Nalesoni ʻe ala tokoni ki ha taha hangē ko Tomú. ʻE lava foki ke muimui ʻa e kau akó ki he ngaahi lea ʻa Palesiteni Nalesoní ʻi heʻenau tatau fakataautaha ʻo e leá pe ʻi he Gospel Library koeʻuhí ke nau lava ʻo fakaʻilongaʻi ʻa e meʻa ʻoku mahuʻinga kiate kinautolú.

Te ke lava ʻo ako ʻa e ngaahi konga ko ʻení, kae ʻikai ako ʻa e konga kotoa ko ʻeni ʻo e lea ʻa Palesiteni Nalesoní. ʻE lava ke maʻu ʻe he kau akó ʻa e konga ko ʻeni ʻo e leá pea laukonga foki mei ai:

ʻI he kotoa ʻo e taʻengatá, he ʻikai ha taha ʻe toe lahi ange ʻene ʻilo mo e tokanga kiate koé [ʻi he ʻOtuá]. He ʻikai ha taha ʻe toe ofi ange kiate koe ʻiate Ia. … Naʻá Ne fakahaaʻi ʻEne ʻofa taupotu tahá ʻi Heʻene fekauʻi mai Hono ʻAlo Pē Taha Naʻe Fakatupú ke pekia maʻaú. …

Ko Sīsū Kalaisi pē ʻa e maʻuʻanga ʻamanaki lelei, melino, mo e fiefia tuʻuloa kiate koé. He ʻikai teitei lava ʻe Sētane ʻo fakahoko ha taha ʻo e ngaahi meʻá ni. Pea he ʻikai teitei tokoniʻi koe ʻe Sētane.

… ʻE fakahoko ʻe he ʻOtuá ʻa e meʻa kotoa pē te Ne lavá, ʻo ʻikai maumauʻi hoʻo tauʻatāina ke filí, ke tokoniʻi koe ke ʻoua naʻá ke liʻaki ʻa e ngaahi tāpuaki maʻongoʻonga taha ʻi he kotoa ʻo e taʻengatá.

Fakakaukau ke ʻeke ha niʻihi ʻo e ngaahi fehuʻi ko ʻení ke tokoni ke fakaloloto ʻa e fealēleaʻakí:

• Ko e hā e meʻa naʻe akoʻi ʻe Palesiteni Nalesoni ʻe ala tokoni ki ha taha hangē ko Tomú?

• Ko e hā ha ngaahi faingataʻa kehe ne fehangahangai mo e kakai lalahi kei talavoú ʻe ala tokoni ʻa e ngaahi akonaki ʻa Palesiteni Nalesoní ke nau ikunaʻí?

Fakamanatu ki he kau akó ʻa e ngaahi akonaki ʻa Palesiteni Nalesoni mei he kamataʻanga ʻo ʻene leá fekauʻaki mo e mahuʻinga ʻo ʻetau ngaahi fili ʻokú ne fakapapauʻi hotau kahaʻú. Te ke lava ʻo ʻai ke nau toe lau ʻa e ngaahi palakalafi ko ʻení:

Ko ʻeku taumuʻa he pōní ke fakapapauʻi ʻoku mahino ki ho fakakaukaú ʻa e foʻi moʻoni ko e moʻuí ni ko e taimi moʻoni pē ia ke ke fili ai pe ko e faʻahinga moʻui fēfē ʻokú ke fiemaʻu ki he taʻengatá. Ko homou taimi ʻeni “ke teuteu ai ke feʻiloaki mo e ʻOtuá” [vakai, ʻAlamā 12:24; 34:32]. …

ʻE hanga ʻe he fili māʻoniʻoni kotoa pē ʻokú ke fai hení ʻo ʻoatu ha ngaahi lelei lahi ʻi he moʻuí ni. Ka ʻe hanga ʻe he ngaahi fili māʻoniʻoni ʻi he moʻui fakamatelié ʻo ʻoatu ha ngaahi lelei taʻemafakatataua ʻi he taʻengatá. Kapau te ke fili ke fai ha ngaahi fuakava mo e ʻOtuá pea tauhi faivelenga ki he ngaahi fuakava ko iá, ʻokú ke maʻu ai ʻa e talaʻofa ʻo e “tānaki atu ʻa e nāunau ki [ho] ʻulú ʻo taʻengata pea taʻengatá” [ʻĒpalahame 3:26].

ʻOku totonu ke ueʻi ʻe he ngaahi moʻoni ko ʻení hoʻo ongoʻi manavasiʻi telia naʻá ke tō he faingamālié. ʻOkú ke maʻu ʻa e ivi malava ke aʻusia e puleʻanga fakasilesitialé. Ko e meʻa taupotu taha ʻoku totonu ke ke manavasiʻi ki aí ko hoʻo tō mei he puleʻanga fakasilesitialé, ʻo iku nofo ʻi ha puleʻanga siʻisiʻi ange koeʻuhí he naʻá ke fili ʻi he māmaní ke moʻui ʻaki pē e ngaahi fono ʻo ha puleʻanga siʻisiʻi ange.

• Makatuʻunga ʻi he meʻa kuo lea ʻaki ʻe Palesiteni Nalesoní, ko e hā e ʻuhinga ʻoku fuʻu mahuʻinga ai e ngaahi fili ʻoku tau fai he taimi ní?

ʻE ala tokoni ke fakakau ʻi he konga ʻo hoʻomou fealeaʻaki ʻo e fehuʻi kimuʻá ʻa hono fakamahinoʻi ange ʻoku finangalo ʻa e Tamai Hēvaní mo Sīsū Kalaisi ke tau foki kotoa ange kiate Kinaua (vakai, 2 Nīfai 26:33) pea kuó Na ʻomi ha founga ke tau aʻusia ai ʻa e ngaahi tāpuaki ʻo e moʻui taʻengatá. Te tau toki lava pē ʻo maʻu ʻa e ngaahi tāpuaki ko ʻení ʻi heʻetau fili ke moʻui ʻaki ʻa e ngaahi fono fakasilesitiale kuo fokotuʻu ʻe he Tamai Hēvaní mo Sīsū Kalaisí. Ko e moʻoni, ko e ngaahi fili ki he taʻengatá ʻoku ʻatautolu ia.

Fakaʻosí

Fakakaukau ke fakaafeʻi e kau akó ke fakalaulauloto ki he founga ʻe lava ke liliu ai ʻenau moʻuí pea mo e ngaahi tūkunga ʻoku nau fehangahangai mo iá ʻi hono manatuʻi e ngaahi akonaki ko ʻeni meia Palesiteni Nalesoní. ʻE lava ke tokoni ʻa e lea ko ʻeni ʻa Palesiteni Nalesoni mo e ngaahi fehuʻi ʻoku ʻoatu fakataha mo iá ke toe vakaiʻi ʻe he kau akó ʻa e meʻa kuo nau ako mo ongoʻí pea faʻu ha palani ki he founga te nau fakaʻaongaʻi ai ia ʻi heʻenau moʻuí.

Ko ia ai, ko hai koe? Ko e ʻuluaki mo e mahuʻinga tahá, ko e fānau koe ʻa e ʻOtuá, ko ha fānau ʻo e fuakavá, pea mo ha ākonga ʻo Sīsū Kalaisi. ʻI hoʻo tali e ngaahi moʻoni ko ʻení, ʻe tokoniʻi koe ʻe heʻetau Tamai Hēvaní ke ke aʻusia hoʻo taumuʻa taupotu taha ke moʻui taʻengata ʻi Hono ʻao māʻoniʻoní.

• Ko e hā e meʻa ʻokú ke ako mei he pōpoaki ʻa Palesiteni Nalesoní ʻokú ke loto ke manatuʻí?

• Ko e hā e meʻa naʻá ke ongoʻi fekauʻaki mo koe pe fekauʻaki mo e ʻOtuá lolotonga hoʻo ako he ʻaho ní?

• Ko e hā ha meʻa te ke fai ke tali ai ʻa e ngaahi moʻoni naʻe ongoʻi ʻe Palesiteni Nalesoni ke akoʻí?

Fakakaukau ke vahevahe hoʻo fakamoʻoni fekauʻaki mo e meʻa kuo tau ako mei he lea ʻa Palesiteni Nalesoní ʻo aʻu mai ki he taimi ní. Fakaafeʻi e kau akó ke nau fakakaukau ʻi he faʻa lotu pe ko hai ʻoku nau ongoʻi ʻoku fiemaʻu ke mahino kiate ia ʻa e ngaahi moʻoni ʻoku akoʻi ʻe Palesiteni Nalesoni ʻi he lea ko ʻení pea mo e founga te nau lava ai ʻo fakaafeʻi kinautolu ki he fakataha hono hokó.