24 enero

Chan ru tinkawresi wib’ re tintz’aqonq sa’ lix “sachb’a-ch’oolejil k’anjel” li Dios?

Tzol’leb’ ut Sumwank 3–5

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq laj santil paab’anel ke’ok chirab’inkil resil lix k’ojlajik wi’chik li evangelio, naab’al reheb’ ke’raj xnawb’al chan ru te’tenq’anq sa’ li k’anjel. Lix yuwa’ li profeet aj Jose Smith kixpatz’ k’a’ru li rajom li Qaawa’ choq’ re. Lix sumenkil xb’aan li Qaawa’ sa’ Tzol’leb’ ut Sumwank 4 ak xwaklesi xch’ooleb’ naab’al li kristiaan chi k’anjelak “chi anchaleb’ xch’ool, xmetz’ew, xk’a’uxl ut xkawilal” (raqal 2). Maak’a’ naxye ma yooko chi k’anjelak sa’ mision malaj sa’ yalaq k’anjel sa’ li Iglees, juntaq’eet li na’ajman: li rajom qach’ool chi k’anjelak chiru li Dios rik’in paab’aal, yo’onink, ut rahok (chi’ilmanq Tzol’leb’ ut Sumwank 4:2–6). Chan ru taatenq’aheb’ li saaj re naq te’raj k’anjelak chiru li Qaawa’, ut re naq te’xkawresi rib’ choq’ re li k’anjel li truuq te’xk’ul moqon sa’ xyu’am?

Re xkawresinkil aawib’ chixb’eresinkileb’ li saaj sa’ li tzolok a’in, naru taawil ut taak’oxla li aatin li natawman sa’ “Xkomon chik li tenq’.”

Xtenq’ankileb’ li wan sa’ aajel ru, a’an ajwi’ jun k’anjel sa’ li kolb’a-ib’.

Tzolok sa’ komonil

Maare rilb’al Tzol’leb’ ut Sumwank 3–5 chiru li xamaan a’in ak xwaklesi xch’ooleb’ li saaj chi k’anjelak chiru li Qaawa’ chi jwal yalb’ileb’ wi’chik xq’e. Re xtenq’ankileb’ chixwotzb’al li neke’xk’oxla, naru taapatz’ reheb’ naq te’xk’oxla naq yookeb’ chi tz’ile’k rix choq’ re jun li trab’aaj. K’a’ru tixsik’ jun li patron sa’ xna’leb’eb’ li ani te’xk’ul li trab’aaj? Naru te’ril Tzol’leb’ ut Sumwank 4 ut te’xk’e reetal k’a’ru naxsik’ li Qaawa’ sa’ xna’leb’eb’ li ani te’raj tz’aqonk sa’ lix k’anjel. Naru xb’aanunkil a’in re xtenq’ankileb’ li saaj chixk’oxlankil li k’a’ru naru te’xb’aanu re naq te’tz’aqonq sa’ lix “sachb’a-ch’oolejil k’anjel” li Dios (Tzol’leb’ ut Sumwank 4:1).

• Re xtenq’ankileb’ li saaj chixtzolb’al chan ru te’tz’aqonq sa’ xseeb’ankil li k’anjel re li kolb’a-ib’, tz’iib’a a’in chiru li pizarron: Li Dios naxb’oq chixjunileb’ chi chalk rik’in li Kristo ut chi tenq’ank sa’ lix k’anjel rik’in xyu’aminkil lix evangelio li Jesukristo, xtenq’ankileb’ li wankeb’ sa’ aajel ru, ut xjunajinkileb’ li junkab’al chi junelik. Patz’ reheb’ li saaj k’a’ut naq li paab’aal, li yo’onink, ut xkomoneb’ chik li na’leb’ li yeeb’ileb’ resil sa’ Tzol’leb’ ut Sumwank 4 tixtenq’aheb’ chixb’aanunkil li k’anjel re li kolb’a-ib’. K’eheb’ li saaj sa’ jalan jalanq li ch’uut, ut patz’ reheb’ naq te’aatinaq chirix xk’eeb’aleb’ xna’aj li na’leb’ a’an sa’ xyu’am. K’a’ru naru taqab’aanu re naq aajelaq wi’chik ru li k’anjel re li kolb’a-ib’ sa’ li qayu’am?

• Patz’ reheb’ li saaj naq te’ril li aatin sa’ “Xkomon chik li tenq’,” re truuq te’xwotz jun aatin chirix li k’anjelak chiru li Qaawa’ sa’ li Iglees. Patz’ reheb’ naq te’xwotz li aatin xe’xtaw, ut k’a’ut naq nawulak chiruheb’. Chan ru te’xb’aanu li xe’xtzol anajwan ut moqon?

• Maare wankeb’ li komon yooqeb’ chixkawresinkileb’ rib’ choq’ re xik sa’ mision. Naru taapatz’ reheb’ naq te’xye resil chan ru yookeb’ chixkawresinkil rib’ re choq’ re li k’anjelak. Re xtenq’ankileb’, naru taaye li patz’om li kok’ aj xsa’ napatz’man re li Elder David A. Bednar: “K’a’ru naru tinb’aanu re xkawresinkil wib’ chi jwal us wi’chik choq’ re li mision?” (“Llegar a ser misioneros,” Liahona, noviembre 2005, 45). Chan ru te’xsume li saaj li patz’om a’an? K’a’ru kixye li Elder Bednar? Naru taab’oq wiib’ oxib’ li komon li ak xe’sutq’i chaq sa’ mision chixyeeb’al k’a’ru xe’xb’aanu re xkawresinkil rib’ choq’ re li mision, ut k’a’ru xe’raj raj xb’aanunkil.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Mateo 28:19–20; Tzol’leb’ ut Sumwank 18:9–16; 50:13–14; 88:81 (Teneb’anb’ilo chixwotzb’al li evangelio)

• Dieter F. Uchtdorf, “Li ani nim xwankil sa’ eeyanq,” Jolomil ch’utub’aj-ib’ re abril 2017

• Carl B. Cook, “K’anjelak chiru qas qiitz’in,” Jolomil ch’utub’aj-ib’ re octubre 2012

• “Cómo prepararse para servir,” ChurchofJesusChrist.org/topics/missionary-preparation

Li k’utuk jo’ li Kolonel

Li Kolonel kixb’oqeb’ lix tzolom chixch’olob’ankil li yaal, ut naq ke’xb’aanu, li Musiq’ej kixtoch’ xch’ooleb’. Naq nakatk’utuk chirix li ab’ink, patz’ reheb’ li saaj naq te’xch’olob’ xyaalal naq aajel ru xpaab’ankileb’ li taqlahom. (Chi’ilmanq Li k’utuk jo’ li Kolonel [2016], 11, 32.)