28 ni Feperueri.

Na Cava e Vakaibalebaletaki ena Veivutuni?

Vunau kei na Veiyalayalati 18–19

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e vou tu ki na noda tabanalevu, ka da na veivuke vakacava mera vakataukeitaki? Na cava eda sa cakava tiko me vakaibalebale kina na noda gauna ena kuoramu se kalasi?

• Noda itavi se icolacola. Na itavi kei na icolacola cava soti e tiko vei keda vaka cauravou kei na goneyalewa? E rawa vakacava ni da vakataucokotaki ira vinaka?

• Noda bula. Na cava eda sa cakava tiko meda vakataki Jisu Karisito vakalevu cake ka ciqoma na Nona kaukauwa ena noda bula? Na cava eda sa cakava tiko me vukea na noda matavuvale me lako mai ki Vua?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E sa dredre me wiliki na Vunau kei na Veiyalayalati 19:16–19 ka sega ni vakila na loloma ni iVakabula kivei keda. Ena veitikina oqo, a vakamacalataka o Koya na sotavi dredre a lako curuma ni sorovaka tu na noda ivalavala ca ka vakatakila na vuna a lomasoli kina o Koya me vakararawataki sara vakalevu—“me [da] kakua kina ni vakararawataki kevaka [eda] na veivutuni.” Na veivutuni esa dua na veivakalougatataki e vakavutuya na iVakabula. E sa dua na sasaga tudei, ena veisiga ni vuki tani mai na ivalavala ca ka vuki vua na Kalou. E sa tiki ni tuvatuva ni Tamada Vakalomalagi me vukei keda ni lesu tale ki Vua. Na kilai vakamatata ni sala ni veivutuni sa rawa ni vukea na vakasavasavataki ni noda ivalavala ca, veisautaka na yaloda kei na lomada, ka toro voleka sara kivua na Kalou.

E sa vukei iko vakacava na veivutuni mo lako voleka mai na Tamada Vakalomalagi? E rawa vakacava ni o vukei ira o vakavulica ni gadreva mera veivutuni? E rawa vakacava ni o vukei ira ni raica ni sa ka ni sasaga ni veisiga na veivutuni ka sega walega ni tauri vakawawa tu me baleta na ivalavala ca bibi? Ni ko vakarau tu mo veivakavulici, navuca ni vulica na itukutuku i Peresitedi Russell M. Nelson “E Rawa ni Vinaka Cake na Veika Eda Cakava tiko meda Vinaka Cake kina” (Liaona, Me 2019, 67–69).

Karisito e Kecisemani, mai vei Harry Anderson

Vulica Vata

Na parofita kece mai na ivakatekivu ni gauna esa kacivi ira tu na tamata mera veivutuni. Ia, de dua e sega na veisureti ni veivutuni esa vakatuburarawa tu me vaka na nona na iVakabula e kune ena Vunau kei na Veiyalayalati 19:15–19, era sa na rairai wilika na itabagone ena macawa oqo. O na via tarogi ira se cava era sa vulica me baleta na iVakabula mai na veitikina oqo. Na cava era kaya na veitikina oqo me baleta na bibi ni veivutuni ena mata ni Turaga? Na vakasama eso oqo sa rawa ni vukei ira o vakavulica ni raica na veivutuni me vaka e dua na veivakalougatataki ki na nodra bula e veisiga.

• Me vukea na lewe ni kuoramu se kalasi ni kila vakavinaka na sala e vakalougatataka kina na nodra bula na veivutuni, sa rawa ni o tekivu ena tarogi ni veitaro oqo: Au na kila vakacava ni ra sa cakacaka tiko na noqu sasaga ni veivutuni? Ena vukei au vakacava na iVakabula meu veisau? Me ikuri ni kena vosoti na ivalavala ca, na veivakalougatataki cava tale e vu mai na veivutuni? Sureta na lewe ni kalasi mera wilika e dua se sivia na ivolanikalou ena “iVurevure Veitokoni Eso,” ni vakaraici na isau ni taro eso. Na cava era sa kunea? Me tiki ni veivosaki oqo, sa rawa ni o vakaraitaka na vidio “Repentance: A Joyful Choice” (ChurchofJesusChrist.org).

• E vuqa na itabagone e tawakila matata na cava e vakaibalebaletaki ena veivutuni. Era na rairai vuturitaka na veivutuni se nanuma ni sa tutaki duadua ga ki na ivalavala ca bibi eso. Me vukea na vakadodonutaki ni tawakila matata oqo, sa rawa ni o sureta na lewe ni kuoramu se kalasi mera vulica na wase ni tukutuku i Peresitedi Russell M. Nelson “E Rawa ni Vinaka Cake na Veika Eda Cakava tiko meda Vinaka Cake kina” (Liaona, Me 2019, 67–69), ni vakaraici na malanivosa eso e vukei ira ni kila deivaki na cava e vakaibalebaletaki ena veivutuni. Na cava era raica e a vukei ira ni vakasamataka na veivutuni ena dua na sala vou? Na veivakalougatataki cava so e yalataka o Peresitedi Nelson vei ira ka veivutuni?

• E rawa vakacava ni o vukei ira o vakavulica ni kila vakavinaka na vuna kei na sala eda veivutuni kina? Na itukutuku i Peresitedi Dallin H. Oaks “Vakasavasavataki ena Veivutuni” (Liaona, Me 2019, 91–94) ena rawa ni veivuke. Sa rawa ni o vida na kuoramu se kalasi ki na va na ilawalawa ka lesia na ilawalawa yadua me wilika e dua vei ira na va na wase ni vosa i Peresitedi Oaks. Rawa ni qai wasea na ilawalawa yadua e dua na ivakaleka ni ka era sa wilika ki na ilawalawa tale eso, vata kei na ivolanikalou cavaga mai na itukutuku e tokona na ka era sa vulica. Sa rawa ni o tinia ni kerea na lewe ni kuoramu se kalasi mera wasea na nodra ivakadinadina me baleta na bibi ni veivutuni ena ituvatuva ni Kalou.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• 2 Nifai 31:13; Inosi 1:5–9; Mosaia 4:9–12; 27:23–26, 35; Alama 19:33; 36:18–21, 24; 37:9; Ilamani 15:7–8; Moronai 6:8; Vunau kei na Veiyalayalati 58:42–43; 64:9–10 (iVolanikalou eso me baleta na veivutuni)

• Vunau kei na Veiyalayalati 18:10–16 (Sa vakavure reki na veivutuni)

• “Veivutuni,” ena Me iSakisaki ni iTabagone (2011), 28–29

• ”Veivutuni ena vuku ni Veisorovaki i Jisu Karisito,” ena wase 3 ni Vunautaka na Noqu Kosipeli (2019), 51–52

• “Repentance Is a Blessing to All of Us,” “Atonement—Not a One-Time Thing” (vidio), ChurchofJesusChrist.org

Veivakavulici ena iVakarau ni iVakabula

Na iVakabula a sureta eso mera cakacaka ena vakabauta ka bulataka na dina eso a vakavulica. Na cava o rawa ni cakava mo vukei ira kina o vakavulica ni raica na kaukauwa ni veivutuni e veisiga? (Raica na Veivakavulici ena iVakarau ni iVakabula, [2016], 31,35.)