14 ni Maji

E Veicuqeni Vakacava Vakai Rau na iTavi Vakalou ni Turaga kei na Marama?

Vunau kei na Veiyalayalati 23–26

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava rawa ni cakava meda vukei ira kina? O cei me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda vakayacora? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vakaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

A solia vakatautauvata na Tamada Vakalomalagi vei ira na turaga kei na marama na itavi bibi ni kena vakataucokotaki na Nona ituvatuva. E rau veicuqeni vakairau na itavi oqo. Me vukei ira na turaga kei na marama ni vakataucokotaka na itavi oqo, a solia vei ira o Koya na isolisoli kei na kilaka vakasakiti eso. Era sa na rairai vulica na lewe ni kuoramu se kalasi na Vunau kei na Veiyalayalati 25 ena macawa oqo. Ena ivakatakila oqo, a soli vakasala na Turaga vei Ema Simici ena nona itavi bibi ena Vakalesui mai ni kosipeli ka vakamacalataka na sala e rawa ni veitokoni kina vakai rau o Josefa kei Ema. Na ivakaraitaki cava so o sa raica vei ira na turaga kei na marama ni cakacaka vata tiko ena sala veicuqeni eso ni kena vakayacori na cakacaka ni Turaga? E rawa vakacava ni o vakauqeti ira na cauravou se goneyalewa o vakavulica ni kila vakamatata na nodra itavi vakalou ka cakacaka vata ni tara na matanitu ni Kalou?

Ni ko vakarau tu mo veivakavulici, navuca mo railesuva “Na Matavuvale: Ai Vakaro ki Vuravura Raraba” (ChurchofJesusChrist.org) kei na itukutuku i Peresitedi Linda K. Burton “Eda na Toso Cake Vata” (Liaona, Me 2015, 29–32).

Sa rawa ni vulica na cauravou kei na goneyalewa mera cakacaka vata ena tarai cake ni matanitu ni Kalou.

Vulica Vata

Me tekivutaki e dua na veivosaki ena sala e cakacaka vata kina na turaga kei na marama ena matanitu ni Kalou, navuca ni sureta na lewe ni kuoramu se kalasi mera railesuva na Vunau kei na Veiyalayalati 25. Na cava e kaya na Turaga me baleta na itavi eso e tiko vei Ema kei Josefa vakai rau? Na cava eda rawa ni vulica mai na wase 25 ena sala sa dodonu mera cakacaka vata kina na veiwatini? O na via solia vei ira o vakavulica eso na pepa mera vola kina na ka era raica ka wasea na nodra nanuma. Qai digidigi mai na veitaviqaravi oqo me vukei ira ni kila vakamatata cake na sala e namaki ira tu kina na luvena tagane kei na yalewa na Kalou mera cakacaka vata.

• Rawa li ni o vakasamataka e dua na ivakaraitaki me vukei ira na lewe ni kuoramu se kalasi ni kila vakamatata na ibalebale ni “vakaveicuqeni”? Me ivakaraitaki, sa rawa ni ra tukuna na roka veicuqeni eso se veivosakitaka na sala e vakavuna me totoka vakalevu kina na sereivakatagi na duidui ni domo ena dua na matasere. E dau veicuqeni vakacava vakairau na itavi vakalou ni turaga kei na marama? Me vaka e dua na kuoramu se kalasi, wilika vata na matai ni rua na parakaravu ena wase ni ulutaga “Veilaveti ka Veivukei Tiko ena Noda iTavi Vakaveicuqeni”mai na itukutuku i Peresitedi Linda K. Burton “Eda na Toso Cake Vata” (Liaona, Me 2015, 30). Se rawa mo sureta e dua na veiwatini me sikova na nomu kuoramu se kalasi ka tukuna na sala rau sa veivuke kina vakai rau ni vakataucokotaka na nodrau itavi kei na sala esa vukei rau kina na Turaga. Na cava eda vulica, mai na itukutuku i Peresitedi Burton se na veiwatini, ena sala era veitokoni kina na turaga kei na marama ena matavuvale?

• Na ivolanikalou era volai tu ena “iVurevure Veitokoni Eso” sa rawa ni vukea na lewe ni kuoramu se kalasi ni vulica e levu tale na itavi ni turaga kei na marama ena matavuvale. O rawa ni lesia na lewe ni kuoramu se kalasi yadua me wilika e dua vei ira na malanivosa oqo ena ivolanikalou. Sureti ira ni wasea na nodra ivakadinadina ka tukuna na itavi eso e vakamacalataki. Na cava era vakavulica na ivolanikalou oqo me baleta na itavi eso ni tubutubu? E rawa vakacava ni ra veivuke vakai ira na veiwatini ena vakataucokotaki ni tavi vakalou eso oqo? E rawa vakacava ni vukei ira na iVakabula mera rawaka? E rawa vakacava ni vukei ira na gone?

• Me vukea nodra kila vakamatata na nomu kuoramu se kalasi na sala era rawa ni veicuqeni kina vakai ira vakatautauvata na turaga kei na marama, vola na ulutaga eso oqo ena papa: iTavi nei Tama kei na iTavi nei Tina. Kerea na lewe ni kuoramu se kalasi mera vakaraica na ikavitu ni parakaravu ni “Na Matavuvale: Ai Vakaro ki Vuravura Raraba” ka vola na ka era raica ena ruku ni ulutaga veiganiti. Na cava eda vulica me baleta na itavi vakalou eso ni tama kei na tina? Na cava na ibalebale mera na dau veivuke vakai ira na tama kei na tina “vakatautauvata” ena vakataucokotaki ni tavi eso oqo? Na ivakaraitaki cava so eda rawa ni wasea mai na noda bula e vakaraitaka ni ra vakataucokotaka tiko na tama kei na tina na nodra itavi ka ra veivuke tiko vakatautauvata? O na via veivosakitaka talega na sala eso era rawa ni vakavakarau kina oqo na itabagone ki na itavi ni veisiga ni mataka oqo.

Cakacaka ena Vakabauta

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Vosa Vakaibalebale 22:6; Vunau kei na Veiyalayalati 68:25–28; 121:41–43 (Nodra itavi na itubutubu)

• Efeso 5:25; Mosese 3:21–24; 5:1–12 (Era cakacaka vata vakatautauvata na veiwatini)

• Jean B. Bingham, “Duavata ena Vakayacori ni Cakacaka ni Kalou,” Liaona, Me 2020, 60–63

• “The Women in Our Lives,” “Let Us Be Men” (vidio), ChurchofJesusChrist.org

Veivakavulici ena iVakarau ni iVakabula

E vakarautaki ira a vakavulica na iVakabula ka solia vei ira na itavi bibi eso. O na rawa ni vakarautaki ira vakacava o vakavulica mera cakacaka vata vaka luvena tagane kei na yalewa na Kalou? (Raica na Veivakavulici ena iVakarau ni iVakabula [2016], 27–28).