Christ in Gethsemane, mai vei Heinrich Hofmann

28 ni Maji

Cava na Vuna Au Gadreva kina na Veisorovaki i Jisu Karisito?

Vunau kei na Veiyalayalati 29

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. Na cava eda rawa ni cakava me taraicake kina na duavata vei ira na lewe ni kuoramu se kalasi? Na takete cava so eda na via cakava vata?

• Noda itavi se icolacola. Na cava eda sa cakava tiko me wasei kina na kosipeli? Na cava so eda sa sotakaya ena vakayacori ni cakacaka ni valetabu kei na tuva kawa?

• Noda bula. Eda sa raica vakacava na liga ni Turaga ena noda bula? Na cava e sa vakauqeti keda ena vuli ivolanikalou ena macawa oqo?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

A vakavulica o Peresitedi Ezra Taft Benson: “Me vaka ga e sega ni gadreva dina tu na kakana e dua na tamata me yacova ni sa walokai ena viakana, sa sega kina ni gadreva na veivakabulai i Karisito me yacova ni sa kila na vuna e gadrevi Karisito kina. E sega ni dua e kila matata se vinaka tu na vuna e gadrevi Karisito kina me yacova ni sa kila deivaki ka vakadonuya na ivunau ni Lutu Tani kei na kena revurevu ki na kawatamata taucoko” (“iVola i Momani kei na Vunau kei na Veiyalayalati,” Ensign, Me 1987, 85). Ni ko sa vulica na Vunau kei na Veiyalayalati 29 ena macawa oqo, o na rairai siqema na ivakamacala ni iVakabula ena Lutu Tani kei na sala eda sa vueti mai kina. O a rawata vakacava e dua na ivakadinadina i Jisu Karisito kei na Nona itutu me vaka na nomu iVakabula ka Dauveivueti? Vakasamataka na sala ena rawa ni veisautaki ira kina na lewe ni kuoramu se kalasi na vaqaqacotaki ni nodra ivakadinadina. Ni ko vakarau tu, navuca ni vulica na “Galala ni Digidigi kei na Lutu nei Atama kei Ivi,” “Na Veisorovaki i Jisu Karisito,” kei “Na iLesilesi Vakalou i Jisu Karisito” ena wase 3 ni Vunautaka na Noqu Kosipeli ([2019], 49–52, 60–61).

Baleta ni a vueti keda na iVakabula mai na Lutu Tani, sa rawa ni da kune marau.

Vulica Vata

Mo vakatakila na veivosaki nikua, sa rawa ni o sureti ira o vakavulica me vola ena papa e dua na ka era kila tu me baleta na Lutu i Atama kei Ivi. Me ivakaraitaki, na cava era sa vulica ena Lutu Tani mai na Vunau kei na Veiyalayalati 29:36–50? Na ivakadinadina cava ni Lutu Tani eda sa raica e wavoliti keda tu? Na veitaviqaravi e ra ena vukea na nomu kuoramu se kalasi ni dikeva na sala e vukei keda kina ni ulabaleta na revurevu ni Lutu Tani na Veisorovaki i Jisu Karisito.

• Me kilai vakamatata cake na Lutu i Atama kei Ivi, sa rawa ni ra wilika na lewe ni kuoramu se kalasi na “Lutu Tani” ena Tudei ena Vakabauta (56–59) se “Galala ni Digidigi kei na na Lutu nei Atama kei Ivi” ena wase 3 ni Vunautaka na Noqu Kosipeli (49–50). Sureti ira ni raitayaloyalotaka ni a tarogi ira e dua na itokani, “Cava na vuna au gadrevi Jisu Karisito kina?” Sureti ira me ra veivakavulici vakai ira ena veisa na sala era na sauma kina na taro oya ka vu ena ka era a vulica mai na nodra wiliwili.

• E rawa vakacava ni o vukea na lewe ni kuoramu se kalasi mera vulica mai na ivolanikalou na vuna era gadreva kina na Veisorovaki i Jisu Karisito? Dua na sala oya me volai eso na tiki ni ivolanikalou mai na “iVurevure Veitokoni Eso” ena papa ka qai vola na ivakaleka ni tukutuku ni veitikina oya ena tiki ni pepa eso. Solia ki na lewe ni kuoramu se kalasi yadua e dua vei ira na tiki ni pepa. Sureti ira me ra wilika na veitiki ni ivolanikalou e volai tu ena papa ka vakaraica e dua e veisotari vata na nodra ivakaleka ni tukutuku. (E so na itukutuku esa baleta e levu sara mai na dua ga na ivolanikalou.) Sureta na lewe ni kuoramu se kalasi yadua mera wilika icake na yatuvosa ni ivolanikalou e veisotari kei na nodra itukutuku ka wasea na ka era sa vulica ena vuna eda gadreva kina na Veisorovaki ni iVakabula.

• Sureta na lewe ni kuoramu se kalasi yadua mera saumi taro vuni me vakaoqo: Au sa mai vakalougatataki tu vakacava ena Veisorovaki i Jisu Karisito? Na cava ena vinakata tu na iVakabula meu veisautaka me rawa niu vakila vakataucoko kina na veivakalougatataki ni Nona Veisorovaki? Qai kerei ira me ra veivosakitaka vata na matai ni taro. Sa rawa ni ra railesuva “Na Veisorovaki i Jisu Karisito” kei “Na iLesilesi Vakalou i Jisu Karisito” ena wase 3 ni Vunautaka na Noqu Kosipeli (51–52, 60–61) kei na dua se sivia na vidio ena “Supporting Resources.” Sureti ira mera wasea na ka era sa vulica.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Vunau kei na Veiyalayalati 19:16–19 (sa sauma o Jisu Karisito na isau ni noda ivalavala ca me kua kina ni da vakasaurarataki kevaka eda veivutuni)

• 2 Nifai 9:6–16; Alama 42:6–9 (o Jisu Karisito sa vakabulai keda mai na mate kei eli)

• 2 Nifai 2:5–10; Ilamani 14:15–17 (eda rawa ni lesu tale vua na Kalou ena vuku duadua ga i Jisu Karisito)

• Mosaia 3:7; Alama 7:11–13 (Baleta ni a soli Koya o Karisito ena vuku ni noda leqa kei na ivalavala ca, sa kila o Koya na sala me vukei keda kina)

• Mosese 5:10–12 (Baleta ni a vueti keda mai na Lutu Tani na iVakabula, sa rawa ni da kune marau)

• Walter F. González, “Na Tatara ni iVakabula,” Liaona, Nove. 2019, 90–92

• “Where Justice, Love, and Mercy Meet,” “Why We Need a Savior,” “The Atonement Enables Us” (vidio), ChurchofJesusChrist.org

Veivakavulici ena iVakarau ni iVakabula

A masulaki ira na Nona tisaipeli na iVakabula ka tomana tu me qaravi ira. A raica o Koya na madigi eso me tiko vata kei ira ka tukuna na Nona loloma. Na madigi cava so e tiko vei iko mo kitaka vakakina vei ira o vakavulica? (Raica na Veivakavulici ena iVakarau ni iVakabula [2016], 6.)