11 ni Epereli

Au na Sureta Vakacava na Tamata Taucoko mera Lako Mai vei Karisito?

Vunau kei na Veiyalayalati 30–36

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai, ikuri ni veivakasalataki ena gagadre vakatabakidua ni kuoramu se kalasi, o na rairai via veivosakitaka na vosa kei na itoko eso mai na koniferedi raraba. Ena rawa ni veivuke na taro eso oqo.

• Na vosa kei na itukutuku cava soti e vakaibalebale vei keda?

• Na cava eda sa vakauqeti ni cakava ena vuku ni ka eda sa vulica se vakila?

• Na cava sa gadrevi meda cakava va-kuoramu se kalasi me vakayacori kina na ivakasala eda sa rogoca ena koniferedi raraba?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Vica na vula ni oti na tauyavutaki ni Lotu vakalesui mai enai ka 6 ni Epereli, 1830, e Feieti, Niu Ioka, sa tekivu kacivi ira na daukaulotu na Turaga mera vakasoqoni ira na “tamata digitaki mai na yasai vuravura e va” (Vunau kei na Veiyalayalati 33:6). Na tekivutaki ni nodra sasaga e vica ga na saumaki vou ena dua na wase ni vanua vakaiyalayala esa tete ki na dua na mataivalu ni kaulotu e kaburaka tiko na kosipeli e vuravura taucoko. Ia na cakacaka vakaulotu e sega ni yalani vei ira na veiqaravi tiko vakadaukaulotu tudei. Sa vinakati keda yadua na Turaga meda sureti ira na tiko wavoliti keda me ra lako mai kivei Koya.

Na kila cava soti e tiko vei iko ena nodra sureti na tani mera vulica na kosipeli ni iVakabula? Na cava o rawa ni cakava mo vakauqeta kina na lewe ni kuoramu se kalasi ni vakayacora na nodra itavi me ra vakau yalo mai vei Jisu Karisito? Ni ko vakarau tu mo veivakatavulici, navuca ni railesuva “Na Cava na Noqu iNaki Vakadaukaulotu?” ena Vunautaka na Noqu Kosipeli ([2019] 1–16) kei na itukutuku i Elder Dieter F. Uchtdorf “Cakacaka ni Kaulotu: Wasei na Veika e Tiko e Lomamu,” Liaona, Me 2019, 15–18).

Mai na sureti ni noda itokani me ra tiko ena soqoni ni Lotu se itaviqaravi eso, eda sa vukei ira ni vulici Karisito.

Vulica Vata

Vunau kei na Veiyalayalati, 30–36. esa tukuna na yacadra eso na tamata ka a kacivi ki na kaulotu ena gauna vakailiu ni Lotu. Ena vica na siga ni bera na nomu soqoni, sa rawa ni o solia yadua ki na lewe ni kuoramu se kalasi e dua vei ira na yaca oqo (raica na ikau ni wase 30–36.) ka sureti koya me vulica na ivakasala cava a solia na Turaga me vukea na tamata oya ni wasea na kosipeli. Eda na tutaka vakacava na ivakasala oya vakaikeda? Na vakasama eso e ra sa rawa ni vakauqeti ira talega o vakavulica me ra sureti ira na wavoliti ira tu me ra lako mai vei Karisito.

• Era sa kila vakamatata tu li o ira o vakavulica na ka e vakaibalebaletaki ena lako mai vei Karisito? Sa rawa ni o kerei ira ni wasea na nodra nanuma. Kevaka me na veivuke, sa rawa mo wasea na ivakamacala oqo: “Meda lako mai vua na iVakabula, sa dodonu mera vakabauti Koya na tamata ena vuku ni veivutuni—ena vakayacori ni veisau veiganiti eso me vakaduavatataki kina na nodra bula ki na Nona ivakavuvuli” (Vunautaka na Noqu Kosipeli, 2). Sa rawa talega vei ira na lewe ni kuoramu se kalasi ni wilika na ivolanikalou e okati kina na malanivosa eso vaka na “lako mai vei au” se “lako mai vei Karisito” me vukea na saumi ni taro oqo—me ivakaraitaki, Maciu 11:28–30; Omanai 1:26; Moronai 10:32; Vunau kei na Veiyalayalati 20:59. Cava na vuna eda vinakati ira kina na tamata mera lako mai vei Karisito? Na ka rawarawa cava soti eda rawa ni cakava meda vukei ira kina? Sa rawa ni tuvatuvaka na lewe ni kuoramu se kalasi me sureta e dua era kila me lako voleka mai vei Karisito.

• Na vulici ni vakarau era wasea kina na kosipeli na tani esa dua na sala levu ni nodra vakauqeti o ira o vakavulica. Sa rawa ni o vakaraitaka e dua se sivia na vidio e tiko ena ruku ni “iVurevure Veitokoni Eso” se sureta na lewe ni kuoramu se kalasi mera wilika na ivakasala kei na ivakaraitaki e kune ena itukutuku i Sisita Cristina B. Franco “Kune Reki ena Wasei ni Kosipeli” (Liaona, Nove. 2019, 83–86). Na cava eda vulica mai na ivakaraitaki eso oqo? Veivosakitaka vata na ka e rawa ni cakava na nomu kuoramu se kalasi mera sureti kina na tani ni lako mai vei Karisito.

• Ena gauna ni kena wasei na kosipeli, a kaya o Elder Dieter F. Uchtdorf ni so vei keda ena rairai “veilecayaki tu ena sala me vakayacora kina. Se da na ririko beka ni lako tani mai na noda vanua ni vakacegu” (“Cakacaka ni Kaulotu: Wasei ni Veika e Tiko e Lomamu,” Liaona, Me 2019, 16). Ke sa vakaoqo na nodra nanuma na lewe ni kuoramu se kalasi, sa rawa ni vukei ira na lima na vakatutu rawarawa ena itukutuku i Elder Uchtdorf. Sa rawa ni o sureta yadua na lewe ni kalasi me wilika e dua na nona vakatutu ka wasea na ka era sa vulica.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• 1 Timoci 4:12 (Mo nodra ivakarau era sa vakabauta)

• Alama 17:2–4 (Sa vakarautaki ira na luvei Mosaia tagane ni wasea na kosipeli)

• Vunau kei na Veiyalayalati 42:6–7 (Vunautaka na kosipeli ena kaukauwa ni Yalo)

• Peresitedi Russell M. Nelson kei Wendy Nelson, “Hope of Israel” (lotu e vuravura raraba ni itabagone, 3 ni June, 2018, ikuri ni New Era kei na Ensign, HopeofIsrael.ChurchofJesusChrist.org

• (Vidio eso) “Inviting All to Come unto Christ: Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’”, ChurchofJesusChrist.org

Veivakavulici ena iVakarau ni iVakabula

A sureti ira na tani na iVakabula mera vakadinadinataka na dina eso me rawa ni tara na lomadra na Yalotabu. “Dou sa kaya se ko cei koi au?” A taroga o Koya. Ni sa sauma o Pita, a vaqaqacotaki na nona ivakadinadina: “Oi kemuni na Karisito, na Luve ni Kalou bula” (Maciu 16:15–16). E rawa vakacava ni vaqaqacotaka na nodra ivakadinadina na lewe ni kuoramu se kalasi na wasei ni kosipeli?