28 febrero

K’a’ru naraj naxye li jalb’a-k’a’uxlej?

Tzolʼlebʼ ut Sumwank 18–19

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Moko naru ta rilb’al Tzol’leb’ ut Sumwank 19:16–19 chi ink’a’ taqeek’a lix rahom li Kolonel choq’ qe. Sa’ li raqal a’an, li Kolonel naxch’olob’ li rahilal kixk’ul naq kixtoj rix li qamaak, ut naxk’utb’esi k’a’ut naq kiwan xch’ool chixnumsinkil xnimal li rahilal—“re naq ink’a’ taqanumsi rahilal wi taqajal qak’a’uxl.” Li jalb’a-k’a’uxlej, a’an jun maatan k’eeb’il xb’aan li Kolonel. A’an xyalb’al qaq’e wulaj wulaj chixtz’eqtaanankil li maak ut chixsik’b’al li Dios. Li na’leb’ k’uub’anb’il xb’aan li qaChoxahil Yuwa’ nokoxtenq’a chi sutq’iik rik’in a’an. Xnawb’al chan ru xb’aanunkil li jalb’a-k’a’uxlej naru tooxtenq’a chi ch’ajob’resiik chiru li qamaak, chixjalb’al li qach’ool, ut chi nach’ok rik’in li Dios.

Chan ru naq li jalb’a-k’a’uxlej ak xatxtenqʼa chi nachʼok rikʼin laa Choxahil Yuwaʼ? Chan ru taatenq’aheb’ li saaj chirajb’al xjalb’al xk’a’uxleb’? Chan ru taatenq’aheb’ chixk’eeb’al reetal naq nab’aanuman li jalb’a-k’a’uxlej wulaj wulaj, ink’a’ junes choq’ re li ninqi maak? Naq nakakawresi li tzolok, naru taawil li raatin li Awa’b’ej Russell M. Nelson “Naru taqab’aanu li chaab’il wi’chik ut toowanq chi chaab’il wi’chik” (Jolomil ch’utub’aj-ib’ re abril 2019).

Li Kristo sa’ Getsemani, xb’aan laj Harry Anderson

Tzolok sa’ komonil

Chixjunileb’ li profeet chalen chaq xtiklajik neke’xb’oq li tenamit chixjalb’al xk’a’uxleb’. A’b’anan, maare maajun b’oqok chixjalb’al qak’a’uxl naxq’ax ru li yeeb’il xb’aan li Kolonel sa’ Tzol’leb’ ut Sumwank 19:15–19, li maare ak xe’ril li saaj chiru li xamaan a’in. Naru taapatz’ reheb’ k’a’ru xe’xtzol chirix li Kolonel sa’ li raqal a’in. K’a’ru naxye li raqal a’in chirix li jalb’a-k’a’uxlej jo’ ilb’il xb’aan li Qaawa’? Xb’aanunkil a’in naru tixtenq’aheb’ li saaj chirilb’al li jalb’a-k’a’uxlej jo’ jun maatan sa’ xyu’ameb’ wulaj wulaj.

• Re xtenq’ankileb’ li saaj chixtawb’al ru chan ru neke’osob’tesiik xb’aan li jalb’a-k’a’uxlej, naru taapatz’ a’in: Chan ru tinnaw ma yoo chi k’anjelak lix yalb’al inq’e chixjalb’al ink’a’uxl? Chan ru tinixtenq’a li Kolonel chi jalaak? Rochb’een xkuyb’al qamaak, k’a’ chik ru naqak’ul rik’in li jalb’a-k’a’uxlej? Patz’ reheb’ li saaj naq te’ril wiib’ oxib’ reheb’ li raqal sa’ “Xkomon chik li tenq’,” re te’xtaw xsumenkileb’ li patz’om a’an. K’a’ru xe’xtaw? Naru taak’ut ajwi’ li video “El arrepentimiento: Una gozosa elección” (ChurchofJesusChrist.org).

• Wankeb’ naab’al li saaj li ink’a’ neke’xtaw ru chi us k’a’ru li jalb’a-k’a’uxlej. Maare neke’xxuwa malaj neke’xk’oxla naq junes nak’anjelak choq’ re li ninqi maak. Re xtuqub’ankil xmajelal li na’leb’ a’an, naru taapatz’ reheb’ li saaj naq te’ril li raatin li Awa’b’ej Russell M. Nelson “Naru taqab’aanu li chaab’il wi’chik ut toowanq chi chaab’il wi’chik” (Jolomil ch’utub’aj-ib’ re abril 2019), ut te’xsik’ li aatin li naxtenq’aheb’ chixtawb’al ru li jalb’a-k’a’uxlej. Ma xe’xtaw jun na’leb’ chirix li jalb’a-k’a’uxlej li ink’a’ ak xe’xnaw? K’a’ruheb’ li osob’tesink kixyeechi’i li Awa’b’ej Nelson reheb’ li neke’xjal xk’a’uxl?

• Chan ru taatenq’aheb’ li saaj chixtawb’al ru k’a’ut ut chan ru naqajal qak’a’uxl? Naru teetaw eena’leb’ sa’ li raatin li Awa’b’ej Dallin H. Oaks “Saqob’resinb’il qu xb’aan li jalb’a-k’a’uxlej” (Jolomil ch’utub’aj-ib’ re abril 2019) Naru taak’eheb’ li saaj sa’ kaahib’ ch’uut, ut li kaahib’eb’ te’ril jun reheb’ li kaahib’ xtasalil li raatin li Awa’b’ej Oaks. Toja’ naq chixjunileb’ te’xye resil li tasal xe’ril, jo’ ajwi’ yalaq raqal re loq’laj hu li naxch’olob’ wi’chik k’a’ru xe’xtzol. Sa’ xraqik, naru taapatz’ reheb’ li saaj naq te’xch’olob’ xyaalal naq aajel ru li jalb’a-k’a’uxlej sa’ lix k’uub’anb’il na’leb’ li Dios.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• 2 Nefi 31:13; Enos 1:5–9; Mosiah 4:9–12; 27:23–26, 35; Alma 19:33; 36:18–21, 24; 37:9; Helaman 15:7–8; Moroni 6:8; Tzol’leb’ ut Sumwank 58:42–43; 64:9–10 (Raqaleb’ chirix li jalb’a-k’a’uxlej)

• Tzol’leb’ ut Sumwank 18:10–16 (Li jalb’a-k’a’uxlej naxk’e sahil ch’oolejil)

• “Li jalbʼa-kʼaʼuxlej,” saʼ Choq’ re Xkawilaleb’ li Saaj (2011), 28–29

• “El arrepentimiento mediante la expiación de Jesucristo,” sa’ li ch’ol 3 re Predicad Mi Evangelio (2019), 62–63

Li k’utuk jo’ li Kolonel

Li Kolonel kixb’oqeb’ li tenamit chi k’anjelak rik’in paab’aal ut chixyu’aminkil li k’a’ru kixk’ut. K’a’ru naru taab’aanu re xtenq’ankileb’ li saaj chixk’eeb’al reetal li wankilal li nachal rik’in li jalb’a-k’a’uxlej wulaj wulaj? (Chi’ilmanq Li k’utuk jo’ li Kolonel [2016], 31, 35.)