14 marzo

Chan ru neke’xtz’aqob’resi rib’ lix santil k’anjeleb’ li winq ut li ixq?

Tzolʼlebʼ ut Sumwank 23–26

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Ani taaraj ru qatenq’ ut qatij? K’a’ru naru taqab’aanu re xtenq’ankil? Ani raj taqab’oq sa’ jun ch’ina k’anjel qik’in?

• Li k’a’ru teneb’anb’il sa’ qab’een. K’a’ru lee k’anjel ak xqachoy xb’aanunkil? K’a’ru k’anjel toj tento taqab’aanu? Chan ru ak xqab’oqeb’ jalan chi chalk rik’in li Kristo, ut chan ru toj taqab’oqeb’ jalan chik?

• Sa’ li qayu’am. K’a’ru toje’ xqanumsi li xkawob’resi lix nawom qach’ool? K’a’ru yooko chixk’ulb’al sa’ li qayu’am, ut chan ru taqatenq’a qib’ chiqib’il qib’?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li qaChoxahil Yuwa’ kixk’e xk’anjel li winq ut li ixq, li aajel ru sa’ wiib’al choq’ re lix k’uub’anb’il na’leb’. Lix k’anjeleb’ neke’xtz’aqob’resi rib’ chirib’ileb’ rib’. Re xtenq’ankileb’ li winq ut li ixq chixb’aanunkil lix k’anjeleb’, kixk’e xmaataneb’ ut xseeb’aleb’. Eb’ li saaj maare xe’xtzol Tzol’leb’ ut Sumwank 25 chiru li xamaan a’in. Sa’ li k’utb’esinb’il na’leb’ a’in, li Qaawa’ kixk’e xna’leb’ li xEmma Smith chirix lix k’anjel sa’ xk’ojob’ankil wi’chik li evangelio, ut kixch’olob’ chan ru te’xtenq’a rib’ chirib’ileb’ rib’ laj Jose ut li xEmma. Ma aawilomeb’ li winq ut li ixq chi k’anjelak sa’ komonil re xb’aanunkil lix k’anjel li Qaawa’? Chan ru taatenq’aheb’ li saaj chixtawb’al ru lix santil k’anjeleb’ ut chi k’anjelak sa’ komonil re xkab’lankil li rawa’b’ejihom li Dios?

Naq nakakawresi li tzolok, naru taawil “Li Junkab’al: Jun Jek’inb’il Aatin choq’ re li Ruchich’och’” (ChurchofJesusChrist.org) ut li raatin li Awa’b’ej Linda K. Burton “Sa’ komonil tootaqe’q” (Jolomil ch’utub’aj-ib’ re abril 2015).

Eb’ li saaj winq ut saaj ixq neke’ru chixtzolb’al li k’anjelak sa’ komonil re xkab’lankil li rawa’b’ejihom li Dios.

Tzolok sa’ komonil

Re aatinak chirix k’anjelak sa’ komonil jo’ winq ut ixq sa’ li rawa’b’ejihom li Dios, naru taapatz’ reheb’ li saaj naq te’ril Tzol’leb’ ut Sumwank 25. K’a’ru kixye li Qaawa’ chirix lix k’anjeleb’ li xEmma ut laj Jose chirib’ileb’ rib’? K’a’ru naqatzol sa’ li tasal 25 chirix li k’anjelak sa’ komonil jo’ b’eelomej ut ixaqilb’ej? Naru taak’eheb’ perel hu reheb’ li saaj re te’xtz’iiba’ li neke’xtaw, ut taapatz’ reheb’ naq te’xwotz li neke’xk’oxla. Naru xb’aanunkil a’in re xtenq’ankileb’ chixtawb’al ru chan ru naraj li Dios naq te’k’anjelaq sa’ komonil li ralal ut lix rab’in.

• Ma wan junaq li jaljookil ru na’leb’ li naxch’olob’ chan ru nab’aanuman li k’ulink-ib’ sa’ komonil? Maare a’an xk’ulinkileb’ rib’ li noq’ sa’ po’ot, malaj xyaab’eb’ xkux laj b’ichanel sa’ coro. Chan ru neke’xtz’aqob’resi rib’ lix santil k’anjeleb’ li winq ut li ixq? Ilomaqeb’ ru li wiib’ raqal aatin sa’ xtiklajik li tasal “Xtaqsinkil ut xtenq’ankil sa’ li qak’anjel li neke’xtz’aqob’resi rib’,sa’ li raatin li Awa’b’ej Linda K. Burton “Sa’ komonil tootaqe’q” (Jolomil ch’utub’aj-ib’ re abril 2015). Malaj naru taab’oq jun sumal chi aatinak rik’ineb’ li saaj re te’xch’olob’ chan ru neke’xtenq’a rib’ chirib’ileb’ rib’ sa’ lix k’anjeleb’, ut chan ru naq li Qaawa’ naxtenq’aheb’. K’a’ru naqatzol sa’ li raatin li Awa’b’ej Burton malaj li raatin li sumal chirix li tenq’ank-ib’ jo’ winq ut ixq sa’ li junkab’al?

• Eb’ li raqal re loq’laj hu sa’ “Xkomon chik li tenq’ ” naru tixtenq’aheb’ li saaj chixtzolb’al k’a’ru lix k’anjeleb’ li winq ut li ixq sa’ li junkab’al. Naru taapatz’ reheb’ li saaj naq te’rileb’ li raqal a’an. Patz’ reheb’ naq te’xyaab’asi jalan jalanq li raqal ut naq te’aatinaq chirix li naxye. K’a’ru neke’xk’ut li loq’laj hu chirix li teneb’anb’il sa’ xb’eeneb’ li na’b’ej yuwa’b’ej? Chan ru te’xtenq’a rib’ chirib’ileb’ rib’ li b’eelomej ut li ixaqilb’ej chixb’aanunkil lix santil k’anjeleb’? Chan ru naq li Kolonel tixtenq’aheb’ re te’usaaq? Chan ru naq eb’ li kok’al te’tenq’anq?

• Re xtenq’ankileb’ li saaj chixtawb’al ru chan ru neke’xtz’aqob’resi rib’ chirib’ileb’ rib’ li winq ut li ixq jo’ rochb’eeneb’ rib’ chi junaqikeb’ xwankil, tz’iib’a a’in chiru li pizarron: Lix k’anjel li yuwa’b’ej ut Lix k’anjel li na’b’ej. Patz’ reheb’ li saaj naq te’ril xwuq li raqal aatin re “Li Junkab’al: Jun Jek’inb’il Aatin choq’ re li Ruchich’och’,” ut naq te’xtz’iib’a chiru li pizarron k’a’ru naxye chirix lix k’anjel li na’b’ej yuwa’b’ej. K’a’ru naqatzol chirix lix santil k’anjeleb’ li yuwa’b’ej ut li na’b’ej? K’a’ru naraj naxye naq li yuwa’b’ej ut li na’b’ej te’xtenq’a rib’ chirib’ileb’ rib’ “jo’ rochb’eeneb’ rib’ chi junaqikeb’ xwankil” sa’ xb’aaunkil lix k’anjeleb’? K’a’ru ak xqileb’ li qana’ qayuwa’ chixb’aanunkil jo’ rochb’eeneb’ rib’ li junaqikeb’ xwankil? Naru ajwi’ taaye chan ru te’xkawresi rib’ li saaj re xb’aanunkil li k’anjel a’an sa’ junaq kutan.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’ li neke’raj xjayalinkil sa’ xyu’ameb’? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Proverbios 22:6; Tzol’leb’ ut Sumwank 68:25–28; 121:41–43 (Lix k’anjeleb’ li na’b’ej yuwa’b’ej)

• Efesios 5:25; Moises 3:21–24; 5:1–12 (Li b’eelomej ut li ixaqilb’ej neke’k’anjelak sa’ komonil jo’ rochb’eeneb’ rib’ li junaqikeb’ xwankil)

• Jean B. Bingham, “Xk’eeb’al chi uxmank lix k’anjel li Dios sa’ komonil,” Jolomil ch’utub’aj-ib’ re abril 2020

• “Las mujeres en nuestra vida,” “Seamos hombres” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixkawresib’ lix tzolom ut kixk’e xk’anjeleb’. Chan ru taakawresiheb’ li saaj chi k’anjelak sa’ komonil jo’ ralal ut xrab’in li Dios? (Chi’ilmanq Li k’utuk jo’ li Kolonel [2016], 27–28.)