ongo talavou ʻoku na sio ki ha telefoni

11 ʻEpeleli

Te u Lava Fēfē ʻo Fakaafeʻi e Taha Kotoa ke Haʻu Kia Kalaisí?

Tokāteline mo e Ngaahi Fuakava 30–36

fakaʻilonga fealeaʻaki fakataha

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Hili iá, makehe mei he fealeaʻaki fakataha fekauʻaki mo e ngaahi fiemaʻu pau ʻa e kōlomú pe kalasí, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení.

• Ko e hā ha ngaahi kaveinga pe pōpoaki ne makehe kiate kitautolu?

• Ko e hā ne tau ongoʻi ne ueʻi kitautolu ke tau fai koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kōlomu pe kalasi ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Hili ha ngaahi māhina mei hono fokotuʻutuʻu ʻo e Siasi kuo fakafoki maí ʻi he ʻaho 6 ʻo ʻEpeleli, 1830, ʻi Feieti, Niu ʻIoke, naʻe kamata ke ui ʻe he ʻEikí ha kau faifekau ke nau tānaki e “kakai filí mei he ngaahi vahe ʻe fā ʻo e māmaní” (Tokāteline mo e Ngaahi Fuakava 33:6). Ko e meʻa ne kamata ko ha ngaahi ngāue ʻo ha kihiʻi tokosiʻi pē ʻo e kau ului foʻoú ʻi ha kiʻi ʻēlia siʻisiʻí, kuo tupulaki ia ki ha kau faifekau tokolahi ʻoku nau talaki e ongoongoleleí ʻi he funga ʻo e māmaní. Ka ʻoku ʻikai fakangatangata pē e ngāue fakafaifekaú kiate kinautolu ʻoku ngāue fakafaifekau taimi kakató. ʻOku fie maʻu ʻe he ʻEikí ʻa kitautolu takitaha ke tau fakaafeʻi ʻa kinautolu ʻoku tau feohí ke omi kiate Ia.

Ko e hā ha ngaahi aʻusia kuó ke maʻu ʻi hono fakaafeʻi e niʻihi kehé ke nau ako fekauʻaki mo e ongoongolelei ʻo e Fakamoʻuí? Ko e hā te ke lava ʻo fai ke ueʻi e kau mēmipa ʻo e kōlomú pe kalasí ke fakahoko honau fatongia ke ʻomi ha ngaahi laumālie kia Sīsū Kalaisí? ʻI hoʻo teuteu ke faiakó, te ke lava ʻo toe vakaiʻi e pōpoaki ʻa ʻEletā Tieta F. ʻUkitofa “Ngāue Fakafaifekaú: Ko Hono Vahevahe e Meʻa ʻi ho Lotó,” Liahona, Mē 2019, 15–18).

kau finemui ʻoku nau kakata

ʻI hono fakaafeʻi hotau ngaahi kaungāmeʻá ke nau omi ki he ngaahi fakatahaʻanga pe ngaahi ʻekitivitī faka-Siasí, ʻoku tau tokoni ai ke nau ako kia Kalaisi.

Ako Fakataha

ʻOku ʻi he Tokāteline mo e Ngaahi Fuakava 30–36 ha ngaahi hingoa ʻo ha kakai ʻe niʻihi naʻe ui ke ngāue fakafaifekau ʻi he kamakamata ʻa e Siasí. ʻI ha ngaahi ʻaho siʻi kimuʻa homou fakatahá, te ke lava ʻo ʻoange ki he mēmipa takitaha ʻo e kōlomú pe kalasí ha taha ʻo e ngaahi hingoá (vakai ki he ngaahi ʻuluʻi fakamatala ʻo e vahe 30–36) pea fakaafeʻi kinautolu ke ako pe ko e hā e faleʻi ne fai ʻe he ʻEikí ke tokoni ki he tokotaha ko iá ke vahevahe e ongoongoleleí. Te tau lava fēfē ʻo fakaʻaongaʻi e faleʻi ko iá kiate kitautolu? ʻE lava ke toe ueʻi ʻe he ngaahi fakakaukau ʻi laló ʻa kinautolu ʻokú ke akoʻí ke fakaafeʻi ʻa kinautolu ʻoku nau feohí ke omi kia Kalaisi.

• ʻOku mahino nai ki he niʻihi ʻokú ke akoʻí ʻa e ʻuhinga ʻo e haʻu kia Kalaisí? Te ke lava ʻo kole ange kiate kinautolu ke vahevahe ʻenau ngaahi fakakaukaú. Kapau ʻe ʻaonga, te ke lava ʻo vahevahe e fakamatala ko ʻení: “Kuo pau ke nau maʻu ʻa e tui kia Kalaisí pea fakatomala—ʻo fai ʻa e ngaahi liliu kotoa pē ʻoku fie maʻu ke fakahoko ke taau ʻenau moʻuí mo ʻEne ngaahi akonakí—ka nau lava ʻo haʻu ai kiate Ia.” (Preach My Gospel, 2). ʻE lava foki ke lau ʻe he kau mēmipa ʻo e kōlomú pe kalasí e ngaahi veesi folofola ʻoku ʻasi ai e ngaahi kupuʻi lea hangē ko e “haʻu kiate au” pe “haʻu kia Kalaisi” ke tokoni ke tali e fehuʻi ko ʻení—hangē ko e, Mātiu 11:28–30; ʻAmenai 1:26; Molomona 10:32; Tokāteline mo e Ngaahi Fuakava 20:59. Ko e hā ʻoku tau fie maʻu ai e kakaí ke nau omi kia Kalaisí? Ko e hā ha fanga kiʻi meʻa faingofua ʻe niʻihi te tau lava ʻo fakahoko ke tokoniʻi ai kinautolu? ʻE lava ke fokotuʻu ʻe he kau mēmipa ʻo e kōlomú pe kalasí ha palani ke fakaafeʻi ha taha ʻoku nau ʻilo ke ʻunu ke ofi ange kia Kalaisi.

• Ko e ako fekauʻaki mo e founga kuo vahevahe ai ʻe he niʻihi kehé e ongoongoleleí ko ha founga lelei ia ke ueʻi fakalaumālie ʻa kinautolu ʻokú ke akoʻí. Te ke lava ʻo huluʻi ha foʻi vitiō ʻe taha pe lahi ange mei he “Ngaahi Maʻuʻanga Tokoni Poupoú” pe fakaafeʻi e kau mēmipa ʻo e kōlomú pe kalasí ke nau lau e faleʻi mo e ngaahi sīpinga ʻoku maʻu ʻi he pōpoaki ʻa Kilisitina B. Falangikō “Ko e Fiefia ʻi Hono Vahevahe ʻo e Ongoongoleleí” (Liahona, Nōvema 2019, 83–86). Ko e hā ʻoku tau ako mei he ngaahi sīpinga ko ʻení? Aleaʻi fakataha e meʻa ʻe lava ke fakahoko ʻe he kau mēmipa hoʻo kōlomú pe kalasí ke fakaafeʻi ai e niʻihi kehé ke haʻu kia Kalaisí.

• ʻI heʻetau talanoa fekauʻaki mo hono vahevahe ʻo e ongoongoleleí, naʻe pehē ʻe ʻEletā Tieta F. ʻUkitofa ʻoku ʻi ai hatau niʻihi “mahalo ʻoku ʻikai ke tau ongoʻi pauʻia he anga hono fai iá. Pe ʻoku tau manavasiʻi ke fai ha meʻa he ʻikai ke tau ongoʻi fiemālie ai” (“Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 16). Kapau ʻoku ongoʻi peheni e kau mēmipa ʻo e kōlomú pe kalasí, ʻe lava ke tokoni kiate kinautolu e ngaahi fokotuʻu faingofua ʻe nima ʻi he pōpoaki ʻa ʻEletā ʻUkitofá. Te ke lava ʻo fakaafeʻi e mēmipa takitaha ʻo e kalasí ke laukonga fekauʻaki mo ha taha ʻo ʻene ngaahi fokotuʻú pea vahevahe e meʻa naʻa nau akó.

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• 1 Tīmote 4:12 (Hoko ko ha faʻifaʻitakiʻanga ʻo e kakai tuí)

• ʻAlamā 17:2–4 (Naʻe teuteuʻi ʻe he ngaahi foha ʻo Mōsaiá kinautolu ke vahevahe ʻa e ongoongoleleí)

• Tokāteline mo e Ngaahi Fuakava 42:6–7 (Malangaʻi e ongoongoleleí ʻaki e mālohi ʻo e Laumālié)

• Russell M. Nelson mo Wendy Nelson, “ ʻAmanakiʻanga ʻo ʻIsilelí” (fakataha lotu fakamāmanilahi ʻa e toʻu tupú, 3 Sune, 2018), fakalahi ki he New Era mo e Ensign, HopeofIsrael.ChurchofJesusChrist.org

• “Ko hono Fakaafeʻi ʻo e Tokotaha Kotoa ke Haʻu kia Kalaisí: Vahevahe ʻo e Ongoongoleleí,” “Fakaafeʻi e Niʻihi Kehé ke ‘Haʻu ʻo Mamata,’” “Fakaafeʻi e Niʻihi Kehé ke ‘Haʻu ʻo Tokoní,’” “Fakaafeʻi e Niʻihi Kehé ke ‘Haʻu ʻo Mamata’” (ngaahi vitiō) ChurchofJesusChrist.org

Ko e Faiako ‘i he Founga ‘a e Fakamoʻuí

Naʻe fakaafeʻi ʻe he Fakamoʻuí e niʻihi kehé ke nau fakamoʻoniʻi e ngaahi moʻoní koeʻuhí ke ueʻi ʻe he Laumālié honau lotó. “Ka ʻoku pehē ‘e kimoutolu ko hai au?” Ko ʻEne fehuʻí ange ia. Naʻe tali ange ‘e Pita, ʻo fakamālohia ai ʻene fakamoʻoní: “Ko koe ko e Kalaisí, ko e ʻAlo ‘o e ‘Otua moʻuí” (Mātiu 16:15–16). ʻOku fakamālohia fēfē ʻe hono vahevahe ʻo e ongoongoleleí ʻa e ngaahi fakamoʻoni ʻa e kau mēmipa ʻo e kōlomú pe kalasí?